Güney Azərbaycanın Təbriz Tibb Elmləri Universitetinin tələbəsi, Qərbi Azərbaycan əyalətinin Sayınqala (İran hakimiyyəti Şahindej adlandırıb) şəhərinin sakini, atası İnqilab Keşikçiləri Qvardiyasının (SEPAH-ın) məsul şəxsi olan Mürtəza Şirməhəmmədi İran hakimiyyətinin hərb-polis rejimi tərəfindən öldürülüb.

“Report” xəbər verir ki, məlumatı GünAzTV yayıb.

Bildirilib ki, tələbənin meyiti noyabrın 2-də dəfn üçün ailəsinə təhvil verilib. Qeyd olunub ki, onun atası Əliəsgər Şirməhəmmədi SEPAH-ın Urmiya şəhər şöbəsinin siyasi-ideoloji bölməsinin rəisidir. Bu səbəbdən o, oğlunun öldürülməsi barədə xəbərin yayılmasının qarşısını alıb. Ona görə də M.Şirməhəmmədinin qətli bir neçə gün sonra ictimaiyyətə məlum olub.

İranla bağlı digər xəbərə görə, ölkədə bir qrup əmmamaməli və əbalı din xadimləri ilə hicabsız qadınlar arasında qarşıdurma olub. Bu barədə sosial şəbəkələrdə videolar paylaşılıb.

Görüntülərdən məlum olur ki, din xadimləri hicabsız gəzdikləri üçün qadınları söyür, təhriq edirlər. Qadınlar da onlara “Sənə dəxli yoxdur” cavabını verirlər.

Digər məlumata görə, mərkəzi Təbriz olan Şərqi Azərbaycan Vəkillər Birliyinin üzvü və insan hüquqları müdafiəçisi Negin Kiyani həbs olunub. O, Təbriz həbsxanasında saxlanılır. Lakin hüquq-müdafiəçisinin həbsinin səbəbi və nədə ittiham olunduğu açıqlanmayıb.

Oktyabrın 15-də saxlanılan azərbaycanlı vəkilə ailə üzvləri ilə görüşə və telefon danışığına icazə verilməyib. N.Kiyani ilə bu müddət ərzində yalnız bir dəfə anası ilə qısa müddətə görüşə bilib.

Məlumata görə, o, İranın təhlükəsizlik qüvvələri tərəfindən saxlanılan azərbaycanlı fəalları könüllü şəkildə müdafiə etdiyi üçün rejimin qəzəbinə tuş gəlib və həbs olunub.

Qeyd edək ki, N.Kiyani və başqa 3 azərbaycanlı vəkil 15 oktyabrda təhlükəsizlik məmurları tərəfindən saxlanılaraq Təbriz zindanına köçürülüblər.

Qərbi Azərbaycan əyalətinin mərkəzi Urmiya şəhərində keçirilən etiraz aksiyasında həbs edilən tələbə Səba Paşazadə qeyri-müəyyən vəziyyətdə saxlanılır. Onun vəziyyəti və ittihamı ilə bağlı ailəsinin məhkəmə, təhlükəsizlik və həbsxana rəhbərliyinə müraciətləri cavabsız qalıb.

Təbrizdə yaşayan milli fəal Əmir Çəməni də təhlükəsizlik məmurları tərəfindən həbs edilib.

Azərbaycan Milli Hərəkatının fəallarından biri, tanınmış siyasi məhbus Abbas Lisani noyabrın 7-i axşam saatlarında kəskin bel ağrısı səbəbindən Ərdəbil həbsxanasından şəhərdəki İmam Əli adına xəstəxanaya köçürülüb. Həkimlər tibbi müayinədən sonra dərhal cərrahi müdaxilə və tibbi yardım göstərilməsinin vacibliyini bildiriblər.

Qeyd edək ki, əməliyyat olunduqdan sonra həkimlərin tibbi məzuniyyətin müddətinin uzadılması barədə arayışlarına baxmayaraq, ETTELAAT-ın təzyiqi və Ərdəbil prokuroru Abdullah Təbatəbayinin göstərişi ilə ona məzuniyyət verilməsi haqqında qərar ləğv edilib.

İran İnsan Haqları Təşkilatının noyabrın 8-nə olan məlumatına görə, etiraz aksiyalarından ötən 54 gün ərzində hökumət məmurları 50-i uşaq olmaqla 321 nəfəri öldürüblər. Məlumatlara əsasən, aksiyada iştirak edən 14 823 nəfər saxlanılıb, onların 428-i tələbədir. 1 862 nəfərinin isə kimliyi və harada saxlanıldığı məlum deyil. Bildirilib ki, bu müddət ərzində 136 şəhərdə etirazçılar İranın idarəetmə sisteminə qarşı nümayişlər həyata keçirib. 135 universitetin tələbələri bu nümayişləri dəstəkləyib.
“İrəli” gəncləri Zəfər Gününü silsilə tədbirlərlə qeyd ediblər8 Noyabr – Zəfər Günü “İrəli” İctimai Birliyi tərəfindən silsilə tədbirlərlə qeyd olunub.

Birliyin Mətbuat xidmətindən Avrasiya.net-ə məlumat verilib ki, təşkilatın nümayəndə və üzvlərinin iştirakı ilə II Fəxri xiyabanda Vətən müharibəsində ölkəmizin ərazi bütövlüyü uğrunda canından keçmiş qəhrəmanlarımızın əziz xatirəsi dərin ehtiramla yad edilib.

Tədbirlər planı çərçivəsində “İrəli” İctimai Birliyinin təşkilatçılığı, Azərbaycan Respublikası Müdafiə Nazirliyinin dəstəyi ilə “N” saylı hərbi hissədə Zəfər Gününə həsr olunmuş tədbir keçirilib.

Tədbirə başlamazdan öncə “İrəli” gəncləri hərbi hissədə əsgərlər üçün yaradılmış şərait və hərbi texnikalarla tanış olublar.

Rəsmi hissə Azərbaycan Respublikasının Dövlət Himninin səsləndirilməsi, habelə şəhidlərimizin əziz xatirəsinin bir dəqiqəlik sükutla yad edilməsi ilə başlayıb.

Tədbirdə çıxış edən “N” saylı hərbi hissənin İdeoloji iş və mənəvi-psixoloji təminat şöbəsinin rəis müavini, mayor Nəcəf Xurşudov bildirib ki, 44 günlük Vətən müharibəsi Azərbaycanın hərb tarixinə öz adını qızıl hərflərlə yazdı. Müzəffər Ali Baş Komandan, cənab Prezident İlham Əliyevin rəhbərliyi altında torpaqlarımızın işğaldan azad edilməsi bu gün hər bir azərbaycanlı üçün böyük qürur və fəxarət mənbəyinə çevrilib.

“İrəli” İctimai Birliyinin sədri Şahin Rəhmanlı çıxışı zamanı ikinci Qarabağ müharibəsində qazanılan şanlı qələbəyə görə dövlətimizin başçısına öz təşəkkürünü bildirib. Vətən müharibəsinin ikinci ildönümü çərçivəsində “İrəli” İctimai Birliyi tərəfindən bir sıra tədbirlərin keçirdiyini bildirən təşkilat rəhbəri diqqətə çatdırıb ki, 44 günlük müharibədə şəhidlik zirvəsində ucalmış qəhrəmanlarımızın xatirəsinin əbədiləşdirilməsi məqsədilə həyata keçirilən “Müzəffər Əsgərimiz” layihəsinin buraxılışları indiyədək 45 rayon və şəhərdə 5000-ə yaxın gəncin iştirakı ilə nümayiş etdirilib.

Hərbi qulluqçulara Zəfər Günü münasibətilə təbriklərini çatdıran Şahin Rəhmanlı qeyd edib ki, “İrəli” İctimai Birliyi tərəfindən ordumuzun şəxsi heyətinin ruh yüksəkliyinin artırılması, həmçinin dövlətimizin bu istiqamətdə həyata keçirdiyi fəaliyyətlərə töhfələr verməyə bundan sonra da davam edəcək.

Rəsmi hissənin sonunda “İrəli” İctimai Birliyi tərəfindən öz xidməti vəzifələrini və hərbi hissənin qarşısında qoyulmuş tapşırıqları yerinə yetirərkən fərqləndiklərinə görə Azərbaycan Silahlı Qüvvələrinin bir qrup əsgərə təltifnamələr təqdim olunub.

Tədbir bir sıra müğənnilərin iştirakı ilə konsert proqramı və əsgərlərlə birgə naharla davam edib.

Zəfər Gününə həsr olunmuş tədbirlər planına uyğun olaraq “İrəli” İctimai Birliyinin İntellektual mərkəzinin təşkilatçılığı ilə “Zəfər Tarixi” adlı intellektual turnir keçirilib. “Nə? Harada? Nə zaman?” formatında, ümumilikdə 100-dək gəncin iştirakı ilə baş tutan intellektual turnirdə 8 komanda birincilik uğrunda mübarizə aparıb.
Ərsin Tatar Azərbaycan xalqını təbrik etdiŞimali Kipr Türk Respublikasının Prezidenti Ərsin Tatar 8 Noyabr – Zəfər Günü münasibətilə Azərbaycan xalqını təbrik edib.

Avrasiya.net xəbər verir ki, Tatar bununla bağlı Tvitter hesabında paylaşım edib.

“İşğal altındakı torpaqlarını qəhrəmancasına mübarizə apararaq azad edən Azərbaycan xalqını Zəfər Günü münasibətilə ürəkdən təbrik edirəm”, - paylaşımda qeyd olunub.
İlham Əliyev Şuşaya getdiNoyabrın 8-də Azərbaycan Respublikasının Prezidenti, Silahlı Qüvvələrin Müzəffər Ali Baş Komandanı İlham Əliyev, birinci xanım Mehriban Əliyeva və oğulları Heydər Əliyev Zəfər Günü münasibətilə Şuşada təşkil olunan tədbirdə iştirak ediblər.

Avrasiya.net xəbər verir ki, dövlət başçısı hərbçilər qarşısında çıxış edib.

Əziz hərbçilər.

Mən sizi və bütün Azərbaycan xalqını Zəfər Günü münasibətilə təbrik edirəm.

İlk növbədə, xahiş edirəm ki, Vətən uğrunda həlak olmuş qəhrəman şəhidlərimizin əziz xatirəsini bir dəqiqəlik sükutla yad edək.

Şəhidlərimizin xatirəsi bir dəqiqəlik sükutla yad olunub.

Prezident İlham Əliyev: Allah bütün şəhidlərimizə rəhmət eləsin.

Alınmaz qala sayılan Şuşanı iki il bundan əvvəl erməni işğalından azad edən Azərbaycan Silahlı Qüvvələri şanlı tarix yazdı. Bu şanlı tarix bizimlə əbədi olacaq. Azərbaycan xalqı, gələcək nəsillər bu şanlı Qələbə ilə haqlı olaraq fəxr edəcəklər.

Şuşa həqiqətən alınmaz qala sayılır. Şuşanı yüngül silahlarla təchiz edilmiş qəhrəman hərbçilərimiz azad edəndə onlar ölümə gedirdilər. Vətən uğrunda, torpaq uğrunda ölümə gedirdilər. Hər birimiz yaxşı anlayırdıq ki, Şuşasız bizim tam qələbəmiz mümkün olmayacaq.

Müharibə dövründə çoxsaylı müsahibələrdə mən müharibənin gedişatı ilə bağlı bəzi məqamları açıqlayırdım. Təbii ki, hər şeyi deyə bilmirdim. Xüsusilə gələcək planlar haqqında bir çox şeyləri deyə bilmirdim. Verilən suala cavab olaraq cəmi bir dəfə demişdim ki, Şuşasız bizim qələbəmiz yarımçıq olacaq. Əminəm, Azərbaycan xalqı yaxşı anladı ki, bizim son məqsədimiz, müharibənin son məqsədi Şuşanı işğaldan azad etməkdir. Təkcə ona görə yox ki, Şuşa Qarabağın tacıdır. Ona görə yox ki, Şuşanın strateji yerləşməsi faktiki olaraq onun azad olunmasından sonra müharibənin taleyini həll edirdi. O cümlədən ona görə ki, Şuşa Azərbaycan xalqının ürəyidir, canıdır, hər bir azərbaycanlı üçün müqəddəs yerdir. Hər dəfə Şuşada olarkən, - mən son iki il ərzində Şuşada on dəfədən çox olmuşam, - hər dəfə Zəfər yolu ilə Şuşaya yaxınlaşarkən mən də əminəm ki, hər bir insan bir daha hərbçilərimizin qəhrəmanlığını, fədakarlığını, peşəkarlığını görür. Çünki “Zəfər yolu” adlandırılan yol cəmi iki ilə yaxındır ki çəkilib. Qəhrəman övladlarımız dağlardan, meşələrdən, dərələrdən, cığırlardan bu uzun məsafəni qət edərək, qanlı döyüşlərdə düşməni məğlub edərək Şuşaya yaxınlaşıb. Ondan sonra sıldırım qayalara dırmaşaraq, yüngül silahlarla küçə döyüşlərində, şəhər döyüşlərində, əlbəyaxa döyüşlərdə düşməni məğlub edib, torpağımızdan qovub, üçrəngli bayrağımızı Şuşada qaldırıb. Bu tarixi gündən cəmi iki il keçib və iki il ərzində bir çox hadisələr baş verib. İllər keçdikcə hərbçilərimizin qəhrəmanlığı hər kəs üçün daha bariz şəkildə aydın olacaq.

Şuşaya gedən yol 27 sentyabr tarixində başlamışdır. Müharibənin ilk günündən son gününə qədər Azərbaycan Silahlı Qüvvələri yalnız irəli gedirdi, 44 gün ərzində bir gün də geri addım atmamışdı. Halbuki, biz dünya hərb tarixindən bilirik ki, belə çətin müharibələrdə, xüsusilə bizim üçün əlverişsiz relyef şəraitində gedən müharibələrdə manevrlər də olur, geriyə addımlar da olur və gözlənilməz hadisələr də olur. Ancaq bizi Qələbəyə aparan güclü iradə idi, Vətən sevgisi idi, hərbçilərimizin peşəkarlığı idi. Sentyabrın 27-də - müharibənin birinci günündə altı kənd azad olunanda Azərbaycan xalqı daha da inandı ki, biz istədiyimizə nail olacağıq, tarixi missiyamızı yerinə yetirəcəyik.

Biz 44 gün ərzində yalnız irəli gedirdik. Şuşaya qədər bir çox şəhər və kəndlərimiz, o cümlədən Cəbrayıl, Hadrut, Füzuli, Zəngilan, Qubadlı, Suqovuşan, 300-ə yaxın kənd, Laçının və Kəlbəcərin bir hissəsi döyüş meydanında azad edilmişdir. Şuşanın azad edilməsi Ermənistan ordusunun belini qırdı. Faktiki olaraq, müharibənin ilk günlərindən Ermənistan təşviş içində idi, bəzi hallarda panikaya qapılırdı, isterikaya qapılırdı. Məhz buna görə də Ermənistan ordusunda 10 mindən çox fərari olmuşdur, onların özlərinin etirafıdır. Azərbaycan Ordusunda bir nəfər də olsun fərari olmamışdır. Bu, xalqımızın yüksək mənəvi keyfiyyətlərindən xəbər verir. Hərbçilərimiz ölümə gedirdilər, “öldü var, döndü yoxdur” şüarı ilə döyüşlərə gedirdilər, bir nəfər də olsun fərari olmamışdır. Bu, xalqımızın qəhrəmanlığıdır və onu göstərir ki, elə gözəl gənc nəsil yetişdi ki, onların bir çoxları Qarabağı, Zəngəzuru heç vaxt görməmişdilər, televiziyalarda, fotoşəkillərdə, valideynlərin, böyüklərin söhbətlərində bu müqəddəs torpağa yaxınlaşırdılar. Ancaq onlar gəldilər və xalqımızın tarixi missiyasını şərəflə yerinə yetirdilər.

Qələbəyə gedən yol keşməkeşli və çətin idi. Birinci Qarabağ müharibəsindəki məğlubiyyət xalqımızı mənəvi cəhətdən sarsıtmışdır. O məğlubiyyətin də səbəbləri bəllidir. O vaxt antimilli ünsürlər hakimiyyəti zəbt etmişdilər, hakimiyyət uğrunda mübarizə aparmışdılar, Şuşa kimi alınmaz qalanı faktiki olaraq Ermənistana, ermənilərə təslim etmişdilər hakimiyyətə gəlmək üçün və belə də oldu. Şuşa və Laçın işğala məruz qalandan bir ay sonra AXC-Müsavat cütlüyü hakimiyyətə gəldi. Onlar bu faciə üzərində, tökülən bu qan üzərində, milli rəzalət üzərində hakimiyyətə gəldilər və hakimiyyətdə qaldıqları bir il ərzində ölkəmizi bərbad vəziyyətə qoydular, vətəndaş müharibəsinə start verdilər, öz əsgərlərini əsir götürdülər. Torpaqlar əldən gedirdi, onlar isə talançılıq, soyğunçuluqla məşğul olurdular. Hakimiyyəti möhkəmləndirmək üçün bütün səylərini səfərbər etmişdilər.

Yəni, Birinci Qarabağ müharibəsində məğlubiyyət labüd idi. Çünki antimilli hakimiyyət müharibədə qələbə qazana bilməz. İşğal dövründə Ermənistanın rəsmi təbliğatı, onların havadarlarının media resursları bir fikri bütün dünyaya, eyni zamanda, Azərbaycan xalqına bildirməyə çalışırdı ki, Azərbaycan öz ərazi bütövlüyünü heç vaxt müharibə yolu ilə bərpa edə bilməz. Beynəlxalq qurumların nümayəndələrinin, bu məsələ ilə məşğul olan ölkələrin vəzifəli şəxslərinin çıxışlarına baxmaq kifayətdir. Onlar neçə dəfə demişdilər ki, bu müharibənin, bu münaqişənin hərbi həlli yoxdur. Yəni, birincisi, bizi inandırmağa çalışırdılar. İkincisi, bizi məsələni hərbi yolla həll etməkdən çəkindirməyə çalışırdılar. Biz də təbii ki, çalışırdıq bu məsələ sülh yolu ilə həll olunsun, ancaq həll olunsun. Amma biz görürdük ki, sadəcə olaraq, danışıqlar taktikası məsələnin dondurulmasına aparır və əlbəttə ki, bununla heç vaxt razı ola bilməzdik.

Nəhayət, Azərbaycan xalqı bir yumruq kimi birləşərək tarixi missiyasını yerinə yetirdi. Müharibəyə gedən yol bir çox istiqamətlərdən keçmişdir. İlk növbədə, biz özümüz ordumuzu lazımi silahlar və texnika ilə təchiz etməli idik. Bunun üçün də güclü iqtisadiyyat olmalı idi. Azərbaycan müstəqilliyi əldə edəndə bizim maliyyə, iqtisadi vəziyyətimiz çox ağır idi. Ona görə güclü iqtisadiyyatın yaradılması müharibədə qələbənin qazanılması işində önəmli amil kimi nəzərə alınırdı və biz bunu etdik. Bizim iqtisadiyyatımız gücləndi, biz öz hesabımıza yaşayırıq, heç kimin yardımına ehtiyacımız yoxdur, heç kimdən asılı deyilik, özümüz imkan daxilində öz həyatımızı qururuq və yaxşı da qururuq.

İndi dünyada müxtəlif yerlərdə gedən iqtisadi proseslər, çətinliklər, böhranlar onu göstərir ki, Azərbaycan iqtisadiyyatı dayanıqlı iqtisadiyyatdır. Belə ağır müharibədən çıxmış ölkə azad edilmiş torpaqlarda iki il ərzində genişmiqyaslı quruculuq işləri aparır. Bütün bu işlərin də maliyyə mənbəyi Azərbaycan büdcəsidir. Biz bu iki il ərzində heç bir ölkədən, heç bir təşkilatdan, heç bir donordan bir manat belə yardım almamışıq. Əlbəttə, əgər kimsə yardım etmək istəsə, biz etiraz etmərik. Ancaq heç kim bizə yardım etmir və etməyəcək. Güclü iqtisadiyyat ordu quruculuğunda əsas amillərdən biridir. Biz bunu etdik, yaratdıq və iqtisadi asılılığı tamamilə aradan qaldırdıq. Əgər biz kimdənsə iqtisadi cəhətdən asılı olsaydıq, müharibəni uğurla başa vura bilməzdik.

Eyni zamanda, biz Ermənistanın işğalçılıq siyasətini ifşa etməli idik. Çünki əfsuslar olsun Ermənistanın nəzarətində olan beynəlxalq media resursları, satılmış siyasətçilər, onların xaricdəki havadarları, erməni lobbisi - onlar belə bir rəy yaratmışdılar ki, sanki Azərbaycan təcavüzkardır. Azərbaycan torpaqları işğal altına düşən zaman bəzi ölkələr bizə qarşı sanksiyalar tətbiq etmişdilər. Yəni, biz öz diplomatik imkanlarımızdan faktiki olaraq istifadə etmirdik. Ona görə bütün dünyaya sübut etməli idik ki, biz haqlıyıq, haqq-ədalət bizim tərəfimizdədir, beynəlxalq hüquq bizim tərəfimizdədir. Ona görə beynəlxalq müstəvidə çox fəal iş aparırdıq. Aparıcı beynəlxalq təşkilatlar – BMT, ATƏT, Avropa İttifaqı, Qoşulmama Hərəkatı, İslam Əməkdaşlıq Təşkilatı, Avropa Şurası bizim mövqeyimizi dəstəkləyən, yəni, haqq-ədaləti ifadə edən qərar və qətnamələr qəbul etmişdir. Yəni, bu, çox önəmli beynəlxalq hüquqi zəmin idi.

Bununla paralel olaraq, bir çox ölkələrlə ikitərəfli formatda sıx əməkdaşlıq əlaqələri yaratmışıq, həm yerləşdiyimiz bölgədə, həm də digər qitələrdə. Təkcə Avropa İttifaqına üzv ölkələrin doqquzu, digər ölkələr Azərbaycanla strateji tərəfdaşlıq bəyannamələri imzalayıb. Bu da Avropa İttifaqına üzv ölkələrin üçdəbir hissəsidir. Yəni, bu beynəlxalq əlaqələr və Azərbaycanın beynəlxalq nüfuzu bizə imkan verdi ki, daha çox dostlar qazanaq, eyni zamanda, Qarabağ həqiqətlərini, erməni işğalı ilə bağlı həqiqətləri dünya birliyinə çatdıraq və çatdırdıq. Bütövlükdə götürəndə 44 gün ərzində müharibə ilə bağlı beynəlxalq yanaşma müsbət idi. Düzdür, bəzi ermənipərəst ölkələr və Ermənistanla yaxın əlaqələrdə olan ölkələr bizə qarşı bəzi siyasi addımlar atmağa çalışırdılar. Amma onlar da heç bir səmərə vermədi. Çünki biz bu illər ərzində güclü beynəlxalq dəstək qazandıq. Biz Qoşulmama Hərəkatına sədr seçildik. Bizim sədrliyimiz yekdil qərarla təsdiqləndi. Sədrliyimiz yekdil qərarla daha bir il uzadıldı. Bu da dünya birliyinin əksər hissəsini birləşdirən beynəlxalq təsisatdır. Bu təsisata 120 ölkə üzvdür. Biz müsəlman ölkələri ilə sıx əlaqələr qurduq və onlara izah etməyə nail olduq ki, Ermənistan təkcə bizə qarşı yox, bütün müsəlman aləminə qarşı təcavüzkar siyasət aparır. Məscidləri dağıdan müsəlman ölkələri ilə dost ola bilməz. Məscidləri dağıdana müsəlman ölkələrinin rəhbərləri qucaq aça bilməz, bilər? Onları qucaqlayıb öpə bilər? Bu, riyakarlıqdır, bu, satqınlıqdır. Bunun başqa adı yoxdur. Ona görə müsəlman aləmində biz Ermənistanı əsas dayaqlardan təcrid etdik. Düzdür, tam təcrid edə bilmədik, bunun başqa səbəbləri var - bax, dediyim riyakarlıq. Ancaq bütövlükdə Ermənistan müsəlman aləmində məscidləri dağıdan, təhqir edən ölkə kimi tanındı və bunu biz etdik.

Bizim vətənpərvərlik məsələləri ilə bağlı çox fəal siyasətimiz olmuşdur. Gənc nəsli vətənpərvərlik ruhunda tərbiyə etmək Prezident kimi mənim siyasətimin əsas istiqamətlərindən biri idi və buna nail olduq. Gənclərimiz vətənpərvərdir, Vətənə bağlıdır və İkinci Qarabağ müharibəsi bunu göstərdi. Bir daha demək istəyirəm, heç vaxt Qarabağı görməyən gənclərimiz Qarabağ uğrunda ölümə getməyə hazır idilər və ölümə gedirdilər, cəmiyyətdə milli birlik, milli həmrəylik ideyaları üstünlük təşkil etdi. Eyni zamanda, Azərbaycanda yaşayan bütün xalqlar mənim apardığım siyasət nəticəsində daha sıx birləşdilər. Mən dəfələrlə deyirdim, bu gün də deyirəm, biz böyük ailəyik. Azərbaycanda yaşayan bütün xalqlar bir böyük ailənin üzvləridir. Yaxşı günlərdə, ağır günlərdə bir yerdəyik və bu birlik dünya miqyasında nadir dəyərdir. Baxın, biz başqa ölkələrin timsalında milli, dini, etnik zəmində narazılıq, toqquşma, inamsızlıq görürük. Azərbaycanda nə görürük - birlik, qardaşlıq, dostluq! Azərbaycanda yaşayan bütün xalqlar Qarabağ uğrunda ölümə gedirdilər. Bu, bizim böyük dəyərimizdir. Biz bunu, bu dəyəri daim qoruyub saxlamalıyıq, gücləndirməliyik. İkinci Qarabağ müharibəsi ölkəmizdə milli həmrəyliyi, milli birliyi daha da gücləndirdi, ölkəmizi gücləndirdi. Biz bu ağır yükü çiynimizdən atdıq, bu damğanı boynumuzdan atdıq. Biz indi başımızı dik tutub istənilən tədbirdə, istənilən formatda sözümüzü deyirik. Biz üzümüz ağ, alnımız açıq, müzəffər xalq kimi yaşayırıq. Buna görə sizə və sizin kimi on minlərlə hərbçiyə borcluyuq. Azərbaycan xalqı bunu bilir və yaxşı qiymətləndirir.

Əlbəttə, müharibədə uğur qazanmaq üçün biz çox önəmli layihələri icra etməli idik və etdik. Bu gün dünyanın və bizim bölgəmizin enerji-nəqliyyat xəritələrinə baxmaq kifayətdir ki, hər kəs görsün bizim təşəbbüsümüzlə icra edilən layihələr həm ölkəmizə, həm də bizim tərəfdaşlarımıza nə qədər böyük fayda gətirib. Bizim təşəbbüsümüzlə nəqliyyat və enerji layihələrində iştirak edən ölkələrin sayı onlarla ölçülür. Hələ indiki mərhələdə daha geniş vüsət alacaq və bütün bu ölkələr bizim təbii dostlarımızdır, müttəfiqlərimizdır. Eyni zamanda, bu layihələr bizə əlavə maliyyə imkanı yaratdı. Biz, ilk növbədə, bu maliyyə imkanlarını hərbi potensialın gücləndirilməsinə yönəltdik. Mənim prezidentlik dövrümdə əgər dövlət büdcəsinin xərclərinə nəzər salsaq, görərik ki, birinci yerdə hərbi xərclərdir, birinci yerdə. Halbuki, ölkənin başqa ehtiyacları var. Bir milyona yaxın məcburi köçkünün də problemlərini biz həll edirdik, onları da biz yeni evlərlə təmin edirdik. Sosial problem, maaşlar, pensiyalar, bunları da biz artırmalı idik və artırırdıq. Daha çox artırmaq istəyirdik və istəyirik. Ancaq, ilk növbədə, orduya, ilk növbədə, Qələbəyə aparan yola daha böyük maliyyə dəstəyi verirdik. Bu gün də belədir. Gələn il üçün Azərbaycanın dövlət büdcəsi rekord həddə çatıb, o cümlədən hərbi xərclərə ayrılacaq vəsait də rekord həddə çatıb. Sual oluna bilər nə üçün, müharibə arxada qaldı, iki il keçib. Cavab çox sadədir. Ermənistanda revanşist qüvvələr baş qaldırır. Ermənistanda müharibənin nəticələri ilə barışmaq istəməyən qüvvələr, dairələr baş qaldırır. Ermənistan 2020-ci ilin 10 noyabr Bəyanatına tam əməl etmir, öz silahlı qüvvələrini Qarabağdan tam çıxarmayıb, Zəngəzur dəhlizini bizə təqdim etməyib, bizə qarşı vaxtaşırı hərbi təxribatlar törədir. Əlbəttə ki, biz hazırlıqlı olmalıyıq və biz hazırıq.

Mən deyə bilərəm ki, son iki il ərzində Silahlı Qüvvələrimiz daha da güclənib. Həm struktur islahatları, həm yeni birləşmələrin yaradılması, eyni zamanda, mövcud olan birləşmələrin sayının artırılması, silah-sursatla təchizat, yeni texnika ilə təchizat ən yüksək səviyyədədir. İndiki Azərbaycan Ordusu iki il bundan əvvəlki Azərbaycan Ordusundan daha güclüdür və bunu hər kəs bilməlidir, Ermənistan və hər kəs!

Ona görə Qələbəyə aparan yol müxtəlif istiqamətlərdən keçmişdir. Əlbəttə ki, güclü Silahlı Qüvvələrin yaradılması əsas vəzifə idi və biz bunu yaratdıq. Bununla paralel olaraq, ölkədə uzun illər ərzində daxili sabitlik, əmin-amanlıq, təhlükəsizlik, əlbəttə ki, bizi gücləndirirdi. Çünki yenə də deyirəm, mən heç vaxt müqayisə aparmaq istəmirəm, - amma indiki dünyada heç nəyi gizlətmək mümkün deyil, hər şey göz qabağındadır, - bir çox ölkələr daxili problemlərin içində çabalayır, bir çox ölkələrdə daxili böhran hökm sürür, qarşılıqlı inamsızlıq, ictimai asayişin pozulması, xalq-iqtidar arasındakı uçurum. Bizdə nə görürük - daxili sabitlik, milli birlik, milli həmrəylik, xalq-iqtidar birliyi. Bax, bu, bizim siyasətimizin böyük nəticəsidir. Bizim bütün addımlarımız və mənim Prezident kimi 2003-cü ildən bu günə qədər bütün addımlarım Azərbaycanın gücləndirilməsinə yönəldilmişdir. Vətən müharibəsinə qədər bütün addımlarım bir amala xidmət edirdi ki, biz torpaqlarımızı azad edək, düşməni torpağımızdan qovaq və biz buna nail olduq. Mən işğal dövründə deyirdim, bir neçə dəfə deyirdim, hər birimiz azadlıq gününü, bu müqəddəs günü öz işimizlə yaxınlaşdırmalıyıq, yaxınlaşdırırdıq və yaxınlaşdırdıq. Düşmənə elə sarsıdıcı zərbə endirdik ki, bu günə qədər özünə gələ bilmir. İndi Ermənistanda gedən proseslərə baxın, indi onlar öz hirsini, öz zəhərini artıq öz aralarında bölüşürlər. Görün, bu iki il ərzində orada hansı proseslər gedir.

İkinci Qarabağ müharibəsinin dərsləri Ermənistan tərəfindən unudulmamalıdır və onlar bilməlidirlər ki, odla oynamaq onlara baha başa gələcək. Əgər orada kimsə – istər iqtidar, istər müxalifət, istərsə də xaricdən göndərilmiş, öyrədilmiş hansısa ünsür yenidən bizə qarşı hansısa bəd fikirdə olmaq niyyətindədirsə, o, bizim yumruğumuzu bir daha görəcək və son iki ilin tarixi bunu göstərdi. Hətta bu il “Fərrux” əməliyyatı, “Qisas” əməliyyatı, 13-14 sentyabr Ermənistan-Azərbaycan sərhədindəki hadisələr - bütün bunlar Ermənistan üçün dərs olmalıdır. Biz bu dərsi öyrədirik və ümid edirik ki, nəhayət, onlar bunu anlayacaqlar, boyunlarını büküb öz daxili işləri ilə məşğul olacaqlar, bizim torpağımıza göz dikməyəcəklər, Qarabağa göz dikməyəcəklər. Qarabağ bizim torpağımızdır. Rus sülhməramlılar orada müvəqqəti yerləşiblər, 2020-ci ilin 10 noyabr Bəyanatında onların müddəti göstərilir və əgər kiməsə bel bağlayırlarsa, yenə də faciə ilə üzləşəcəklər.

Biz, sadəcə olaraq, bütün beynəlxalq razılaşmalara həmişə hörmətlə yanaşırıq. Biz ədalətli insanlarıq və ədalətli ölkəyik. Əgər biz hansısa öhdəliyi öz üzərimizə götürmüşüksə, onu yerinə yetiririk. Biz 2020-ci ilin 10 noyabr Bəyanatında üzərimizə götürdüyümüz bütün öhdəlikləri yerinə yetiririk, iki ildir ki, yerinə yetiririk, amma Ermənistan yerinə yetirir? Yox! İkinci Qarabağ müharibəsindən dərhal sonra, sadəcə olaraq, o qədər qorxu içində idi ki, təbii, o müddəaları yerinə yetirmişdir və bir güllə atılmadan Ağdam, Kəlbəcər və Laçın rayonlarının işğal altında olan əraziləri bizə qaytarıldı. Əgər qaytarmasaydı, yenə də başlarını əzəcəkdik. Amma ondan sonra? Ondan sonra yenə vaxt uzatmağa başladı. Mən bir daha demək istəyirəm, o öhdəlik hələ tam yerinə yetirilməyib. Erməni silahlı qüvvələri Qarabağda nə gəzir? Bizim səbrimiz tükənməz deyil və bir daha xəbərdarlıq etmək istəyirəm, əgər bu öhdəlik yerinə yetirilməsə, Azərbaycan lazımi addımlar atacaq.

Zəngəzur dəhlizi Ermənistanın öhdəliyidir, öz üzərinə öhdəlik götürüb. Biz iki il ərzində Laçın yolu ilə Ermənistandan Qarabağa və əks istiqamətə gedən maşınlara toxunmuruq. Biz öhdəlik götürmüşük, yerinə yetiririk, sərbəst hərəkət. Ermənistan da öhdəlik götürüb ki, Azərbaycanın qərb rayonları ilə Naxçıvan Muxtar Respublikası arasında yol bağlantısı olsun. İki il keçib üstündən, nə texniki-iqtisadi əsaslandırma var, nə hansısa hərəkət var, nə dəmir yolu, nə də avtomobil yolu. Biz nə vaxta qədər gözləməliyik?

13-14 sentyabr hadisələri elə-belə baş vermədi. Təbii ki, Ermənistan bizə qarşı növbəti hərbi təxribat törətmişdir. Amma cavabımız da çox təsirli oldu. Cavabımız bir qədər az da ola bilərdi, əgər onlar öz üzərilərinə götürdükləri öhdəliklərə əməl etsəydilər. Cavabımız daha sərt ola bilərdi, əgər biz yeni müharibə istəsəydik. Biz bunu istəmirik, qan tökülməsini istəmirik. Sadəcə olaraq, haqqımızı istəyirik.

13-14 sentyabr əməliyyatından sonra Azərbaycan-Ermənistan sərhədi istiqamətində əsas strateji yüksəkliklərdə Azərbaycan Silahlı Qüvvələri yerləşib. Ermənistan gözəl anlamalıdır bu, nə deməkdir. Bu gün həmin strateji yüksəkliklərdən Qarakilsə, Qafan, Gorus, İstisu şəhərlərini biz gözlərimizlə görürük. Biz Bala Göyçə gölünün sahilindəyik. Böyük Göyçə gölü də gözümüzün önündədir. Bütün bunlar reallıqlardır. Bu reallıqları biz yaratmışıq, Vətən müharibəsindən sonra. Nə üçün? İlk növbədə, Ermənistanın hərbi təxribatlarına cavab olaraq, digər tərəfdən, özümüzü gələcək hərbi təxribatlardan sığortalamaq üçün. Çünki dediyim yüksəkliklərdən Ermənistanın əksər postları görünür və əgər orada qüvvələrin konsentrasiyası baş verərsə, biz bunu görüb dərhal tədbir görəcəyik. Eyni zamanda, ona görə ki, Ermənistan öz beynəlxalq öhdəliklərini yerinə yetirmir. Ermənistan İkinci Qarabağ müharibəsində məğlub olub, ordusu darmadağın edilib. Məğlub edilmiş ölkə özünü belə apara bilməz. Ona görə bizim bütün addımlarımız əsaslıdır. Düzdür, Ermənistanın bəzi xarici havadarları bizi nədəsə günahlandırmaq istəyirlər. Onların cavabını da mən vermişəm. Yenə də nəsə banlasalar, yenə də cavablarını verərəm. Bu, məni dayandırmaz. Amma fakt odur ki, biz öz haqqımızı tələb edirik və Azərbaycanın haqlı olması böyük beynəlxalq aktorlar tərəfindən sual altına qoyulmur.

Bir sözlə, müharibədən keçən iki il ərzində biz öz siyasətimizi davam etdirmişik. Biz iki il ərzində böyük quruculuq işləri görmüşük, Qarabağı və Şərqi Zəngəzuru faktiki olaraq yenidən qururuq və quracağıq. Eyni zamanda, Ordumuzu gücləndiririk və gücləndirəcəyik. Ermənistan bilməlidir ki, bizi indiki çərçivələrdə saxlayan Ermənistanın hansısa havadarının bəyanatı deyil, bizim öz siyasətimizdir. Biz heç kimdən qorxmuruq, heç kimdən çəkinmirik. Əgər biz kimdənsə qorxsaydıq, heç vaxt İkinci Qarabağ müharibəsinə start verməzdik. Biz hər birimiz ölümə gedirdik, öldü var, döndü yoxdur, ya azadlıq, ya ölüm! İndi də ölümə getməyə hazırıq öz haqlarımızı tələb edərək. Çünki hələ də, - müharibə iki il bundan əvvəl başa çatsa da, - narahatedici məqamlar var və erməni xalqına müraciət edib sözümü demək istəyirəm. Onlar bu otuz ilin işğalının acılarını indi görürlər. İşğal nədir, itki nədir, indi görürlər. Biz, sadəcə olaraq, onlara cavab vermişik, biz öz torpağımızda vuruşmuşuq, işğalçını torpaqlarımızdan qovmuşuq. Onlar bunu anlamalıdırlar ki, xaricdə oturan və bu bölgəyə bir oyun meydançası kimi baxmaq istəyən dairələrin qurbanına ikinci dəfə çevrilməsinlər. Biz burada əsas söz sahibiyik, biz burada əsas güc sahibiyik. Bizim Ordumuz qəhrəmanlıq, peşəkarlıq, fədakarlıq göstərib. Lazım olarsa, bir daha göstərərik, istədiyimizə nail olarıq, bunu hər kəs bilir və bizim sərhədimizdə Ermənistana dəstək olaraq hərbi təlim keçirənlər də bilsinlər. Bizi heç kim qorxuda bilməz. Ermənistan yaxşı qonşuluq siyasəti aparmaq istəyirsə, birincisi, 2020-ci ilin 10 noyabr Bəyanatının bütün müddəalarını yerinə yetirməlidir. Azərbaycanla sülh üzrə aparılan danışıqlarda səmimi olmalıdır. Süni şəkildə vaxt uzatmamalıdır, hansısa möcüzəni gözləməməlidir ki, kimsə gəlib bunların yerinə vuruşacaq. Heç kim gəlib onların yerinə vuruşmayacaq, gəlib vuruşsa da, qarşısında yenə də Azərbaycan Ordusunu görəcək.

Biz sülh istəyirik, biz müharibə istəmirik. Sülh, amma ədalətli sülh. İrəli sürdüyümüz şərtlər ədalətlidir, beynəlxalq hüquqa əsaslanır və sülh müqaviləsi bu şərtlər əsasında imzalanmalıdır. Əgər Ermənistan xoş niyyət göstərsə, bu, imzalanacaq, göstərməsə, imzalanmayacaq. Ondan sonra nə olacaq, onu həyat göstərər.

Dediyim bütün bu sözlərin bir mənbəyi var - həm bizim güclü iradəmiz, həm də Vətən müharibəsindəki Qələbəmiz! Bu Qələbə imkan verir ki, biz bu sözləri hamının üzünə, bizə xor baxanların gözünə deyək. Bu Qələbə, bu Zəfər bizə bu imkanı verdi, bütün xalqımıza inam verdi, ruh verdi. Biz təkcə ərazi bütövlüyümüzü yox, milli qürurumuzu bərpa etdik. Buna görə, əziz hərbçilər, sizə borcluyuq, sizin kimi on minlərlə əsgər, zabitə borcluyuq və Azərbaycan xalqı bunu yaxşı bilir. Mən də Ali Baş Komandan kimi sizinlə fəxr edirəm.

Hərbçilər: Yaşasın Ali Baş Komandan!

Prezident İlham Əliyev: Yaşasın Qarabağ! Yaşasın Azərbaycan!

Sonra xatirə şəkli çəkdirildi.

Sonda hərbi qulluqçuların təntənəli keçidi oldu.
Şuşaya daxil olmağımıza heç bir qüvvə mane ola bilməzdi - GENERAL“Vətən müharibəsi zamanı Şuşaya daxil olmağımıza heç bir qüvvə mane ola bilməzdi”.

Avrasiya.net Report-a istinadən xəbər verir ki, bunu Vətən Müharibəsi Qəhrəmanı, Ordu birliyinin komandiri general-mayor Kənan Seyidov deyib.

Azərbaycanın mədəniyyət paytaxtı uğrunda gedən döyüşlərin komandanlarından biri olmuş general bildirib ki, hərbi qulluqçular əvvəlcə Şuşa yüksəkliklərinə nəzarəti təmin edib, daha sonra şəhərə girmək üçün fürsət gözləyib:

“1986-cı ildə Şuşada düşərgədə olmuşdum. Həmin hadisənin üzərindən illər keçəndən sonra Şuşanın işğaldan azad olunması əməliyyatında iştirak etdim. Döyüşlər zamanı duman çəkiləndən sonra Şuşanı görəndə çox həyəcan keçirdik. Həmin anları heç vaxt unutmaram. O zaman əmin olduq ki, biz şəhərə girəcəyik”.

Onun sözlərinə görə, həmin vaxt Azərbaycan Ordusu bütün çətinliklərə rəğmən, qarşıya qoyulmuş tapşırıqları yerinə yetirməyə hazır idi:

“Düzdür, Şuşanın relyefi çox çətindir. Bu, bizim işimizi xeyli çətinləşdirirdi. Amma Şuşaya daxil olmağımıza və orada möhkəmlənməyimizə heç nə, heç bir qüvvə mane ola bilməzdi”.

“Şuşaya daxil olarkən çox böyük qürur hissi keçirdik. Həmin hisləri sözlə ifadə etmək mümkün deyil. Şuşa bizim üçün çox əhəmiyyətli idi. Şükür ki, bu müqəddəs tapşırığı layiqincə yerinə yetirdik”, - Vətən Müharibəsi Qəhrəmanı vurğulayıb.

Qeyd edək ki, K.Seyidov İkinci Qarabağ müharibəsi zamanı Müdafiə Nazirliyinin Xüsusi Təyinatlı Qüvvələri komandanının birinci müavini - qərargah rəisi olub. Prezident İlham Əliyevin 2020-ci il noyabrın 20-də imzaladığı sərəncamla Vətən müharibəsinin komandirlərindən biri olmuş K.Seyidova general-mayor ali hərbi rütbəsi verilib.

O, daha sonra Prezidentin müvafiq sərəncamına əsasən, Ordu birliyinin komandiri təyin olunub.
Güney Azərbaycanlıların Milli Azadlıq Cəbhəsindən bayram təbrikiNoyabr ayının 8-də 2020-ci il tarixdə 29 il işğaldan sonra qəhrəman Azərbaycan ordusu Şuşa şəhərini erməni işğalından azad etməklə Azərbaycan tarixinə şərəfli bir gün yazdı. Qarabağın döyünən ürəyi, musiqi və incəsənət beşiyi olan Şuşanın azad olunması ilə Azərbaycan öz dövlət sərhədlərinin təmamilə bərpa edilməsi sürəcinə girmiş oldu. Məhz Şuşa qələbəsindən sonrakı mərhələdə diplomatik danışıqlarla erməni işğalçıları Laçın, Kəlbəcər və Ağdam bölgələrindən qeyri-şərtsiz çıxarıldılar.

44 günlük ikinci Vətən müharibəsində Şuşa ilə bərabər Azərbaycanın digər strateji əhəmiyyətli yaşayış bölgələri də işğaldan azad edildi. Azad olunmuş ərazilərimizdə yenidən dalğalanan Azərbaycanın dövlət bayrağı millətimizə qürur hissi yaşatmaqla yanaşı, Azərbaycanı regional və qlobal proseslərdə söz sahibinə çevirdi. Bu sürəcdə Türkiyə dövlətinin mənəvi və hərbi dəstəyini yanına alan Azərbaycan dövləti həm də bunu sübut etdi ki, türk dövlətlərinin birlikdə əməkdaşlıq ideyası gerçək əsaslara dayanır. 2021-ci il iyunun 15-də Şuşa şəhərində Türkiyə və Azərbaycan arasındakı müttəfiqlik münasibətləri haqqında imzalanmış Şüşa Bəyannaməsi bunun sübutudur.

44 günlük savaş sürəcində və ondan sonrakı proseslərdə İran fars rejiminin Azərbaycan dövlətinə qarşı ermənipərəst mövqeyinin qarşısında Güney Azərbaycanda yaşayan çoxmilyonlu Azərbaycan Türklərinin dirənişi, Azərbaycan dövləti və ordusuna verdiyi mənəvi dəstək, taleyin hökmü ilə coğrafi anlamda 200 illik parçalanmaya məruz qalmış bir millətin əslində vahid milli birlik ideyası ilə Bütöv Azərbaycana doğru irəlilədiyini göstərdi. Məhz bu doğrultuda Güney Azərbaycanda yaşayan azərbaycan türkləri Azərbaycan Respublikasının prezidenti cənab İlham Əliyevin 21 oktyabr 2022-ci il tarixdə Azərbaycanın dövlət sərhədlərinin hüdudlarından kənarda yaşayan çoxmilyonlu azərbaycanlılara verdiyi tarixi mesajı Güney Azərbaycanda daha bir tarixi zəfər gününə çağırış olaraq qəbul edir.

8 noyabr Zəfər günü güneyli və quzeyli bütün azərbaycanlılar üçün mədəniyyət beşiyi Şüşanın azad olunduğu gün, bu zəfər tariximizi gerçəkləşdirən şəhidlərimizin ruhu, qazilərimizin və müzəffər Azərbaycan ordusu qarşısında sayğı duruşu günüdür.

Biz GAMAC olaraq, Zəfər günü münasibətilə ilə həm savaş, həm də siyasət meydanda cəsarət və müdriklik göstərən Ali Baş Komandan cənab İlham Əliyev başda olmaqla, bütün dünya azərbaycanlılarını, Azərbaycanın müzəffər Ordusunu, qəhrəman qazılərimizi təbrik edir, bu tarixi gündə şəhidlərimizi sayğı ilə anır və onların qəhrəmanlığını alqışlayırıq.

Rusiya İrana bu məsələdə yardım etsə...“Fateh-110” və “Zülfüqar” ballistik raketləri müqabilində əgər Rusiya İrana nüvə proqramının həyata keçirilməsini sürətləndirməyə kömək etsə, təkcə Ukrayna və Yaxın Şərqi yox, bütün dünya ciddi təhlükə ilə üz-üzə qalar.

Axar.az xəbər verir ki, bu sözləri ukraynalı ekspert Anatoli Amelin deyib.

Ekspertin sözlərinə görə, İranda vəziyyət təkcə etirazlara görə qarışıq deyil:

"İran Rusiya ilə birlikdə nüvə silahının yayılması üçün faktiki presedent yaradır. Rusiyanın taktiki nüvə silahından istifadə edib-etməyəcəyinə heç kim əmin ola bilmir. Lakin ABŞ artıq 18 min km-ə qədər mənzilə malik 24 qitələrarası raket daşıya bilən sualtı qayığını Aralıq dənizinə köçürüb".
"Təzə Pir” məscidinin rəisi vəfat edib"Təzə Pir” məscid kompleksinin rəisi Hacı Hatəm Mirzəyev vəfat edib.

"Report" xəbər verir ki, o, noyabrın 7-si axşam saatlarında 65 yaşında dünyasını dəyişib.

Məlumata görə, mərhum bu gün dəfn ediləcək.

Qeyd edək ki, Hatəm Musa oğlu Mirzəyev 1957-ci ildə Bakıda dünyaya gəlib. O, 2010-cu ildən "Təzə Pir” məscid kompleksinin rəisi vəzifəsində çalışırdı.
İranın Azərbaycan və İsrailə qarşı təhdidlərinə etirazİsrail Təhlükəsizlik Akademiyasının Azərbaycan dövlətini və xalqını Azərbaycan Respublikasının oktyabrın 18-də Dövlət Müstəqilliyinin Bərpası günü münasibətilə təbrik etməsi və Azərbaycana dəstək ifadə etməsi‚ İran İslam Respublikası tərəfindən həddsiz qısqanclıqla qarşılanmış və hazırda 35-40 milyona yaxın Güney Azərbaycanlını əsir edən onları qanlı əsarətdə saxlayan və 1828-ci il fevralın 10-da bağlanmış Türkmənçay müqaviləsi ilə qədim Azərbaycan torpaqlarının 70 faizə qədərini işğal edən və Azərbaycan torpaqlarının üzərində qurulan və İslamı əlində bayrağa çevirən‚ İranda 1979-cu ildə qanuni hakimiyyəti zorla ələ keçirən və qurulduğundan indiyə qədər ancaq terror ocaqları yaradan‚ terrorçu dəstələr və agentura şəbəkə yetişdirən‚ qonşularına qarşı ancaq casusluq‚ kəşfiyyat həyata keçirən‚ qonşularına qarşı ekstremist qüvvələr yaratmağa çalışan qeyri-qanuni və qeyri-legitim saxta İran rejimi riyakarlıqla İsraili işğalçı adlandıraraq Azərbaycan dövləti ilə İsrail dövlətinin qədim tarixi dostluqlara söykənən əzəli dostluğuna hədyanlar yağdırmışdır.

İran özü işğalçıdır və Azərbaycan torpaqları üzərində qurulmuşdur. Bu‚ tarixi faktdır və inkar edilə bilməz. Təbriz‚ Zəncan‚ Ərdəbil‚ Urmiyə‚ Xoy‚ Mərənd‚ Qəzvin‚ Rəşd‚ və s. böyük şəhər və vilayətlər hamısı tarixi Azərbaycan torpaqlarıdır. Bu torpaqlarda fars milliyyəti yoxdur və ölkə çoxluqla Güney Azərbaycanlılardan ibarətdir. Farslar İranda rəsmi statistilk rəqəmlərə görə 15-16 milyondan çox deyil. Belə olan halda 15-16 milyonluq etnik bir xalq 35-40 milyona yaxın böyük Azərbaycan toplumu üzərində necə qanuni hakimiyyətə və üstünlüyə sahib ola bilər?? Fars rejimi Güney Azərbaycan torpaqlarını işğal etmiş və sayca böyük bir xalq olan 35-40 milyonluq Güney Azərbaycanlını əsir etmiş‚ 200 ilə yaxındır ki‚ onları qanlı əsarətdə və boyunduruqda saxlamaqdadır. 35-40 milyonluq bir xalqın başqa millət tərəfindən idarə edilməsi münkünsüz bir haldır. 35-40 milyonluq bir toplumun‚ özü də İran adlanan ölkədəki fars toplimundan sayca 3-4 dəfəyə yaxın artıq olan bir xalqın özünün dövləti və öz ərazisi olmalıdır. Böyük bir xalqı əsarətdə saxlamaq böyük və beynəlxalq bir cinayətdir.

İran rejimi hal-hazırda 35-40 milyona yaxın bir xalqı qanlı əsarətdə saxlamaqla onların bütün hüquqlarını qanlı repressiyalar‚ terrorlar həyata keçirtməklə boğur. İran ordusunu ümimiyyətlə Güney Azərbaycanlılar təşkil edir. Ölkənin tən yarısından çoxu Güney Azərbaycan türküdür. Bütün bunlarla bərabər‚ İran rejimi daim müsəlman ölkəsi olan Azərbaycan Respublikasının 20 faiz torpaqlarını işğal etmiş Ermənistanla daim dostluq qurmuş və mümasibətlər dostluqdan daha da yüksəyə‚ qardaşlıq səviyyəsinə qalxmışdır. İran 30 il ərzində öz doğma qardaşı Ermənistana Azərbaycanla savaşmaq və Azərbaycan torpaqlarını işğalda saxlamaq üçün silah sursat‚ hərbi texnika və digər bütün tələbatları verərək Azərbaycana qarşı dəstəklədi. Məhz bölgədə İranın dəstəyi və diktəsilə Ermənistan silahlı qüvvələri 30 il boyu Azərbaycana qarşı dəhşət saçan hərbi cinayətlər törətdi. İranın dəstəyi ilə işğal edilmiş Azərbaycan torpaqları dağıdıldı və yerlə yeksan edildi‚ Azərbaycan iqtisadiyyatına milyardlarla dollar maddi və mənəvi ziyanlıq dəydi. Azərbaycan torpaqlarına qarşı məhz İranın da İranın dəstəyi ilə həyata keçirilən işğal nəticəsində 1 milyondan çox Azərbaycanlı‚ müsəlman-türk öz tarixi dədə-baba torpağından qaçqın və məcburi köçkün düşmüşdür. Ermənistan silahlı qüvvələri işğal etdiyi Azərbaycan torpaqlarında müsəlman məscidlərini dağıtmış‚ məacidləri‚ dini və ibadət yerlərini mal və donuz tövləsinə çevirmişdir. Bütün bu vandallizm aktlarını törədən‚ heçbir insanlıq qaydalarına sığmayan hərbi və müharibə cinayətləri törətmiş‚ BMT Təhlükəsizlik Şurasının işğalçı adlandırdığı Ermənistanla yüksək dostluq quran İran ali dini rəhbərliyi erməniləri daim İranda hərarətlə və böyük dostluqla qarşılamışdır.

Bu isə o deməkdir ki‚ müsəlman torpağı olan Qarabağın işğal edilməsindən və dağıdılmasına qədər‚ müsəlman məscidlərinin donuz tövləsinə çevrilməsinə qədər iyrənc addımların atılmasında və vandallıq aktlarının törədilməsində İranın rejiminin xüsusi payı vardır. Bütün bunlarla bərabər İran 30 il boyu Ermənistanın işğal etdiyi Qarabağda narkotik əkib-becərmiş və gizli yollarla qara bazarlara çıxararaq öz iqtisadiyyatını yüksəltməyə və narkotik ticarətindən əldə etdiyi 100 milyardlarla dollar maliyyəni terrora və Nüvə silahının istehsalına yönəltmişdir. Eyni zamamda İran Qarabağı talan etmiş‚ öz məqsədləri üçün istifadə etməyə çalışmışdır. Məhz bu səbəbdəndir ki‚ İran rejimi Qarabağın işğaldan azad edilməsinə şiddətlə qarşı çıxmış‚ bunun üçün Ermənistana silah sursat yardımı etmiş və ən əsası isə 44 günlük ikinci Qarabağ müharibəsində İran bütün maddi və texniki imkanlarını səfərbər edərək Ermənistanı silahla təmin etmişdir. İranın bu gün qarşı çıxdığı Zəngəzur dəhlizi vasitəsilə hər gün Qarabağdakı separatçı rejimə silah və hərbi texnika daşınmışdır. Dəfələrlə Güney Azərbaycanlılar İranın Ermənistana və Qarabağdakı separatçı qüvvələrə silah daşıyan yük karvanlarının qarşısını kəsərək yandırmışdır və Güney Azərbaycanlılar İrandan Ermənistana silah daşınan Norduz keçid məntəqəsinin bağlanmasını tələb etmişdilər. İran bu səbəbdən Zəngəzir koridorunun da açılmasına şiddətlə qarşı çıxır. Vaxtilə Azəbaycanın öz tarixi torpaqlarını işğaldan azad edərkən qarşı çıxdığı kimi‚ Zəngəzur dəhlizinə də öz çirkin‚ məkrli siyasəti üçün qarşı çıxır. İran rejimi Azərbaycana olan tarixi düşmənçiliyini açıq aşkar göstərərək Zəngəzurun Qafan vilayətində məhz Azərbaycan Respublikası ilə sərhəddə Konsulluq binasının açılışını etdi. İran bununla bir daha işğalçının yanında olduğunu‚ işğala dəstək verdiyini və özünün işğalçı olduğunu göstərmiş oldu.

2020-ci ilin 44 günlük Qarabağ müharibəsi zamanı İran rejiminin kəşfiyyat orqanları məhz Araz çayı boyunca Azərbaycanla sərhəddə radiolokasiya qurğuları yerləşdirərək Azərbaycan hərbçilərinin səsini dinləyərək erməni kəşfiyyatına ötürmüşdür. Eyni zamanda Azərbaycan ordusunun silahlarına radarlar vasitəsilə təsir etməyə və silahların fəaliyyətinin dondurulmasına çalışmışdır. Bütün bunların fonunda kimin işğalçı olduğu açıü görünür. İsrail heçbir ərəb ölkəsini işğal etməyib. İsrail sadəcə məhz Qurani Kərimdə də uca Allahın Hz. İbrahim ə.s-a və onun nəslinə vəd etdiyi‚ Quran Kərimin bildirdiyi kimi‚ Allah tərəfindən Yəhudilərin atası olan Hz. İbrahim peyğəmbərin və onun nəslinin yurd olaraq verildiyi və sakin edildiyi torpaqlarda yaranmışdır. Burada Allahın heçbir müvafiq əmri pozulmamış və əksinə Allahın buyruğu yerinə yetmişdir. Qurani Kərimdə buyrulur ki‚;Biz İsrailoğullarını gözəl bir yurda sakin etdik.

Və İsrail Qurani Kərimin bildirdiyi‚ Allahın buyurduğu torpaqlarda yaranıb. Yəhudi xalqı minillərdir ki‚ məhz tarixi Kənam torpaqların‚ yəni indiki İsrail ərazilərinin əzəli sakinidir və kimsənin nə torpağını‚ nə təbii sərvətini‚ nə də evini və yurdunu qəsb etməyib. İsrail dövləti heçbir zaman heç kimin dini ibadət yerinin dağıdılmasında da iştirak etməyib. İran rejiminin əksinə olaraq İsrail həm yerləşdiyi öz Coğrafiyasında‚ həm də öz Coğrafiyasından kənarlarda belə hər kəslə‚ bütün xalqlarla və ölkələrə dost olmağa‚ qonşuları ilə mehriban yaşamağa çalışır. İsrail qurulduğu gündən indiyə qədər heçbir sərhəd qonşusu İsrail dövlətindən zərər görməyib. İsrail hər zaman öz qonşularına qarşı barış və sülh təklifi ilə çıxış etmiş və hər kəsə dostluq əlini uzatmışdır. Amma İsraili işğalçı ölkə adlandıran İran rejiminin özü işğalçıdır. Tarixi və əzəli Azərbaycan torpaqlarının üzərində qurulmuş‚ 35-40 milyonluq Güney azərbaycanlını əsir etmiş və böyük bir xalqa kölə siyasəti yeridən‚ onların öz ana dilini‚ milli mənliyini boğan‚ tarixini unutdurmağa çalışan‚ öz müsəlman qonşusu olan Azərbaycan torpaqlarının işğal edilməsində birbaşa iştirak edən və 30 ilə yaxın işğalda qalmasına çalışan‚ daim erməniləri Azərbaycana qarşı təxribatlara sövq edən‚ işğalçı və qəsbkar bir rejimin bir başqasını sadəcə quru iftiralarla işğalçı adlandırması da riyakarlıqdır.

Və təsadüfü deyil ki‚ İranda qanuni hakimiyyəti zorla ələ keçirtmiş Ayətullah Xomeyninin inqilabı həyata keçirtdikdən sonra ilk görüşdüyü şəxs Livandakı erməni Katoliklərinin‚ yəni erməni ASALA terror şəbəkəsinin başçısı olmuşdur. İranda dini rejim qurularkən də Livan və Fələstindəki varlı erməni diaporası və erməni lobbisi Xomeyninin qurduğu dini rejimə‚ yəni İslam (Şiə) Respublikasına maddi dəstək vermişdir. Xomeyninin erməni sevgisi bu gün də İran dövlətinin rəsmi ana siyasətidir. Maraqlıdır ki‚ erməni lobbisi və zəngin erməni diasporası İranda İslam Respublikasının‚ Şiə dövlətinin qurulmasına dəstək verir və ermənilər‚ özünü İslam dünyasının rəhbəri hesab edən bu dövlətin qurulmasında ən fəal qüvvə qismində iştirak edir və bu İslam dövlətində çox önəmli postlara sahib olur‚ məhz özünü bütün İslam dünyasının lideri hesab edən bu İslam Respublikası və Şiə dövləti olan İran rejimi öz qonşuluğundakı müsəlman Azərbaycan Respublikasının torpaqlarının işğal olunmasında‚ 1 milyon müsəlmanın öz dədə-baba torpağından didərgin düşməsində və müsəlman torpaqlarının 30 il boyunca işğalda qalmasında və dağıdılmasında‚ müsəlman məscidlərinin dağıdılmasında və donuz tövləsinə çevrilməsində iştirak edir. Büyün bunlar azmış kimi‚ müsəlman ölkəsi olan Azərbaycan Respublikasının suveren sərhədlərində təxribatların törədilməsinə çalışır və düşmənçiliyini davam etdirir və onra da riyakarcasına İsraili günahlandırır.

Azərbaycan Respublikası müstəqil‚ suveren dövlətdir. Kimsə Azərbaycanln daxili işinə qarışa bilməz. Azərbaycanın öz dövlət siyasəti və dövlət maraqları var. Hər bir suveren ölkə kimi‚ Azərbaycan dövləti də öz siyasətini özünün və xalqının milli mararları üzərində qurur. Hər bir ölkənin milli‚ strateji və təhlükəsizlik maraqları o dövlətin rəsmi dövlət siyasətini təyin edir. Yəni‚ hər bir dövlətin rəsmi siyasəti hər hansı kənar təzyiq və müdaxilələrlə deyil‚ tamamilə öz daxili milli maraqları‚ xalqlararası münasibət üzərində qurulur. Azərbaycan müstəqil və suveren ölkədir və kimlə dostluq quracağını da yalnız Azərbaycan dövləti özü təyin edir. Kimsə buna müdaxilə və təzyiq edə bilməz və kimsə bu münasibətlərə hər hansı hədyan səsləndirə bilməz. Azərbaycanda əsrlər boyu‚ təqribi 2600-2700 ilə yaxındır Yəhudilər yaşayır. Yəhudilər Azərbaycanda hər zaman mehriban və dostluq şəraitində yaşayıb. Burada heçbir zaman anti-semitizm‚ yəhudi təqibi olmayıb. Azərbaycan xalqı bütün tarix boyu hər zaman Yəhudilərə dost olub. Azərbaycanda doğulan və xaricə köç edən Yəhudilər də hər zaman Azərbaycanı özünə vətən‚ Azərbaycan xalqını isə özünə qardaş xalq bilib. Birinci və ikinci Qarabağ müharibəsində də Yəhudilər Qarabağın azadlığı və Azərbaycanın ərazi bütövlüyü uğrunda mətanətlə döyüşüb. Birinci Qarabağ müharibəsində çox sayda Yəhudi mənsubu könüllü döyüşərək şəhid olmuşdur.

Xaricə köç edən Yəhudilər daim Azərbaycanla digər dünya ölkələri xüsusən ABŞ‚ İngiltərə‚ Almaniya‚ İtaliya və s. ölkələr arasında yaxşı münasibətlərin olmasına çalışaraq öz vətənləri Azərbaycana xidmət etməyə çalışırlar. İsraillə münasibətlərin qurulmasında isə Azərbaycandan Xaricə və İsrailə köç etmiş Azərbaycanlı Yəhudilərin böyük xidmətləri vardır. Hazırda İsraildə 100 min nəfərə yaxın Azərbaycanlı Yəhudi icması vardır. Bu kifayət qədər böyük bir rəqəmdir. Onlar İsrailin hər yerində Azərbaycançılıq təbliğatı aparır və ermənilərin törətdiyi Xocalı soyqırımından tutmuş bütün erməni vandalizmini bütün dümyaya çatdıraraq Azərbaycan naminə ermənilərlə mübarizə aparırlar. 2020-ci ilin Tovuz döyüşlərində və 44 günlük Azərbaycan və Erməmistan müharibəsində İsraildəki Azərbaycanlı Yəhudilər gecə-gündüz Azərbaycana və Azərbaycan ordusuna dəstək oldular‚ ermənilər əleyhinə aksiyalar keçirtdilər. Dünyanın hər yerində olan Azərbaycanlı Yəhudilər vətənləri Azərbaycan naminə mübarizə apardılar.
Azərbaycandakı yerli Yəhudi icmaları da var qüvvəsilə Azərbaycan dövlətinin və əsgərinin yanında oldular və bir neçə azərbaycanlı Yəhudi könüllü olaraq 44 günlük müharibədə döyüşlərdə iştirak etdi. Bütün bunlar Azərbaycan və İsrailin dostluğunu şərtləndirən əsas amildir. Azərbaycan və İsraili heçbir maddi maraq yox‚ milli maraqlar birləşdirir. Azərbaycan dünyada İsraildən sonra ən sıx və kompakt şəklində yaşadığı ikinci ölkədir. Dünyanın hər yerində və İsraildə yüzminlərlə Azərbaycanlı Yəhudi Azərbaycanın milli maraqlarını və Azərbaycançılığı təbliğ edərək‚ münasibətlərin daha da dərinləşməsinə çalışırlar. Çünki bizim 3000 ilə yaxın bir tariximiz var. Dostluqlar bu tarixin üzərindədir. Bu‚ dövlətlərin istəyindən əlavə olaraq‚ məhz xalqların dostluğudur. Xalqların birgə sifarişidir. Tarixi zərurətdir. Azərbaycan və İsrail dövlətləri buna biganə yanaşa bilməz. Dövlətlərin ana siyasəti xalqların münasibəti üzərində qurulur. Azərbaycan xalqı ilə Yəhudi xalqı 2600-2700 illik bir tarixi əhatə edən dərin və ağır sınaqlardan çıxaraq qardaşlaşmış xalqlardır.

Azərbaycan və İsrail münasibətlərinin təməlində‚ birmənalı olaraq məhz xalqların sarsılmaz səmimi dostluğu və qardaşlığı dayanır.

İranın bir çox şəhər və qəsəbələrində qondarma və uydurma erməni soyqırımını əbədiləşdirmək üçün abidələr ucaldılıb. Amma Xocalı soyqırımına dair İranda heçbir abidə yoxdur. Və İrandan heç vaxt Azərbaycan xalqı və dövləti ilə həmrəylik nümayişi edilməyib. Amma və lakin bütün bunların əksinə olaraq İsrail hökuməti və Parlamenti erməni soyqırımı layihəsini qətiyyəylə rədd edərək‚ Azərbaycan‚ Türkiyə və bütün Türk xalqları ilə qardaşlıq nümuməsi olaraq həmrəylik nümayiş etdirilib. Xocalı soyqırımının günahsız qurbanları da hər il İsraildə anılmaqda və erməni vəhşiliyi dilə gətirilməkdədir.
İsrail və Azərbaycan dostluğu bölgənin‚ İsrail və Türkiyə dostluğu isə dünyanın təhlükəsizliyinə bir töhvədir.

Azərbaycan və İsrail dövlətlərinin rəhbərləri sadəcə öz tarixlərinə‚ ölkəsinin milli maraqlarına və öz xalqlarına sədaqət göstərərək zamanla bu tarixi dostluğu və ənənəni daha da rəsmiyyətə çevirmişlər. Hər hansı bir kənar düşmən qüvvə xalqların bu dostluğunu və qardaşlığını poza bilməz.
Xalqların münasibəti maddi maraqlar üzərində yox‚ səmimi dostluq və qardaşlıq üzərində qurulur.
Yəhudi xalqı tarixən olduğu kimi‚ bundan sonra da Azərbaycan xalqının və dövlətinin yanındadır.

İsrail Təhlükəsizlik Akademiyasının
Azərbaycan Respublikasındakı
Nümayəndəliyi

Bayden Netanyahuya dəstək verdi - İrana qarşı birlikABŞ prezidenti Co Bayden İsrailin keçmiş baş naziri Benyamin Netanyahunu seçkilərdə qələbə qazanması münasibətilə təbrik edib.

Avrasiya.net xəbər verir ki, bu barədə Ağ Evin sözçüsü Karine Jen-Pyer məlumat verib.

O, Vaşinqtonun İsraildə yeni hökumət qurulmasını yaxından izləyəcəyini bildirib. Bayden ikitərəfli tərəfdaşlığın gücünü bir daha təsdiqləyib və İsrailin təhlükəsizliyinə sarsılmaz dəstəyini vurğulayıb.

Netanyahu zəngdən sonra "Twitter"də Baydenlə danışdığını bildirib. Netanyahu Baydenə deyib ki, onlar “daha çox sülh sazişləri əldə edə və İran təhlükəsi ilə mübarizə apara bilərlər”.