Tokio Moskvaya etiraz edib
Tokio Moskvanın Kuril adaların keçmiş sakinləri olan Yaponiya vətəndaşlarının adaların cənub hissəsinə asanlaşdırılmış səfərləri haqqında ikitərəfli, habelə qarşılıqlı vizasız gediş-gəliş proseduru haqqında sazişdən çıxmaq qərarı ilə əlaqədar Rusiyaya etiraz edib. Bu barədə Tokioda keçirilən mətbuat konfransında Nazirlər Kabinetinin baş katibi Hirokazu Matsuno bildirib.
"Biz bunu yersiz hesab edirik. Bizim nöqteyi-nəzərimizdən bu, yolverilməzdir. Hazırda Rusiya tərəfdən rəsmi bildiriş (müqavilədən çıxmaq barədə nota) almamışıq. Eyni zamanda, biz qəti etirazımızı bildirdik”, - deyə o bildirib.
Matsuno həmçinin Yaponiya-Rusiya münasibətlərinin pisləşməsinə görə məsuliyyətin “tamamilə Rusiyanın üzərinə düşdüyünü” iddia edib.
Qeyd edək ki, bazar ertəsi Rusiya Yaponiya ilə bu adaların keçmiş sakinləri olan Yaponiya vətəndaşlarının Kuril adalarına asan səfərləri haqqında sazişi, eləcə də qarşılıqlı səfərlərin proseduru haqqında sazişi ləğv edib. Rusiya Federasiyası Hökumətinin müvafiq sərəncamı hüquqi informasiyanın rəsmi portalında dərc olunub.
