Ukrayna Azərbaycanlıları Radasının II Qurultayı keçirilibFevralın 12-də Ukraynanın paytaxtı Kiyevdə Ukrayna Azərbaycanlıları Radasının (UAR) növbəti - II Hesabat-seçki Qurultayı keçirilib. Qurultayda Diasporla İş üzrə Dövlət Komitəsinin (DİDK) nümayəndələri, Ukraynanın müxtəlif regionlarından gəlmiş 200 nəfərə yaxın təmsilçi, Ukraynanın dövlət rəsmiləri, deputatlar, jurnalistlər və digər qonaqlar iştirak edib.

Tədbirdən əvvəl Qurultay nümayəndələri ulu öndər Heydər Əliyevin Kiyevdəki abidəsini ziyarət edib və qarşısına tər çiçəklər düzüblər. Sonra Azərbaycan və Ukraynanın Dövlət Himnlərinin səsləndirilməsi ilə işinə başlayan Qurultayda Azərbaycan torpaqlarının azadlığı uğrunda həlak olan şəhidlərin xatirəsi bir dəqiqəlik sükutla yad edilib.

UAR-ın Baş katibi Ceyhun Məmmədov giriş sözü ilə qurultayı açıq elan edib: “Mən sizin hamınızı ürəkdən salamlayıram. Bu gün diaspora tariximiz üçün çox əlamətdar bir gündür. Ukrayna azərbaycanlılarını təmsil edən əsas diaspor təşkilatlarının nümayəndələri, rəhbərləri buradadırlar və bizimlədirlər. Sizləri Ukrayna Azərbaycanlıları Radasının II Qurultayın açılışı münasibətilə təbrik edirəm. Əminəm ki, bu qurultay ukrayna azərbaycanlılarının həmrəyliyi, birliyi və işlərində daha da fəal olmaları üçün çox önəmli bir başlanğıc olacaq.”

UAR-ın Baş katibi Ceyhun Məmmədovun moderatorluğu ilə keçən Qurultayda DİDK-nın sədr müavini Vaqif Seyidbəyov çıxış edərək Ali Baş Komandan İlham Əliyevin rəhbərliyi ilə şanlı zəfərimizdən sonra diasporumuzun fəaliyyətində yeni bir mərhələ başladığını qeyd edib. V.Seyidbəyov DİDK-nın fəaliyyəti – Koordinasiya Şuraları, Azərbaycan Evləri, Qarabağ məktəbləri, gənclərlə iş istiqamətində həyata keçirilən layihələri və s. barədə məlumat verib. Diasporumuzu daha da inkişaf etdirmək, onun fəaliyyətini gücləndirmək üçün birlik və həmrəyliyimizi daha da möhkəmləndirməyin vacibliyini bildirib.

Dövlət Komitəsinin fəaliyyətini əks etdirən qısa videoçarxın nümayişindən sonra çıxış edən Azərbaycan Respublikasının Ukraynadakı Səfirliyinin müşaviri Kamal Xəlilov ulu öndər Heydər Əliyevin təşəbbüsü ilə formalaşan Azərbaycan diasporunun bu gün Prezident İlham Əliyevin rəhbərliyi ilə inkişaf etdiyini qeyd edib. Ukrayna Azərbaycanlıları Radasının fəaliyyətini yüksək qiymətləndirən Səfirlik nümayəndəsi təşkilatın tarixi Vətənimiz Azərbaycan və dövlətimiz üçün əlindən gələni etdiyini vurğulayıb.

Ukrayna Ali Radasının deputatı Maryan Zablotskiy Ukraynada yaşayan soydaşlarımızı sadəcə Azərbaycan diasporu deyil, Ukraynanın bir parçası olduğunu, onların vətənpərvərliyini xüsusi vurğulayıb.
Ukraynanın Etnosiyasət və vicdan azadlığı Dövlət Xidtmətinin rəhbəri Yelena Boqdan Ukrayna cəmiyyətinə verdiyi töhfələrə, ölkənin ərazi bütövlüyünün qorunmasına göstərdiyi dəstəyə görə Azərbaycan diasporuna təşəkkür edib.

İrpin şəhər merinin müavini İrina Petrova Azərbaycan diasporu ilə qarşlıqlı əməkdaşlığın ildən-ilə inkişaf etdiyini, İrpində Zərifə Əliyeva Parkının açılmasını, ən yaxşı məktəblərdən birinə Zərifə Əliyevanın adının verilməsini bu əməkdaşlığın bariz nümunəsi olduğunu bildirib. Qarşılıqlı münasibətlərin möhkəmlənməsinə, İrpin şəhərinin inkişafına verdiyi töhfələrə görə Azərbaycan diasporunun bir qrup üzvünü xüsusi diplomla mükafatlandırılıb.

UAR-ın Baş katibi Ceyhun Məmmədovun Ukrayna Azərbaycanlıları Radasının 3 illik fəaliyyətinə dair hesabat verib. “Bizlər şanlı Azərbaycan tarixinin şanlı şahidləriyik. Bizlər şəhid övladıyıq, bizlər şəhid qardaşıyıq, bizlər şəhid dostuyuq, bizlər şəhidlik mərtəbəsinə yüksələn o ali insanlaın igidliyinin canlı şahidləriyik!” deyə başlayan çıxışdan sonra UAR’ın 3 illik fəaliyyətinə dair videoçarx təqdim olunub.

Daha sonra çıxış edən Oleq Krapivin və Hikmət Cavadov Qurultay iştirakçlılarına UAR-ın fəaliyyətinə göstərdityi dəstəyə və tədbirə qatıldıqlarına görə təşəkkür ediblər. Qarabağ səfərindən sonra diasporumuzun qarşısında açılan yeni mərhələdə hədəflərə nail olmaq üçün birliyimizi möhkləmləndirməyin, hər bir azərbaycanlının, o cümlədən iş adamları və ziyalıların hüquqlarının qorunmasının vacibliyini qeyd ediblər.

Çıxışlardan sonra Ukrayna Azərbaycanlıları Radasında təmsil olunmaq üçün müraciət edən 23 təşkilatla UAR arasında qarşlıqlı əməkdaşlığa dair Memorandum imzalanıb.

Diaspor rəhbərləri Murad Ömərov, Eldar Tağıyev, Şeyx Şakir və başqaları çıxış edərək Diasporla İş üzrə Dövlət Komitəsinin sədri Fuad Muradovun birlik və həmrəylik təşəbbüslərini təşkilatların dəstəkləməsini, bu gün daha 23 təşkilatın UAR-la əməkdaşlığa başlamasını alqışlayıblar.

Sonda səsvermə yolu təşkilatın Əsasnaməsinə edilən dəyişikliyə uyğun olaraq İdarə Heyətinin tərkibi genişləndirilib və yeni üzvlər seçilib. Daha sonra İH-nin üzvləri Ceyhun Məmmədovu UAR-ın icraçı direktoru seçib. Bundan başqa, təşkilatın tərkibində Ziyalılar, Gənclər və İş adamları Şuraları yaradılıb, onların üzvləri müəyyənləşdirilib. Daha sonra UAR-ın loqosunun dəyişdirilməsi ilə bağlı təkliflər irəli sürülüb və yekdilliklə qəbul olunub.

Sonda Ukrayna Azərbaycanlıları Radasının II Qurultayının Bəyanatı oxunub və Qurultay iştirakçılarının Azərbaycan Respublikasının Prezidenti İlham Əliyevə müraciəti qəbul olunub.

Ukrayna Azərbaycanlıları Radasının II Qurultayı incəsənət ustalarının iştirak etdiyi ziyafətlə yekunlaşıb.
Qurultay yerli mediada geniş işıqlandırılıb.




"Sonuncu şansınızı düzgün dəyərləndirin, Ramiz Mehdiyev!"Fevralın 10-da Azərbaycan Milli Elmlər Akademiyasının (AMEA) prezidenti, akademik Ramiz Mehdiyevin AMEA-nın mətbuat xidmətinin adından yaydırdığı bəyanatla sükutu pozması əslində gözlənilən idi. Bu bizim hamımızın yaxşı tanıdığımız Ramiz Mehdiyevdirsə, o uzun müddət susa bilməzdi. Ramiz Mehdiyev özünü “ağır artilleriya” zənn edərək günün birində mütləq sükutu pozacaq, əvvəl-axır hücuma keçəcəkdi. Bu onun ənənəvi dəst-xəttidir. Odur ki, mən bu adamın növbəti dəfə AMEA-nın mətbuat xidmətindən və saytından sanki öz dədə-baba malıymış kimi sui-istifadə edərək bəyanat yaymasına əsla təəccüblənmədim.

Bəyanat AMEA-nın adından yayılsa da, ancaq bu bəyanatın birbaşa R.Mehdiyevin özü tərəfindən hazırlandığına nə mənim, nədəki həmkarlarımızın zərrə qədər də şübhəsi yoxdur. Ölkəmizin tanınmış elm xadimlərinə, millət vəkillərinə, siyasət adamlarına, digər nüfuzlu şəxslərə qarşı cəfəng iddialarla, əsassız ittihamlarla və təhqiramiz ifadələrlə dolu bu “inşa yazısı” tipik “Ramiz Mehdiyev mətbəxi”nin məhsuludur və akademiya prezidenti bu bəyanatı ilə əslində bütün Azərbaycan cəmiyyətinə açıq müharibə elan edib.

Əvvəla onu deyim ki, akademikin qələmindən çıxan və ölkənin aparıcı mətbu orqanlarının elektron poçtuna göndərilən, eləcə də AMEA-nın saytında yerləşdirilən bu yazı-bəyanat akademik üslubdan və məzmundan uzaq, tamamilə qeybət və böhtan xarakterli söz yığınıdır. Yazıda nəzərə çarpan bir çox səhvlər də bu yazının müəllifinin “akademik” səviyyəsini göstərir. Hiss olunur ki, AMEA prezidentinin özü də, R.Mehdiyevin tezislərini hazırlamaqda ona kömək edən, onun adından yazı qondaran spiçrayterlər də elmi-intellektual böhrandan əziyyət çəkirlər, rabitəsiz cümlələrdən ibarət tələm-tələsik bəyanat hazırlayıb yaymaqla psixoloji gərginlik içində çabaladıqlarını nümayiş etdirirlər.

Bunlar bir bəyanatı bu cür bərbad şəkildə “bişirib-düşürüb” ortaya çıxarırlarsa, indi görün Ramiz Mehdiyevin qosqoca AMEA sistemində tətbiq etdiyi köhnə idarəçilik metodları hansı səviyyədədir. Ən pisi də budur ki, AMEA prezidenti bu cür intellektual kasadlıqla həm elmi ictimaiyyətə dirəniş göstərir, həm də dövlətə meydan oxumağa çalışır. Bu lap ölümöncəsi aqoniyaya bənzəyir. Əslində Ramiz Mehdiyev intellekt cəhətdən zəngin biri olsaydı və qrossmeyestr kimi davransaydı, dövlətin və cəmiyyətin üzərinə gəlməz, müdriklik nümayiş etdirərdi. Ancaq Ramiz Mehdiyev kimi zombiləşmiş siyasi fiqurdan belə bir müdriklik, uzaqgörənlik gözləmək sadəlövhlük olardı. Adam pərakəndə, sistemsiz və səviyyəsiz, məntiqsiz formada dirəniş göstərməkdə axıra qədər davam edəcək və sonda özünü bitirəcək.

Bizim mənəvi borcumuz isə Ramiz Ənvəroviçə bu özünübitirmə, özünüifşa prosesində mümkün qədər çox yardımçı olmaqdır. Biz onun haqqında bildiklərimizi, onun indiyə qədər ölkə siyasətində və akademiya sistemində törətdiklərini, Azərbaycanın gələcək inkişafına qarşı yönəlmiş “beşinci kolon” planlarını açıb ortaya qoymaqla, deşifrə etməklə həm elm camiəsini, həm də bütövlükdə cəmiyyətimizi “Ramiz Mehdiyev kabusu”ndan mümkün qədər tez xilas etməyə çalışmalıyıq. Yenə deyirəm biz bu prosesdə AMEA-nın ən uğursuz prezidentinə yardımçı olmalıyıq ki, adam özünü ifşa etməyə davam etsin. Bəli, Ramiz Mehdiyevin sonuncu bəyanatı sözün həqiqi mənasında özünüifşa bəyanatıdır. Heç kim Ramiz Mehdiyevi bir bəyanatla onun özündən daha yaxşı ifşa edə bilməzdi.

Məlum bəyanatda “avtobus müxalifəti”, “cib müxalifəti”, “Milli Məclisin ənənəvi növbətçi trolları”, “özünü buraxmış parlament”, “saxta deputatlar” və digər ifadələrin yer alması, bu ifadələrin Ramiz Mehdiyev tərəfindən dilə gətirilməsi vaxtilə Administrasiya rəhbəri olduğu dönəmlərdə bu biabırçı “yarlıq”ların bilavasitə onun göstərişi ilə siyasi dövriyyəyə buraxıldığını, güncəlləşdirildiyini göstərir. O, bir vaxtlar lənətlədiyi, mübarizə apardığı radikal müxalifətçilərin leksikonundan bu gün onu tənqid edənlərə qarşı utanmazcasına istifadə edir. Ramiz Mehdiyev özünü əsl Jozef Fuşe kimi apararaq riyakarlığa yol verir və bəyanatda seçkilərin nəticələrinin saxtalaşdırıldığını diqqətə çatdırır. Bəli, bu Ramiz Mehdiyev qırmızılığının son həddidir.

Lakin əsl həqiqətdə isə bu adamın seçkilərin saxtalaşdırılmasından dəm vurmağa heç bir mənəvi-siyasi haqqı yoxdur. Çünki ölkədə uzun illər boyu seçki kampaniyalarının təşkil edilməsi prosesinə Administrasiya rəhbəri kimi bilavasitə Ramiz Mehdiyevin özü rəhbərlik edib. İndi bu adam hansı haqla eynən Əli Kərimlinin, Cəmil Həsənlinin ritorikasından çıxış edir? Seçkiləri saxtalaşdıran adam indi birdən-birə süddən çıxmış ağ qaşığamı döndü? Deməli, özünün uzun illər boyu təmsil olunduğu, daha doğrusu, lap yüksək eşalonda yer aldığı siyasi sistemi hədəfə almaq, “baltalamaq” üçün məhz Ramiz Mehdiyev “əxlaq”ına malik olmaq lazımdır.

Bu adam vaxtilə “xaç ata”lıq etdiyi, bilavasitə təşkilatçısı olduğu kampaniyaların, siyasi hadisələrin məsuliyyət yükünü indi bu qədər asanlıqla başqalarının üzərinə atmağa çalışırsa, demək ki, Ramiz Mehdiyev üçün nə siyasi proseslərdə, nədəki mənəvi anlamda heç bir “qırmızı xətt”lər yoxdur. Adam öz ambisiyalarını gerçəkləşdirmək üçün hər kəsi əzib keçməyə və hər şeyi ayaqlar altına atmağa hazırdır. Bax, belələrini əsl siyasi “monstr” adlandırmaq olar. Bu “monstr”ı neytrallaşdırmaq, zərərsizləşdirmək lazımdır ki, ölkənin ictimai-siyasi mühitini gün-gündən daha da toksikləşdirməsin, zəhərləməsin.

Ramiz Mehdiyev məlum bəyanatı ilə siyasi hakimiyyətə ismarıc və eyhamlar göndərir, onun haqqında tənqidi fikir söyləyənləri riyakarlıqda ittiham edir, onlara qarşı psixoloji hücuma keçir, onları şantaj edir, hətta bəzilərini maliyyə yeyintisində, digərlərini övladlarına karyera qurmaqda suçlayır, bəzilərinə qarşı isə siyasi ittihamlar irəli sürür. Bütün bunlar həm onun çaşqınlığından, həm də kələfin ucunu, daha doğrusu, başını itirməsindən irəli gəlir. Ona görə də şantaja əl atır və eyni zamanda ona qarşı mətbuatda çıxış edən şəxsləri mövqe dəyişikliyində ittiham edir.

Ancaq Ramiz Mehdiyevin özünün mövqeyindəki təzadlı dəyişikliklərdən isə xəbəri yoxdur. O, bir tərəfdən yazısında ölkə başçısının adını tez-tez çəkir və mədhiyyə səpkisində ifadələrə geniş yer verir, ancaq digər tərəfdən isə vaxtilə ideoloqu olduğu sistemi “baltalayır”. Bunu isə yalnız əqidəsinə xəyanət etmiş, cəbhəsini dəyişmiş, silahdaşlarını satmış şəxslər edə bilər. Ramiz Mehdiyev isə belələrininin bariz nümayəndəsidir. Ramiz Mehdiyev özü “ştreykbrexer” olduğu halda, bu gün başqalarını mövqe dəyişdiklərinə görə tənqid edib aşağılamağa çalışır. Bu əsl absurddur.

Qocalıq marazmına tutulmuş bu qondarma “akademik” (onun akademik titulunu necə alması da ayrıca araşdırılmalıdır) adi, ənənəvi şantaj üsuluna əl ataraq, yazısında uzun illər yüksək vəzifə tutduğunu və hələ də Təhlükəsizlik Şurasının üzvü olduğunu xatırladır. Əlbəttə, bu xatırlatma boşuna deyil. Mehdiyev bununla eyham vurur ki, guya, hansısa sirləri aça bilər və əlində yetərincə kompromat var. Ancaq Mehdiyevin bu eyhamları, şantajları hamısı boş şeydir. Çünki Ramiz Mehdiyev “blef”lə məşğuldur, görüntü yaradır. O, özünü yalandan məlumatlı, çox informasiyalı, faktlarla və komromatlarla zəngin biri kimi göstərir. Ancaq əsl həqiqətdə isə AMEA prezidentinin nə əlində, nədəki , “seyf”ində heç bir tutarlı bəlgə, komromat yoxdur. Bu, sadəcə keçmiş “boz kardinal”ın ənənəvi taktikasıdır.

Ramiz Mehdiyev ömrü boyu belə olub, vəzifə səlahiyyətlərindən öz dar, şəxsi maraqları üçün istifadə edərək bu və ya digər rəqibinə qarşı cılız təzyiq metodlarından istifadə edib, insanları qorxutmağa, gözümçıxdıya salmağa çalışıb. Düşünür ki, yəqin ki, həmin metodlar bu gün də keçərlidir, effektivdir. Bu isə bir daha onu göstərir ki, 83 yaşlı Ramiz Mehdiyev hələ də sovet dövründə ilişib qalıb, 21-ci əsrə adlaya bilməyib. Odur ki, bu adamın nə inzibati-amirlik psixologiyasından doğan hədə-qorxularından, nədəki komromat eyhamlarından əsla çəkinmək lazım deyil. Bir sözlə, bu dəqiqə Ramiz Mehdiyevin əlində “xolostoy” güllələrdən başqa heç nə yoxdur.

Mən hesab edirəm ki, AMEA-nı yubanmadan “Mehdiyev çətəsi”ndən təmizləmək lazımdır. Bu “çətə” orda lövbər salmağa davam etdikcə, Ramiz Mehdiyev həm elmi mühitimizi, həm də ölkənin ictimai-siyasi həyatını terrora məruz qoymağına davam edəcək. Belələrini cəmiyyətdən və siyasi mühitdən təcili surətdə təcrid etmək lazımdır. Ramiz Mehdiyevlə gündəlik ünsiyyət imkanı olan və ona cəmiyyətin mövqeyini çatdırmağa cəsarəti çatan şəxslər varsa, lütfən, bu adama desinlər ki, onun AMEA prezidenti kimi yaydığı bəyanat da, atdığı addımlar da artıq cəmiyyətdə gülüş doğurur, kinayə hədəfinə çevrilir. Ramiz Mehdiyev indiyə qədər törətdiyi bütün məkrli əməllərinə və yol verdiyi səhvlərinə görə xalqdan da, bir zamanlar təmsil olunduğu siyasi düşərgədən də, bəyanatlarında ittiham və şantaj etdiyi siyasət və elm adamlarından da üzr istəməlidir.

Əgər bu qocaman şəxsdə özünə qarşı, keçib gəldiyi siyasi ömür yoluna qarşı heç olmasa, zərrə qədər də olsa hörmət hissi qalıbsa, siyasi arenanı və elm məbədimizi – AMEA-nı üzüsulu tərk etməli, istefa verib getməlidir. Onun özü bunu könüllü şəkildə etməzsə də, zaman və reallıqlar onsuz da onu süpürüb elm tarixinin “küllüyü”nə atacaq. Bu mənada könüllü şəkildə istefa verib AMEA-dan getmək bəlkə də Ramiz Mehdiyev üçün öz “sifət”ini qoruyub saxlamaqdan ötrü sonuncu şansdır. Heç olmasa, sonuncu şansınızı düzgün dəyərləndirin, Ramiz Mehdiyev!

Əlisahib Hüseynov,
Milli Həmrəylik Partiyasının sədri
Sabiq başçının məhkəməsi: 25 nəfər ifadə verdiSabunçu Rayon Məhkəməsinin inzibati binasında Cəlilabad Rayon İcra Hakimiyyətinin hazırda həbsdə olan sabiq başçısı Namiq Zeynalovun cinayət işi üzrə məhkəmə iclası davam etdirilib, şahidlər dindirilib.

Avrasiya.net xəbər verir ki, Lənkəran Ağır Cinayətlər Məhkəməsinin hakimi Xamməd Nuriyevin sədrliyi ilə keçirilən prosesdə şahid qismində 25 şəxs ifadə verib.

Daha sonra şahidlər məhkəmənin, dövlət ittihamçısının və vəkillərin suallarını cavablandırıblar.

Məhkəmənin növbəti iclası fevralın 18-nə təyin edilib.

Qeyd edək ki, N.Zeynalov 2020-ci ilin dekabr ayında Dövlət Təhlükəsizliyi Xidmətinin Cəlilabad Rayon İcra Hakimiyyətində keçirdiyi xüsusi əməliyyat zamanı saxlanılıb.

Ona Cinayət Məcəlləsinin 179.2.2-ci (Mənimsəmə və ya israf etmə təkrar törədildikdə) 179.2.3-cü (şəxs tərəfindən öz qulluq mövqeyindən istifadə etməklə törədildikdə), 179.2.4-cü (xeyli miqdarda ziyan vurmaqla törədildikdə), 308.2-ci (Vəzifə səlahiyyətlərindən sui-istifadə), 311.3.3-cü (külli miqdarda rüşvət alma), 311.3.2-ci (təkrar rüşvət alma), 313-cü (Vəzifə saxtakarlığı) maddələri ilə ittiham verilib.

N.Zeynalov 5 milyon manatdan artıq vəsaiti mənimsəmədə və rüşvət alma yolu ilə ələ keçirməkdə ittiham olunur.
Bakıda təcili yardım maşını aşdı - VideoBakının Sahil bağının yanında, Rəşid Behbudov küçəsi ilə Üzeyir Hacıbəyov küçəsinin kəsişməsində sərnişin avtomobili təcili yardım maşınını vurub.

Avrasiya.net Yenipress.az-a istinadən xəbər verir ki, nəticədə 99 JH 739 dövlət nömrə nişanlı təcili yardım maşını aşıb.

Hadisə zamanı xəsarət alanların olub-olmadığı barədə məlumat yoxdur.
Azərbaycanlı məşhur İsveçdə zorlama ittihamı ilə həbs olunduİsveçdə yaşayan, əslən Azərbaycandan olan məşhur tatu ustası Natiq Səttarov zorlama ittihamı ilə həbs olunub.

Avrasiya.net “Qafqazinfo”ya istinadən xəbər verir ki, hadisə ötən ilin noyabrın 6-da Stokholmun mərkəzində yerləşən “Oxid bar” restoranında baş verib.

Belə ki, Jozef adı ilə də tanınan Səttarov, əvvəllər tanımadığı qadını ayaqyolunda zorlayıb. Məlumata görə, onun təcavüzünü restoranın digər qonaqlarının tualetin qapısını döyməsi dayandırıb.

Keçirilən tibbi müayinə zamanı qadında zorlamanın izləri aşkar edilib. Səttarov ittihamı rədd etsə də, Stokholm məhkəməsi fevralın 3-də onu 8 ay müddətinə azadlıqdan məhrum edib.

Qeyd edək ki, Natiq Səttarov əvvəllər narkotik vasitələrin qanunsuz dövriyyəsi, qeyri-qanuni avtomobil idarə etmək və saxta sənədlərdən istifadə etməkdə təqsirli bilinib.

Xatırladaq ki, illər öncə Natiq Səttarovun mərhum meyxanaçı Ağasəlim Çıldağın nikahdankənar oğlu olması ilə bağlı iddialar yayılmışdı. Lakin meyxanaçının qardaşı bu iddianı təkzib etmişdi. Məlumata görə, Natiq Səttarov 2006-cı ildə İsveçdə siyasi sığınacaq alıb. Televiziya ulduzu kimi də tanınan Natiqin instaqramda 250 mindən çox izləyicisi var.

GSISD "Qadınlar, Elm və Davamlı İnkişaf” mövzusunda Beynəlxalq Vebinar təşkil edibDayanıqlı İnkişaf üzrə Qlobal Strateji İnstitutu (GSISD) 2022-ci ildə BMT-nin Elmdə Beynəlxalq Qadınlar və Qızlar Gününü qeyd etmək üçün “Qadınlar, Elm və Davamlı İnkişaf” mövzusunda Beynəlxalq Vebinar təşkil edib.

GSISD, “THE” Beynəlxalq Cəmiyyəti və İslamabad Regional Araşdırmalar Mərkəzi - ICRS “Qadınlar, Elm və Davamlı İnkişaf” mövzusunda Beynəlxalq Vebinar təşkil edərək, Birləşmiş Millətlər Təşkilatının "Elmdə Qadınlar və Qızların Beynəlxalq Günü" nü qeyd edib. Bütün dünyada qadınların elmi nizam-intizamda fəal rolunun vacibliyini nəzərə alaraq, dünya ictimaiyyəti bu hadisəni hər il fevralın 11-də qeyd edir. Vebinarın əsas diqqəti qadınların elmə və davamlı inkişafa cəlb edilməsi olub. Elm və gender bərabərliyi beynəlxalq səviyyədə razılaşdırılmış inkişaf məqsədlərinə, o cümlədən Dayanıqlı İnkişaf üçün 2030-cü il gündəliyinə nail olmaq üçün həyati əhəmiyyət kəsb edir. Son onilliklər ərzində dünya ictimaiyyəti qadınları və qızları elmə həvəsləndirmək və cəlb etmək üçün çoxlu səylər göstərmişdir. Bununla belə, qadınlar və qızlar elmdə tam iştirak etməkdən kənarda qalırlar.

GSISD-nin təsisçisi icraçı direktoru Qayser Navab vurğulayıb ki, “Bugünkü dünyanın elmə və elmə daha çox qadın və qıza ehtiyacı var”. O, daha sonra bildirib ki, davamlı inkişaf məqsədlərinə nail olmaq üçün qadınların elmə cəlb edilməsi vacibdir. O, həmçinin gender bərabərliyi, qadınların səlahiyyətləndirilməsi və davamlı qərar qəbuletmə prosesində və qlobal ləyaqətin təmin edilməsində gənclərin rolunu ətraflı izah edib.

Cənab Nəvab qadınların müxtəlif aspektləri, elm və davamlı inkişaf haqqında əhəmiyyətli çıxışlar təqdim etdikləri üçün bütün natiqlərə təşəkkür edib. O, bu tədbiri uğurla təşkil edən GSISD komandasının səylərini yüksək qiymətləndirib.

Cənab Nəvab məlumat verib ki, “Dayanıqlı İnkişaf üzrə Qlobal Strateji İnstitutu (GSISD) davamlı inkişaf sahəsində nüfuzlu qlobal siyasət tədqiqat institutudur. Bu, siyasətçilər, vətəndaş cəmiyyəti fəalları, akademik dairələr və gənc liderlərdən ibarət konsorsiumdur. O, daha sonra bildirib ki, bu siyasətə əsaslanan tədqiqat institutunun əsas məqsədi debatlara, dialoqlara başlamaq və həmçinin davamlı inkişafla əlaqəli müxtəlif məsələlərin davamlı həllini tapmaq üçün strateji yönümlü və obyektiv tədqiqatlara başlamaqdır.

GSISD-nin Tədqiqat, İnkişaf və Planlaşdırma üzrə həmtəsisçisi və Baş Direktoru Dr. Muhammad Shakeel Ahmed iştirakçıları salamlayıb və qadınların elm sahəsindəki layiqli töhfələrini yüksək qiymətləndirərək beynəlxalq vebinarın əhəmiyyətini vurğulayıb. “COVID-19-un hazırkı dövründə qadınlar ictimai səhiyyədə təsirli rol oynadılar və eyni zamanda cəbhə bölgəsində peşəkar tibb işçiləri kimi çalışdılar. Elmdə qadınların töhfələrini tanımaq, stereotipləri məhv etmək və elmdə qadınlara və qızlara qarşı ayrı-seçkiliyə qalib gəlmək həmişəkindən daha vacibdir”. - o, əlavə edib

Əsas məruzəçi Avropa Komissiyasının və diplomatik mühitin fəlsəfə doktoru xanım Lidia Natalia TRUSILEWICZ qadınların elmdə rolu ilə bağlı fikirlərini bölüşüb. O, qadınların çoxşaxəli çətinliklərə baxmayaraq elmi intizamda əla rol oynadığını bildirib. O, həmçinin Böyük qadın alimi Mari Salomea Skłodowska Curie haqqında məlumat verib.

Dr Eng. Lidiya Natalia Təhsil, Mədəniyyət, Gənclər və İdman üzrə Avropa Komissarı tərəfindən Marie Skłodowska-Curie Actions (MSCA) proqramının əməkdar nümayəndəsidir. O, xüsusilə elm kommunikatoru və Tədqiqat və İnkişaf tədbirlərinin təşkilatçısı, habelə mülki və ətraf mühit mühəndisliyi elmi, tullantıların idarə edilməsi və dairəvi iqtisadiyyat sahələrində peşəkar könüllü olmaqdan zövq alır.

İslamabad Regional Tədqiqatlar Mərkəzinin prezidenti
Səfir Fauzia Nasreen bildirib ki, qadınlar bütün və hər sahədə və təhsil kimi peşələrdə elmə və hər bir mümkün bilik sahəsinə müraciət etmək üçün işə götürülməlidirlər ki, onlar regional səviyyədə keçid edə bilsinlər.
Elm sahəsində çalışan qadınlar cəmiyyətin inkişafında həlledici rol oynayırlar. Son illərdə elmdə qadınların və qızların artması cəmiyyətimizin tərəqqi etdiyini göstərir. Fauzia Nasreen şəxsi təcrübəsindən danışarkən, başqa cinsdən olan insanlar həqiqətən dəstək oldular və yoldaşlıq nümayiş etdirdilər. O, həmçinin BMT-nin SDG-lərinə və qadınların və qızların elmdə iştirakının vacibliyini necə müzakirə etdiyini və bunun bir ölkənin və ya millətin iqtisadiyyatı və sosial inkişafı üçün yaxşı olduğunu qeyd edib.

10 il əvvəl dənizdə batan şəxsi dayısı oğlu öldürübmüşAbşeron sakini 10 il əvvəl bibisi oğlunu dənizdə boğaraq öldürüb.

Bu barədə Avrasiya.net-ə Baş Prokurorluğun Mətbuat Xidmətindən məlumat verilib.

Bildirilib ki, 21.06.2012-ci il tarixdə Abşeron rayonu, Saray qəsəbə sakini Bayramov Ceyhun Yunis oğlunun Xəzər dənizinin Sumqayıt şəhəri Novxanı çimərliyinə aid hissəsində dənizdə çimərkən boğulub ölməsi faktı ilə bağlı Cinayət Məcəlləsinin müvafiq maddəsi ilə cinayət işi başlanılaraq Qubadlı rayon prokurorluğunda ibtidai istintaq aparılmış, istintaqla cinayəti törətmiş şəxs və ya şəxslər müəyyən edilmədiyindən iş üzrə icraat 19.06.2014-cü il tarixli qərarla dayandırılmışdır.

Bağlı qalmış cinayət işlərinin açılması istiqamətində görülən istintaq-əməliyyat tədbirləri ilə 10 il əvvəl törədilmiş cinayətin üstü açılaraq Ceyhun Bayramovun dayısı oğlu Fuad Qasımov tərəfindən qəsdən öldürülməsi müəyyən edilmişdir.

Fuad Qasımov 08.02.2022-ci il tarixdə rayon prokurorluğunda dindirilərkən qeyd edilən tarixdə bibisi oğlu Ceyhun Bayramov ilə dənizdə çimərkən onu boğaraq öldürdüyünü etiraf etmişdir.

İş üzrə toplanmış kifayət qədər sübutlar əsasında Fuad Qasımov Cinayət Məcəlləsinin 120.1-ci (qəsdən adam öldürmə) maddəsi ilə təqsirləndirilən şəxs qismində cəlb edilməklə rayon məhkəməsinin qərarı ilə barəsində həbs qətimkan tədbiri seçilmişdir.

Hazırda iş üzrə istintaq tədbirləri davam etdirilir.
İran Türkiyədə nüvə aliminin qisasını almağa cəhd etdi: Kəşfiyyat planı iflasa uğratdıTürkiyə kəşfiyyatı aerokosmik texnologiyalar sahəsində çalışan İsrail əsilli iş adamını öldürməyə hazırlaşan doqquz İran casusundan ibarət şəbəkəni ortaya çıxarıb.

Sözügedən qətl planı iranlı nüvə alimi Mahsen Fəxrizadənin öldürülməsinin qisası olaraq planlaşdırılıb. İranın nüvə proqramının rəhbəri sayılan alimin 2020-ci ilin noyabrında İsrail kəşfiyyatı “Mossad” tərəfindən öldürüldüyü iddia olunur.

İranlı casuslar iş adamı Yan Qelleri izləyərkən ifşa olublar. Sui-qəsd hazırlığı barədə Türkiyə kəşfiyyat orqanları həmçinin İsrail tərəfinə də məlumat veriblər.

Şəbəkəyə İran kəşfiyyatının zabiti Yasin Tahirimamkəndi adlı şəxsin rəhbərlik etdiyi bildirilib.

Faktla bağlı danışan alim özünü Türkiyə təhlükəsiz şəraitdə hiss etdiyini qeyd edib.

Mənbə: Times Of Israel
Pekin Olimpiadasında medal sıralaması - SİYAHIPekində keçirilən Qış Olimpiya Oyunlarının medal sıralamasında Almaniya yığması liderliyini davam etdirir.

Avrasiya.net xəbər verir ki, Olimpiadanın arxada qalan 8 günündən sonra Almaniya yığmasının hesabında 7 qızıl və 4 gümüş medal var.

İlk beşlikdə, həmçinin Norveç (6 qızıl, 3 gümüş, 5 bürünc medal), Niderland (5, 4, 1), İsveç (5, 2, 2) və Avstriya (4, 6, 4) yığmaları yer alır.

Oyunlara ev sahibliyi edən Çin medal sıralamasında 7-ci yerdə gedir. ÇXR yığması hesabına hələlik 3 qızıl, 3 gümüş və 1 bürünc medal yazdıra bilib.

Rusiya komandası 8-ci yerdədir. Rusların aktivində 2 qızıl, 4 gümüş, 6 bürünc var.

Xatırladaq ki, “Pekin-2022” Qış Olimpiya Oyunlarında 91 ölkədən 2800-dən çox idmançı iştirak edir. Olimpiadada atletlər idmanın 15 növü üzrə 109 dəst medal uğrunda mübarizə aparırlar. Oyunlar fevralın 20-də başa çatacaq.
Baydenin müşaviri “Rusiya-Ukrayna müharibəsi”nin tarixini açıqlayıbRusiya Ukraynanın işğalına kifayət qədər hazırlaşmağı bacardı, artıq Kiyevə hücum hər gün baş verə bilər.

Bunu ABŞ prezidenti Co Baydenin milli təhlükəsizlik məsələləri üzrə müşaviri Ceyk Sallivan deyib.

“ABŞ kəşfiyyatının məlumatına görə, Rusiya prezidenti Vladimir Putin fevralın 20-də Pekin Olimpiadasının bitməsinə az qalmış Ukraynanın işğalı barədə göstəriş verə bilər”, -deyə Ceyk Sallivan Ağ Evdə keçirilən brifinqdə deyib.

Bununla belə, o qeyd edib ki, Rusiya rəhbərinin işğala başlamaq əmri verdiyini təsdiqləyən dəqiq məlumat yoxdur.

Sallivan həmçinin Ukraynadakı bütün amerikalıları yaxın iki gün ərzində onun ərazisini tərk etməyə çağırıb. Onun fikrincə, rusların işğalı havadan bombardmanla başlaya bilər.