Erməni keşiş Paşinyandan üz döndərdi

Erməni apostol kilsəsinin Şirak yeparxiyasının baş keşişi Mikael Ajapahyan ölkənin baş naziri Nikol Paşinyanın iştirak etdiyi dua mərasimində xidmətdən imtina edib.

Avrasiya.net xəbər verir ki, bu barədə “Sputnik Ermənistan” məlumat yayıb.

"Paşinyanın iştirakı mənim üçün arzuolunmazdır, xoşagəlməzdir, buna görə də onun iştirakı səbəbindən dua mərasiminə xidmət etmədim. Bu, hər ruhaninin hüququdur. Ruhanilərin nümayəndəsi hardasa arzu etmədiyi şəxsə görə xidmət etməyə məcbur deyil", - deyə baş keşiş bildirib.

Mikael Ajapahyan anım mərasiminin yenə də baş tutduğunu, mərasimdə "baş nazirin iştirakını bəyənməyən" bir keşiş tərəfindən xidmət edildiyini əlavə edib.

Qeyd edək ki, Nikol Paşinyan 1988-ci ilin 7 dekabrında baş vermiş Spitak zəlzələsinin 32-ci ildönümü ilə əlaqədar bu gün Ermənistanın təbii fəlakətdən zərər çəkmiş şəhərlərinə gedib.