"İngiltərə səfirliyinin belə bir avantürist mövqe nümayiş etdirəcəyini heç kim gözləmirdi"Mayın 14-də bir qrup ictimai fəal və radikal müxalifət təmsilçilərinin Bakıda keçirilən növbəti icazəsiz aksiyası əslində bundan əvvəl keçirilmiş ənənəvi aksiyalardan heçnə ilə fərqlənmirdi. Adi, sıradan bir aksiya idi. Və bu aksiyanın insidentsiz keçdiyi, saxlanılanların olmadığı hər kəsə məlumdur. İcazəsiz olmasına baxmayaraq həmin gün polis tərəfindən aksiya iştirakçılarına tədbirin qətnaməsini oxumaq imkanı da verildi. Bütün bunları aksiyanın iştirakçı və təşkilatçıları özləri də təsdiqləyib. Onlar aksiya iştirakçılarına qarşı polis tərəfindən hər hansı bir zorakılığın olmadığını bildiriblər.

Əgər zorakılıq faktları baş versəydi, bunu gizlətmək, ört-basdır etmək qeyri-mümkün olardı. Lakin İngiltərənin Azərbaycandakı səfirliyi isə çağırılmamış qonaq libasına bürünərək mayın 14-də keçirilən aksiya zamanı guya, etirazçılara qarşı polislər tərəfindən kobud rəftar olunduğu iddiası ilə çıxış etdi. Səfirliyin sosial şəbəkə hesablarında sözügedən aksiya ilə bağlı paylaşımlarda “dinc etiraz aksiyasının dağıdılması” kimi əsassız ifadələr yer aldı.

Sözün açığı, İngiltərə səfirliyinin belə bir avantürist mövqe nümayiş etdirəcəyini heç kim gözləmirdi. Əgər İngiltərə səfirliyi 14 may aksiyasına münasibət bildirməsəydi, mən əminəm ki, bu aksiya sıradan bir aksiya kimi dərhal unudulub gündəmdən çıxacaqdı. Lakin Böyük Britaniyanın Bakıdakı diplomatik korpusu bu hərəkəti ilə sanki odun üstünə benzin tökdü və aksiyanın özündən heç bir nəticə əldə edə bilməyən təşkilatçılar bu dəfə fürsətdən istifadə edib səfirliyin yaratdığı süni ajiotajdan yararlanmağa başladılar. Onların imkanı olsa, hətta gedib ingilis səfirliyinə təşəkkür də edərlər ki, “sağolun ki, sayənizdə diqqət mərkəzinə düşməyi bacardıq”.

Çox güman ki, səfirliyin özü də indiki həssas məqamda belə bir ajiotaja rəvac verməyindən, “nəlbəkidə fırtına yaratmağından” olduqca məmnundur. Onların bu davranışı həm Azərbaycana qarşı ənənəvi qərəzli mövqedən, həm də konkret siyasi maraqlardan irəli gəlir. Böyük dövlətlər bu cür məqamlardan həmişə Azərbaycana qarşı təzyiq vasitəsi kimi istifadə etməyə çalışırlar. Onların dərdi heç də demokratiyanın inkişafına töhfə vermək, insan hüquqlarının qorunmasına təminat almaq deyil.

Çox güman ki, ingilislərin məqsədi sadəcə olaraq fürsətdən yararlanmaq, müəyyən dividendlər əldə etməkdir. İngilislər bunu çox yaxşı bacarırlar. Necə deyərlər, suyu bulandırmaq və bulanlıq suda balıq tutmaq ingilis diplomatiyasının köhnə xüsusiyyətidir. Ancaq göründüyü kimi bu taktika bu dəfə işləmədi. İngiltərə səfirliyinin Roma Papasından artıq katoliklik etmək cəhdi gözlənilən nəticəni vermədi.

Şübhəsiz ki, ingilis səfirliyinin bu addımı diplomatik avantüradır. Lakin bu avantüra onsuz da kifayət qədər müsbət məcrada inkişaf edən Azərbaycan-İngiltərə münasibətlərinə heç bir xələl gətirə bilməz. Zənnimcə, İngiltərə səfirliyi bundan sonra ölkəmizdə cərəyan edən siyasi proseslərə münasibət bildirməzdən əvvəl necə deyərlər, yüz ölçüb, bir biçəcək.

Yeri gəlmişkən, İngiltərənin Ermənistandakı səfirliyi isə İrəvanın “Fransa” meydanında keçirilən etiraz aksiyalarını görməzdən gəlir. Həmin aksiyalarda baş verən kütləvi zorakılıqlar səfirlik tərəfindən susqunluqla qarşılanır. Bunun özü də olduqca düşündürücüdür. İngilis diplomatlar Bakıdakı kiçik aksiyanı qara rəngdə, İrəvanda keçirilən davamlı aksiyaları isə ağ rəngdə görürlər. Heyrətamiz diplomatiyadır...

Əlisahib Hüseynov,
Milli Həmrəylik Partiyasının sədri
"Pandemiyadan sonrakı dövr kimi  yeni münasibətlərin qurrulması artıq başlanılıb"Avropa İttifaqı ilə Azərbaycan arasındakı münasibətlər 2016-cı ilə kimi bir qədər gərgin keçsə də son 6 ildə aparılan uğurlu xarici siyasət və əməkdaşlığa verilən düzgün qiymət nəticəsində əlaqələr artan qrafik üzrə inkişaf etdi.

Bunu "Xalq Cəbhəsi"nə politoloq Vasif Əfəndi deyib.

Politoloqun fikrincə, 2016-cı ildə Aİ və Azərbaycan arasında ticarət dövriyyəsi qəflətən yarıbayarı azalaraq bir milyard dollara enmişdi: "Bu gün isə bu rəqəm 15 dəfə artaraq 15 milyard dollara çatıb. Azərbaycan Qarabağ siyasəti və müharibənin uğurlu nəticəsi Avropa İttifaqı ölkələrini cəsarətləndirərək ölkəmizə sərmaya yatırmağa sövq etdi. Hazırda Avropa İttifaqı üzv dövlətlərindən 1700 şirkət ölkəmizdə fəaliyyət göstərir. Bunun qarşılığında da Azərbaycan Aİ ilə etibarlılıq əsasında enerji ehtiyatlarının ixracını artırmaq niyyətindədir. Ukraynada gedən müharibənin nəticəsi olaraq Avropa ölkələri ciddi enerji qıtlığı ilə üzləşə biləcəklərinin fərqindədirlər. Aİ Şurasının prezidenti Şarl Mişel mütəmadi olaraq Azərbaycanla sıx əlaqə saxlamaqla münasibətlərin səviyyəsinin düşməməsinə çalışır. Azərbaycan Aİ ilə münasibətləri başlayan zamandan üzərinə götürdüyü enerji təhlükəsizliyi öhdəliyinə sadiqdir. Bu səbədən də Trans-Anadolu və Trans- Adriatik qaz boru kəmərləri Avropaya təhlükəsiz qaz ixracını həyata keçirir.

Dünya bazarında neft və qazın qiymətlərinin bahalaşması davam edəcək. Bu vəziyyətdə əldə olan resusların düzgün istiqamətlənməsi bizim həm xarici, həm də daxili siyasətimizin ana xəttini təşkil etməlidir. Hesab edirəm ki, pandemiyadan sonrakı dövr kimi yeni münasibətlərin qurrulması artıq başlanılıb. Növbəti mərhələ isə Rusiya Ukrayna müharibəsinin bitməsindən sonra başlayacaq və dünyada tam fərqli iqtisadi və siyasi münasibətlər qurulacaq. Biz gələcəyə hesablanmış strategiya quraraq yeni dünyada yerimizi tutmalıyıq".
"Kreml Paşinyanın ipini əldən verməyir"İlk öncə qeyd edim ki, Qafqazlarda söz sahibi Rusiyadır. Avropa İttifaqı iki konflikt tərəfi arasında vasitəçilik missiyası yaratmaq istəsə də bu konstruktiv olmadı. Səbəbi aydındır. Ermənistan Rusiyanın kaloniyasıdır və Rusiyanın rəqiblərinin təhrikinə gedərək yanlış addım atmaqdan qorxur.

Bunu "Xalq Cəbhəsi"nə politoloq Elman Vəliyev deyib.

O, qeyd edib ki, Azərbaycanla Ermənistan arasında sülh müqaviləsi, delimitasiya və demarkasiya məsələləri Kremlin əli ilə mümkündür:
"Brüssel görüşündən sonra üç tərəfin xarici işlər nazirləri görüş keçirdi. Bu görüşdə delimitasiya və demarkasiyanın həll edilməsi üçün işçi qrupunun yaradılması qərarı verildi. Azərbaycan tərəfinin işçi qrupu hazır vəziyyətdədir. Ermənistan tərəfi də öz işçi qrupunun yaradılmasına başlayıb və ayın axrına kimi bu prosesdə irəliləyiş əldə olunacaq.

Brüssel görüşündə Şarl Mişel hər iki tərəfdən razılıq əldə etmişdi ki, aprelin 29-da yenidən görüş keçirilsin və sülh üçün mühüm qərar versin. Lakin Ermənistan tərəfi bunu ləğv elədi. Ləğvdən əvvəl Paşinyanla Putinin danışığı olmuşdur. Əminəm ki, bu ləğvin səbəbkarı Kreml idi. Sonra Paşinyan Moskvaya Putinlə görüşə getdi. Yəni, Kreml Paşinyanın ipini əldən verməyir".

Politoloq deyib ki, son zamanlar İrəvanda Paşinyana qarşı etiraz aksiyaları intensivləşib. Bu aksiyalara Kremldə əlaltından dəstək verməkdədir: "Kreml Paşinyanın qələmini mütləq qıracaq, amma indi xarici siyasət oriyentasiyasında bir xeyli boşluqlar yaranıb. Qərbin Ermənistana dəstəyi həm onun lobbiçilik fəaliyyəti ilə bağlıdır, həm də Ermənistanı Rusiyanın pəncəsindən xilas etmək səylərindən qaynaqlanır. Lakin Qərbin bu mövqedə uğurlu olacağı fikri qeyri-realdır.

Əvvəl, axır Ermənistan sülh müqaviləsini imzalayacaq. Ermənistanla Türkiyə əlaqələri də müsbət kontekstdə irəliləməkdədir. Ola bilməz ki, Ermənistan Türkiyə ilə münasibətləri nizamlasın, ancaq Azərbaycanla yenidən intriqaya girsin. Paşinyanla İlham Əliyevin yeni bir görüşünü də istisna etmirəm. Bu görüş həlledici görüşlərdən biri ola bilər və vasitəçi tərəf Kremlə məxsus olacaq".

Şuşada dini liderlərin toplantısı keçiriləcəkŞuşada türkdilli dövlətlərin dini liderlərinin toplantısı keçiriləcək.

Avrasiya.net xəbər verir ki, bunu Qafqaz Müsəlmanları İdarəsinin sədri Şeyxülislam Allahşükür Paşazadə deyib.

Sədrin sözlərinə görə, tədbirin bu ilin sentyabr ayının sonu oktyabr ayının əvvəlində keçirilməsi planlaşdırılır:

“Tədbirdə Qazaxıstan, Qırğızıstan, Özbəkistan, Türkmənistan, Türkiyə və Azərbaycan dini liderlərinin iştirakı nəzərdə tutulub. Ümid edirəm ki, gələcəkdə bu kimi konfrans və görüşləri azad olunan ərazilərdə keçirmək mümkün olacaq. Bununla da Azərbaycan həqiqətlərini, azad olunan ərazilərdəki erməni vandalizmini beynəlxalq ictimaiyyətin diqqətinə çatdıra biləcəyik”.
Qarabağda istehsal edilən elektrik İrandan ixrac ediləcəkQarabağda istehsal ediləcək elektrik enerjisi İran vasitəsilə Naxçıvana, Türkiyəyə, Avropa ölkələrinə ixrac ediləcək.

Avrasiya.net xəbər verir ki, bunu Report-a İranın Azərbaycandakı səfiri Seyid Abbas Musəvi deyib.

Onun sözlərinə görə, İran da bu elektrik enerjisindən istifadə edəcək: "Gələcəkdə Qarabağda elektrik stansiyalarının tikintisində İran şirkətlərinin iştirakı nəzərdə tutulur".

Səfir əlavə edib ki, İran şirkətlərinin Qarabağda həm təhsil kompleksinin, həm də xəstəxananın tikintisində iştirakı nəzərdə tutulur: “Bu istiqamətdə iş aparılır”.

Qeyd edək ki, 1994-cü il 2 iyul tarixində “Azərbaycan Respublikası ilə İran İslam Respublikası arasında hidro və elektroenergetika sahələri üzrə əməkdaşlıq haqqında Memorandum” imzalanıb. Adıçəkilən Memorandumda “Xudafərin” və “Qız qalası” hidroqovşaqlarının tikinti işlərinə başlanılmasına dair razılıq əldə edilib.

Adıçəkilən layihənin icrası ilə bağlı aparılan uzunmüddətli müzakirələrin nəticəsi olaraq stansiyaların tikintisi ilə bağlı “Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində “Xudafərin” və “Qız Qalası” hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında Saziş” 23 fevral 2016-cı il tarixdə imzalanıb.

“Xudafərin” su anbarının tutumu 1,612 milyard kubmetr, minimal həcmi isə 117 milyon kubmetr təşkil edir. Su anbarında işlər yekunlaşdırılıb.

“Qız Qalası” hidroqovşağının su tutumu 56,75 milyon kubmetr, minimal həcmi isə 7,5 milyon kubmetr təşkil edir. Su anbarında işlər 95 % tamamlanıb.

Xatırladaq ki, bu günə qədər Qarabağda 4 min meqavat gücündə 9 elektrik stansiyası açılıb. Həmçinin, beş su elektrik stansiyası tikilir və bu layihələr 2022-ci ildə böyük ehtimalla tamamlanacaq. Bununla yanaşı, Laçın və Kəlbəcərdə 100 meqavat gücündə külək elektrik stansiyaların, həmçinin, 50 meqavatlıq günəş elektrik stansiyalarının tikintisi nəzərdə tutulub.
Mətbuat Şurasından jurnalistin səhhəti ilə bağlı açıqlama: “Ürəkaçan deyil”“Jurnalist həmkarımız, uzun illərdən bəri tanıdığımz Qadir İbrahimlinin səhhəti şəxsən mənim, ümumən Azərbaycan Mətbuat Şurasının diqqətindədir”.

Avrasiya.net xəbər verir ki, bunu Azərbaycan Mətbuat Şurasının sədri Əflatun Amaşov tanınmış jurnalist Qadir İbrahimlinin sağlıq durumundan bəhs edərkən deyib.

“Respublika Xəstəxanasının rəhbərliyi ilə bir neçə də əlaqə saxlamışıq. Qadirin tezliklə sağlamlığına qovuşmasını arzulayırıq. Həkimlər də bunun üçün əllərindən gələni edirlər. Bir çox həmkarımın da bildiyi kimi, səhhəti hazırda ürəkaçan sayıla bilməz”, - Ə.Amaşov əlavə edib.

Ə.Amaşovun sözlərinə görə, o, Qadir İbrahimlinin sağlamlıq durumu ilə əlaqədar müvafiq dövlət qurumları ilə də təmasa keçib: “İnanıram ki, müvafiq tədbirlər görüləcək. Allah Qadirə kömək olsun. Ümüd edək ki, səhhəti düzələcək”.

Xatırladaq ki, “İstiqlal.az” saytının rəhbəri Qadir İbrahimli mayın 18-də Respublika Kliniki Xəstəxanasının Reanimasiya şöbəsinə yerləşdirlib. Ona qaraciyər serrozu diaqnozu qoyulub.
İran sərhədçiləri Azərbaycan vətəndaşını GÜLLƏLƏDİİran sərhədçiləri sərhədi pozmaq istəyən Azərbaycan vətəndaşını güllələyərək öldürüb.

Bu barədə Avrasiya.net-ə Dövlət Sərhəd Xidmətinin (DSX) Mətbuat Mərkəzindən məlumat verilib.

Bildirilib ki, may ayının 16-da İran sərhəd nümayəndəliyi xətti ilə Azərbaycan vətəndaşı Musayev Mircavad Mircəlal oğlunun İrandan Azərbaycan istiqamətində dövlət sərhədini pozmağa cəhd edərkən bu ölkənin sərhədçiləri tərəfindən silahın tətbiqi nəticəsində həyatını itirməsi barədə məlumat daxil olub:

“Mayın 18-də Mircavad Musayevin cənazəsi prokurorluq orqanlarının nümayəndəsinin iştirakı ilə rəsmi qaydada qəbul edilərək ailə üzvlərinə təhvil verilib. Baş vermiş hadisənin araşdırılması və nəticələri barədə məlumat verilməsinə dair İran tərəfinə müvafiq sorğu göndərilib”.
Ərdoğan: "İsveç tamamilə terror yuvasıdır"“NATO təhlükəsizlik təşkilatıdır. Alyansın daxilində terror təşkilatlarının olmasını qəbul edə bilmirik. Bu ölkələr (Finlandiya və İsveç) PKK/YPG-yə ev sahibliyi edir. Biz bir daha dalana dirənməyi düşünmürük”.

“Report” xəbər verir ki, bunu Türkiyə Prezidenti Rəcəb Tayyib Ərdoğan söyləyib.

“İsveç tamamilə terror yuvasıdır. Bir ölkə “yox” deyərsə, hər hansı namizəd ölkəni NATO-ya qəbul edə bilməzlər. Keçmişdə təşkilata daxil olanlar olub. Bunun içində Almaniya, Fransa da var. Yunanıstan və Fransa onsuz da təşkilata qoşulub sonra çıxmışdılar”, - o bildirib.
Putin onları ordu rəhbərliyindən qovduRusiya ordusunda Ukraynada döyüş meydanında uğursuzluqlara görə yüksək komandanlıq kütləvi şəkildə işdən çıxarılır.

Axar.az xəbər verir ki, bu barədə Britaniya Müdafiə Nazirliyi məlumat yayıb.

“Son həftələrdə Rusiya Ukraynaya müdaxilənin ilkin mərhələlərində zəif çıxış etdiyi güman edilən yüksək səviyyəli komandirləri işdən çıxarıb. Rusiya hərbi sistemində ört-basdır və günah keçisi axtarmaq mədəniyyəti geniş yayılıb”, - məlumatda deyilir.

Məlumata görə, elit 1-ci qvardiya tank ordusuna komandanlıq edən general-leytenant Sergey Kisel Xarkovu almadığı üçün işdən uzaqlaşdırılıb:

“Rusiya Qara dəniz donanmasına komandanlıq edən vitse-admiral İqor Osipov aprel ayında “Moskva” kreyserinin batmasından sonra uzaqlaşdırılıb. Rusiyanın Baş Qərargah rəisi Valeri Gerasimovun vəzifəsində qalacağı ehtimalı var, lakin Putinin ona güvəndiyi bəlli deyil”.