İran BƏƏ gəmisini saxladı

İran Birləşmiş Ərəb Əmirliklərinə (BƏƏ) məxsus bir gəminin ələ keçirildiyini bəyan edib.

Virtualaz.org yerli KİV-ə istinadən bildirir ki, Tehran rəhbərliyi bunu BƏƏ-yə məxsus gəminin ərazi sularını pozması ilə əlaqələndirib: “Bu səbəbdən də gəmi və içərisindəki heyət tutuldu”.

Mütəxəssislərin fikrincə isə, BƏƏ-yə aid gəminin İranın su sərhədlərini pozması bəhanədir. Əsl səbəb avqustun 17-də BƏƏ tərəfinin İran balıqçılarını atəşə tutaraq öldürməsidir. Məhz bu hadisədən sonra iki tərəf arasında böhran yaranmışdı.

Hadisədən sonra BƏƏ-nin Tehrandakı səfiri iki dəfə nazirliyə çağırılmış, Əbu Dabi üzr istəmişdi.

BƏƏ hadisədən sonra İranın itkilərini kompensasiya edəcəyini də açıqlamışdı.