"Bu, Bakının qlobal təhlükəsizlik sistemində rolunu gücləndirir"

“Azərbaycanın əsas hədəflərindən biri regionda dayanıqlı sülhün təmin olunmasıdır. Ermənistanla sülh prosesinin irəliləməsi yalnız ikitərəfli münasibətlərin normallaşması deyil, həm də regional təhlükəsizlik sisteminin qurulması, iqtisadi əməkdaşlıq platformalarının yaradılması, Cənubi Qafqazın sabitlik məkanına çevrilməsi deməkdir. Bu yanaşma regionu geosiyasi qarşıdurma zonasından əməkdaşlıq məkanına transformasiya edir”.

Bunu Avrasiya.net-ə açıqlamasında Milli Məclisin deputatı Arzuxan Əlizadə deyib.

Deputat bildirib ki, bu gün bölgədəki təhlükəsizlik strategiyasının müəllifi Prezident İlham Əliyevdir.
“Bu proseslərin mərkəzində Prezident İlham Əliyevin yürüdüyü siyasət dayanır. Onun təhlükəsizlik strategiyası üç əsas istiqaməti birləşdirir. Bunlar regional sülh təşəbbüsləri, qlobal təhlükəsizlik sisteminə inteqrasiya, çoxşaxəli tərəfdaşlıq siyasətidir. Bu yanaşma Azərbaycanı regionda təhlükəsizlik arxitekturasının əsas aktorlarından birinə çevirir”, -o vurğulayıb.

O əlavə edib ki, ABŞ–Azərbaycan təhlükəsizlik əməkdaşlığı və Bakının sülh təşəbbüsləri regionda yeni mərhələnin başlandığını göstərir: “Azərbaycan artıq regional sabitliyin təminatçısı, sülh təşəbbüslərinin müəllifi, beynəlxalq təhlükəsizlik əməkdaşlığının aktiv iştirakçısı kimi çıxış edir.
Beləliklə, Prezident İlham Əliyevin yürüdüyü siyasət Cənubi Qafqazın münaqişə məkanından təhlükəsizlik və əməkdaşlıq platformasına çevrilməsi prosesini sürətləndirir və Azərbaycanın qlobal təhlükəsizlik sistemində rolunu gücləndirir”.