Rusiyanın Cənubi Qafqazdakı siyasəti bizə bəllidir - Fuad Əliyev
Rusiyanın müdafiə naziri Sergey Şoyqunun “Dəniz kuboku” müsabiqəsinin açılış mərasimində Bakıya səfəri və burada keçirdiyi görüşlər geniş müzakirələr doğurub. Xüsusilə, son bir ayda Azərbaycanla Rusiya arasında məlum silah qalmaqalı fonunda bu səfər ətrafında ən müxtəlif fikirlərə rast gəlinir. Çoxları hesab edir ki, müdafiə nazirinin yarışla bağlı gəldiyi barədə deyilənlər o qədər də inandırıcı deyil. Şoyqunun başqa səbəblərdən Bakıya gəldiyi ehtimal olunur.
Rusiya müdafiə nazirin Bakıya səfəri ilə bağlı Azərbaycan Liberal Demokrat Partiyasının (ALDP) sədri Fuad Əliyev “Yeni Müsavat” qəzetinə açıqlama verib.
ALDP sədri Fuad Əliyev yarışın bəhanə olduğu qənaətindədir: “Hər il ”Dəniz kuboku" müsabiqəsi artıq ənənəvi olaraq Azərbaycanda keçirilir. Amma bu il tam başqa formatda oldu. Dörd ölkədən ikisi - İran və Qazaxıstan COVİD-19-a görə bu müsabiqədə iştirakdan imtina etdilər. Prinsipcə, Azərbaycan və Rusiya da imtina edə bilərdilər. Amma nədənsə etmədilər. Hesab edirəm ki, Ermənistanın Tovuz istiqamətində təxribatı nəticəsində Azərbaycan ordusu tərəfindən layiqli cavab alması, ordumuza dəstək üçün yüz minlərlə soydaşımızın həmrəylik nümayiş etdirməsi, hər bir azərbaycanlının döyüşə getməyə hazır olması, bir sıra ölkələrin təxribata görə Ermənistanı qınamaları, Türkiyə rəsmilərinin açıq və net şəkildə bəyanatları, Dövlət başçısı İlham Əliyevin Putinə zəng etməsi, Kremlin Ermənistanın silahlandırılması məsələsinə aydınlıq gətirməsinin istənilməsi Rusiyaya bu dəfə məsələnin ciddi olduğunu anlatdı. Baxın, Tovuz döyüşlərindən sonrakı 50 gün ərzində Rusiya rəsmilərinin həm Tovuz hadisələri, həm də Dağlıq Qarabağ münaqişəsi ilə bağlı aktivliyi müşahidə olundu. Məlum məsələdir ki, Şoyqu “Dəniz kubokuna” görə Bakıya gəlməyib. Hər il bu yarış onun iştirakı olmadan keçirilib.
Nəzərə alsaq ki, Şoyqu Bakıya səfərdən qabaq İrəvana gedib, deməli, bu səfər daha çox siyasi xarakter daşıyır. Görünür, onun regiona təcili gəlməyi Azərbaycan və Ermənistan rəhbərlərinə Putinin bu məsələlərə dair fikirlərini çatdırmaqdır. Şoyqunun Bakıda Rusiyanın Ermənistanı silahlandırmasına dolayısı yolla don geydirməyini də nəzərdən qaçırmamalıyıq. Rusiyanın Cənubi Qafqazdakı siyasəti bizə bəllidir. Hesab edirəm ki, regionda ciddi dəyişikliklər olacaq və Azərbaycan ona hazır olmalıdır".
