ABŞ İran ətrafındakı bazalarda hərbi təyyarələrin sayını artırıb

ABŞ İordaniya və Səudiyyə Ərəbistanındakı bazalarda yerləşən hərbi təyyarələrin sayını əhəmiyyətli dərəcədə artırıb.

APA xəbər verir ki, bu barədə Britaniyanın “Financial Times” (FT) qəzeti mənbələrə istinadən məlumat yayıb.

Məlumata görə, Vaşinqton İrana qarşı bir neçə həftə davam edə biləcək mümkün hərbi əməliyyatlar üçün Yaxın Şərqdə böyük aviasiya gücü toplayır.

Peyk görüntülərinə və Təl-Əviv Universitetinin analizinə istinadən nəşr İordaniya bazasında ən azı 66 qırıcı təyyarənin yerləşdiyini bildirir. Bazalarda görünən təyyarələrdən on səkkizi F-35 qırıcılarıdır.

Məqalədə həmçinin bazada 17 F-15 çoxməqsədli qırıcı və səkkiz A-10 hücum təyyarəsinin yerləşdiyi bildirilir.

Qəzet həmçinin qeyd edir ki, bazada EA-18 elektron müharibə təyyarələri və nəqliyyat təyyarələri də müşahidə olunub.

Görüntüləri təhlil edən ekspertlər Səudiyyə Ərəbistanındakı bazada E-3 “AWACS” hava erkən xəbərdarlıq və idarəetmə təyyarələrinin və C-130, həmçinin C-5 nəqliyyat təyyarələrinin olduğunu da bildirib.