Azərbaycanın iri un və çörək istehsalçıları müraciət yayıb.

Müraciətdə deyilir:

"Məlum olduğu kimi, baş verən qlobal neqativ proseslər, qeyri-müəyyənliklər, istehsala və təchizat zəncirlərinə təzyiqlər, həmçinin COVID-19 pandemiyası səbəbindən dünyada ərzaq məhsulların qiyməti kəskin artıb. Bu proseslər ərzaqlıq buğdanın qiymətinə də təsirsiz ötüşməyib.

Azərbaycana ərzaqlıq buğdanın idxalının əsasən Rusiyadan həyata keçirildiyi üçün bu ölkənin bazarında baş verən qiymət artımı bu məhsulun ölkəmizə daha yüksək qiymətlərlə tədarükü ilə nəticələnir. Əlavə olaraq, Rusiyada 2021-ci ilin fevral ayından etibarən yüksək ixrac rüsumunun tətbiqi də qiymətlərin artmasına ciddi təsir göstərir. 2021-ci ilin dekabr ayında Rusiyada ərzaqlıq buğdanın 1 tonunun orta aylıq ixrac qiyməti 2019-cu ilin analoji dövrü ilə müqayisədə 58,7%, 2020-ci ilin dekabr ayı ilə müqayisədə isə 33,1% yüksək olub.

Bununla belə, qlobal qiymət artımlarının Azərbaycan bazarına neqativ təsirlərinin azaldılması məqsədilə dövlət tərəfindən il ərzində un idxalçılarına və istehsalçılarına böyük dəstək göstərilib. Belə ki, ölkədə ərzaqlıq buğda ehtiyatlarının lazımı səviyyəyə çatdırılması məqsədillə 2020-ci ildən başlayaraq tədarükçulərə subsidiyalı kreditlər ayrılır. Əlavə olaraq, 2021-ci ilin fevral ayından başlayaraq un istehsalçılarına subsidiyalar ödənilib, ərzaqlıq buğdanın idxalı və satışı, həmçinin unun və çörəyin satışı ƏDV-dən azad olunub. Biz sahibkarlara göstərilən dəstək tədbirlərinin nəticəsidir ki, qlobal qiymət dəyişiklikləri Azərbaycan bazarına ciddi təsir etməyib, 50 kq-lıq bir kisə unun topdan satış qiymətini 26 manat səviyyəsində saxlamağa imkan verib.

Mövcud subsidiya mexanizminin 2021-ci ilin dekabr ayının sonunadək qüvvədə olmasını nəzərə alaraq, hazırda buğda idxalının və un istehsalçılarının fəaliyyətinin davam etdirilməsi, ölkəmizin bu strateji ərzaq məhsulu ilə etibarlı təminatı, eləcə də qıtlığın yaranması təhlükəsinin qarşısının alınması məqsədilə unun qiymətinin ərzaqlıq buğdanın cari qiyməti ilə uyğunlaşdırılması zərurəti yaranmışdır.

Hesablamalarımıza görə, uyğunlaşmanın nəticəsi olaraq, 50 kq-lıq bir kisə unun topdan satış qiyməti 36 manatadək arta bilər və bu səbəbdən ənənəvi (dairəvi “zavod” çörəyi) çörəyin qiymətinin də maksimum 10-15 qəpik artması ehtimal olunur.

Vətəndaşlarımızın qida təchizatında önəmli rolumuzu dərk edərək, bildiririk ki, unun qiymətinin ərzaqlıq buğdanın cari qiyməti ilə uyğunlaşdırılacağı halda, çörək və un məmulatlarının qiymətinin 2022-ci ilin taxılın biçin-tədarük dövrünədək qeyd etdiyimiz səviyyədən yuxarı qalxmaması üçün bütün səylərimizi səfərbər edəcəyik. Qida təchizatı zəncirinin bütün iştirakçılarını bizimlə həmrəy olmağa çağırırıq".

Bakıdakı otellərin birində ərəb turist vəfat edib.

Xəqani 1 ünvanda yerləşən Square Inn otelində Səudiyyə Ərəbistanı Krallığının vətəndaşı 1980 -ci il təvəllüdlü Hamadi bin Saeed Almunabbehi qaldığı otaqda vəfat edib.

Faktla bağlı Səbail rayon prokurorluğu və 39-cu polis bölməsində araşdırmalar aparılır.

Foto.info.az

İordaniyanın “Cohina”, “Əl Ənbat” və “Nəbd Əl Balad” qəzetlərində rus mənşəli iordaniyalı jurnalist Yelena Neduqinanın “Nizami Gəncəvi irsi İordaniya və Azərbaycanı daha da yaxınlaşdırdı” sərlövhəli məqaləsi dərc edilib.

AZƏRTAC xəbər verir ki, məqalədə ötən il dahi Azərbaycan şairi və mütəfəkkiri Nizami Gəncəvinin 880 illik yubileyi ilə bağlı Əmmanda silsilə tədbirlərin keçirildiyi diqqətə çatdırılıb. Müəllif qeyd edib ki, ölkənin ən nüfuzlu ali təhsil ocağı – İordaniya Universitetində keçirilən “Nizami Gəncəvi ərəblərin gözü ilə” mövzusunda simpozium bu baxımdan ən əlamətdar tədbir olub. Dahi şairin zəngin irsinin təbliği və alimlər, tələbələrin iştirakı ilə təqdim edilən mühazirələr bir daha göstərdi ki, bəşəriyyətə, o cümlədən İslam aləminə görkəmli şəxsiyyətlər bəxş etmiş Azərbaycanla İordaniya arasında sıx mədəni bağlar mövcuddur. Xüsusən, Nizami Gəncəvi haqqında müxtəlif ölkələrin ədəbiyyatşünaslarının tədqiqat əsərlərindən ibarət olan kitabın ərəb dilində nüsxəsinin təqdimatı İordaniya Universitetinin filologiya fakültəsinin müəllim və tələbə heyətinə gözəl bir hədiyyə oldu.

Y.Neduqina vurğulayıb ki, ötən il “Nizami Gəncəvi İli” çərçivəsində keçirilən beynəlxalq tədbirlər Prezident İlham Əliyevin dahi Azərbaycan şairinin zəngin irsinin təbliği ilə yanaşı, Şərq-İslam mədəniyyətinin bütün dünyada tanıdılması istiqamətində atdığı möhtəşəm humanitar addım oldu.

Məqalədə Nizami Gəncəvinin əsərləri, humanizmi, insanlar arasında bərabərliyi və qardaşlığı təbliğ edən dərin fəlsəfi fikirləri haqqında da ətraflı məlumat verilib.

Ermənilər Azərbaycandan kömək istəyiblər.

Axar.az xəbər verir ki, bu haqda müxtəlif Teleqram kanallarında video görüntülər yayımlanıb.

Sözügedən videoda bir qrup şəxsin hökumətdən narazılıq etdiyi görünür. Onlar sərhədə gedəcəklərini, Azərbaycan dövlətindən müharibə etdikləri üçün üzr istəyəcəklərini bildiriblər.

“Bəlkə Azərbaycan bizi nələrləsə təmin etdi” deyə onlar qeyd ediblər.

Unun qiyməti 9-10 manat qalxıb. Bu, ciddi artımdır. Hökumət həmişə çörəyin, un məmulatlarının qiyməti qalxmasın deyə, dövlət büdcəsindən dotasiya verib. Çörəyin, unun qiyməti aşağı səviyyədə saxlanılıb.

Avrasiya.net xəbər verir ki, bunu Unikal.org-a açıqlamasında deputat Vahid Əhmədov deyib.

Onun sözlərinə görə, unun qiymətini birdən-birə bu qədər artırmaq olmaz:

"Belə artım gözlənilən deyildi. Belə artımlar varsa, hökumət unun qiymətini stabil saxlamaq üçün dövlət büdcəsindən dotasiya ayırmalıdır. Ehtiyat kifayət qədərdir. Biz insanların əmək haqqını, pensiyasını və müavinətini 20-40 manat artırmışıqsa, birdən-birdən belə qiymət artımı problemlər yarada bilər. Bunun qarşısını almaq lazımdır".

Deputat bildirib ki, həm bayramdan əvvəl, həm də bayramdan sonra obyektiv qiymət artımı ilə yanaşı, bəzi sahibkarlar subyektiv qiymət artımı edirlər:

"Bunun da qarşısı alınmalıdır. 2022-ci ilin dövlət büdcəsinin müzakirəsi zamanı qiymət artımı ilə bağlı Baş nazirə müraciət etdik. Bildirdik ki, qiymət məsələsi ilə ciddi məşğul olmaq lazımdır. Qeyd olundu ki, bununla bağlı müəyyən tədbirlər həyata keçirilir. İndi unun qiymətinin bu qədər artması qəbuledilən deyil. Ola bilər ki, əhalinin sosial vəziyyətində problemlər yaratsın. Təklif edirəm ki, unun qiymətinə dotasiya verilsin və əvvəlki qiymətində saxlanılsın".

V.Əhmədov vurğulayıb ki, bayramqabağı bütün məhsullarda süni qiymət artımı var idi:

"Qiymət artımı ciddi problemdir. Xaricdən taxıl və digər məhsullar idxal edirik. Başa düşürəm ki, xaricdə də böyük ərzaq qıtlığı var. Taxılın və digər məhsulların qiyməti artıb. Çalışmaq lazımdır ki, öz ölkəndə istehsal edəsən və ya ehtiyatın olsun ki, bazarı müəyyən qədər tənzimləyə biləsən. Subyektiv qiymət artımlarına gəlincə isə hökumət bunun qarşısını almalı, tədbirlər görməlidir".

Ağstafa rayonunda kişi həyat yoldaşı tərəfindən balta ilə qətlə yetirilib.

Avrasiya.net Report-a istinadən xəbər verir ki, hadisə rayonun Dağ Kəsəmən kəndində qeydə alınıb.

Belə ki, hadisəni törətməkdə şübhəli bilinən 1985-ci il təvəllüdlü Aynur Abdullayeva həyat yoldaşı, 1984-cü il təvəllüdlü Elvin Mübariz oğlu Abdullayevi balta ilə qətlə yetirib.

Faktla bağlı araşdırmalara başlanılıb.

Türkiyənin “Pegasus” şirkəti İstanbul-İrəvan reysləri üçün Ermənistan Dövlət Mülki Aviasiya Administrasiyasına ərizə təqdim edib.

Modern.az xəbər verir ki, aviaşirkət fevral ayında Türkiyədən Ermənistana uçuşlara başlamaq niyyətindədir.

Ermənistanın “Flyone Armenia” şirkəti də oxşar müraciətlə Mülki Aviasiya Komitəsinə müraciət edib.

Ermənistan Ərazi İdarəetmə və İnfrastruktur Nazirliyinin mətbuat katibi Sona Arutyunyan bildirib ki, Türkiyənin “Pegasus” şirkəti fevral ayından başlayaraq həftədə iki uçuş həyata keçirmək üçün müraciət edib.

Onun sözlərinə görə, Mülki Aviasiya Komitəsinə yaxın müddətdə ərizəyə baxacaq.

Ötən il dekabrın 23-də Türkiyənin nəqliyyat və infrastruktur naziri Adil Karaismailoğlu bəyan edib ki, Türkiyənin “Pegasus” aviaşirkəti İstanbul-İrəvan marşrutu üzrə uçuşlara başlamağa hazırlaşır.

Dekabrın 24-də məlum olub ki, Ermənistanın “Flyone Armenia” aviaşirkəti də İrəvan-İstanbul və əks istiqamətdə uçuşların həyata keçirilməsi üçün Mülki Aviasiya Komitəsinə sorğu göndərib.

İsrail ordusuna məxsus “Eurocopter Panther” tipli helikopter qəzaya uğrayıb.

Axar.az xəbər verir ki, hadisə Hayfa şəhəri sahillərində baş verib. Qəza zamanı helikopterdə üç ekipaj üzvü olub.

Hadisə yerinə çoxlu sayda axtarış-xilasetmə qrupu cəlb olunub. Axtarış-xilasetmə işləri havadan, qurudan və dənizdən davam etdirilir.

Fransanın cənubunda koronavirusun yeni variantı tapılıb.

Avrasiya.net xarici mətbuata istinadən xəbər verir ki, yeni ştamm Kamerundan Fransaya qayıdan səyahətçilərdə aşkarlanıb.

Marsel həkimləri tərəfindən aşkar olunan yeni ştamm şərti olaraq B.1.640.2 adlandırılıb.

Hələlik bu ştammın təhlükəsi və ya yoluxma səviyyəsi məlum deyil.

Eks-prezident Mixail Saakaşvilinin işini araşdırmaq üçün komissiya yaradılarsa, boykota son qoymağa və parlamentə qayıtmağa hazıram.

Axar.az xəbər verir ki, bunu Vahid Milli Hərəkat Partiyasının liderlərindən olan Xatiya Dekanoidze deyib.

O, parlamentdə Saakaşvilinin işini araşdırmaq üçün müvəqqəti komissiyanın yaradılmasını vacib hesab etdiyini vurğulayıb.

Qeyd edək ki, Saakaşvili ötən il oktyabr ayının 1-dən həbsxanadadır. Eks-prezidentə dəstək üçün müxalifət nümayəndələri demək olar ki, fasiləsiz etiraz aksiyaları keçirir.