İctimai Şuranın üzvləri Gəncədə təhsil alan əcnəbi tələbələrlə görüşüblərGəncədə işgüzar səfərdə olan Dövlət Miqrasiya Xidməti yanında İctimai Şuranın üzvləri bu şəhərdə fəaliyyət göstərən ali təhsil müəssisələrinin əcnəbi tələbələri ilə görüşüb, onları narahat edən məsələlər ətrafında geniş müzakirələr aparıblar.

Gəncə Regional Miqrasiya İdarəsinin və Azərbaycan Dövlət Aqrar Universitetinin təşkilatçılığı keçirilən tədbiri giriş sözü ilə açan Dövlət Miqrasiya Xidməti yanında İctimai Şuranın sədri Azər Allahverənov ölkə ərazisində təhsil alan əcnəbi tələbələrlə əlaqədar Şura tərəfindən həyata keçirilən fəaliyyətlər barədə məlumat verib. Qeyd olunub ki, əcnəbi tələbələrlə bağlı mövcud qaydalar həmin kateqoriyadan olan şəxslərin hüquqi statusundan irəli gələn hüquqi çərçivələrlə müəyyən olunub. Hədəf qrupları ilə müzakirələrin aparılmasının əhəmiyyətinə toxunan A.Allahverənov miqrasiya xidmətləri zamanı elektron resurslardan səmərəli şəkildə istifadənin üstünlükləri barədə danışıb, MigAz mobil tətbiqi və digər elektron xidmətlərdən istifadə yollarını nümayiş etdirib.

Azərbaycan Dövlət Aqrar Universtetinin şöbə müdiri Küşvər Məmmədova, Gəncə Dövlət Universitetinin şöbə müdiri Ruslan Məmmədov və Gəncə Texnologiya Universitetinin əməkdaşı İlahə Qurbanova təmsil etdikləri təhsil müəssisələrində əcnəbi tələbələrlə təşkil olunan iş barədə məlumat veriblər və xüsusilə vurğulayıblar ki, tələbələrin hüquqi statusu ilə bağlı meydana çıxan məsələlər Gəncə Regional Miqrasiya İdarəsinin əməkdaşlarının dəstəyi ilə çevik həllini tapır. Bununla yanaşı, tədbir iştirakçıları əcnəbi tələbələrin qarşılaşdıqları çətinliklərin aradan qaldırılması üçün aidiyyəti dövlət orqanları ilə mütəmadi görüşlərin keçirilməsinin zəruriliyi barədə fikir bildiriblər və bu barədə təkliflər səsləndiriblər.

Tədbirdə iştirak edən əcnəbi tələbələrin olduğu olduğu yer üzrə qeydiyyatının aparılması, onlara müvəqqəti yaşamaq və iş icazələrinin verilməsi, miqrantların hüquq və azadlıqları barədə, həmçinin onları maraqlandıran digər suallar Dövlət Miqrasiya Xidmətinin Miqrasiya siyasəti və hüquqi təminat baş idarəsinin rəis müavini Kəyan Hacıyev, Gəncə Regional Miqrasiya İdarəsinin rəisi Orxan Xıdırov və bölgə üzrə struktur bölməsinin digər əməkdaşları tərəfindən ətraflı cavablandırılıb.

Meymunçiçəyinin müəyyən edilməsi üçün test HAZIRLANIRABŞ-ın əczaçılıq şirkəti "Abbott Laboratories" meymunçiçəyi xəstəliyinin müəyyən edilməsi üçün tibbi testlər hazırlayır.

Bu barədə şirkətə istinadən "Reuters" agentliyi məlumat yayıb.

Bildirilib ki, şirkət ictimai səhiyyə və elm sahələrindəki tərəfdaşlarına test dəstləri təqdim edəcək.

"Vəziyyət inkişaf etdikcə, əlavə test ehtiyaclarını ödəmək üçün tədbirlər görəcəyik", - şirkətdən verilən məlumatda qeyd olunub.
NATO üzvlərinə Ukrayna çağırışı: Hazır olun!Ukrayna müharibəsi uzun müddət davam edə bilər və biz buna hazır olmalıyıq.

Bu sözləri NATO Baş katibi Yens Stoltenberq deyib.

“Heç kim müharibənin nə zamana qədər davam edəcəyini deyə bilməz. Ona görə də Ukraynaya dəstək üçün müttəfiqlərə çağırış edirəm. Həm də uzun müddətə dəstək olmağa hazır olun”, - Baş katib bildirib.
Rusiyanın 1 tankı, 5 artilleriya sistemi məhv edildiÖtən gün Ukrayna hərbçiləri Rusiya ordusunun 12 hücumunu dəf edib.

Bu barədə Ukrayna Birləşmiş Qüvvələri məlumat yayıb.

“Bütün müdafiə zonası boyunca düşmən döyüş təyyarələrindən, reaktiv yaylım atəş sistemlərindən, iriçaplı top artilleriyasından, tanklardan, müxtəlif sistemlərin minaatanlarından istifadə edir, mülki infrastruktur obyektlərinə, dinc yaşayış məntəqələrinə raket və bombalı zərbələr endirir. İşğalçılar Donetsk və Luqansk vilayətlərində 50-yə yaxın yaşayış məntəqəsini atəşə tutub, 60 mülki obyekti, o cümlədən: 55 yaşayış binası, məktəb, mədən müəssisəsi, istirahət mərkəzinin inzibati binası, yanğınsöndürmə məntəqəsini dağıdıb və zədələyib. Bu hücumlar nəticəsində 9 mülki şəxs həlak olub, daha 14 nəfər müxtəlif dərəcəli bədən xəsarətləri alıb”, - məlumatda qeyd olunub.

Bildirilib ki, ötən gün ərzində Birləşmiş Qüvvələrin hərbi qulluqçuları 1 tank, 5 artilleriya sistemi; 5 ədəd döyüş zirehli texnikası; 5 düşmənin zirehli avtomobili məhv edilib.

Eyni zamanda, Ukrayna Donbas səmasında hava hücumundan müdafiə bölmələri Rusiyanın Ka-52 helikopterini, qanadlı raketi və Orlan-10 pilotsuz uçuş aparatını vurub.
Rumıniyada fəaliyyət göstərən “SOCAR Petroleum SA” şirkətinin ötən il gəlirləri 2,4 dəfə artıbRumıniyada yanacaqdoldurma məntəqələrinə sahib olan və enerji bazarında xüsusi nüfuzu ilə seçilən SOCAR-ın bu ölkədə törəmə “SOCAR Petroleum SA” şirkəti ötən il gəlirlərinin və satışlarının artdığını bildirib.

AZƏRTAC ölkədə biznes və iqtisadiyyat sahəsində qabaqcıl nəşr və internet portal “Economica.net”ə istinadla xəbər verir ki, şirkətin ötən il üçün dövriyyəsi 1,42 milyard ley, xalis mənfəəti isə 16,45 milyon ley olduğu bildirib (1 manat-2,73 ley). Rəqəmlər 2020-ci illə müqayisədə çox müsbət dinamikanı göstərir. Belə ki, 2020-ci ildə SOCAR-ın Rumıniyada 827 milyon ley dövriyyəsi və cəmi 6,8 milyon ley xalis mənfəəti olub. Həmçinin Rumıniya Maliyyə Nazirliyinə təqdim edilən balans məlumatlarına əsasən, şirkətin işçilərinin sayı bir qədər artaraq 669-dan 682-yə çatıb.

Geniş yanacaqdoldurma şəbəkəsini əhatə edən “SOCAR Petroleum SA” hazırda bir neçə illik inkişafdan sonra 67 yanacaqdoldurma məntəqəsi şəbəkəsinə malikdir. Eyni zamanda məqalənin müəllifi iqtisadi ekspert Mihai Nikuts bildirir ki, Azərbaycan TANAP və TAP boru kəməri sistemi vasitəsilə Avropanın qaz tədarükçüsünə çevrilib. Rumıniya rəsmilərinin sözlərinə görə, Bolqarıstan və Yunanıstan arasında interkonnektor qurulduqdan sonra Rumıniya Azərbaycan qazını idxal edəcək. Bu isə ölkəmizin Rumıniyada qaz sektoru biznesində iştirakı ilə nəticələnə bilər. Qeyd olunub ki, bununla bağlı iki ölkə arasında rəsmi görüşlər keçirilib.
Azərbaycanda 10 rayon və şəhərdə su kəsiləcəkAzərbaycanda 10 rayon və şəhərə içməli su məhdudiyyətlə veriləcək.

Bu barədə Avrasiya.net-ə "Azərsu" ASC-dən məlumat verilib.

Bildirilib ki, intensiv yağıntılar səbəbindən Kür çayında bulanıqlığın kəskin artması nəticəsində Kür Sutəmizləyici Qurğular Kompleksində suyun emalı xeyli azalıb. Bununla əlaqədar Şirvan, Hacıqabul, Salyan, Neftçala, Biləsuvar, Sabirabad, Saatlı şəhərlərinə, magistral kəmərlərin trassası boyu yerləşən kəndlərə, həmçinin Bakının Qaradağ rayonuna, eləcə də Səbail və Binəqədi rayonlarının bir hissəsinə içməli suyun verilməsində məhdudiyyətlər olacaq.

“Azərsu” ASC yaranacaq narahatlıqla əlaqədar abonentlərdən üzr istəyir.
Mingəçevirdə məktəbdə Respublika Günü və "Şuşa ili"nə həsr olunmuş tədbir keçirilibİsmət Qayıbov adına Mingəçevir şəhərində yerləşən 10 nömrəli məktəbin (Rus bölməsi üzrə təhsil alan) 2 D sinfinin iştirakı və sinif rəhbəri Aytən Əliyevanın təşkilatçılığı ilə 28 May Respublika Günü və "Şuşa ili"nə həsr olunmuş tədbir keçirildi.

Tədbirdə Birinci və İkinci Qarabağ müharibəsi şəhid ailələri, Vətən müharibəsi qaziləri, Gənc Qazilər Ib Mingəçevir üzvləri, təhsil şöbəsinin əməkdaşları da iştirak etdi.

Tədbirdə müxtəlif mahnılar, rəqslərlə yanaşı 44 günlük Vətən Müharibəsində şəhadətə qovuşmuş şəhidlərimizə həsr olunmuş kompozisiya nümayiş olundu.

Tədbirin sonunda məktəbin direktoru Mehriban Mehdiyeva, şəhid ailələri və Vətən Müharibəsi qaziləri çıxış edərək tədbiri təşkil edən Aytən müəlliməyə və 2ci sinfin vətənpərvər şagirdlərinə gözəl çıxışları, şagirdlərini milli ruhda yetişdirdiyi üçün minnətdarlıq etdi.

Sonda Aytən müəllimə çıxış etdi və öz şagirdlərini vətənpərvərlik ruhunda tərbiyə etməyin əhəmiyyətindən danışdı. Qeyd etdi ki, gələcəyə əsil vətənsevər, milli dəyərlərinə bağlı şəxsiyyət yetişdirmək hər bir pedaqoqun borcudur deyərək gələn qonaqlara təşəkkürünü etdi bununla da tədbir yekunlaşdı.
Yetişən nəsli bu qədər vətənsevər, milli dəyərlərinə bağlı görəndə insanın bu vətən üçün dəfələrlə can alıb, can verməyi gəlir. Yetərki bu körpələr azad, bütöv Azərbaycanda, Qarabağda yaşayıb, yaratsınlar.

DSX-nin hərbçisi İNTİHAR ETDİMay ayının 26-da Dövlət Sərhəd Xidmətinin (DSX) Sərhəd Qoşunlarının Horadiz sərhəd dəstəsinin müddətdən artıq həqiqi hərbi xidmət hərbi qulluqçusu baş çavuş Şirəliyev Canmirzə Çingiz oğlu xidmət yerindən kənarda intihar edib.

Avrasiya.net xəbər verir ki, bu barədə DSX-nin Mətbuat Mərkəzi məlumat yayıb.

İlkin olaraq intiharın hərbi xidmətlə bağlı olmayan səbəbdən baş verməsi ehtimal edilir.

Faktla əlaqədar prokurorluq orqanlarının əməkdaşları ilə birlikdə araşdırma tədbirləri həyata keçirilir.
İlham Əliyev Soltanlı stansiyasının təməlini qoyduMayın 26-da Azərbaycan Respublikasının Prezidenti İlham Əliyev və birinci xanım Mehriban Əliyeva Cəbrayıl rayonunda da səfərdə olublar.

Avrasiya.net xəbər verir ki, dövlət başçısı və birinci xanım Horadiz-Ağbənd dəmir yolu xəttinin Cəbrayıl rayonu ərazisində Soltanlı stansiyasının təməlqoyma mərasimində iştirak ediblər.

Prezident İlham Əliyevə və birinci xanım Mehriban Əliyevaya dəmir yolu və stansiya barədə məlumat verilib.

Bildirilib ki, təkxətli dəmir yolunun uzunluğu 110,4 kilometrdir. Layihəyə əsasən yol boyunca 9 stansiyanın (Horadiz, Mərcanlı, Mahmudlu, Soltanlı, Qumlaq, Həkəri, Mincivan, Bartaz, Ağbənd), 3 tunelin, 41 körpünün, 7 yolötürücünün, 300-ə yaxın süni mühəndis qurğusunun, rabitə və işarəvermə sisteminin, elektrik təsərrüfatının tikintisi planlaşdırılır. Yol boyunca 85 kilometr ərazi minalardan təmizlənib və proses davam edir. Dəmir yolu xəttinin yan yollarla birlikdə 60 kilometrlik hissəsi tamamlanıb. Bu məsafədə yük qatarları hərəkət edir. Tikinti işləri Türkiyənin “Kalyon RSY İnşaat Adi Ortaklığı Ticari İşletmesi” şirkəti tərəfindən həyata keçirilir.

Prezident İlham Əliyev Soltanlı stansiyasının təməlini qoyub.

Bildirilib ki, stansiyada sərnişinlər üçün gözləmə zalı, rabitə, işarəvermə və digər xidməti otaqlar yaradılacaq.

Qeyd edək ki, Horadiz-Ağbənd dəmir yolu xəttinin təməli 2021-ci il fevralın 14-də Prezident İlham Əliyev tərəfindən qoyulub. Layihənin 2023-cü ilin sonunadək yekunlaşdırılması nəzərdə tutulur. Azərbaycan Prezidentinin sərəncamları ilə yolun inşasına 312 milyon 700 min manat vəsait ayrılıb.