“Parkur ilə hərəkət, zəka ilə qələbə” qrant layihəsinin yarımfinal mərhələsi uğurla keçirildi
Yarımfinal çərçivəsində iştirakçılar həm fiziki, həm də zehni bacarıqlarını nümayiş etdirmişlər. Parkur zolağında qurulmuş müxtəlif maneələrin sürətli, düzgün və təhlükəsiz şəkildə dəf olunması ilə yanaşı, iştirakçılar strateji düşünmə, ani qərarvermə və düzgün taktika seçimi bacarıqlarını da sərgiləmişlər.
Yarımfinal mərhələsində oyunların qurulmasına və təqdimatını həyata keçirmək üçün Gəncə-Daşkəsən Regional Gənclər və İdman İdarəsinin Gənclərlə iş sektorunun baş məsləhətçisi və gənclərlə iş üzrə təlimçi Maarif Quliyev dəvət edilmişdir. Həmçinin oyunun icrası üçün baş hakim qismində fiziki tərbiyə müəllimi Elmir Ələkbərov, oyuna nəzarəti layihə eksperti Eldəniz Səttarov, idman mütəxəssisləri Azərbaycan Aikido və Budo Mərkəzinin Gəncə regional şöbəsinin rəhbəri, 6-cı dan qara kəmər ustası və təlimatçı Ramin Yusifov və Atletika idman növü üzrə beynəlxalq yarışlar qalibi Ruslan Hüseynov izləmişlər.
Yarımfinal mərhələsi iştirakçılar arasında sağlam rəqabət mühitinin formalaşmasına, idmana marağın artmasına və şagirdlərin fiziki-psixoloji inkişafına mühüm töhfə vermişdir. Final mərhələsinə vəsiqə qazanan iştirakçılar artıq həlledici mərhələyə hazırlaşırlar.
Qeyd edək ki, Təhsildə inkişaf və innovasiyalar üzrə IX qrant müsabiqəsinin qalibi olan layihə Şəmkir şəhər Cahangir Rüstəmov adına tam orta məktəbin müəllimi Vüqar Xəlilov tərəfindən icra olunur. Layihənin əsas məqsədi şagirdlərin idman bacarıqlarının inkişafına, fiziki hazırlığın gücləndirilməsinə və müasir idman növlərinə marağın artırılmasına töhfə verməkdir.
