"Novruz xalqımızın zəngin milli-mənəvi irsini özündə yaşadan bayramdır"
Bu gün Azərbaycan xalqı üçün Novruz sadəcə təbiətin oyanışı deyil, həm də milli qürurun, sarsılmaz birliyin və tarixi ədalətin təntənəsidir. Vətən müharibəsində qazanılan şanlı Qələbədən sonra baharın gəlişi ölkəmizdə tamamilə yeni bir ruhla qarşılanır. Artıq suverenliyini və ərazi bütövlüyünü tam bərpa etmiş qüdrətli Azərbaycanın hər bir guşəsində yandırılan Novruz tonqalları, həm də Zəfərimizin rəmzinə çevrilib. Müzəffər Ali Baş Komandan İlham Əliyevin rəhbərliyi ilə işğaldan azad edilmiş torpaqlarımızda, uca dağların zirvəsində qalanan bayram tonqalları bütün dünyaya Azərbaycan xalqının öz köklərinə, torpağına və dövlətçiliyinə nə qədər bağlı olduğunu nümayiş etdirir. Hər bir soydaşımız bu əziz bayramı bütövləşmiş və azad bir vətənin vətəndaşı olaraq sonsuz fəxarət hissi ilə qeyd edir. Novruzun müqəddəsliyi həm də onun rəmzi məna daşıyan və insanı bayrama hazırlayan dörd çərşənbəsində gizlənib. Bu çərşənbələr kainatın dörd əsas ünsürünü simvolizə edərək təbiətin mərhələli şəkildə oyanışından xəbər verir.
Bu fikirləri Milli Məclisin deputatı Kamran Bayramov mətbuata açıqlamasında bildirib.
K.Bayramov qeyd edib ki, tarixin heç bir mərhələsində unudulmayan, qadağalara sinə gərərək nəsillərdən-nəsillərə ötürülən Novruz adətləri, bu gün özünün ən şanlı dövrünü yaşayır. Müzəffər Ali Baş Komandan İlham Əliyevin rəhbərliyi ilə ərazi bütövlüyünü və suverenliyini tam bərpa etmiş Azərbaycanın hər bir qarışında - Şuşadan Xankəndiyə, Kəlbəcərdən Cəbrayıla qədər ucalan bayram tonqalları xalqımızın sarsılmaz iradəsinin işığıdır. Bu gün hər bir azərbaycanlı baharın gəlişini qalib bir millətin fəxr dolu övladı kimi qarşılayır.
Deputat diqqətə çatdırıb ki, Azərbaycan xalqının minilliklər boyu formalaşan milli-mənəvi dəyərlər sistemi və zəngin mədəniyyəti, keçmişimizlə bu günümüz və gələcəyimiz arasında sarsılmaz bir mənəvi körpü yaradıb. Bu irsin öyrənilməsi və təbliği hər zaman aktuallığını qoruyan strateji bir məsələdir. Məlumdur ki, sovet imperiyası dövründə mövcud olan kommunist ideoloji mühiti milli-mənəvi dəyərlərimizin, dini və milli adət-ənənələrimizin təbliğinə müəyyən qadağalar qoysa da, Azərbaycan müstəqilliyini bərpa etdikdən sonra bu sahəyə dövlət tərəfindən xüsusi diqqət yetirilməyə başlandı. Xalqımızın qədim və rəngarəng mənəvi irsi dünya mədəniyyət xəzinəsinə əvəzsiz töhfələr bəxş edərək, hər bir azərbaycanlının fəxr mənbəyinə çevrildi. Ümummilli Lider Heydər Əliyev mənsub olduğu xalqın tarixi keçmişinə, mədəni irsinə və mənəvi dəyərlərinə hər zaman böyük qayğı ilə yanaşmışdır. Ulu Öndərin bu istiqamətdə həyata keçirdiyi uzaqgörən tədbirlər Şərq və Qərb sivilizasiyalarının kəsişməsində yerləşən Azərbaycanın milli dəyərlərinə olan maraq və məhəbbət hissini daha da artırdı. Dahi rəhbər milli və ailə dəyərlərinin hər bir millətin həyatındakı əvəzsiz rolunu yüksək qiymətləndirərək deyirdi: “Hər bir azərbaycanlı öz milli mənsubiyyətinə görə qürur hissi keçirməlidir və biz azərbaycançılığı - Azərbaycanın dilini, mədəniyyətini, milli-mənəvi dəyərlərini, adət-ənənələrini yaşatmalıyıq”.
Bu gün həmin ali prinsiplər Prezident İlham Əliyev tərəfindən yeni dövrün tələblərinə uyğun olaraq şaxələndirilmiş şəkildə davam etdirilir. Dövlətimizin başçısının vurğuladığı kimi: “Azərbaycan xalqı həmişə öz milli-mənəvi dəyərlərinə sadiq olub. Bu gün Azərbaycan dövləti milli dəyərlərimizin qorunması üçün ardıcıl siyasət aparır. Biz öz milli-mənəvi dəyərlərimizlə, adət-ənənələrimizlə fəxr edirik”. Prezident İlham Əliyevin dövlət-din münasibətləri və milli irsin qorunması sahəsində yürütdüyü siyasət, Ulu Öndər Heydər Əliyev tərəfindən əsası qoyulan müqəddəs yolun uğurlu və məntiqli davamıdır.
K.Bayramov vurğulayıb ki, xalqımızın milli-mənəvi irsinin qorunması, tədqiqi və gələcək nəsillərə ötürülməsi istiqamətində Heydər Əliyev Fondunun müstəsna fəaliyyəti xüsusi vurğulanmalıdır.
Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın rəhbərliyi altında Fond öz çoxşaxəli layihələri ilə milli-mənəvi dəyərlərimizin yorulmaz təbliğatçısına və etibarlı müdafiəçisinə çevrilmişdir. Azərbaycanın Birinci vitse-prezidentinin milli-mənəvi dəyərlərin dünyada tanıdılması üçün həyata keçirdiyi proqramlar onun yüksək vətəndaşlıq mövqeyinin və milli irsə sonsuz bağlılığının bariz nümunəsidir. Məhz Mehriban xanım Əliyevanın gərgin səyləri nəticəsində 2009-cu ildə Novruz bayramı və Azərbaycan aşıq sənəti UNESCO-nun Qeyri-maddi mədəni irs siyahısına daxil edilmişdir. Bu uğurların məntiqi davamı olaraq, 2010-cu ildə BMT Baş Assambleyasının 64-cü sessiyasında 21 mart tarixi rəsmən Beynəlxalq Novruz Günü elan olunmuşdur. Fondun bu istiqamətdəki fəaliyyəti Azərbaycanın zəngin mədəniyyətini bəşəri dəyərlər səviyyəsinə qaldırmışdır.
K.Bayramov əlavə edib ki, Novruz bayramının fəlsəfi və sosial mahiyyətinin əsasında sosial ədalət, tolerantlıq və bərabərlik dayanır. Bu günlərdə hər kəs çalışır ki, hər bir evdə bayram süfrəsi açılsın, heç bir qəlb sevinclən kənarda qalmasın. Biz başqa xalqlardan və dinlərdən olan qonşularımızı, dostlarımızı da unutmur, onlara da bayram sovqatı göndəririk. Belə yüksək əxlaqi-mənəvi keyfiyyətləri aşılayan ailələrimiz həm milli, həm də bəşəri dəyərlərə hörmətlə yanaşan vətənpərvər bir nəsil yetişdirir.
