Şok: Amerikalılar bu ölkədə səhvən fabrikə hücum etdi
Dərc olunub:
29-05-2021, 02:00
Bolqarıstanda keçirilən NATO təlimi zamanı amerikalı hərbçilər səhvən günəbaxan yağı istehsal edən fabrikə basqın təşkil edib.
Axar.az xəbər verir ki, bu barədə yerli media məlumat yayıb.
Belə ki, Çeşniqirovo aviabazası yaxınlığında baş tutan "Swift Response" təlimləri zamanı 7 amerikalı əsgər fabrikə soxulub və işçilərə silah tuşlayıblar.
Hərbçilər işçilərə yerə uzanaraq hərəkətsiz vəziyyətdə qalmağı əmr ediblər.
Sonradan məsələ ilə bağlı açıqlama verən fabrik sahibi Marin Dimitrov Müdafiə Nazirliyinə şikayət ünvanladığını və sözügedən olayla bağlı hələ ki, rəsmi açıqlama almadığını söyləyib:
“Təhqir edildik. Ölümlə təhdid etdilər. Bizə cinayətkar və terrorçu münasibəti göstərdilər. Hüquqi yolla haqlarımızı sona qədər tələb edəcəyəm”.