“Yurd”  Xaçmazda Vətən müharibəsinə həsr olunmuş bilik yarışı keçiribXaçmaz şəhər 7 nömrəli tam orta məktəbinin akt zalında “Qəhrəmanlar can verər yurdu yaşatmaq üçün” adlı layihə çərçivəsində yeniyetmə və gənclərin iştirakı ilə Vətən müharibəsinə həsr olunmuş Nə? Harada? Nə zaman? intellektual oyunu üzrə turnir keçirilib.

Tədbirin rəsmi açılış mərasimində çıxış edən “Yurd” Gənclərin İntellektual İnkişafına Dəstək İctimai Birliyinin sədri Ramin Mahmudov bildirib ki, layihənin həyata keçirilməsində əsas məqsəd zəfərimizlə başa çatan Vətən müharibəsinin gənc nəsil arasında təbliğ edilməsinə dəstək verməkdir.

Tədbirdə qonaq qismində iştirak edən Xaçmaz Rayon İcra Hakimiyyətinin baş məsləhətçisi, Vətən müharibəsi iştirakçısı, “Cəsur döyüşçü”, Füzulinin, Cəbrayılın və Xocavəndin azad olunmasına görə medalları ilə təltif olunmuş Tariyel Didarov, Xaçmaz Rayon Gənclər və İdman İdarəsinin rəisi Elman Məmmədov, Quba-Xaçmaz Regional Təhsil İdarəsinin Xaçmaz rayonu üzrə təhsil sektorunun əməkdaşı Mövlan Əkbərov, Vətən müharibəsi iştirakçıları- Xocavəndin, Füzulinin, Cəbrayılın, Zəngilanın azad olunmasına görə medalları ilə təltif olunmuş baş gizir Nəriman Qurbanov, Şuşanın, Füzulinin azad olunmasına görə, “Döyüşdə fərqlənməyə görə” medalları ilə təltif olunmuş Zeynal Məmmədov, Suqovuşanın azad olunmasına görə medalı ilə təltif olunmuş Həzrətəli Əliyev öz çıxışlarında bu kimi tədbirlərin gənclərdə vətənpərvərlik hisslərinin artırılmasında müsbət əhəmiyyətə malik olduğunu qeyd etmiş və layihənin həyata keçirilməsində Xaçmaz rayonunu da seçdiklərinə görə təşkilatçılara təşəkkürlərini bildirmişlər.

Xaçmaz rayonunun müxtəlif kənd və qəsəblərində yaşayan və təhsil alan 30 nəfər yeniyetmə və gəncdən ibarət komandaların bilik mübarizəsində “Turan” komandası qalib adını qazanıb. “Odlar yurdu” və “İstiqlal-1” komandaları müvafiq olaraq ikinci və üçüncü yerləri bölüşdürüblər.

Yekunda qalib və mükafatçılara təşkilatçılar tərəfindən kubok, medal və diplomlar, bütün iştirakçılara isə layihə çərçivəsində hazırlanmış Xızı, Siyəzən, Şabran, Xaçmaz, Qusar və Qubadan olan ümumilikdə 186 nəfər Vətən müharibəsi şəhidi haqqında məlumatların yer aldığı “Zəfərin şəhid qəhrəmanları” adlı kitablar təqdim edilmişdir.

Qeyd edək ki, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Yurd” Gənclərin İntellektual İnkişafına Dəstək İctimai Birliyi tərəfindən icra olunur.
Bildirk ki, layihə çərçivəsində bu günədək Xızı, Siyəzən və Şabran rayonlarında keçirilən tədbirlərdə 100 nəfərə yaxın yeniyetmə və gənc iştirak etmişdir. Növbəti tədbirlərin Quba və Qusar rayonlarında da keçirilməsi planlaşdırılmışdır.
Bina hazır deyil, İran tələsik konsulluq açdı - Hraparakİranın Zəngəzurdakı konsulluğunun binasında aparılan təmir işləri hələ də yekunlaşmayıb. Açılış mərasimi hələ bir neçə aydan sonra baş tutmalı idi. Amma açılış bu gün və böyük ehtimal İran tərəfinin təşəbbüsü ilə baş tutub.

Axar.az xəbər verir ki, bu barədə Ermənistanın "Hraparak" qəzeti yazıb.

“Zəngəzurdakı mənbələrimizin bildirdiyinə görə, bu gün gözlənilən hadisədən vilayət rəhbərliyinin xəbəri belə olmayıb. Əslində bu, kortəbii şəkildə baş verib. Xatırladaq ki, İran hakimiyyəti hələ ötən ilin dekabrında Zəngəzurda baş konsulluq açmaq qərarına gəlib, Abidin Varamin İran İslam Respublikasının baş konsulu təyin edilib”, – məlumatda qeyd olunub.

Qeyd edək ki, bu gün baş tutan açılış mərasimində Ermənistanda səfərdə olan İran XİN başçısı Hüseyn Əmir Abdullahian da iştirak edib.
DİN AXCP-yə "YOX" dediBakı Şəhər İcra Hakimiyyəti Azərbaycan Xalq Cəbhəsi Partiyasının (AXCP) icra hakimiyyətinin önündə piket keçirilməsini məqsədəuyğun hesab etməyib. Buna baxmayaraq, həmin partiyanın bir qrup üzvü piketin keçiriləcəyi haqda sosial şəbəkələrdə məlumatlar paylaşırlar.

Daxili İşlər Nazirliyinin (DİN) Mətbuat Xidmətinin bölmə rəisi Zeyni Hüseynov  bildirilib ki, piket üçün nəzərdə tutulan yer təhsil müəssisələrinin yerləşdiyi, nəqliyyatın intensiv hərəkət etdiyi və insan sıxlığının yüksək olduğu ərazi olduğundan orada aksiya keçirilə bilməz.

"Ona görə də 2019-cu ildə qeydə alınmış analoji neqativ halın təkrarlanmasına imkan verilməyəcək, cəhd ediləcəyi təqdirdə isə qarşısı alınacaq", - DİN rəsmisi bildirib.

 Xatırladırıq ki, qanunvericiliklə icazə verilməyən yerlərdə kütləvi tədbirlərin keçirilməsinə görə təşkilatçılar məsuliyyət daşıyırlar.
Başı kəsilən 16 yaşlı qız məktəbdən çıxarılıbmışDünən Abşeron rayonu Hökməli qəsəbəsində nişanlısı tərəfindən boğazı kəsilərək qətlə yetirilən 16 yaşlı H.Rəcəbovanın orta təhsili yarımçıq qalıbmış.

Hökməli qəsəbə tam orta məktəbindən Qafqazinfo-ya bildirilib ki, H.Rəcəbova 2021-ci ildə 8-ci sinifdə oxuyarkən ailəsinin tələbi ilə təhsilini yarımçıq qoyub.

“Onun atası bir müddət əvvəl vəfat edib, qapalı ailə olduqları üçün anasını çölə buraxmırlar. Nənəsi orta məktəbə gəlib təkidlə nəvəsinin məktəbdən çıxarılmasını tələb etdi. O, nəvəsinin nişanlandığını və 8-ci sinifdən sonra təhsilə davam etməyəcəyini bildirdi. Bundan sonra H.Rəcəbovanın məktəbdən çıxarılmasını aktlaşdırdıq və məktəbi tərk etdi”.

Qeyd edək ki, ailənin H.Rəcəbovadan başqa bir oğlu var.

Xatırladaq ki, oktyabrın 20-si Abşeron rayonu ərazisində 2006-cı il təvəllüdlü A.N. (ad şərtidir) öldürülüb. Aparılmış araşdırmalarla zərərçəkmişin nişanlısı, 1996-cı il təvəllüdlü Murad Həsənovun şəxsi münasibətlər zəminində aralarında yaranmış münaqişə zamanı bıçaqla xəsarət yetirərək A.N. qəsdən öldürməsinə əsaslı şübhələr müəyyən edilib.

Faktla bağlı Abşeron rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.

Murad Həsənov şübhəli şəxs qismində tutularaq istintaqa cəlb edilib.
Mətbuat Şurasından sosial şəbəkə istifadəçilərinə MÜRACİƏTAzərbaycan Mətbuat Şurası sosial şəbəkə istifadəçilərinə və vətəndaş mediası fəallarına müraciət ünvanlayıb.

Müraciətdə deyilir:

"Əziz dostlar! İnternet və multimedia şəbəkəsinin əhatə dairəsinin böyük sürətlə genişlənməsi, müasir texnologiyaların yaratdığı sonsuz imkanlar dünyanın hər yerində olduğu kimi, Azərbaycanda da yeni informasiya mühiti formalaşdırıb. Çağdaş dövrün əsas platformaları olan sosial şəbəkələr və vətəndaş mediası bu gün cəmiyyətin məlumatlandırılmasında əhəmiyyətli rol oynayır. Bu platformalardakı ayrı-ayrı səhifələr, populyar şəxslər, blogerlər və ən fərqli düşüncəyə sahib sosial şəbəkə istifadəçiləri hər gün əhali qruplarında maraq doğuran məlumatlar yaymaqla, müxtəlif mövzuları gündəmə gətirməklə azad informasiya və diskussiya şəraitini genişləndirir, cəmiyyət həyatının fəal iştirakçılarına çevrilirlər.

Təcrübə göstərir ki, sosial şəbəkələr və vətəndaş mediası dərk olunmuş məsuliyyətə əsaslandıqda söz və ifadə azadlığına önəmli töhfələr verir, ictimai düşüncə palitrasını zənginləşdirir. Deyilənlərlə yanaşı, təəssüf ki, bu platformalarda bəzi şəxslər azad mühitin imkanlarından sui-istifadə edərək etik qaydaları pozur, aşırı aqressiya və qərəz sərgiləyir, böhtan və təhqirə, vulqar ifadələrin işlədilməsi hallarına yol verir, kin və nifrət təbliğatçılarına çevirilirlər. Belə davranış tərzi verilən məlumatların ictimai çəkisini heçə endirməklə bərabər, ölkəmizin informasiya məkanına neqativ ab-hava gətirir, hətta bəzi hallarda hüquqi məsuliyyət yaradır.

Özünütənzimləmə qurumu olaraq Azərbaycan Mətbuat Şurası üçün informasiya müstəvisində cəza mexanizmlərinin dövriyyəyə girməsi birmənalı qaydada arzuedilməzdir. Deyilənləri nəzərə alaraq, biz bütün sosial media mənsublarını, bu platformanın fəallarını insanların şərəf və ləyaqətini qorumağa, şəxsi həyatın toxunulmazlığı prinsipinə hörmətlə yanaşmağa, cinayət, zorakılıq, qəddarlıq və intihar hallarının təşviqinə yol verməməyə, söyüş və vulqar ifadələrin işlədilməsindən çəkinməyə, uşaqların şəxsi həyatı barədə məlumatları yaymamağa, onları zədələyən, mənəvi-psixoloji durumuna mənfi təsir göstərə biləcək zərərli bilgiləri paylaşmamağa, terror, xurafat və cəhalət təbliğatçılarına qarşı barışmaz olmağa, bir sözlə, ölkə jurnalistlərinin VIII qurultayının qərarı ilə təkmilləşdirilmiş “Azərbaycan Jurnalistlərinin Etik Davranış Qaydaları”ndakı müddəalara riayət etməyə çağırırıq.

Mətbuat Şurası etik dəyərlərə əməl olunmasına dair çağırışına səmimi yanaşılacağına, qurumun ictimai missiyasına həssas münasibət göstəriləcəyinə inanır, informasiya cəmiyyətinin bütün iştirakçılarına fəaliyyətlərində uğurlar arzulayır".
Abdullahian Ermənistanda İranın iç üzünü açdıTürkiyə lideri Rəcəb Tayyib Ərdoğanın Zəngilan Beynəlxalq Hava Limanının açılışına gəldiyi və burda həm də Zəngəzur dəhlizi mesajını verdiyi gündə İran XİN başçısı Hüseyn Əmir Abdullahianın tələsik Ermənistana getməsi və ordan bəyanat səsləndirməsi təsadüfi deyildi.

Ərdoğan “Naxçıvanı Azərbaycanın qərb rayonları ilə birləşdirəcək Zəngəzur dəhlizi ilə bağlı bəzi dairələrdəki qorxu və narahatlıq reallıqdan uzaqdır. Qarabağda atılan bütün bu addımlardan sonra belə bir qorxuya ehtiyac yoxdur” deyərkən, məhz İranı qəsd edirdi. Hüseyn Əmir isə erməni həmkarı Ararat Mirzoyanla ötən gün keçirdiyi mətbuat konfransında İrəvana səfərinin əsas məqsədinin məhz “Fars körfəzi-Qara dəniz dəhlizi” olduğunu rəsmən elan etdi.

İranın Şərq-Qərb Orta Dəhlizinə alternativ “yeni dəhliz” ortaya atması və guya Zəngəzur dəhlizinə qarşı çıxmasının “səbəblərini” görüntüləməyə çalışması ciddi siyasi ziddiyyətlərlə müşayiət olunur:

1. İran sərhədlərin dəyişməsinin “qırmızı xətti” olduğunu dəfələrlə elan etməklə, Araz kənarına ordu yığmasının da məhz bununla bağlı olduğuna açıq şəkildə deməkdən çəkinmir.

Əgər dəhliz doğrudan da ərazi dəyişməsi və ərazi bütövlüyünə qarşıdırsa, İran niyə məhz Ermənistan ərazisindən “fars körfəzi-Qara dəniz dəhlizi” çəkməyə çalışır? Üstəlik, Azərbaycanın Ermənistan ərazisindən istədiyi və Ermənistanın 10 noyabr bəyanatı ilə üzərinə öhdəlik olaraq götürdüyü yolun uzunluğu cəmi 42 km da etmir, İran isə Ermənistanın tam bu başından o başına qədər, uzununa uzanan bir dəhlizdən bəhs edir. Əgər Zəngəzur dəhlizi Ermənistanın ərazi bütövlüyünə təhdiddirsə, “Fars körfəzi-Qara dəniz dəhlizi” Ermənistanı dövlət kimi yox etməlidir!

Maraqlı da budur ki, Fars körfəzindən Qara dənizə çıxış imkanı yaratmaq istəyən İran bu yola “dəhliz” məntiqi ilə yanaşır. Niyə “yol” yox, “dəhliz”? Bu dəhlizdən Ermənistan hansı iqtisadi fayda götürəcək? Neftini bu dəhlizlə daşıyacaq, yoxsa qazını?

Ermənistan bu yoldan ancaq ərik daşıya bilər ki, hazırda da bunu edir – heç bir yol infrastrukturuna da gərək yoxdur.

2. “Fars körfəzi-Qara dəniz dəhlizi” sözün hər mənasında xülyadır və İran düz 30 ildir ki, bu layihəni gerçəkləşdirə bilmir. Səbəb isə Ermənstanın Gürcüstanla sərhəd ərazilərinin dağlıq olması və nəqliyyatın hərəkəti üçün namünasibliyidir. Bu dağların altından tunel atmaq onmilyardlara başa gələn təhlükəli layihədir. Yalnız Yuxarı Lars yolunu “genişləndirməklə” bu yolun yükgötürmə qabiliyyətini artırmaq olar.

Yuxarı Lars yolu isə çətin dağlıq ərazidən keçir və qış fəslində tam, yaz və payız fəslində isə vaxtaşırı bağlanması ilə gündəmə gəlir. Bu yol o qədər məhdud imkanlıdır ki, hazırda bu yoldan istifadə edən yük maşınlarının özünü “ötürmək” imkanında deyil – vaxtaşırı olaraq Yuxarı Lars keçid məntəqəsində minlərlə maşın tıxacda ilişib qalır.

Bu yol nə qədər genişləndirilə və inkişaf edə bilər ki, rentabelli olsun?

3. İran regiondan kənar ölkələrin bölgəyə hər hansı formada gətirilməsinin əleyhinə olduğunu dəfələrlə bəyan edib və bu sözləri ötən gün Abdullahian İrəvandakı mətbuat konfransında da dedi. Erməni ekspertlər də bunun AB missiyası və ATƏT müşahidəçiləri adı ilə bölgəyə “üçüncü güclərin” gətirilməsinə etiraz olduğunu etiraf etdilər.

Buna baxmayaraq, Abdullahian İrəvanda “Hindistan-İran-Ermənistan” platforması qurmağı təklif etdi və bunu da məhz Fars körfəzi-Qara dəniz “dəhlizi” ilə əlaqələndirməyə çalışdı.

Qəribədir, Ermənistanın Qara dənizə çıxışı yoxdur; Qara dənizə çıxışı olan Gürcüstandır. Ermənistandan sonra Gürcüstan öz ərazisindən “dəhlizə” razılıq verməlidir ki, Qara dənizə gedib çıxa biləsən.

Belədə, sual olunur: sənin yeni “platforman” əgər doğrudan da “dəhliz” məntiqinə söykənirsə, Gürcüstan niyə bura daxil edilmir?

Son proseslər fonunda bu “üçlü platforma” arzusunun heç də iqtisadi olmadığı şübhəsi yaranır: Ermənistana hazırda silah satan yeganə ölkə Hindistandır; İrəvan-Dehli hərbi əlaqələri qurulur, əməkdaşlıqlar imzalanır – elə “dünən” müdafiə naziri Suren Papikyan Hindistanda bir sıra görüşlər keçirib – diqqət edək, Hindistanla son illər təmasları Mirzoyan aparmır.

İranın da Ermənistana silah yardımı etməsi və yaxud edə biləcəyi haqda vaxtaşırı mediada məlumatlar səsləndirilir. Bir neçə gün öncə İran parlamentinin erməni kökənli deputatı da elan etdi ki, İranın Ermənistana silah satması və yaxud hərbi yardım etməsinə heç kəs mane ola bilməz.

Beləliklə, Abdullahianın təklif etdiyi “Hindistan-İran-Ermənistan” platforması ən azı siyasi-hərbidir və bunun artıq dediyimiz səbəblərdən “iqtisadi platforma” olmaq ehtimalı sıfra bərabərdir.

Tehranın təklifi Pakistan-Azərbaycan-Türkiyə xəttinə alternativdir: Özünü Türkiyəyə, Hindistanı Pakistana, Ermənistanı isə Azərbaycana qarşı qoymaqla.

İran bütün vasitələrlə TDT və Orta Doğu siyasi-iqtisadi xəttinin baş tutmaması üçün özünü hər yola qoyur, hətta gedib Hindistanı “müttəfiq” tutur.

Maraqlıdır, bölgəyə aid olmayan güclərin regiona müdaxiləsinə qarşı çıxan İran niyə 3+3 platformasını dəstəkləmək əvəzinə yeni platforma təklif edir və Hindistanı regiona daxil etməyə çalışır?

Hindistanın bu məsələdə nə qədər həvəsli olduğu haqda məlumat yoxdur: buna çalışan İrandır.

4. İran Zəngəzur dəhlizinə mane olmaq üçün Zəngilan aeroportunun açıldığı günün sabahı – yəni bu gün Zəngəzurda İran Baş Konsulluğunun açılış mərasimini keçirəcək.

O konsulluğun hansı zərurətdən yarandığı, hansı iş görəcəyi olduqca mübahisəlidir və ümumiyyətlə, Zəngəzurda nə qədər əhali, nə qədər iranlı, nə qədər iqtisadi potensial var ki, İran təcili şəkildə orda konsulluq açmaq qərarı verir?

Bu konsulluğun da əlbəttə ki, iqtisadi-ticari münasibətlərlə heç bir əlaqəsi yoxdur: orda İran casuslarının və agentlərinin olacağına, qismən də olsa, konsulluğun müfahizəsi adı ilə İran güclərinin orda yerləşdiriləcəyinə şübhə yoxdur.

İran faktiki olaraq Zəngəzur dəhlizinin açılmasına qarşı güc faktına keçir: sabah dəhlizin açılması zamanı “İran konsulluğunun mühafizəsi” adı ilə qüvvələrini də bölgəyə daşımaq “hüququnu” əldə etmək üçün.

5. Rusiyanın Kalininqrad vilayətinə yolu bir neçə ölkənin içindən keçir – dəhlizdir və heç bir maneə də yaradıla bilməz. Məgər bu dəhliz Litvanın ərazi bütövlüyünü təhlükəyə atır? Əgər belə bir hal olsa, hazırda Rusiyaya qarşı bütün sanksiyalara qoşulan Litva fürsətdən istifadə edib, dəhlizi bağlamazdımı?

Ümumiyyətlə, dəhliz nə vaxtdan ölkənin ərazi bütövlüyünü pozan, sərhəd dəyişikliyinə səbəb olan hal sayılır? İran hansı beynəlxalq əsasla Ermənistanın 10 noyabr bəyanatı ilə üzərinə götürdüyü öhdəlikləri icra etməməsi üçün güc nümayişinə keçir?

İran açıq savaşa gedir və heç bir arqumenti, iqtisadi-siyasi əsaslandırmaları məntiqli deyil – nə Fars körfəzi-Qara dəniz layihəsi realdır, nə yeni platforması yürütdüyü siyasətə uyğundur, nə də iddiaları beynəlxalq hüquqa münasibdir.

Məqsəd nə yolla olursa-olsun, Zəngəzur dəhlizinin açılmasına, Orta Dəhlizin ciddi şəkildə fəaliyyətə başlamasına mane olmaq, Azərbaycan və Türkiyə xətti ilə Orta Asiyanın birləşməsinin qarşısını almaqdır.

Ancaq İranın nəyəsə nail olacağı ciddi şübhə altındadır. Ermənistanın hər an İrana xəyanət edəcəyinə hər kəs əmindir və artıq bu barədə erməni ekspertlər özləri danışmağa başlayıblar. Ermənistan ilk xəyanətini də edib və bu, davam edəcək!

İran yalnız müəyyən keçid dövründə böyük layihələrin qarşısının alınması üçün istifadə oluna bilər, ancaq Tehran rejiminə heç bir ölkə geniş imkan tanımayacaq – “platformasına” daxil etməyə çalışdığı Hindistan belə ABŞ-la müttəfiqliyi İranın iqtisadi deyil, siyasi buqələmunluğuna qurban etməyəcək.
Bakıda 15 yaşlı qız itkin düşübBakıda 15 yaşlı qız itkin düşüb.

"Report"un əldə etdiyi məlumata görə, hadisə oktyabrın 18-də paytaxtın Suraxanı rayonu, Qaraçuxur qəsəbəsində qeydə alınıb.
Belə ki, 2007-ci il təvəllüdlü Əliyeva Xədicə Emin qızının saat 07 radələrində yaşadığı evdən çıxıb və bir daha geri qayıtmayıb.

Hazırda faktla bağlı Suraxanı Rayon Polis İdarəsinin 32-ci Polis Bölməsində araşdırma aparılır.
“İmam Mehdi gələndə gərək birinci İrandan başlasın” - Siyavuş Novruzov“30 il Azərbaycanın İslam dəyəri təhqir olunanda niyə İran hərəkətə gəlmirdi? Əgər imam Mehdinin adından istifadə edirlərsə, Mehdi gələndə ədaləti bərpa etmək üçün gərək birinci İrandan başlasın”.

Bu sözləri Milli Məclisin deputatı Siyavuş Novruzov parlamentin oktyabrın 21-də keçirilən plenar iclasında çıxışı zamanı deyib.

"İşğaldan azad olunan ərazilərdə hərbi bazaların deyil, hava limanlarının, yaşayış yerlərinin olması nümunəvi addımdır. İranın Arazın kənarında hərbi təlimlər keçirməsi nəyə lazımdır? Bu artistliyin heç bir yeri yoxdur", - o, əlavə edib.

Deputat qeyd edib ki, bu addımlarla İran heç kimə hədə-qorxu gələ bilməz:

“30 il Azərbaycanın İslam dəyəri təhqir olunanda niyə İran hərəkətə gəlmirdi? Əgər imam Mehdinin adından istifadə edirlərsə, Mehdi gələndə ədaləti bərpa etmək üçün gərək birinci İrandan başlasın. Ona görə də Türkiyə və Azərbaycan rəhbərliyinin Zəngilanda görüşməsi qardaşlığımızın, tək olmadığımızın növbəti sübutu oldu".
Azərbaycan ATƏT-in qərarını RƏDD EDİRATƏT-in Sədrliyi və Katibliyinin birbaşa aidiyyəti tərəflərin - Azərbaycan və Ermənistanın əvvəlcədən razılığı olmadan belə bir missiya göndərmək səlahiyyəti və mandatı yoxdur. Bu məsələ ilə bağlı qeyri-rəsmi məsləhətləşmələr açıq şəkildə göstərir ki, iki ölkə sərhədinə belə bir “ehtiyacların qiymətləndirilməsi qrupu”nun göndərilməsi ilə bağlı təşkilat daxilində konsensus yoxdur.

Bu barədə Azərbaycanın ATƏT-dəki Nümayəndəliyinin adından ATƏT Daimi Şurasında təşkilatın 2023-cü illə bağlı büdcə müzakirələri zamanı yayılmış bəyanatda deyilir.

“Katibliyin 19 oktyabr 2022-ci il tarixində guya ATƏT adından Ermənistana “ehtiyacların qiymətləndirilməsi qrupu”nun göndərilməsi ilə bağlı yaydığı bəyanat təşkilat daxilində şəffaflığın və hesabatlılığın təmin edilməsində Sədrlik və Katibliyin tamamilə uğursuz olduğunu nümayiş etdirir.

Xatırladaq ki, ATƏT-in alətlər qutusunda ATƏT-in hərtərəfli təhlükəsizlik konsepsiyası kontekstində işlənib hazırlanmış faktaraşdırıcı missiyalar da daxil olmaqla erkən xəbərdarlıq, münaqişələrin qarşısının alınması və böhranın idarə edilməsi üzrə bir sıra mexanizm və prosedurlar var. Ən əsası odur ki, onlar kooperativ xarakter daşıyır, bu isə o deməkdir ki, onların aktivləşdirilməsi üçün bütün dövlətlərin razılığı, xüsusilə də konkret vəziyyətdə birbaşa aidiyyəti olan tərəflərin əvvəlcədən razılığı və fəal dəstəyi vacibdir.

Bu, Azərbaycan hökumətinin tələbi ilə 2005-ci ildə Azərbaycanın işğal olunmuş ərazilərinə ATƏT-in faktaraşdırıcı missiyası və 2010-cu ildə Sahə Qiymətləndirmə Missiyasını göndərəndə belə olub. ATƏT bu missiyaları yalnız Azərbaycan və Ermənistan hər ikisi razılıq verdikdən sonra göndərməyə razılaşıb. 2020-ci ilin sentyabrında Ermənistanın Azərbaycana qarşı yenidən təcavüzündən əvvəl Azərbaycanın öz ərazilərinə göndərilməsini xahiş etdiyi Ehtiyacların Qiymətləndirilməsi Missiyası ATƏT tərəfindən heç vaxt Ermənistan tərəfindən razılaşmanın olmaması bəhanəsi ilə yerinə yetirilməyib.

ATƏT və onun icra strukturları və təsisatları Azərbaycanın əvvəllər işğal olunmuş əraziləri ilə bağlı ATƏT-in prinsip və öhdəliklərinin Ermənistan tərəfindən kobud şəkildə pozulması hallarını aradan qaldıra bilməyiblər. Ermənistanın müqavimətinə görə, ATƏT-in Katibliyi və təsisatları ölkəmizin təklif etdiyi sahələrdə Azərbaycanla əməkdaşlıq etməkdən çəkinirdilər.

ATƏT kontekstindən kənarda UNESCO-nun faktaraşdırıcı missiyasının Azərbaycan ərazilərinə səfərinin bu günə qədər baş tutmamasının yeganə səbəbi Ermənistanın etirazı və konsensus olmadığı halda UNESCO-nun missiya göndərməkdən imtina etməsidir.

Belə ki, ATƏT-in Sədrliyi və Katibliyinin birbaşa aidiyyəti olan tərəflərin - Azərbaycan və Ermənistanın əvvəlcədən razılığı olmadan belə bir missiya göndərmək səlahiyyəti və mandatı yoxdur. Bu məsələ ilə bağlı qeyri-rəsmi məsləhətləşmələr açıq şəkildə göstərir ki, iki ölkə sərhədinə belə bir “ehtiyacların qiymətləndirilməsi qrupu”nun göndərilməsi ilə bağlı təşkilat daxilində konsensus yoxdur. Görünən odur ki, Polşa sədrliyi iştirakçı dövlətlərin bütün rəylərinin nəzərə alınmasını təmin edə bilməyib. Müzakirələrin hələ də davam etdiyi bir vaxtda belə bir səfərin Azərbaycanla əvvəlcədən məsləhətləşmədən və xəbərdarlıq edilmədən elan edilməsi xüsusilə təəssüf doğurur”, - bəyanatda qeyd olunub.

Qeyd edilib ki, ATƏT-in Sədrliyi və Katibliyinin bu cür birtərəfli hərəkəti həm də məsuliyyətli və etibarlı vasitəçiliyə, eyni zamanda, etimadın yaradılması prinsipinə ziddir: “Bu təşəbbüs ATƏT-in mandatlı fəaliyyəti hesab edilə bilməz və olmayacaq. ATƏT-in heç bir vəsaiti və aktivi belə qeyri-konsensual fəaliyyət üçün istifadə olunmayacaq. Azərbaycan bu birtərəfli qərarı rədd edir və bir neçə iştirakçı dövlətdən olan bir qrup şəxslə əməkdaşlıq etməyəcək və bu şəxsi səfərin nəticələrini qəbul etməyəcək.

Azərbaycan Nümayəndəliyi xatırladıb ki, ATƏT-in Prosessual Qaydalarına uyğun olaraq yalnız ATƏT-in qərar qəbul edən orqanları tərəfindən təsdiqlənmiş qərarlar, bəyanatlar, bəyannamələr, hesabatlar, məktublar və ya digər sənədlər ATƏT-in qərarları və ya sənədləri adlandırıla bilər. Yalnız onlar bütün iştirakçı dövlətlərin razılaşdırılmış fikirlərini əks etdirir və bütün iştirakçı dövlətlər üçün siyasi məcburi xarakter daşıyır. ATƏT-in qərar qəbul edən orqanlarının sədrləri və ya ATƏT-in icra strukturları tərəfindən verilən sənədlər ATƏT sənədləri sayılmır.