Həm leqal miqrasiya, həm də turizm xəttində təhlükəsizliyə təhdidlərin qarşısını almaq üçün kompleks tədbirlər görülməlidir. Trend-in məlumatına görə, bu barədə politoloq Arzu Nağıyev deyib.

A.Nağıyev bildirib ki, ümumilikdə həm leqal miqrasiya, həm də turizm xəttində təhlükəsizliyə təhdid mövcuddur:

"Məhz buna görə də leqal miqrasiya və turizm xəttində təhlükəsizliyə təhdidlərin qarşısını almaq üçün kompleks tədbirlər həyata keçirilir və keçirilməlidir. Məlum məsələdir ki, viza tələb olunan dövlətlərdə bunu xüsusi xidmət orqanları həyata keçirə bilir. Vizasız rejimdə isə səfər edən xarici ölkə vətəndaşları barədə, ümumiyyətlə, zəruri məlumatlar haqqında baza yaradılmalıdır. Çünki son vaxtlar baş verən hadisələr göstərir ki, dünyanın bir sıra dövlətlərində terror aktları törədilərkən, istərsə də digər təhlükəsizliyə təhdid məsələlərində həm turizm, həm də miqrasiya xəttindən istifadə olunur. Bunun da qarşısını almaq üçün kompleks tədbirlər görülməli, əməliyyat şəraitinə nəzarət edilməli, həm vizasız, həm də viza ilə gələn vətəndaşların özlərinin də təhlükəsizliyinin qorunması istiqamətində müvafiq addımlar atılmalıdır. Bu, həm hüquq-mühafizə orqanlarının, həm Xarici İşlər Nazirliyinin, həm də Miqrasiya Xidmətinin üzərinə düşən birbaşa məsələlərdir".

Politoloq vurğulayıb ki, son vaxtlar Azərbaycan çoxsaylı beynəlxalq tədbirlərə, eləcə də idman yarışlarına ev sahibliyi edir: "Təbii ki, biz ölkəmizə xoş məramla gələnləri həmişə qarşılamağa hazır olan bir dövlətik. Bildiyiniz kimi, Azərbaycanda da sadələşdirilmiş viza rejimi tətbiq olunur. Bunu dövlət rəhbərliyi də nəzarətdə saxlayır. Ümumiyyətlə, yuxarıda sadalananları nəzərə alaraq, hüquq-mühafizə orqanları, xüsusi xidmət orqanları bütün bu məsələləri daim nəzarətdə saxlamalıdır".

Daxili İşlər Nazirliyi (DİN) Sumqayıtda kadr islahatları aparıb.

“Report” məlumatına görə, Sumqayıt şəhər Polis İdarəsinin 4-cü Polis Bölməsinin rəisi Ruslan Hüseynov, Dövlət Yol Polisinin əməkdaşları – Loğman İsmayılov və Rəşid Məcidov işdən kənarlaşdırılaraq sərəncama götürülüb.

Məlumata görə, polislər kök olduqları üçün normativləri yerinə yetirə bilməyiblər.

Daxili İşlər naziri general-polkovnik Ramil Usubov yeni rəis təyin edib.

Unikal.org-un məlumatına görə, Ramil Usubovun müvafiq əmri ilə polis mayoru Məmməd Əliyev bu gün Yasamal rayon Dövlət Yol Polisi Şöbəsinin rəisi vəzifəsinə təyinat alıb.

Gültəkin Hacıbəylinin BAXCP sədri, millət vəkili Qüdrət Həsənquliyevin çıxışı ilə bağlı səsləndirdiyi fikirlər əks-reaksiya doğurub.

Avrasiya.net xəbər verir ki, BAXCP sədrinin müavini Niyaməddin Orduxanlı Gültəkin Hacıbəylinin növbəti dəfə ictimaiyyətə yalan danışdığını bildirib.

“O deyib ki, guya Qüdrət bəy cərimələr hesabına deputatların əmək haqlarının artırlmasını təklif edib. Halbuki Qüdrət bəy Milli Məclisdə toplanan cərimələr hesabına ayrı-ayrı kateqoriyalardan olan işçilərin əmək haqqının artırılmasının sosial ədalət prinsipini pozduğunu bəyan edib və ləğv olunmasını tələb edib. Onun çıxışı mətbuatda dərc olunub. Qeyd edib ki, əgər bu qayda ləğv olunmursa, onda hakimiyyətin müstəqil qanadı olan Milli Məclis Aparatının əməkdaşları Prezident Administrasiyasının əməkdaşlarından daha az maaş alır, onların da maaşı eyni qaydada artırılsın. Başqa sözlə, Qüdrət bəy ümumiyyətlə bu məsələ ilə bağlı çıxışında deputatlarla bağlı deyil, MM Aparatı işçiləri ilə bağlı danışıb”, - N.Orduxanlı bildirib.

Sədr müavini deyib ki, G.Hacıbəyli deputat olanda iqtidara yarınmasına və yaltaqlığına haqq qazandırmaq üçün bu gün deyir ki, o deputat olanda da səmimi olub, indi iqtidarı yamanlayanda da səmimidir:

“Deməli ya onda yalan danışıb, ya da indi yalan danışır. Bir- birindən tam fərqli fikirlər söyləməyin səmimiyyətə nə aidiyyəti var?! İqidar həmin iqtidardır!”

N.Orduxanlı vurğulayıb ki, Azərbaycanın regionun lider dövləti olmasını Qüdrət Həsənquliyev yazmayıb:

“Azərbaycanın regionun lideri olduğunu Gültəkin Hacıbəylinin indiki lideri Cəmil Həsənli yazıb! Qüdrət bəyin çıxışlarını oxumursa, heç olmasa, liderinin yazdıqlarını oxusun!”

Hindistanın PHD Ticarət və Sənaye Palatası (PHDCCI) Hindistanın Bakıdakı Səfirliyinin dəstəyi ilə “Hindistanın ən yaxşıları ” - ən böyük eksklüziv Hindistan məhsulları ticarət sərgisinin açılışına start verilib.

Avrasiya.net xəbər verir ki, açılış mərasimində çıxış edən PHD Ticarət və Sənaye Palatasının baş katibi Maheş Reddi deyib ki, xarici ölkələrdə təşkil olunan sərgilərdə Hindistan sənayesinin yüksəkkeyfiyyətli məhsullarının, müxtəlif sənaye sahələrinə aid xidmətlər və texnologiyalar təqdim olunur. M.Reddi bildirib ki, bu sərgiyə elektronika, velosiped, düyü, çay, ədviyyatlar, qablaşdırma, əczaçılıq, hədiyyələr, sənətkarlıq məhsulları, dəftərxana ləvazimatı, ev mebeli, tekstil, geyim, zinət əşyaları da daxil olmaqla yüksək keyfiyyətli məhsul və xidmətlər sərgiləyən 75 Hindistan şirkəti qatılıb.

Hindistanın ölkəmizə yeni təyin olunan səfiri Bavitlunq Vanlalvavna ölkələrimiz arasındakı mövcud əlaqələrin inkişafından və davamlı siyasi dialoqun mövcudluğundan məmnun olduğunu vurğulayıb və deyib ki, son zamanlar Hindistan və Azərbaycan arasında ticarət dövriyyəsinin həcmində artımın müşahidə olunmasını təqdirəlayiq bir haldır. Səfir deyib ki, Hindistan və Azərbaycan arasında tarixi bağlar və inkişaf etməkdə olan ikitərəfli əməkdaşlığa əsaslanan yaxın dostluq münasibətləri mövcuddur. Əlavə edib ki, iki ölkə arasında enerji, əczaçılıq, kənd təsərrüfatı, turizm, informasiya texnologiyaları, elm və texnologiya, tekstil və geyim və təhsil kimi bir sıra sahələrdə artmaqda olan biznes və ticarət əlaqələri var: “2017-ci ildə Hindistanın Azərbaycancana ixracının həcmi 37 milyon dolları keçib, Hindistan və Azərbaycan arasındakı ümumi ikitərəfli ticarətin həcmi 463 milyon dollara çatıb.

Ekologiya və təbii sərvətlər nazirinin müavini Firdovsi Əliyev Azərbaycanla Hindistan arasında mövcud əlaqələrin qədim tarixindən danışaraq deyib ki, hər iki ölkənin çoxşahəli əlaqələri mövcuddur: “Hindistan Azərbaycanın müstəqilliyini tanıyan ilk ölkələrdəndir. Azərbaycan və Hindistan arasında ticarət, iqtisadiyyat, elm, texnologiya və digər sahələrdə əlaqələr intensiv inkişaf edir. İki ölkə arasında əməkdaşlıqda daşımalar xüsusi yer tutur. Belə ki, Bakı-Tbilisi-Qars dəmir yolu, Ələt Bakı Beynəlxalq Dəniz Ticarət Limanının Hindistan şirkətləri tərəfindən istifadə olunması xüsusi vurğulanmalıdır”.

Sərgi martın 7-dən başlayaraq 17 mart tarixinə kimi, saat 11-dən 19.00 kimi Bakı İdman Sarayında (Neftçilər prospekti 26a, Bakı, Azərbaycan) davam edəcək. Sərgiyə giriş sərbəstdir.

Bu gün Azərbaycan Respublikasının Prezidenti yanında Əfv Məsələləri Komissiyasının 2019-cu il üçün növbəti iclası keçiriləcək.

Komissiyadan verilən məlumata görə, iclasda daxil olan müraciətlərə baxılacaq, müzakirələr aparılacaq.

Qeyd edilib ki, Əfv Komissiyasının katibliyi və əfv sektoru daim işləyir, mütəmadi olaraq müraciətləri qəbul edir. Ümumilikdə Komissiyaya 1000-dən artıq müraciətin daxil olduğu bildirilib.

Xatırladaq ki, 2018-ci ilin may ayında Cümhuriyyətin 100 illiyilə bağlı Prezident tərəfindən imzalanan böyük əfv sərəncamı ilə 634 məhkum cəzadan azad edilib. Onlardan 609 nəfər azadlıqdan məhrumetmə cəzasının qalan hissədindən azad olunub.

Bu il Novruz bayramı ərəfəsində ölkə Prezidenti tərəfindən humanist addımların davamı olaraq, növbəti əfv sərəncamının imzalanacağı gözlənilir.

Plüralizm, söz azadlığı, insan hüquqları, etnik və dini azlıqların hüquqları və sair kimi məsələlər beynəlxalq güc mərkəzlərinin milli dövlətlərə qarşı təzyiq vasitəsi kimi istifadə etdikləri ən effektiv silahdır. Bu universal dəyərlər siyasi istismar vasitəsinə çevrilərək, dəyərsizləşdirilir və qlobal imperializm bunu öz məqsədlərinə çatmaq üçün edir.

Bunu Teleqraf.com-a açıqlamasında Milli Məclisin deputatı, politoloq Hikmət Babaoğlu deyib.

O qeyd edib ki, başqa ölkələrdən hüquq və azadlıqlara hörmət tələb edən beynəlxalq güc mərkəzlərinin özləri ən çox hüquq və azadlıqları pozan ölkələrdir:

“Onlar öz milli mənfəətlərini, imperialist maraqlarını təmin etmək üçün istismar obeykti kimi müəyyənləşdirdikləri ölkələrə xüsusi təzyiq, yaxud elə siyasi şantaj mexanizmi formalaşdıraraq onun adını bəzən beynəlxalq hüquq müdafiə təşkilatları, bəzən beynəlxalq və regional təşkilat, bəzən isə söz və vicdan azadlıqları təşkilatları qoyurlar. Ancaq bunların əsl məqsədi hüquq və azadlıqların qorunması deyil, qeyd etdiyimiz kimi bəzi ölkələri nəzarət altında saxlamaqdır. Fəxrəddin Abbaszadənin həbsinə siyasi don geyindirmək istəyənlər də elə həmin istismarçı mərkəzlərin beynəlxalq şantaj şəbəkəsidir”.

H.Babaoğlu qeyd edib ki, F.Abbaszadə Azərbaycana qarşı radikal çıxışlar edən separatçıdır və Azərbaycan hüquq-mühafizə orqanlarının rəsmi sorğusu əsasında federal axtarışa verilib, sentyabrın 6-da Rusiyada saxlanılıb:

“Onun haqqında hələ 2018-ci il iyulun 12-də Səbail rayon məhkəməsinin qərarı ilə cinayət işi açılıb və həbsinə qərar verilib. O, ermənilərə məxsus mətbuat orqanlarında da Azərbaycana qarşı separatçı çıxışlar edib. Fəxrəddin Abbaszadənin Ermənistan xüsusi xidmət orqanları ilə sıx əlaqədə olduğu da bəllidir. Dəfələrlə işğalçı Ermənistanın paytaxtı İrəvan şəhərində müxtəlif tədbirlərə qatılaraq işğalçılıq siyasətinə dəstək verib.

Bütün bunlar isə ölkəmizin milli təhlükəsizliyini təhdid etməklə konkret cinayət tərkibli hərəkətlərdir və hamı çox aydın dərk etməlidir ki, Azərbaycan qanunlarını pozan, onun milli təhlükəsizliyini təhdid edən hərəkətlərə kim yol veribsə, mütləq gec-tez cəzalandırılacaq.

Ona görə də burada etnik mənsubiyyət, ya da hansısa azadlıq, hüquq axtarmaq yersizdir. Azərbaycanın bütün vətəndaşları qanun qarşısında bərabərdir və hamı eyni dərəcədə məsuliyyət daşıyır. Bu hadisəni siyasiləşdirmək istəyənlər məqsədlərinə nail ola bilməyəcəklər”.

04 mart 2019-cu il tarixində Pirallahı rayonunda yerləşən 168 №-li orta məktəbdə "Tarix yazan qəhrəmanlar" başlığı altında vətənpərvərlik mövzusunda tədbir keçirildi.

Yeni Azərbaycan Partiyası Pirallahı rayon təşkilatının təşkilatçılığı ilə keçirilən tədbirdə Yeni Azərbaycan Partiyası Pirallahı rayon təşkilatının sədri Hikmət Şikarov, Azərbaycanın Milli Qəhrəmanı Bəxtiyar Allahverdiyev, Azərbaycan Əfqanıstan Veteranları İctimai Birliyinin İdarə Heyətinin üzvü Musa Həsənli, Xocalı Soyqırımını Tanıtma İctimai Birliyinin İdarə Heyətinin üzvü Qafar Nuriyev, "N"saylı hərbi hissənin əsgər və zabitləri, Pirallahı rayon ümumtəhsil müəssisələrinin X-XI sinif şagirdləri və Qarabağ müharibəsi veteranları iştirak etdilər. Çıxış üçün söz alan Yeni Azərbaycan Partiyası Pirallahı rayon təşkilatının sədri, Qarabağ və Əfqanıstan müharibələrinin veteranı Hikmət Şikarov Azərbaycan gəncliyinin vətənpərvər ruhda böyüməsində dövlətimizin apardığı siyasətdən danışdı. " Ümummilli lider Heydər Əliyev Azərbaycan vətəndaşlarının sabaha olan ümidlərini özlərinə qaytardı. Elmin, səhiyyənin və mədəniyyətin böhranlı vəziyyətdən çıxarılması naminə gərəkli addımlar atdı. Ən başlıcası isə milli ordumuzun döyüşkən ruhunu özünə qaytarmaq üçün ordunu yenidən qurmağa başladı. "Mən Azərbaycan milli ordusunun gücünə inanır, Azərbaycan əsgərinə güvənirəm”, - deyən ümummilli liderimiz bu sahədə yetərincə işlər gördü. O, xalqın ən ağır vaxtlarında ordu quruculuğunda uğurlu islahatlar apararaq, vətəni, ana torpağı qəlbən sevən igid əsgərlərimizə zəfər qazanmağın yollarını nişan verdi.

Ümummilli liderimizin siyasi kursunu davam etdirən müstəqil Azərbaycan dövlətinin Prezidenti, Ali Baş Komandan İlham Əliyev də yurda keşik çəkən vətən övladlarından qayğısını əsirgəmir. Məhz İlham Əliyevin qayğısı sayəsində ordumuz ən müasir silahlarla təmin olunub. Milli Ordumuzun yaranmasının və Bakının erməni işğalından azad olunmasının 100 illiyi ilə əlaqədar iyun ayının 26-da və sentyabr ayının 15-də keçirilən hərbi paradlar bir daha göstərdi ki, Azərbaycanın silahlı qüvvələri bölgədə lider olmaqla yanaşı, həm də dünyanın ən aparıcı orduları ilə bərabər səviyyədədir".

Azərbaycanın Milli Qəhrəmanı Bəxtiyar Allahverdiyev, Azərbaycan Əfqanıstan Veteranları İctimai Birliyinin İdarə Heyətinin üzvü Musa Həsənli, Xocalı Soyqırımını Tanıtma İctimai Birliyinin İdarə Heyətinin üzvü Qafar Nuriyev də öz çıxışlarında keçdikləri şanlı döyüş yolundan danışaraq qeyd etdilər ki, Vətənpərvərlik təkcə itirdiyimiz torpaqlari geri qaytarmaq istəyi deyil. Vətənpərvərlik, ilk növbədə, dininə, dilinə, tarixinə, keçmişinə, ədəbiyyatına, musiqisinə hörmət, ətrafdakı insanlara sevgi deməkdir. Vətənə sevgi məhz vətənpərvərlikdən başlayır. Allaha, valideynlərimizə borclu olduğumuz kimi, vətənə də borcluyuq. Rəsmi hissənin sonunda Yeni Azərbaycan Partiyası Pirallahı rayon təşkilatının sədri, Qarabağ və Əfqanıstan müharibələrinin veteranı Hikmət Şikarov Əfqanıstan müharibəsinin başa çatmasının 30 illiyi ilə əlaqədar medal ilə təltif olundu. Yeni Azərbaycan Partiyası Pirallahı rayon təşkilatının sədri, Qarabağ və Əfqanıstan müharibələrinin veteranı Hikmət Şikarov 21 fevral 2019-cu il tarixində Azərbaycan Respublikasının Prezidenti cənab İlham Əliyevin Azərbaycan Əfqanıstan veteranlarına dövlət qayğısının artırılması ilə bağlı əlavə tədbirlər haqqında Sərəncamının müharibə veteranlarına, şəhid ailələrinə göstərilən diqqət və qayğının dövlətimizin və ölkə başçısının yürütdüyü siyasətin əsas istiqamətlərindən biri olduğunu qeyd etdi.

Tədbirin bədii hissəsində 168 №-li orta məktəb şagirdlərinin ifasında vətənpərvər mövzusunda mahnılar səsləndirildi. Tədbirin sonunda məktəblilər qəhrəman döyüşçülərlə, müharibə veteranları ilə xatirə şəkilləri çəkdirdilər.

Bakıda 61 yaşlı kişi itkin düşüb.

Trend-in məlumatına görə, hadisə paytaxtın Nizami rayonu ərazisində baş verib.

Fevralın 28-də Nizami rayonu, Keşlə qəsəbəsi, D.Aslanov küçəsi ev 2-də yaşayan, 1958-ci il təvəllüdlü Həsənov Vahid Qoçəli oğlu yaşadığı evdən çıxıb və bir daha geri qayıtmayıb.

Faktla bağlı araşdırmalara başlanılıb.

Bu gün Azərbaycanda Od çərşənbəsi qeyd olunur.

Kult.az-ın xəbərinə görə, ilin axır çərşənbələrindən ikincisi xalq arasında Üskü çərşənbə, Adlı çərşənbə kimi tanınan Od çərşənbədir.

Od çərşənbəsi qədim insanların oda olan inamından qaynaqlanıb.

Od çərşənbəsinin mahiyyətində odun qədimdən insanı hər cür pisliklərdən, şərdən təmizləyəcəyinə, xeyrin qələbə çalacağına inam ifadə olunur.

Qədim türk təfəkkürünə görə, od insanı şərdən qoruyur, sehri-cadunu batin edir, insanı təmizləyir. Təsadüfü deyil ki, qədim ənənədə yadelli elçilər əvvəlcə odun üstündən atıldıqdan, təmizləndikdən sonra türk xaqanı onları qəbul edirdi.

Novruz bayramı ərəfəsində keçirilən od çərşənbəsi insanın yaradılış prosesinin ikinci mərhələsinin - od komponenti ilə bağlı mərhələnin mifik təzahürüdür. Qədim türk mifologiyasında odla bağlı müxtəlif motivlər mövcud olub.