Ukraynada jurnalist həlak olubKalininqradda fəaliyyət göstərən RuBaltic.ru saytının jurnalisti Aleksey İlyaşeviç Ukraynanın Avdeevka şəhəri yaxınlığındakı döyüşlərdə həlak olub.

Avrasiya.net xəbər verir ki, bu barədə baş redaktor Aleksandr Nosoviç məlumat yayıb.

"Mənim dostum, tələbəm və RuBaltic.ru-nun köşə yazarı Aleksey İlyaşeviç Avdeevka yaxınlığındakı döyüşlərdə həlak olub", - Nosoviç RuBaltic.ru saytında yazıb.

İlyaseviç? həmçinin “Sputnik Belarus” saytında ekspert kimi fəaliyyət göstərib.

İlyaseviç Donetskin Yenakiyevo qəsəbəsinin sakinidir. 2014-cü ildə orta məktəbi bitirib, bir il Xarkov Universitetində təhsil aldıqdan sonra təhsildən uzaqlaşıb.

“Jurnalist Ukraynada aparılan müharibədə Rusiyanın tərəfində olub. O, sonradan Donetsk Universitetinin jurnalistika fakültəsində təhsil almağa və bombalar altında işləməyə üstünlük verib" – baş redaktor deyib. Onun sözlərinə görə, İlyaşeviç könüllü olaraq cəbhə xəttinə gedib.
Qasım Süleymaninin Tehrandakı heykəli də yandırıldıTehran şəhər parkında İran İnqilab Keşikçiləri Korpusunun Qüds Qüvvələrinin keçmiş komandanı, general Qasım Süleymaninin heykəli yandırılıb.

Avrasiya.net xəbər verir ki, bu barədə "Azad İran" teleqram kanalı məlumat yayıb.

Bildirilir ki, iranlı müxalif jurnalist Məsih Əlinejad İnstaqram hesabında yazıb:

“İslam Respublikasının rəmzləri bir-bir odda yanır. Birincisi, Xamneyinin şəklinin yandırılması. Sonra baş örtüklərinin yandırılması. İndi də Qasim Süleymaninin heykəlinin yandırılması..".

Prezident Sofiyada mühüm tədbirdə - FotoOktyabrın 1-də Bolqarıstan Respublikasının paytaxtı Sofiya şəhərində Yunanıstan-Bolqarıstan Qaz İnterkonnektorunun (IGB) açılış mərasimi keçirilib.

Avrasiya.net xəbər verir ki, Azərbaycan Respublikasının Prezidenti İlham Əliyev mərasimdə iştirak edib.

Bolqarıstan Prezidenti Rumen Radev Azərbaycan Respublikasının Prezidenti İlham Əliyevi, digər ölkələrin dövlət və hökumət başçılarını qarşıladı.

Yunanıstan-Bolqarıstan Qaz İnterkonnektorunun texniki göstəriciləri, layihənin əhəmiyyəti barədə videoçarx nümayiş etdirildi.

Sonra çıxışlar oldu.

Dövlətimizin başçısı mərasimdə çıxış etdi.

Prezident İlham Əliyevin çıxışı

-Təqdimata görə çox sağ olun.

Hörmətli Bolqarıstan Prezidenti Radev.

Hörmətli Avropa Komissiyasının Prezidenti xanım Ursula Fon der Lyayen.

Hörmətli prezidentlər və Baş nazirlər.

Xanımlar və cənablar.

Əvvəlcə Bolqarıstan Prezidenti Radevə bu tarixi mərasimdə iştirak etmək üçün dəvətə görə təşəkkürümü bildirmək istəyirəm. Yunanıstan-Bolqarıstan Qaz İnterkonnektoru layihəsi Avropanın enerji təhlükəsizliyinin möhkəmləndirilməsində və qaz təchizatının şaxələndirilməsində mühüm rol oynayacaq. Enerji təhlükəsizliyi hər bir ölkənin milli təhlükəsizliyinin bir hissəsidir. Dünyada cari geosiyasi vəziyyət bunu bir daha sübuta yetirir. Təxminən iki ildir ki, Azərbaycan qazı Avropa bazarlarına çıxarılır və indi isə, o, Bolqarıstana daxil olur.

Avropanın enerji xəritəsini dəyişmiş Cənub Qaz Dəhlizi qitə üzrə ən böyük infrastruktur layihələrindən biridir. Azərbaycan Cənub Qaz Dəhlizini başlayan tərəf olmaqdan qürur hissi duyur. Cənub Qaz Dəhlizi qazı istehlakçılara yeni marşrutla, o cümlədən yeni mənbədən nəql edir. Bu vaxta qədər yeganə mənbə Xəzərin Azərbaycan sektorunda yerləşən “Şahdəniz” qaz yatağı olmuşdur. Lakin Azərbaycanın bir neçə digər qaz yatağında hasilat bu yaxınlarda başlayacaq və təchizat həcmlərinin artırılmasına töhfə verəcəkdir.

Uzun illər Azərbaycan beynəlxalq bazarda və ilk növbədə, Avropa bazarında etibarlı neft təchizatçısı olub. İndi isə etibarlı qaz təchizatçısına çevrilir. Xanım Prezidentin bərpaolunan enerji barədə dedikləri ilə bağlı bildirmək istərdim ki, bu, həmçinin bizim iyul ayında Avropa Komissiyası ilə Azərbaycan arasında imzaladığımız Enerji sahəsində strateji tərəfdaşlığa dair Anlaşma Memorandumunun bir hissəsidir. Beləliklə, əminəm ki, bu yaxınlarda Azərbaycan Avropa üçün etibarlı elektrik enerjisi təchizatçısına çevriləcəkdir. Külək enerjisi sahəsində təkcə Xəzər dənizində təsdiq edilmiş potensialımızın həcmi 157 qeqavatdır. Hazırda biz avropalı tərəfdaşlarımızla bu enerjinin Avropa qitəsinə çatdırılması barədə müzakirələr aparırıq.

Ötən il qaz ixracımız təxminən 19 milyard kubmetr təşkil etmişdir. Onun 8,2 milyard kubmetri Avropaya nəql olunmuşdur. Bu isə əvvəlki illə müqayisədə 40 faiz artım deməkdir. Bu il biz ixracımızı 22 milyard kubmetrə qədər artıracağıq və onun 11,5 milyard kubmetri Avropa istehlakçılarına çatdırılacaqdır. Artıq söylədiyim kimi, bu ilin iyul ayında biz xanım Prezident Ursula Fon der Lyayenin Azərbaycana səfəri zamanı Avropa Komissiyası ilə Anlaşma Memorandumu imzaladıq. Bu, çox əhatəli sənəddir, ona əsasən, 2027-ci ilə qədər biz təbii qazın təchizat həcmini ən azı iki dəfə artırmağı planlaşdırırıq və bunu etməyə tam potensialımız var.

Biz TANAP-ın 16 milyard kubmetrdən 32 milyard kubmetrə, TAP-ın isə 10 milyard kubmetrdən 20 milyard kubmetrə qədər genişləndirilməsi ilə bağlı tərəfdaşlarımızla artıq məsləhətləşmələrə başlamışıq. Çünki bu, olmadan əlavə təchizatı təmin etmək çətin olacaq.

Sonda mən Bolqarıstan, Yunanıstan xalqlarını və hamımızı bu tarixi mərasim, belə bir mühüm layihənin tamamlanması münasibətilə təbrik etmək istərdim və Yunanıstan-Bolqarıstan Qaz İnterkonnektoruna uzun və uğurlu fəaliyyət arzu edirəm.

Sağ olun.

Çıxışlardan sonra xatirə şəkli çəkdirildi.

Qeyd edək ki, Yunanıstan-Bolqarıstan Qaz İnterkonnektorunun (IGB) ümumi uzunluğu 182 kilometrdir, Bolqarıstanın və Yunanıstanın qaz nəqli şəbəkələrini birləşdirir.

Layihə 2011-ci ildə Bolqarıstanda qeydiyyatdan keçmiş Bolqarıstan-Yunanıstan “ICGB AD” investisiya şirkəti tərəfindən Bolqarıstanın Enerji Holdinqi və Yunanıstanın “IGI Poseidon” şirkətinin səhmdarları ilə birlikdə reallaşdırılır və hər biri 50 faiz paya malikdir.

İnterkonnektorun ümumi dəyəri 240 milyon avrodan çoxdur. Avropa Komissiyası 2010-cu ildə texniki-iqtisadi əsaslandırmalar üçün 45 milyon avro qrant yardımı və Bolqarıstanın həyata keçirdiyi proqram çərçivəsində 35 milyon avro məbləğində daha bir ödəniş ayırıb. Avropa İnvestisiya Bankı isə 110 milyon avro kredit verib.

Xatırladaq ki, IGB Azərbaycanın “Şahdəniz-2” yatağından hasil edilən təbii qazı Bolqarıstana çatdıracaq. Bu məqsədlə Bolqarıstanın “Bulgargaz EAD” dövlət şirkəti “Şahdəniz” konsorsiumu ilə müqavilə imzalayıb. Boru xəttinin illik ötürmə gücü 3 milyard kubmetr təşkil edəcək. Perspektivdə bu göstərici ildə 5 milyard kubmetrədək artırıla bilər. Beləliklə, Azərbaycan təbii qazı Bolqarıstanın tələbatının 25-30 faizini ödəyəcək.

Onu da qeyd edək ki, Azərbaycan qazının Avropaya nəqli 2020-ci ilin axırında Cənub Qaz Dəhlizinin sonuncu seqmentinin - TAP-ın işə düşməsi ilə başlayıb. Hazırda Türkiyə, Gürcüstan, Yunanıstan, Bolqarıstan, Albaniya və İtaliya Azərbaycan qazının alıcılarıdır. Göründüyü kimi, yeni çağırışlar qarşısında Azərbaycan qazına tələbat artır.
"Ulu Öndər mühüm demokratik məzmunlu dəyişikliklərin təşəbbüskarı idi"Məlumdur ki, bəşəriyyətə malik olan ən böyük nemətlər sırasında tarixi şəxsiyyətlər həlledici yer tutur. Tarixi şəxsiyyətlər xalqların talelərinə mühüm təsir göstərmək qüdrətinə malik olduğundan, onların ideyaları, enerjiləri, fəaliyyətləri ayrı-ayrı dövrlərin inkişaf meyllərini müəyyən edir. Azərbaycan xalqının taleyinə müxtəlif dövrlərdə müstəsna təsir göstərmiş dahi şəxsiyyətlər sırasında Heydər Əliyevin misilsiz yeri olduğu danılmaz həqiqətdir. Azərbaycan xalqının Ümummilli Lideri müasir tariximizə dahi xilaskar, böyük qurucu kimi daxil olub.

Azərbaycan və Azərbaycan xalqının taleyində Heydər Əliyevin Azərbaycana uzun müddət rəhbərlik etməsi və bu rəhbərliyin zəngin məzmuna malik olması xüsusi əhəmiyyət kəsb edir. Tam qətiyyətlə və cəsarətlə demək olar ki, Heydər Əliyevin Azərbaycana rəhbərlik etdiyi dövr onun tarixinin xüsusi, ən intensiv inkişaf mərhələsini təşkil edir. Heydər Əliyevin fenomeninə xüsusilə də onun xilaskarlıq missiyasına tələbat Azərbaycanın müstəqilliyini bərpa etdikdən sonra ilk günlərdən etibarən hiss edilməyə başlandı. Yenicə müstəqillik əldə etmiş Azərbaycanda yaşanan siyasi böhran, xaos və anarxiya və bundan istifadə edən erməni təcavüzkarlarının torpaqlarımızı işğalı Heydər Əliyev fenomeninə qayıdışı qaçılmaz edirdi. Xalq anlayırdı ki, Heydər Əliyev qazanılmış müstəqilliyin qorunub saxlanılmasının yeganə təminatıdır. Azərbaycan xalqı Heydər Əliyevin ətrafında sıx birləşməklə öz gələcək taleyini özü həll etmək niyyətində idi. Beləliklə, 1993-cü il iyununda Ulu Öndər Heydər Əliyev xalqın çağırışına səs verərək Bakıya qayıtdı və ölkəmizi bəlalardan, müsibətlərdən xilas etmək istiqamətində mühüm vəzifələrin icrasına başladı.

Qeyd etməyə dəyər ki, Heydər Əliyev Azərbaycan xalqının ən təhlükəli anlarında öz taleyini ona etibar etməkdə yanılmadığını möhtəşəm qayıdışın elə ilk aylarında sübuta yetirə bildi. Qısa bir zaman kəsiyində ölkəni taqətdən salan hərc-mərcliyə qətiyyətlə son qoyuldu, sabitlik və əmin-amanlıq təmin edildi, hərtərəfli böhran cilovlandı və erməni təcavüzünün Azərbaycanın dərinliklərinə irəliləməsinin qarşısı alındı. Yaradılan dayanıqlı siyasi sabitliyin ardınca iqtisadiyyatda böhranın qarşısının alınması, maliyyə nizam-intizamının yaradılması, aqrar islahatların həyata keçirilməsi, yeni iqtisadi sistemə keçidi təmin edən cəsarətli addımların atılması həm də Azərbaycanın müstəqilliyini möhkəmləndirən əsasların yaradılması demək idi. Beləliklə, Heydər Əliyevin möhtəşəm qayıdışı və xilaskarlıq missiyası Azərbaycanın dövlət müstəqilliyinin dönməz, sarsılmaz və əbədi olması ilə nəticələndi.

Adı Azərbaycanın tarixinə dahi xilaskar və böyük qurucu kimi əbədi həkk olunan Heydər Əliyevin zəngin irsi, ideyaları və tövsiyyələri müasir cəmiyyətimizin inkişafının ideya mənbəyidir. Ümummilli Liderin təlatümlərdən çıxaraq qurub yaratdığı Azərbaycan hazırda cənab Prezident İlham Əliyevin rəhbərliyi altında bütün dünyaya möhtəşəm yüksəliş dinamikası nümayiş etdirir. Aparılmış müdrik siyasətin nəticəsində ölkəmiz bütün sahələrdə inkişaf yolu keçərək regionun ən qüdrətli dövlətinə çevrilmişdir. Xüsusilə ölkə başçısının fəaliyyətinin zirvəsində təbii ki, işğal altındakı torpaqlarımızın azad olunması, ərazi bütövlüyümüzün bərpası ilə nəticələnmiş Vətən müharibəsi dayanır. Prezident, Müzəffər Ali Baş Komandan İlham Əliyevin rəhbərliyi ilə qazanılmış Qarabağ Zəfəri xalqımızın qəhrəmanlıq tarixinə qızıl hərflərlə yazıldı. Azərbaycan qalib ölkəyə, xalqımız isə qalib xalqa çevrildi. Bu gün əminliklə demək olar ki, Azərbaycanın bütün sahələrdə əldə etdiyi bu misilsiz nailiyyətlər Ulu Öndər Heydər Əliyev siyasətinin təntənəsi və onun davamçısı Prezident İlham Əliyevin xalqına olan sonsuz sevgisinin təcəssümüdür.

Rəşad Rəhmanov
Siyəzən şəhər 2 saylı tam orta məktəbin direktoru
"Həssaslara Doğru” QHT Koalisiyası yaradılıbQeyri-hökümət təşkilatlarının bilik və bacarıqlarının, kadr və maddi resursların birləşdirilməsi, onlardan birgə istifadənin bu mübarizənin uğurluğunu təmin edən vasitələrdən biri kimi qəbul edərək “Yeni Həyat” Hümanitar və Sosial Dayaq İctimai Birliyi, “Əliliyi Olan Şəxslərin Sosial Müdafiəsinə və İnteqrasiyasına Dəstək” İctimai Birliyi və “Qadın Təşəbbüsü və Sosial Problemlərin Həllinə Yardım” İctimai Birliyi Regional Koalisiyanın yaradılması haqqında razılığa gəliblər.

Üç təşkilatın təsis etdiyi 30.09.2022-ci il tarixində Həssas sosial qruplara aid şəxslərin dayanaqlı inkişafına ictimai dəstəyin gücləndirilməsi məqsədilə Regional Koalisiyanın yaradılması haqqında anlaşma memorandumunun imzalanması mərasimi təşkil edildi.

Kaolisiyanın yaradılmasında məqsəd İnsan alveri, məişət zorakılığı, erkən nigah, cinsi ayrı-seçkiliyə qarşı ölkədə aparılan mübarizəyə öz töhvəsini verməkdir.
5 min rus əsgəri mühasirədə: Ukrayna müraciət etdiUkrayna ordusu Liman ətrafında mühasirəyə düşən 5 mindən çox rus əsgərə müraciət edib.

Avrasiya.net xəbər verir ki, bu barədə müraciətin videosunu “Azadlıq” radiosu yayıb.

Ukrayna ordusu rus əsgərlərə səsgücləndiricilərlə mühasirədə olduqlarını, müqavimət göstərməyin mənasızlığını elan edib və təslim olmağı təklif edib.

“Rusiya Silahlı Qüvvələrinin hərbçiləri, Ukrayna müdafiə qüvvələri Limanı ələ keçirdi, müqaviməti davam etdirməyin heç bir mənası yoxdur. Siz mühasirədəsiniz. Başa düşün, sizin hakimiyyətə siz lazım deyilsiniz, onlar üçün siz sadəcə yemsiniz, siz öz doğmalarınıza lazımsınız”, - davamlı səsləndirilən müraciətdə bildirilir.

Rusiya əsgərlərinə təklif edilib ki, yaxınlıqdakı yola çıxsınlar, silahları yerə qoysunlar və Ukrayna ordusunun əsgərlərini əllərini qaldıraraq gözləsinlər.
Sərhəddə daha bir erməni əsgər öldüÖtən gecə, saat 23:40 radələrində döyüş mövqeyində olan erməni əsgərin meyiti tapılıb.

Bu barədə Ermənistan MN məlumat yayıb.

19 yaşlı sıravi Qraçya Karamanyanın güllə yarasından öldüyü müəyyən edilsə də, təfərrüat bəlli deyil.

Hazırda hadisənin başvermə səbəbləri araşdırılır.

Qeyd edək ki, Ermənistan ordusunda nizam-intizam bərbad vəziyyətdədir və əsgərlərin bir-birini güllələməsi adi hala çevrilib.
Gənclər təşkliatı Masallı rayonunda tədbir keçirib“Sağlam Yaşa” Gənclərin Maarifləndirilməsi İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Autizm və Daun sindromlu uşaqlara icma əsaslı reabilitasiya (İƏR) xidmətinin göstərilməsi və valideynlərin maarifləndirilməsi” adlı layihənin icrasına başlayıb.

İlk tədbir 28 sentyabr 2022-ci il tarixində Masallı rayon Mərkəzi xəstəxanasında keçirilmişdir. Tədbirdə 50-yə dək sağlamlıq imkanları məhdud uşaq və onların valideynləri iştirak etmişdir. Tədbiri giriş sözü ilə təşkilatın icraçı direktoru Tələt Qəribov açaraq iştirakçıları salamladı və layihə haqqında məlumat verdi.
Ətraflı

Təlimçi Sadiq Həsənov layihənin məqsəd və vəzifələri haqqında geniş məlumat verdi. Sosial Xidmətlər Agentliyinin Lənkəran- Astara Regional filialının baş mütəxəsisi İntiqam Bağırov Dövlətimizin sağlamlıq imkanları məhdud uşaqlar üçün yaratdığı şəraitdən, onlardan neçə yararlanmaq barədə izahat verdi.

Yerli “Ümidim sənsən” İctimai Birliyinin sədri Fidan Abbasova bu sahədə valideynlərin daha çox maariflənməyə ehtiyacı olduğunu diqqətə çatdırdı. Valideyn İsa Təbrizli qeyd etdi ki, onun iki uşağı xəstədir və bu tədbirdə iştirak edirlər. Amma o bu gün tədbirdə bilib ki, bu kimi uşaqlar üçün reabilitasiya peşə məktəbi fəaliyyət göstərir və orda sağlamlıq imkanları məhdud uşaqlar üçün bir neçə ixtisas üzrə sənət öyrədirlər.

Müəllimə Əsədullayeva Rəbiyyə qeyd etdi ki, onun oğlu daun sindromu daşıyıcısıdır və yaxşı olar ki, bu kimi uşaqlar üçün rayonda ixtisaslaşmış məktəb fəaliyyət göstərsin. Sonda valideynlərin sualları cavablandırıldı və təklifləri dinlənildi.
Gənclər dini və etnik toqquşmaların Azərbaycana gətirilməsinə imkan verməməlidir"Müasir İnkişaf" İctimai Birliyi Azərbaycan Respublikasının QHT-lərə Dövlət Dəstəyi Agentliyinin maliyyə yardımı ilə icra etdiyi "Azərbaycanın multikulturalizm modelinin mənəvi-mədəni irsin qorunmasında rolu" adlı layihə çərçivəsində Bakı şəhərində ilk tədbirini keçirib.

Tədbirdə Müasir İnkişaf Birliyinin sədri, layihənin rəhbəri Mübariz Göyüşlü rəhbərlik etdiyi təşkilatın həyata keçirdiyi tədbirlərdən, Agentliyin dəstəyi ilə gerçəkləşdirilən layihələrdən danışıb. O, bu layihə çərçivəsində görüləcək işlər zamanı multikulturalizm, onun Azərbaycan modeli, ölkəmizdəki etnik-dini durum barədə maarifləndirici çalışmalar həyata keçiriləcəyini söyləyib. M.Göyüşlü Azərbaycanda multikulturalizm, tolerantlıq və dini dözümlülüyün dövlət siyasəti səviyyəsində inkişaf etdirilməsi haqqında fikirlərini bölüşüb. M.Göyüşlü Azərbaycanın multikultural dəyərlərinin ölkə daxilində və xaricində daha da geniş şəkildə təbliğ edilməsinin vacib olduğunu qeyd edib.

AMEA Fəlsəfə və Sosiologiya İnstitutunun şöbə müdiri, fəlsəfə doktoru Məhəmməd Cəbrayılov Azərbaycanın multikulturalizm modelinin mənəvi-mədəni irsin qorunmasındakı rolu haqqında ətraflı danışıb. O, bildirib ki, Azərbaycan müxtəlif sivilizasiyaların qovuşduğu məkan olaraq, əsrlər boyu milli-mədəni rəngarənglik mühitinin formalaşdığı, ayrı-ayrı millətlərin və konfessiyaların nümayəndələrinin sülh, əmin-amanlıq, qarşılıqlı anlaşma və dialoq şəraitində yaşadığı diyar kimi tanınır. M.Cəbrayılov multikulturalizmin artıq azərbaycanlıların həyat tərzi, gündəlik yaşam forması olduğunu qeyd edib. Alim öz çıxışında ölkəmizdəki dini, etnik harmoniyadan, fərqli dinə və etnik qrupa məxsus olan insanların bir-birinə hörmətlə yanaşmasından danışıb. O, bir sıra xarici ölkələrin dini və etnik məsələlərdə problemlər yaşadığını, toqquşmaların, iğtişaşların, vətəndaş qarşıdurmasının baş verdiyini söyləyib. M.Cəbrayılov gəncləri həmin acı praktikanın, gərgin məqamların Azərbaycana gətirilməsinə imkan verməməyə çağırıb.

Sonda Azərbaycan İlahiyyat İnstitutunun tələbəsi Qüdrət Cəfərov, Azərbaycan Turizm və Menecment Universitetinin tələbələri Aqşin Dərvişov, Cəlal Əliyev də fikirlərini bölüşüblər, suallar ünvanlayıblar. Tədbirdə səslənən önəmli təklif və tövsiyyələr qeyd edilib və aidiyyatı qurumlara çatdırılması qərarlaşdırılıb.

Qeyd edək ki, "Müasir İnkişaf" İctimai Birliyinin Azərbaycan Respublikasının QHT-lərə Dövlət Dəstəyi Agentliyinin maliyyə yardımı ilə icra etdiyi "Azərbaycanın multikulturalizm modelinin mənəvi-mədəni irsin qorunmasında rolu" adlı layihə iki aylıq müddəti əhatə edir.