"Azərbaycanın istər güzəşt limiti, istərsə gözləmə limiti  artıq çoxdan tükənib"Ölkəmiz və bölgəmiz üçün önəmli hadisələrin baş verdiyi bir dönəmdən keçirik. Dünən (oktyabrın 5-də) Ağdamda işğaldan azad edilmiş şəhər və rayonlarımızın gələcək taleyində olduqca önəmli rol oynayacaq mühüm bir tədbir - BMT-nin Məskunlaşma Proqramı (UN-HABITAT) və Dövlət Şəhərsalma və Arxitektura Komitəsinin birgə əməkdaşlığı, ADA Universitetinin təşkilati dəstəyi ilə “Dayanıqlı İnkişaf Məqsədləri” və “Yeni Şəhər Gündəliyi” – postmünaqişə dövründə bərpa və yenidənqurmanın aparıcı qüvvəsi kimi” mövzusunda 1-ci Azərbaycan Milli Şəhərsalma Forumu keçirildi. Ölkə başçısı İlham Əliyevin forumdakı çıxışını yəqin ki, hamınız izləmisiniz. Bu gün (oktyabrın 6-da) isə Çex Respublikasının paytaxtı Praqada “Avropa siyasi birliyi” Zirvə Toplantısının açılış plenar iclası baş tutdu. Prezident İlham Əliyev bu toplantıya da qatıldı.

Dünənki və bu günkü toplantılar arasında ilk baxışdan heç bir əlaqə görünməsə də, ancaq Prezident İlham Əliyev Milli Şəhərsalma Forumunda çıxışı zamanı Ermənistana və onun havadarlarına ünvanladığı açıq və qətiyyətli ismarıclarıyla hər iki toplantı arasında sinxron bağlılıq qurdu. Bu ismarıclar həm də ona görə xüsusilə əhəmiyyətli idi ki, ertəsi gün (yəni bu gün) Praqada keçirilən Əliyev-Paşinyan-Makron və Şarl Mişel dördtərəfli görüşü ərəfəsində verildi. Həmin ismarıclar rəsmi Bakının Praqa görüşündə tutacağı mövqenin bəlirtisi, anonsu idi.

Belə ki, İlham Əliyev Milli Şəhərsalma Forumunda çıxışında birmənalı surətdə bəyan etdi ki, “Qarabağ regionunda yaşayan erməni əhalisi bizim vətəndaşlarımızdır və biz onların həyatını necə qaydaya salacağımızı heç bir beynəlxalq oyunçu ilə müzakirə etməyəcəyik”. Bu Azərbaycan tərəfinin ən önəmli mesajlarından biri idi və bu mesaj Makron-Paşinyan “tandem”inin Qarabağ ermənilərinin həm “status”u, həm də rəsmi Bakı ilə danışıqlarda tərəf kimi işirak etməsi məsələsini gündəmə gətirmək istəklərini bəri başdan alt-üst etdi. Yəni ki, bununla Paşinyana və onun havadarlarına tam aydın şəkildə bildirildi ki, bu cür təxribatçı təkliflər Bakı üçün qəbuledilməzdir və Ermənistan tərəfi bizim bu kimi məsələlərdə güzəştə gedəcəyimizə qətiyyən ümid bəsləməsin. Çünki Azərbaycanın istər güzəşt limiti, istərsə gözləmə limiti artıq çoxdan tükənib.

İlham Əliyev Praqaya nəyisə güzəştə getmək üçün yox, nəticə əldə etmək üçün gedib. Nəticələr də olacaq. Buna heç kimin şübhəsi olmasın. İstər Əliyev-Paşinyan-Makron-Şarl Mişel dördtərəfli görüşü, istər Ərdoğan-Paşinyan görüşü, istərsə də “Avropa siyasi birliyi” Zirvə Toplantısında yüksək səviyyədə təmsil olunmağımız Ermənistan-Azərbaycan münasibətlərinin normal məcraya düşməsi yönündə öz müsbət nəticələrini verəcək. “Avropa siyasi birliyi” platformasında təmsil olunmağımız hər şeydən öncə Azərbaycan həqiqətlərinin birbaşa Avropa liderlərinin diqqətinə çatdırılması baxımından bizim üçün yeni imkanlar açır. Zirvə toplantısının gedişində liderlərin fikir mübadiləsi apardığı sülh və təhlükəsizlik, iqtisadi vəziyyət, enerji və iqlim, miqrasiya və hərəkətlilik məsələlərinin hər biri Azərbaycan üçün də olduqca əhəmiyyətlidir.

Bir sözlə, Praqa görüşləri Azərbaycanın öz geosiyasi və geoiqtisadi maraqlarını təmin etmək baxımından kifayət qədər əlverişli və perspektivlidir. Bu görüşlər həm də Ermənistan liderini sülhə dair qətiyyətli mövqe tutmağa sövq etmək üçün faydalıdır. Paşinyan bu görüşlərin gedişində Azərbaycan və Türkiyə ilə münasibətlərin normallaşdırılmasının vacibliyini və qaçılmazlığını həm özü tam və qəti şəkildə dərk etmiş olacaq, həm də öz vətəndaşlarını sülhə hazırlamaq baxımından opponentlərinə qarşı debatlar üçün yeni əsaslandırmalar təqdim etmək imkanı qazanacaq. Ümumən, Praqa görüşləri sülhə sadiqliyin təsdiqi baxımından və sülhə yaxınlaşmaq üçün dönüş nöqtəsi ola bilər. İlham Əliyev Praqada Avropa İttifaqı Şurasının Prezidenti Şarl Mişellə görüşündə Azərbaycanın Brüssel formatını dəstəklədiyini dilə gətirməklə sülhə sadiqliyimizi bir daha nümayiş etdirdi. Bu baxımdan, Praqa görüşlərinə ilk növbədə Azərbaycan və Ermənistanı sülhə yaxınlaşdıran növbəti bir mərhələ kimi baxmaq lazımdır.

Əlisahib Hüseynov,
Milli Həmrəylik Partiyasının sədri
İH-də əməliyyat: baş memar və şöbə müdiri tutulduLənkəranın baş memarı və psixiatriya xəstəxanasının şöbə müdiri tutulub.

Bu barədə Avrasiya.net-ə Baş Prokurorluğun Mətbuat Xidmətindən məlumat verilib.

Bildirilib ki, Baş prokuror yanında Korrupsiyaya qarşı Mübarizə Baş İdarəsinə daxil olmuş vətəndaş müraciətləri əsasında həyata keçirilmiş təxirəsalınmaz əməliyyat-axtarış tədbirləri nəticəsində Lənkəran Rayon İcra Hakimiyyəti başçısı Aparatının Memarlıq və Tikinti şöbəsinin müdiri – baş memar Abdullayev Elgün Əzizulla oğlu və Lənkəran Şəhər Rayonlararası Psixiatriya xəstəxanasının şöbə müdiri Nuriyev Nəsrəddin Şahrza oğlu xidməti vəzifələrinin icrası ilə bağlı vətəndaşlardan rüşvət alarkən cinayət başında yaxalanıblar.

Əməliyyat tədbirləri ilə Elgün Abdullayevin qeyd olunan vəzifədə işləyərkən rayon ərazisində yerləşən torpaq sahələri üzərində tikilmiş fərdi yaşayış evi və qeyri-yaşayış sahələri ilə bağlı sənədləşmənin aparılması, eləcə də həmin sahələrin layihələrinin rəhbərlik etdiyi şöbədə təsdiq edilməsi üçün ona müraciət etmiş ayrı-ayrı vətəndaşlardan müxtəlif məbləğlərdə rüşvət tələb edərək almasına dair əsaslı şübhələr müəyyən edilib.

Eləcə də həyata keçirilən əməliyyat tədbirlərinin digər istiqaməti üzrə Rayonlararası Psixiatriya xəstəxanasının şöbə müdiri Nəsrəddin Nuriyevin qeyd olunan vəzifədə işləyərkən vətəndaşa xəstəliklə əlaqədar epikrizin təqdim edilməsi, eləcə də məzmununa bilə-bilə saxta məlumatlar daxil etdiyi tibbi sənədlərin həmin şəxsə əlillik dərəcəsinin təyin edilməsi məqsədilə müvafiq elektron sistemə göndərilməsi müqabilində ona müraciət etmiş sonuncunun qohumundan rüşvət almasına dair əsaslı şübhələr müəyyən edilib.

İş üzrə toplanmış kifayət qədər sübutlar əsasında Cinayət Məcəlləsinin müvafiq maddələri ilə cinayət işləri başlanıb, Elgün Abdullayevə həmin Məcəllənin 311.3.2 (rüşvət alma - təkrar törədildikdə) maddəsi ilə ittiham elan edilməklə barəsində məhkəmənin qərarı ilə həbs qətimkan tədbiri, Nəsrəddin Nuriyevə isə 311.1 (rüşvət alma) və 313-cü maddələri (vəzifə saxtakarlığı) maddələri ilə ittiham elan edilməklə yaşının çox olmasını nəzərə almaqla barəsində məhkəmənin qərarı ilə ev dustaqlığı qismində əsas, vəzifədən kənarlaşdırma qismində əlavə qətimkan tədbiri seçilib.

Hazırda təqsirləndirilən şəxslərin eyni xarakterli əməllərindən zərər çəkən çoxsaylı vətəndaş müraciətlərində göstərilən digər xüsusatlar ətrafında əməliyyat-istintaq tədbirləri davam etdirilir.

"Qeyd edilən şəxslərin qanunazidd əməllərinə məruz qalmış vətəndaşlardan Baş Prokurorluğun “961” Çağrı mərkəzinə, Baş prokuror yanında Korrupsiyaya qarşı Mübarizə Baş İdarəsinin “161-Qaynar xətt” əlaqə mərkəzinə, eləcə də sosial şəbəkələrdəki səhifələrinə müraciət etmələri xahiş olunur", - məlumatda qeyd olunub
Nərminin qətli ilə bağlı ekspert rəyi yoxa çıxıbGəncə Ağır Cinayətlər Məhkəməsində Tovuz rayonunun Dondar Quşçu kəndində 10 yaşlı Nərmin Quliyevanın qətlində təqsirləndirilən İlkin Süleymanovun cinayət işi üzrə məhkəmə prosesi davam etdirilib.

Hakim Dadaş İmanovun sədrliyi ilə keçirilən proses qapalı olub.

Təqsirləndirilən şəxs İlkin Süleymanovun vəkili Zabil Qəhrəmanov bildirib ki, məhkəmə iclasında şəxsi həyata aid məsələlər müzakirə olunduğuna, iş materiallarındakı bu haqda sənədlər araşdırıldığına görə iclas qapalı keçirilib.

Məhkəmədə, həmçinin, İlkin Süleymanovun telefonu ilə bağlı ekspert rəyi tədqiq olunub.

Rəydə göstərilib ki, İlkin Süleymanovun telefonundan internetdə cizgi filmlərinə, porno görüntülərə baxılıb. Vəkillər İlkin Süleymanovun telefonuna müdaxilə edildiyini bildirib.

Daha sonra təqsirləndirilən şəxsin vəkili vəsatət qaldırıb. Bildirib ki, 2020-ci il yanvarın 6-da axşam saat 20:00-dan sonrakı vaxtlarda İlkin Süleymanovun telefonunun harada olduğunu müəyyənləşdirmək üçün mobil operatora sorğu göndərilsin:

"İlkin Süleymanov ifadəsində bildirib ki, yanvarın 6-da axşam saat 20.00 radələrində meyit tapılandan sonra onu da polis şöbəsinə aparıblar, telefonunu əlindən alıblar və o vaxtdan buraxılmayıb. İlkinin əleyhinə tutarlı sübutlar olmadığına görə dolayı sübutlar yaratmağa cəhd göstərilib. Təsəvvür edin, “Tom Cerri”yə cəmi 1 saniyə baxılıb. 1 saniyə ərzində uşağa nəyi göstərə bilərdi? Yaxud işdə bir tərəfdən iddia olunur ki, Nərmin ayın 4-də öldürülüb, amma o biri tərəfdən də ekspert rəy verir ki, yanvarın 5-də də cizgi filminə baxılıb? Ayın 5-də Nərmin öldürülmüşdüsə, nə ehtiyac vardı cizgi filminə baxmağa? Telefonun tədqiq olunması məsələsilə bağlı da suallar var. Telefona giriş üçün parol olub. O parol İlkindən necə alınıb? Müstəntiq prosessual şəxsdir, parolu götürürsə, bu rəsmiləşdirilməlidir”.

Vəkilin sözlərinə görə, prosesdə məlum olub ki, İlkin Süleymanovun işi ilə bağlı Moskvadan alınmış ekspert rəyi iş materiallarında yoxdur. Hansı ki, həmin rəyin işə əlavə olunması haqda protokol var.

Məhkəmə prosesi oktyabrın 12-də davam edəcək.

İttihama görə, Tovuz rayonunun Dindar Quşçu kənd sakini, 2009-cu il təvəllüdlü Nərmin Quliyeva 2019-cu il noyabrın 21-də itin düşüb. 2020-ci il yanvarın 6-da onun yanmış meyiti kənd ərazisində aşkar edilib.

Qətldə şübhəli bilinən kənd sakini, 1973-cü il təvəllüdlü İlkin Süleymanov saxlanılıb. O Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 133.2.1 (oğurlanmış şəxsə əzab vermə), 133.2.4 (yetkinlik yaşına çatmayan, köməksiz vəziyyətdə olan şəxsə əzab vermə), 144-cü (adam oğurluğu) maddələrilə ittiham olunur.

İttihama əsasən, İlkin Süleymanov, sinif yoldaşı Şərif Quliyevin qızı Nərmini oğurlayaraq, 47 gün sonra qətlə yetirib.
Məktəb zorxana deyilMəktəblərdə zorakılıq halları niyə baş verməlidir ki? Axı adından da göründüyü kimi məktəb təhsil ocağıdır, uşaqlara bilik verən, cəmiyyətin ziyasını, nurunu artıran müqəddəs məkandır. Məktəb zorxana deyil. Amma görünən budur ki, bəzi harın valideynlər və onların ərkəsöyün, tərbiyəsiz övladcığazları məktəblə məhləni, dərs otağı ilə rinqi səhv salırlar. Bu baxımdan, mən paytaxtımızda yerləşən 112 saylı məktəbdə bir şagirdin öz sinif yoldaşı tərəfindən amansızcasına döyülməsinin günahını ilk növbədə həddini aşmış həmin şagirddə və onu yırtıcı, quldur xislətində böyüdən valideynlərində görürəm.

Odur ki, mən sözügedən hadisənin baş verməsinin günahını ailə, valideyn, məktəb, müəllim, direktor, sinifdəki şagirdlər, nazirlik, döyən və ya döyülən şagirdlər arasında bölüşdürməyə çalışan şəxslərin mövqeyi ilə qətiyyən razı deyiləm. Əlbəttə, bu hadisədə məktəb də, direktor və müəllim də, nazirlik də müəyyən qədər günah daşıyıcısı ola bilər. Ancaq əsas günahkar məhz ailədir, valideynlərdir. Çünki bəzi ailələrdə ailə dəyərləri yox, "meşə qanunları" hökm sürür. Bəzi valideynlər sanki öz övladlarını cəmiyyət üçün yox, cəngəllik üçün yetişdirirlər. Bəzi valideynlər isə ümumiyyətlə, uşaqlarının tərbiyəsi ilə məşğul olmurlar.

Valideyn nəzarətindən kənarda qalan uşaqlar tin uşaqları kimi, küçə psixologiyası ilə, küçə əxlaqı ilə böyüyürlər. Bəziləri isə özlərini hətta kriminal "avtoritet"lərə bənzətməyə, digər uşaqları zorakı üsullarla özlərinə tabe etdirməyə çalışır. Belə şagirdlərə indi bütün məktəblərdə rast gəlmək mümkündür. Məktəblərin və müəllimlərin aqressiv valideynlərin basqısından çəkinmələri isə bu cür tərbiyəsiz və özbaşınalığa meylli uşaqların sayının get-gedə daha da çoxalmasına rəvac verir. Odur ki, mən hörmətli millət vəkilimiz Aqil Abbasın sözügedən xoşagəlməz insidentə “Əşi, uşaq dalaşar da. Əsas günah onları kameraya çəkən və aralamayan digər şagirdlərdədir", deyə verdiyi qəribə reaksiya ilə heç cürə razılaşa bilmirəm. Bu düzgün yanaşma deyil.

Biz bu cür yanaşma ilə kifayətlənsək, belə zorakılıqların sayı bir müddətdən sonra daha da çoxalacaq. Cəzasızlıq cinayətlərin artmasına səbəb olur. Bu ki hamının bildiyi adi həqiqətdir, aksiomadır. Odur ki, biz bu olayın üzərindən “Əşi, uşaq dalaşar da" mental-düşüncə tərzi ilə ötüb keçməməliyik. Öz sinif yoldaşını döyən həmin azğın şagird də və hətta onun valideynləri də mütləq məsuliyyətə cəlb olunmalıdır ki, bu addım digər məktəblilərə də, digər valideynlərə də görk olsun.

Belə azğın məktəbliləri islah etmək üçün şiddətli töhmət əsla yetərli deyil. Mən bunu çox sayda valideynlərin sözügedən videonu izlədikdən sonra öz məktəbli uşaqları üçün dərin narahatlıq hissi keçirdiklərinə görə deyirəm. Bəli, indi əksər valideynlər qorxur ki, iraq olsun, sabah hansısa qudurmuş şagirdlər onların da məktəbə gedən uşaqlarına qarşı oxşar zorakılıqları edə bilər. Biz həmin valideynlərin hisslərinə, həyəcanlarına, narahatlıqlarına anlayışla yanaşmalıyıq.

Biz məktəblərimizdə sevgi və mərhəmət hissindən məhrum kriminal ünsürlərin, potensial cinayətkarların yox, Vətənə, millətə, bütün azərbaycanlılara sevgi hissilə yanaşan vətənpərvər, savadlı gənclərin yetişməsini təmin etməliyik. Milli həmrəyliyimiz məktəblərdən başlayır!

Əlisahib Hüseynov,
Milli Həmrəylik Partiyasının sədri
“Hindistanın verdiyi silahlar erməniləri məhvə aparır” – Pakistanlı ekspert“Hindistan dünyəvi və demokratik imicini məhv edir. Bu ölkənin Ermənistana silah satışı ilə bağlı razılaşma ermənilərin məhvinə doğru irəliləyən bir yoldur. Bütün bunlar nəticədə regionda sülh təşəbbüslərinə və davamlı inkişafa təsir göstərir. Hindistan ən böyük demokratik ölkə olduğunu iddia edir, amma demokratiya kütləvi qırğın silahlarını satmaqla olurmu, bunu soruşmaq lazımdır. Xüsusən də sülhsevər Azərbaycana qarşı Ermənistana dəstək verməsi Hindistanın nüfuzunu daha da aşağı salır”.

Bu sözləri Modern.az-a açıqlamasında Pakistanın Davamlı İnkişaf üzrə Qlobal Strateji İnstitutunun icraçı direktoru Məhəmməd Şakil Əhməd bildirib.

Onun sözlərinə görə, Hindistanın cinayətkar ölkəyə dəstək verməsi qəbuledilməzdir:

“Ermənistanla Azərbaycan arasında baş verən son toqquşmalardan sonra Hindistan Ermənistana raket və sursat ixrac etməyə hazırlaşır. Digər yardımlarla yanaşı, Hindistan Azərbaycana qarşı kömək etmək üçün Ermənistana yerli “Pinaka” reaktiv yaylım atəşi sistemlərini ixrac edəcək. Məlumatlara görə, Hindistan raketatanlardan başqa Ermənistana tank əleyhinə raketlər və digər döyüş sursatlarının ixracı üçün 250 milyon dollarlıq müqavilə imzalayıb. Hindistan qarşıdakı aylarda silahları Ermənista göndərəcək".

Pakistanlı ekspert vurğulayıb ki, Hindistanın Ermənistana silah ixrac etməsi ilk dəfə deyil. Bundan öncə də oxşar hallar müşahidə edilib:

"Hindistan 2020-ci ildə Ermənistana dörd ədəd "Swathi" radarının ixracı üçün 43 milyon dollarlıq müqavilə imzalayıb. Bu radarlar əks-hücumlarda kömək etmək üçün daxil olan artilleriya mərmilərini izləyə və düşmənin silah mövqelərini təyin edə bilər.

Ermənistanın artıq süni nəfəs aparatında olduğu və bir çox erməninin dövlətlə vətəndaşlar arasında inamsızlıq səbəbindən ölkəni tərk etdiyi bu kritik dönəmdə Ermənistan xalqın rifahına, təhsilinə və iqtisadiyyatına investisiya qoymalıdır. Bu cür silah sövdələşmələrinə investisiya qoymaq davamlı həll yolu deyil. Bundan əlavə, Hindistan silah alqı-satqısı siyasətini yenidən düşünməlidir. Silah demək, insanlığı, təbiəti məhv etmək deməkdir. Hindistan xalqı silah müqaviləsinə etirazını bildirməlidir”.

Qeyd edək ki, Hindistan Ermənistana müasir raketlər və tank əleyhinə silahlar satacaq. Hindistan Müdafiə Nazirliyinin yaydığı məlumata görə, satılacaq silahların ümumi qiyməti təxminən 270 milyon dollar dəyərindədir.

Hindistanın Ermənistana satacağı “Pinaka” raketləri 40 kilometr uçuş məsafəsinə və dəqiq zərbə vurma qabiliyyətinə malikdir. Bu raket sisteminin yüksək effektivliyi Kəşmirin dağlıq bölgələrində Pakistana qarşı aparılan müharibədə istifadə edilib.
Türkiyə İsrailə səfir təyin edibTürkiyə Şahin Özkan Torunları İsrailə səfir təyin edib.

“Report” “Habertürk”ə istinadən xəbər verir ki, bu barədə diplomatik mənbədən bildirilib.

Qeyd edək ki, Türkiyə ilə İsrail arasında münasibətlərin pozulmasının təməli 2009-cu il yanvarın 29-da İsveçrənin Davos şəhərində "Qəzza: Orta Şərqdə sülh" mövzusunda keçirilən konfransda qoyulub. Belə ki, Türkiyənin o zamankı Baş naziri R.T.Ərdoğan İsrailin həmin dövrdəki Prezidenti Şimon Peres çıxış edərkən İsraili fələstinlilər münasibətdə obyektiv və ədalətli davranmamaqda qınayaraq, "one minute" ("bir dəqiqə") deyərək dövlət başçısının sözünü kəşmişdi. Bundan sonra tərəflər arasında diplomatik qalmaqal yaşanmışdı.

2010-cu il mayın 31-də isə Fələstinin Qəzza zolağına humanitar yardım aparan Türkiyənin “Mavi mərmərə” gəmisinə İsrail hərbçilərinin basqını iki dövlət arasında gərginliyin yaranmasına səbəb olmuşdu. Həmin hadisə nəticəsində Türkiyənin 9 vətəndaşı israilli hərbçilər tərəfindən öldürülmüşdü. Bundan sonra isə iki ölkə arasında vəziyyət böhran həddinə çatmışdı. Türkiyə Təl-Əvivdəki səfirini, İsrail isə Ankaradakı səfirini geri çağırmışdı və iki ölkə arasında diplomatik əlaqələr kəsilmişdi.

2016-cı ildə diplomatik əlaqələr yenidən bərpa olunub.

Münasibətlərin istiləşməsinin əlaməti olaraq İsrail Prezidenti İsaak Hersoq 2022-ci ilin martında Türkiyə Prezidenti Rəcəb Tayyib Ərdoğanla görüşmək üçün Ankaraya səfər edib. Avqustun 17-də isə İsrailin Baş naziri Yair Lapidin ofisi İsrail və Türkiyə arasında diplomatik münasibətləri tam bərpa etmək və səfir təyin etmək barədə qərarı qəbul edildiyini açıqlayıb.

Bir müddət əvvəl İrit Lilian İsrailin Türkiyədəki səfiri təyin edilib.
Ehtiyatda olan polkovnik həbs edildiEhtiyatda olan polkovnik Elnur Məmmədovun məhkəməsi keçirilib.

Bu gün Bakı Hərbi Məhkəməsində hakim Elbəy Allahverdiyevin sədrliyi ilə baş tutan prosesdə hökm elan edilib.

Elnur Məmmədova 6 ay cəza kəsilib.

Qeyd edək ki, iddiaçı Müdafiə Nazirliyinin hüquq departamentinin rəisi Elçin Əliyev Elnur Məmmədova qarşı xüsusi ittiham qaydasında şikayət verib

Elnur Məmmədov Cinayət Məcəlləsinin 147.2-ci maddəsi ilə (Ağır və ya xüsusilə ağır cinayətdə ittiham etməklə böhtan atma) ittiham olunub.

Qeyd edək ki, Elnur Məmmədov son günlərdə sosial şəbəkələrdə Müdafiə Nazirliyinin rəhbərliyini, o cümlədən Şəxsi Heyət Baş İdarəsi Kadrlar İdarəsinin rəisi general-mayor Elçin Xəlilovu tənqid edib, bir sıra iddialar irəli sürməklə gündəmə gəlmişdi.

Müdafiə Nazirliyi isə açıqlama yayaraq, E.Məmmədovun nazirliklə bağlı iddialarını yalanlamışdı
734 QHT Edilli məzarlığı ilə bağlı bəyanat yayıbQeyri-hökumət təşkilatları Xocavənd rayonunun Edilli kəndində növbəti dəfə aşkar olunmuş kütləvi məzarlıqla bağlı beynəlxalq təşkilatlara ünvanlanan bəyanat yayıb.

Avrasiya.net xəbər verir ki, bəyanatda deyilir:

“Azərbaycan cəmiyyətində böyük sarsıntı yaradan, Xocavənd rayonunun Edilli kəndində aşkar edilmiş məzarlıq regionda sayca üçüncü kütləvi məzarlıqdır. Belə ki, bu ilin fevral ayında Edilli kəndində bir kütləvi məzarlıqda 6 nəfərin cəsədi, martın 29-da Xocalı rayonunun Fərrux dağında bir kütləvi məzarlıqda 3 nəfərin cəsədi və sentyabr ayının 14-də Edilli kəndində digər bir kütləvi məzarlıqda 12 nəfərin cəsədi təsadüfi qazıntılar nəticəsində aşkar edilib. Məzarlıqlarda tapılan cəsədlərin funksional vəziyyətləri onların qabaqcadan planlaşdırılmış qaydada, xüsusi qəddarlıqla öldürüldüklərini deməyə əsas verir. Bütün bu baş verənlər Ermənistan silahlı qüvvələri tərəfindən hərbi əsir və girovlarımıza qarşı qanuni çərcivədən kənar və özbaşına edamların nəticəsidir ki, bu da silahlı münaqişə zamanı tətbiq olunan humanitar hüquq normalarının və ya müharibə adət və qanunlarının pozulması ilə nəticələnən müharibə cinayətidir.


Biz, Azərbaycanda fəaliyyət göstərən qeyri-hökumət təşkilatlarının nümayəndələri bu hadisəni qətiyyətlə pisləyir və hadisəni törədənlərin cəzalandırılmasını tələb edirik.

Birinci Qarabağ müharibəsi dövründə Azərbaycanın 20% ərazisinin işğalı zamanı (1988-1994-cü illər) ermənilər tərəfindən əsir götürülən 4000-ə yaxın Azərbaycan vətəndaşının (hərbi qulluqçu və mülki şəxslərin) taleyindən hələ də xəbər yoxdur. Azərbaycan dövləti dəfələrlə itkin düşmüş və girov götürülmüş şəxslərlə bağlı beynəlxalq təşkilatlara müraciət etsə də, bütün beynəlxalq humanitar təşkilatlar məsələ ilə bağlı səssiz qalmış və heç birini cavablandırmamışdır.

1949-cu il Cenevrə konvensiyalarına əsasən, müharibə zamanı hərbi əsirlərlə davranış, eləcə də yaralı və mülki şəxslərin müdafiəsi tələbləri Ermənistan tərəfindən dəfələrlə pozulmuş və 2022-ci ildə aşkar edilən kütləvi məzarlıqlar da bu pozuntuların baş verdiyini sübut edən bariz nümunə olmuşdur. İndiyədək müharibə cinayətləri törədən erməni hərbiçilərinə qarşı Ermənistan hüquq mühafizə orqanları və məhkəmələri tərəfindən heç bir cəzalandırılma halına rast gəlinməmişdir.

Azərbaycan Respublikasının 2020-ci il Vətən Müharibəsindən sonra Ermənistana həm itkin düşmüş şəxslərin taleyi, eləcə də minalanmış ərazilərin xəritələrinin təhvil verilməsi ilə bağlı müraciətləri də faktiki olaraq cavabsız qalmışdır. Ermənistan bütün hallarda Azərbaycanın humanist, qərəzsiz münasibətinə qeyri-adekvat münasibət bəsləmişdir. Müharibə cinayətləri törədən, yüzlərlə mülki şəxsin ölümünə səbəb olan, 1 milyon insanın yaşamaq hüquqlarını pozan, onların varidatını mənimsəyən, mədəni irsini məhv edən Ermənistan adlı bir dövlətin hələ də beynəlxalq təşkilatlar tərəfindən dəstəklənməsi, azərbaycanlıların başlarına gətirilən faciələrə ikili standartlarla yanaşılması bizim həmin təşkilatların fəaliyyətinə inamımızı azaldır.

Bəyan edirik ki, Ermənistanın müharibə cinayətlərinə beynəlxalq təşkilatlar, xüsusən beynəlxalq humanitar təşkilatlar adekvat cavab verməli, törətdiyi cinayətlərə görə Ermənistanı məsuliyyətə cəlb etməli və Azərbaycanın 4000-ə yaxın itkin düşmüş vətəndaşının taleyinə aydınlıq gətirməlidirlər”.
Yas mərasimində oğul atasını bıçaqlayıbBalakəndə yas mərasimində oğul atasını bıçaqlayıb.

APA-nın Şimal-qərb bürosunun məlumatına görə, rayonun Yeni Şərif kənd ərazisində baş verib.

1993-cü il təvəllüdlü Yeni Şərif kənd sakini Ramil Şabanov nənəsinin yas mərasimində atası 1967-ci il təvəllüdlü Mahama Şabanovla mübahisə düşüb.

Mübahisə zamanı Ramil Şabanov üzərində olan bıçaqla atasına xəsarət yetirib. Xəsarət alan Mahama Şabanov Balakən rayon Mərkəzi Xəstəxanasına yerləşdirilib. Hadisəni törətməkdə şübhəli sayılan Ramil Şabanov saxlanılıb.

Faktla bağlı Balakən rayon Polis Şöbəsində araşdırma aparılır.