İranda təyyarənin vurulması işi üzrə həbslər başladı

İranda Ukrayna təyyarəsinin vurulması ilə əlaqədar bir neçə şəxs həbs edilib.

RİA Novosti xəbər verir ki, bu barədə ölkənin məhkəmə hakimiyyətinin rəsmi nümayəndəsi Qulamhüseyn Esmaili məlumat verib. Q.Esmaili həbslərlə bağlı əlavə məlumat verməyib.

Öz növbəsində İran Prezidenti Həsən Ruhani qəzanın səbəblərini və başvermə şəraitini araşdırmaq məqsədi ilə ölkə rəhbərliyinin məhkəmə sistemində xüsusi struktur yaradacağını söyləyib.

Virtualaz.org xatırladır ki, 8 yanvarda İranın Tehran vilayətinin Parand şəhəri yaxınlığında Ukraynaya məxsus təyyarə qəzaya uğrayıb. Qəza nəticəsində 176 nəfər həlak olub. İran Silahlı Qüvvələrinin Baş Qərargahı 11 yanvarda bəyanat verərək bu təyyarənin İranın Havadan Müdafiə Sistemi tərəfindən səhvən vurulduğunu bildirib.