Britaniya Ukraynaya verilən hərbi yardımın həcmini artıracaq
Gələn il Böyük Britaniya Ukraynaya verilən hərbi yardımın həcmini artıracaq.
Bu barədə “Report” Böyük Britaniya hökumətinin press-relizinə istinadən xəbər verir.
Baş nazir Liz Tras qeyd edib ki, Britaniyanın hərbi dəstəyinin spesifik xarakteri Ukrayna Silahlı Qüvvələrinin ehtiyacları əsasında müəyyən ediləcək.
“Ukraynanın son həftələrdə qazandığı qələbələr ruhlandırıcı oldu. Bu cəsur insanlar şübhə edənlərə meydan oxudular və onlara hərbi, iqtisadi və siyasi dəstək verildikdə nə edə biləcəklərini göstərdilər. Mənim Ukrayna xalqına mesajım budur: Böyük Britaniya hər addımda sizinlə olmağa davam edəcək. Sizin təhlükəsizliyiniz bizim təhlükəsizliyimizdir”.
Qeyd edək ki, bu il Böyük Britaniya Ukraynaya hərbi yardım məqsədi ilə 2,3 milyard funt-sterlinq (2,6 milyard ABŞ dollarından çox - Red) vəsait ayırıb.
