Xərçəngə səbəb olan 4 növ məhsul...Dünyada xərçəng xəstəliyindən əziyyət çəkənlərin sayı ildən ilə dayanmadan artır.

Alimlərin fikrinə görə, bunun səbəblərindən biri sağlam olmayan qidalanmadır. Mütəxəssislər xərçəng xəstəliyinə səbəb ola bilən 4 qrup qida məhsullarını təyin ediblər.

Avrasiya.net Sağlamolun.az-a istinadən bu məhsulların siyahısını təqdim edir:

Şəkərlə zəngin olan qidalar


Şəkərdən sui-istifadə bir çox xərçəng növünün (düz bağırsaq, süd vəzi, sidik kisəsi, mədə, qida borusu və s.) riskini artırır. Şəkərin (qlükoza) orqanizmdə parçalanması xərçəng hüceyrələrinin artması prosesini stimullaşdırır.

Bu tək şəkərə deyil, şəkər əvəzedicilərə də aiddir. Mütəxəssislərin fikrinə görə, şəkər əvəzediciləri şəkərdən qat-qat daha ziyanlı və təhlükəlidir ki, onlardan tam imtina etmək lazımdır.

Lakin şəkərdən tam imtina etmək olmaz. Qlükozanın qanda və beyin toxumalarında konsentrasiyanın aşağı olması sinir toxumasının xərçəngi riskini artıra bilər.

Kolbasa, sosis, vetçina və s.

Ümumdünya xərçəng araşdırması agentliyi bu məhsulları təsdiq olunmuş kanserogen aktivliyinə malik olan məhsullar kimi qiymətləndirir. Kolbasa və s. bu kimi emal olunmuş ətdən hazırlanmış qidaların müntəzəm olaraq istehlakı yoğun bağırsaq xərçənginin riskini xeyli artırır. Həmçinin elmi araşdırmalar göstərir ki, bu məhsullardan sui-istifadə süd vəzi xərçənginin də riskini artırır.

Yağlı məhsullar

Araşdırmalar göstərib ki, çox yağlı məhsulların müntəzəm olaraq istehlakı bağırsaqda və bir çox digər orqanlarda xərçəng şişlərin böyüməsini stimullaşdırır.

Emal olunmuş qidalar, yarımfabrikatlar, yararlıq müddəti uzun olan qidalar

Müxtəlif hazır qıdalar (şirniyyatlar, çipsi, suxarı və s.), şirin qazlı içkilər, dükanlarda satılan pizza, blinçiklər, düşbərə və s. bu kimi yarımfabrikatların istehsalı zamanı çoxlu miqdarda şəkər, duz və süni yağlar (marqarin və s.), konservant, dadlandırıcılar və s. kimyəvi maddələrdən istifadə olunur. Nəticədə bu məhsullar orqanizmə heç bir fayda vermir, əksinə orqanizmi zəiflədir, hüceyrələr səviyyəsində pozulmalar yaradır, müxtəlif xəstəliklərin və o cümlədən xərçəngin riskini artırır.
Rektor universitetin qapılarını ictimaiyyətin üzünə açıb - Buyurun gəlin!ADAU-nun rektoru, AMEA-nın müxbir üzvü, professor İbrahim Cəfərov ictimaiyyətə səslənərək rəhbərlik etdiyi təhsil olcağına dəvət edib.

Avrasiya.net rektorun sosial səhifəsində yerləşdirdiyi dəvəti sizə təqdim edir:

Əziz dostlar, Azərbaycan Dövlət Aqrar Universiteti olaraq aqrar sahənin inkişafında maraqlı olan bütün tərəflərı - şirkətləri, fermerləri, istehsalçıları, müxtəlif elmi-tədqiqat institutlarının alimlərini, valideynləri, kütləvi informasiya vasitələrinin nümayəndələrini tədris prosesinə dəvət edirik.

Şəffaf və dünyəvi tədris prosesinə nail olmaq, bazarın tələbatına uyğun müasir düşüncə tərzinə malik, xarici dillərdən birini mükəmməl bilən, kompyuter bilikləri olan Azərbaycan vətəndaşı və aqrar mütəxəssis yetişdirmək hədəfimizdir.

Bu nöqteyi nəzərdən dünyanın müxtəlif universitetləri ilə əmədaşlıq tellərimiz mövcuddur, hər il onlarla tələbələrimiz Erasmus proqramı çərçivəsində Avropanın və Türkiyənin universitetlərində təhsil alır, müxtəlif proqramlar çərçivəsində alimlər universitetimizə dəvət olunur, mühazirələr oxuyur, praktiki dərslər keçirlər.

Tələbələrimiz də bu istiqamətdə tam səfərbər olunmalı və öhdəliklərinə, yəni normal təhsil almalarına köklənməlidirlər. Hamımıza uğurlar arzusu ilə səsimə səs verməyə, universitetlə bir yerdə olmağa çağırıram!!!
3 azyaşlı övladını zorlayan “ata”nın cinayət işi - TəfərrüatŞəki Apellyasiya Məhkəməsi əvvəlki hökmü qüvvədə saxlayıb.

Ali Məhkəmədə azyaşlı övladlarına qarşı seksual xarakterli hərəkətlər edən Şəki şəhər sakini Səlimov Nurəli Əli oğlunun məhkəmə prosesi keçiriləcək.

AzNews.az-ın məlumatına görə, hakim Fərhad Kərimovun sədrliyi ilə keçirilən məhkəmə prosesi dekabr ayının 4-nə təyin olunub.

Belə ki, Səlimov Nurəli Əli oğlu Cinayət Məcəlləsinin 150.3.3 və 234.1-ci maddələri ilə təqsirli bilinərək Şəki Ağır Cinayətlər Məhkəməsinin 12 yanvar 2017-ci il tarixli hokmü ilə 14 il 6 ay müddətinə azadlıqdan məhrum edilib. Məhkum 1-ci instansiya məhkəməsinin hökmündən apellyasiya şikayəti versə də Şəki Apellyasiya Məhkəməsi əvvəlki hökmü qüvvədə saxlayıb.

İttiham aktına görə, Səlimov Nurəli Əli oğlu CM-in 150.3.3 və 234.1-ci maddələri ilə təqsirli bilinərək məhkum edilmişdir, ona görə ki, o, qeyri rəsmi yaşadığı yaşadığı Batayeva Liliya Nikolayevnanın 7 yaşlı qızı Batayeva Nadejda Valeriyevna, ögey qızı 2007-ci ildə anadan olmuş Mehdiyeva Səbinə Elnur qızı və ogey oğlu Mehdiyev Yusif Elnur oğluna qarşı seksual hərəkətlər edib.

Belə ki, 1973-cü il təvəllüdlü Nurəli Səlimov 2006-cı ildən 2012-ci ilədək olan müddət ərzində Oğuz rayonu Baş Daşağıl kəndi ərazisində yerləşən fermadakı evlərində və Şəki şəhərində kirayə yaşadıqları evdə Nadejda Batayevanın köməksiz vəziyyətindən istifadə etməklə onunla qeyri-təbii yolla cinsi əlaqədə olub. Bundan sonra isə 2014-cü il tarixdən etibarən 2016-cı ilin may ayına kimi olan müddət ərzində Şəki şəhərinin «Dağdibi» adlanan ərazisində yerləşən kirayə yaşadıqları evində və Şəki rayonu Öryət kəndində yerləşən evində 7 yaşlı Mehdiyeva Səbinə Elnur qızına və onun qardaşı Yusif Mehdiyevə eyni hərəkətləri edib.
İcra başçısından yeni təyinatlarBinəqədi Rayon İcra Hakimiyyətinin (RİH) İctimai-siyasi və humanitar məsələlər şöbəsinə yeni müdir təyin olunub.

RİH-dən verilən məlumata görə, icra başçısı Elxan Allahverdiyevin əmri ilə Nicat Elman oğlu Allahverdiyev İctimai-siyasi və humanitar məsələlər şöbəsinin müdiri təyin olunub.

N.Allahverdiyev bu vəzifəyə qədər Binəqədi RİH-nin İnformasiya təminatı və təhlil sektorunun müdiri vəzifəsində çalışıb.

İcra başçısının digər əmri ilə Aynur Hüseyn qızı Quliyeva İnformasiya təminatı və təhlil sektorunun müdiri təyin olunub.

A.Quliyeva isə buna qədər Binəqədi RİH-nin Sənədlərlə və vətəndaşların müraciətləri ilə iş şöbəsində dəftərxana işinin aparıcı məsləhətçi vəzifəsində çalışıb.

Xatırladaq ki, sabiq icra başçısı Xaləddin İsgəndərovun 2015-ci ilin oktyabr ayında Binəqədi Rayon İcra Hakimiyyətinin İctimai-siyasi və humanitar məsələlər şöbəsinə müdir vəzifəsinə təyin etdiyi Elman Dadaşovu bu ilin noyabr ayında yeni icra başçısı Elxan Allahverdiyev işdən azad edib.(modern.az)
Novruz Məmmədov aparat rəhbərini işdən çıxardıNazirlər Kabineti Aparatının rəhbəri Ağa-Bala Hacıyev vəzifəsindən azad edilib.

Bu barədə baş nazir Novruz Məmmədov müvafiq əmr imzalayıb.

Bu vəzifəyə hələlik təyinat olmayıb.

Qeyd edək ki, Hacıyev Ağa-bala Şamxal oğlu 1941-ci ildə Bakı şəhərində anadan olub.

Əmək fəaliyyətinə 1957-ci ildə Azərdəmiryolu Bakı parovoz deposunda fəhlə kimi başlayıb, daha sonra çilingər kimi çalışıb. 1960-1965-ci illərdə Xarkov Dəmir yol Nəqliyyatı üzrə Mühəndislər İnstitutunda (Ukrayna) təhsil alıb. 1965-1978-ci illərdə Azərbaycan Baş istehsalat energetika və elektrikləşdirmə idarəsinin "Azərenerjisazlama" müəssisəsində mühəndis, baş mühəndis olub. Sex rəisinin müavini vəzifələrində işləyib.

1978-1983-cü illərdə Azərbaycan Respublikası Dövlət Plan Komitəsinin energetika və elektrikləşdirmə şöbəsinin müdiri, 1983-1991-ci illərdə Azərbaycan Respublikası Dövlət Plan Komitəsi (sonradan Dövlət İqtisadiyyat və Planlaşdırma Komitəsi) sədrinin müavini vəzifəsində çalışıb, komitənin kollegiyasının üzvü təsdiq edilmişdir. 1991-1992-ci illərdə Azərbaycan Respublikası Prezidentinin rəhbərliyi altında Azərbaycan Respublikası Müdafiə Şurasının üzvü olub.

1991-1994–cü illərdə Azərbaycan Respublikası Nazirlər Kabinetinin İşlər İdarəsinin müdafiə və müdafiə sənayesi şöbəsinin müdiri, 1994-cü ilin oktyabr ayından Azərbaycan Respublikası Prezidentinin sərəncamı ilə Azərbaycan Respublikası Nazirlər Kabinetinin İşlər müdiri vəzifəsinə təyin edilib.

2003-cü ilin sentyabrından Azərbaycan Respublikası Nazirlər Kabineti Aparatının rəhbəri vəzifəsində çalışıb.

A.Hacıyev "Azərbaycanın əməkdar iqtisadçısı" fəxri adına layiq görülüb.

Maşınqayırma və energetikanın inkişafı problemləri üzrə 19 elmi məqalənin müəllifidir, texniki elmlər namizədidir.

2012-ci il iyunun 22-də prezident İlham Əliyev dövlət qulluqçularının təltif edilməsi haqqında sərəncamı ilə Hacıyev Ağa-Bala Şamxal oğlunu 2-ci dərəcəli "Vətənə xidmətə görə” ordeni ilə təltif edilib.(bakupost.az)
Azərbaycanda 620 minə yaxın əlilliyi olan şəxs varBMT Baş Məclisi tərəfindən 3 Dekabr-Beynəlxalq Əlilliyi olan şəxslər günü elan edilib.

Əmək və Əhalinin Sosial Müdafiəsi Nazirliyindən daxil olan məlumata görə, ölkədə 620 minə yaxın əlilliyi olan şəxs var ki, onlar əlilliyə görə əmək pensiyası və ya pensiya hüququ olmadıqda aylıq sosial müavinətlə təmin olunurlar. Başqa sözlə, respublikada olan 1 milyon 309 min nəfər pensiyaçının 30 faizi əlilliyi olan şəxslər, aylıq sosial müavinət ödənilənlərin isə 60 faizə qədəri əlilliyi olan şəxslər və sağlamlıq imkanları məhdud uşaqlardır.

Əlilliyə görə əmək pensiyası və ya aylıq sosial müavinətlə yanaşı müharibə əlilləri və onlara bərabər tutulanlar, həmçinin yalnız aylıq müavinət alan ümumi səbəblərdən I qrup əlilliyi olanlar Azərbaycan Prezidentinin aylıq təqaüdü ilə təmin olunurlar. İndiyədək 6 mindən çox müharibə əlili və onlara bərabər tutulan şəxsə isə dövlət büdcəsi hesabına minik avtomobili verilib.

Hazırda nazirliyin 14 bərpa-müalicə müəssisəsi var. Nazirlik tərəfindən bu ilin 11 ayında 8,2 min əlilliyi olan şəxsə (o cümlədən 956 nəfər Qarabağ müharibəsi əlilinə) və sağlamlıq imkanları məhdud uşağa 29,4 min müxtəlif reabilitasiya vasitəsi, o cümlədən 1200-ə yaxın əlil arabası verilib.

Əlilliyi olan şəxslərin əmək bazarına çıxışının təmin olunması istiqamətdə cari ilin 11 ayında 500-dən çox əlilliyi olan şəxs işlə, 60-dan çox əlilliyi olan şəxs ödənişli ictimai işlə təmin olunub.
"Elmed" ölümdə təqsirləndirilən cərrahı işdən qovdu“Elmed” Tibb Mərkəzi cərrah Məhəmməd Neciyevə qarşı cinayət işinin başlanması ilə bağlı məlumata münasibət bildirib.

Klinikanın mətbuat xidmətinin rəhbəri Yusif Osmanov Trend-ə açıqlamasında bildirib ki, hadisə oktyabrın 4-də baş verib:

"Faktla bağlı dərhal cinayət işi başlanıb və istintaq aparılıb. M.Neciyev "Elmed" Tibb Mərkəzində müqavilə əsasında işləyib. Hadisədən sonra isə onunla "Elmed" Tibb Mərkəzi arasında bağlanan müqaviləyə xitam verilib. Oktyabr ayının 6-dan etibarən M.Neciyevin tibb mərkəzi ilə heç bir əlaqəsi yoxdur. Artıq 3 aydır ki, adıçəkilən cərrahla əməkdaşlıq etmirik".

Qeyd edək ki, 1963-cü il təvəllüdlü Əliyev Himayil Əli oğlu bu il oktyabrın 4-də səhər saat 11 radələrində "öd daşı və kəskin kalkulyoz" diaqnozu ilə “Elmed” Tibb Mərkəzinə daxil olub və əməliyyata götürülüb.

H.Əliyev saat 13 radələrində əməliyyatdan çıxıb və həmin gün axşam saat 21 radələrində dünyasını dəyişib.

Faktla bağlı Cinayət Məcəlləsinin (CM) 314.2-ci (səhlənkarlıq, eyni əməllər ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda) maddəsi ilə cinayət işi başlanılıb. M.Neciyev Himayil Əliyevin ölümündə səhlənkarlıq etməkdə günahlandırılıb.

Artıq M.Neciyevin cinayət işinin ibtidai istintaqı başa çatıb və baxılması üçün Binəqədi Rayon Məhkəməsinə göndərilib.
Fədayə Laçın son söz dedi: Bu, yolun sonudur...Bakıda məhbusların qaçmasına kömək göstərməkdə təqsirləndirilən müğənni Fədayə Laçın, Penitensiar Xidmətin konvoy taborunun komandiri, ədliyyə polkovnik-leytenantı Bəhruz Abdullayev, qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov, kriminal aləmdə nüfuza malik Əli Ağami, Günay Atakişiyeva, taksi sürücüsü Məhəmməd Hacıyev, Aqil Nəcəfov, Anar Əsgərov, İsrafil Soltanov, Şahmar Bəyəlizadə və Tərlan Zeynalovun cinayət işi üzrə məhkəmə prosesi keçirilib.

Axar.az xəbər verir ki, bu gün Bakı Ağır Cinayətlər Məhkəməsində hakim Azad Məcidovun sədrliyi ilə baş tutan prosesdə Fədayə Laçın son söz deyib.

O, əməlindən peşman olduğunu deyib: “Mən dövlətimin qanunlarını bilən adamam. Heç vaxt qanunsuz bir əməl tutmamışam. Mən istəyirəm ki, hər kəs buna inansın ki, mən həqiqətən də bilmədən bu əməli törətmişəm”.

Fədayə Laçın qeyd edib ki, həyatda çox talesiz bir qadın olub: “Bir qadın kimi xoşbəxt ola bilməmişəm. Həyatdakı yolum həmişə daşlı olub. Dəfələrlə bu yolda yıxılmışam. Amma yenə də durub yola davam eləmişəm. Heç vaxt əlimdən tutanım, dəstək olanım olmayıb. Amma bu dəfə mən bataqlığa düşmüşəm. Bu dəfə mənim əlimdən tutub çıxaran olmasa, bu, yolun sonudur”.

Fədayə Laçın 9 nəfərlik ailəsinin olmasını nəzərə alınmasını istəyib: “Ailə üzvlərim mənim himayəmdədir. Oğlum bu hadisədən sonra magistr təhsilini yarımçıq qoydu. Bu bir ana kimi mənə böyük dağdır. Mən 22 ildir sənətdəyəm. Ali təhsilliyəm, ziyalı bir ailədə böyümüşəm. Sadəcə həyatda heç vaxt şansım gətirməyib. Nə bir insan kimi, nə də bir qadın kimi xoşbəxt ola bilməmişəm. Bu son hadisə də onu göstərdi ki, həqiqətən də mən bəxtsiz və talehsiz bir insanam”.

Müğənni bildirib ki, azadlığa çıxsa, Şəhidlər Xiyabanına gedərək 20 Yanvar şəhidlərimiz olan İlham və Fərizənin məzarı başında "Yasin" oxuyacağını əhd edib.

Onun sözlərinə görə, bir insanın kriminal aləmdə olan biri ilə tanışlığının olması onun da cinayətkar olması demək deyil.

Fədayə Laçın qeyd edib ki, bazarda da satılan 6 manatlıq bir açara görə belə bir vəziyyətin yaranmasını təsəvvür etməyib: “Əgər məndən odlu silah, soyuq silah, narkotik istəsəydilər, əlbəttə bundan imtina edərdim. Çünki bunun cinayət olduğunu bilirəm. İndi kimsə məndən çörək belə istəyəndə ehtiyat edirəm. Fikirləşirəm ki, çörək yemək üçündür, amma yenə də ehtiyat edirəm. Son olaraq məhkəmədən əfv olunmağımı istəyirəm”.

Qeyd edək ki, prokuror Ceyhun Səmədovun 10 il, Fuad Hacıyevə 8 il 6 ay, Tural Poladxanova 8 il 6 ay, Bəhruz Abdullayevə 10 il, Əli Ağamiyə 20 il, Məhəmməd Hacıyevə 8 il, Günay Atakişiyevaya 7 il, İsrafil Soltanova 8 il, Şahlar Bəyəlizadəyə 8 il, Anar Əsgərova 8 il, Təralan Zeynalova 8 il azadlıqdan məhrumetmə cəzası tələb edib.

Prokuror müğənni Fədayə Laçının isə 6 il müddətinə azadlıqdan məhrum edilməsini istəyib.

Ötən il oktyabrın 23-də Bakı-Astara-Bakı planlı dəmir yolu qarovulu ilə xüsusi təyinatlı vaqonda Bakı şəhərinə etap olunan xüsusilə ağır cinayətlərlə təqsirləndirilməklə həbs edilmiş "Qoca" ləqəbli Etibar Ələkbər oğlu Məmmədov və Əli Rasim oğlu Ağami Biləcəri qəsəbəsi ərazisində müşayiət altından qaçıblar.

Xidməti yoxlamanın ilkin nəticələrinə əsasən, vəzifə borclarını lazımınca yerinə yetirmədiklərinə görə ədliyyə nazirinin əmri ilə Penitensiar Xidmətin Konvoy taborunun komandiri, ədliyyə polkovnik-leytenantı Bəhruz Abdullayev və taborun Qərargah rəisi vəzifəsini icra edən, ədliyyə mayoru Hikmət Sadıqov ədliyyə orqanlarından xaric edilib, taborun 2-ci konvoy bölüyünün komandiri, ədliyyə kapitanı Ruslan Zeynalov, 3-cü bölüyün komandiri, ədliyyə kapitanı Rza Xankişiyev və Qərargah rəisinin konvoy xidməti üzrə baş köməkçisi, ədliyyə kapitanı Rakif Məmmədov tutduqları vəzifədən azad olunublar.

Mühafizə altından qaçan Əli Ağami həbs olunub, Etibar Məmmədov isə əməliyyat zamanı zərərsizləşdirilərək öldürülüb.

Məlum olub ki, kriminal avtoritetlərin qaçmasında müğənni Fədayə Laçın, onun tanışı Günay Atakişiyeva da yaxından köməklik göstəriblər.

Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 304.2.1 (qabaqcadan əlbir olan bir qrup şəxs tərəfindən azadlıqdan məhrum etmə və ya həbs yerindən, yaxud mühafizə altından qaçma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi başlanmaqla istintaq qrupu yaradılıb, dərhal təxirəsalınmaz istintaq hərəkətləri aparılıb.

Həmçinin Penitensiar xidmətin vəzifəli əməkdaşlarına qarşı Cinayət Məcəlləsinin 179-cu (mənimsəmə və ya israf etmə) maddəsi ilə ittiham elan edilib.
Eldar Mahmudov istintaqa nələr deyib? – İlk dəfə yayıldıEldar Mahmudovun şəriki, Bakı Ağır Cinayətlər Məhkəməsində mənimsəmədə ittiham edilərək hakim qarşısına çıxarılan Sahib Ağayevin cinayət işi üzrə məhkəmə iclasına hakim Samir Əliyev sədrlik edir. Məhkəmənin baxış iclası keçirilərkən hakimlər heyəti belə bir qərar qəbul etdi ki, proseslər bundan sonra qapalı keçirilsin.

Bildirək ki, bu iş üzrə zərərçəkmiş tərəflər Vergilər Nazirliyi və Dövlət Təhlükəsizlik Xidmətidir. Külli miqdarda mənimsəmədə və vergidən yayınmaqda təqsirləndirilən Sahib Ağayev barəsində cinayət işinin əsas diqqət çəkən məqamı Eldar Mahmudovun bu iş üzrə şahid qismində dindirilməsidir.

Sabiq MTN başçısı şahid qismində ona görə dindirilib ki, onun rəhbərlik etdiyi nazirlikdə dövlət əhəmiyyətli layihənin icrası üçün ayrılan vəsaitin 30 milyona yaxını mənimsənilib və başqa bir şirkətin hesabına köçürülərək ölkədən çıxarılıb.

İttihama görə, Sahib Ağayevin rəhbərlik etdiyi şirkət 2015-ci ildə Bakıda keçirilən Avropa Oyunları ərəfəsində Milli Təhlükəsizlik Nazirliyinin istəyi ilə təhlükəsizliyin təmin edilməsi məqsədilə xüsusi avadanlıqların gətirilməsi və həmin sistemin qurulmasını həyata keçiribmiş. İmzalanmış müqavilə şişirdilərək 30 milyon manat Sahib Ağayevin xarici şirkətinin hesabına köçürülüb. Bu işdə Sahib Ağayevlə yanaşı, Kanada vətəndaşı Kazem Askarinin də adı keçir.

Sahib Ağayevin və ona himayədarlıq edənlərin əməli MTN ləğv edildikdən sonra üzə çıxıb. Bundan sonra Sahib Ağayev axtarışa verilib. O, Qazaxıstanda saxlanılaraq Azərbaycana gətirilib.

S.Ağayev Cinayət Məcəlləsinin 179.3.2-ci (mənimsəmə, külli miqdarda törədildikdə) və 213-cü (vergidən yayınma) maddələri ilə ittiham edilir.

Bu cinayət işi üzrə E.Mahmudov istintaqda şahid qismində ifadə verib.

Avrasiya.net xəbər verir ki, “Yeni Müsavat” eksklüziv olaraq sabiq nazirin istintaqa ifadəsinin bəzi təfərrüatlarını əldə edib. Eldar Mahmudovun istintaqa ifadə verməsi barədə xəbər və Baş Prokurorluğun Ağır Cinayətlərə qarşı İstintaq İdarəsindən ifadə verib çıxarkən görüntülər bir neçə dəfə mediada yayılsa da, onun nə üçün istintaqa dəvət edildiyi və hansı suallara cavab verdiyi haqda məlumat olmayıb. Beləliklə, bu, Mahmudovun ictimaiyyətə məlum olan ilk ifadəsidir:

Mahmudov dindirilən zaman bir zamanlar şəriklik etdiyi Sahib Ağayevin əməllərindən xəbərsiz olduğunu söyləyib. O, ifadəsində bildirib ki, nazir kimi rəhbərlik etdiyi Milli Təhlükəsizlik Nazirliyinin əsasnaməsinə uyğun olaraq, üzərinə düşən vəzifələri icra edib. General-polkovnik hərbi rütbəsində olan Mahmudov hazırda işləmədiyini deyib.

Suallara cavabında Eldar Mahmudov “Main İnvestment LTD” MMC-nin rəhbəri, Kanada vətəndaşı Kazem Askarini təxminən 1998-ci ildən tanıdığını bildirib. O, Kazemlə hansı şəraitdə tanış olduğunu xatırlamayıb və bildirib ki, Kazem sahibkar kimi müxtəlif sahələrdə bizneslə məşğul olub. Daha sonra o, şərikinə qarşı irəli sürülmüş ittihamlarla bağlı danışıb. Qeyd edib ki, 2015-ci ildə Bakıda keçirilən Avropa Oyunları ərəfəsində təhlükəsizlik sisteminin qurulması üçün araşdırmalar aparıblar.

Mahmudovun sözlərinə görə, onların maraqlarına uyğun olan təhlükəsizlik sistemi Kanadada olub. Necə təsadüfdürsə, elə həmin təhlükəsizlik sisteminin qurulması işini də Mahmudovun 1998-ci ildən tanıdığı Kazem bilirmiş. Kazem Kanadada olan şirkəti vasitəsi ilə bu işləri görməyə başlayıb. Mahmudov söyləyib ki, Kazem Kanada vətəndaşı olduğu üçün və informasiya texnologiyaları ilə işlədiyi üçün nazirliyin Beynəlxalq Əlaqələr İdarəsinin əməkdaşlarına bu işlə məşğul olmağı tapşırıb. Amma Mahmudov bu işi hansı işçisinə tapşırdığını xatırlamayıb.

Kazemin şirkəti ilə bağlanmış müqaviləyə əsasən o, Kanadada olan təhlükəsizlik sistemini Azərbaycanda quracaqmış. Müqavilənin 2013-cü ildə imzalandığını deyən Mahmudov bunun üçün Kazemin şirkətinə ödənilən ümumi məbləği əvvəlcə xatırlamadığını söyləyib.

Müqavilənin qiymətinin bir neçə dəfə dəyişdirilməsi, hər dəfə də məbləğin artırılması ilə bağlı suallara cavab verən Mahmudov deyib ki, bu prosesləri də tam xatırlamır. Amma təsdiqləyib ki, müqavilə bir neçə dəfə dəyişdirilib və qiymətlər artırılıb. Bunu da belə izah edib ki, sonradan görüləcək işlərin həcmi artırmış. Müqavilə üçün ödəniləcək məbləğin Maliyyə Nazirliyi ilə razılaşdırıldığını deyən Mahmudov qeyd edib ki, müqavilə imzalandıqdan sonra MTN-in Maddi Texniki Təminat baş İdarəsinə də məlumat verilib.

“Müqaviləyə ayrılacaq məbləğ Maliyyə Naziriliyi ilə ”Main İnvestment LTD" arasında razılaşdırılıb. Daha sonra da bizə məlumat verilib. Məbləğ MTN-nin büdcəsinə köçürüldü. Bundan sonra da “Main İnvestment LTD” ilə MTN arasında müqavilə imzalandı. Bu barədə mənə mütəmadi məlumat verilirdi. Həmin məbləğ MTN-nin büdcəsindən ayrılmırdı. Buna görə də müqavilənin dəyəri ilə çox da maraqlanmırdım. Məbləğ Maliyyə Nazirliyindən ayrıldıqdan sonra şirkətin bank hesabına köçürülüb" , - deyə Mahmudov söyləyib.

Təkrar suallara cavabında Mahmudov deyib ki, müqavilə üçün 80-90 milyon manat ayrıldığını xatırlayır. Bundan sonra isə Mahmudov şərikinin 30 milyonu necə mənimsəməsi ilə bağlı suallara cavab verib. İttihamda göstərilir ki, Sahibin də iştirakı ilə “Main İnvestment LTD”yə ayırlan 90 milyona yaxın vəsaitin 30 milyona yaxını Dominikan Respublikasında qeydiyyatda olan “Preim Desig and Patenting.SA” şirkətinin bank hesabına köçürülüb.

Amma Mahmudov suallara cavabında bundan xəbərsiz olduğunu deyib. O bildirib ki, “Main İnvestment LTD” ilə MTN arasında imzalanmış müqaviləyə əsasən şirkətə ilk olaraq avans kimi layihənin dəyərinin 30 faizi ödənilib. Bundan sonra isə MTN-də yaradıllan komissiya görülən işlərə nəzarət edərək qalan məbləği mərhələli şəkildə ödəyib. Mahmudov ifadəsində bu layihənin icrasına hazırda vəzifədə olan generallardan birinin rəhbərlik etdiyini bildirib.

Bu işdə şübhəli və suallar doğuran məqam həyata keçirilən layihənin məbləğinin həqiqətən də 90 milyon manat dəyərində olub-olmamasıdır. Layihənin ümumi dəyərinin bir neçə dəfə şişirdildiyi bildirilir. Maraqlıdır ki, bu layihəyə milyonlar ayrılsa da, heç bir mütəxəssis tərəfindən araşdırmalar aparılmayıb.

Elə Mahmudova da bu barədə suallar verilib. Soruşulub ki, layihənin dəyərini araşdırmaq üçün mütəxəssislər cəlb edilibmi? MTN tərəfindən heç bir mütəxəssisin cəlb edilmədiyini deyən Mahmudov bu mütəxəssislərin Maliyyə Nazirliyi tərəfindən təyin edildiyini bildirib.

Daha sonra Mahmudov mətbuatda “şəriki” kimi təqdim edilən və hazırda həbsdə olan Sahib Ağayev haqda sualları cavablandırıb. O, Sahib Ağayevin Qazaxıstanda yaşadığını və bizneslə məşğul olduğunu söyləyib. Mahmudov söyləyib ki, həyat yoldaşı Ağayevin xanımı ilə rəfiqə olub və tanışlıq da buradan başlayıb.

Əldə etdiyimiz məlumata görə, Mahmudov ailəvi tanışı olan Sahib Ağayevin oğlu Əlini də MTN aparatında işə götürübmüş. Amma özü vəzifədən çıxarıldıqdan sonra Əli Ağayev də işdən çıxarılıb. O da məlum olub ki, 30 milyona yaxın vəsaitin köçürüldüyü və Dominikanda qeydiyyatdan keçmiş şirkət də Sahib Ağayevin imiş. Amma Mahmudov bundan və şirkətin fəaliyyətindən də xəbərsiz olduğunu söyləyib.

Mahmudov Sahib Ağayevlə Kazemin əməkdaşlığından və birgə fəaliyyətindən də xəbərsiz olduğunu deyib. Sabiq nazirin bu ifadəsindən belə məlum olur ki, ailəvi dostu Sahib Ağayev və 1998-ci ildən tanıdığı Kazem birləşərək ona da yalan danışıblar.

Elə bundan əvvəl baş tutan “MTN əməliyyatları”nda da məlum olmuşdu ki, Mahmudov MTN-də baş verən bütün hadisələrdən “xəbərsiz” imiş...
Ovqat yazısı - İtlə gedən iplərimiz…Əmrah FƏQANOĞLU

Və yaxud sarı torpaq donuzu ilindən gözləntilərimiz

Yenə sanılı günlər qalır Yeni ilə… Şərq təqviminə görə, 2019-da it öz hökmranlığını sarı torpaq donuzuna təslim etməyə məhkumdur. Donuz da ki, nə donuz… Haqqında o qədər “vəsfnamələr” var, qalaq-qalaq kitablara sığışmaz. Ən əsası, Allah onu yeməyi cəmi müsəlmanlara haram buyurub, səbəbi də xüsusən isti iqlim şəraitində ətinin tərkibində mikrobların həddən artıq olmasıdır. Bir də ki, donuz rastına çıxan hər şeyi, o cümlədən də qabaqdan qalma, iylənmiş məhsulları ağına-bozuna baxmadan sümürdüyünə görə murdar heyvan sayılır. Axı əbəs yerə deyilməyib ki, “nə tökərsən aşına, o da çıxar qaşığına”. Yəni donuz da nə yeyirsə, əti də onlardan formalaşır. Bununla belə, tez varlanmaq istəyənlər adətən donuz saxlayırlar, çünki bir dəfəyə on beşə qədər bala verə bilir… Donuzun “murdar heyvan” sayılmasından söz açmışkən məşhur “Sehrli xalat” filmindəki pioner, xan və vəzirlər arasında gedən dodaqqaçıran dialoqları xatırlamamaq mümkünsüzdür:

Pioner:-Sənin nə ixtiyarın var, donuzun biri donuz!

Xan:-Nə, nə, dddonuz?

Xan:-Pianar? O kimdir? Hardandır?

Vəzir:-Pianar şübhəsiz, ya ifrit, ya da cin adıdır…

Vəzir:-Haqlısan. Yoxsa o zalım oğlu hökmdara öz sarayında deməzdi ki, donuzdur.

Xan:-Kəs səsivi, Allahın xoşuna gəlməyən heyvanın adını çəkmə.

Vəzir:-Əgər bu pianar ifritdirsə, qorxuram bundan da pis hadisə baş verər

Xan:-Bundan da pis nə ola bilər?

Vəzir:-Bəlkə də bu pianar cindir, bəlkə də cinlərin padişahıdır. O istəsə bizi itə, eşşəyə və yaxud qurrrbağaya döndərər.

Vəzir:-Bəəəlkə o, hökmdarı doo, doo, donuza döndərər?

Xan:-Yooox, mənə nə deyirlər-desinlər, amma ona döndərməsinlər.

Vəzir:-Yəni nəyə?

Xan:-Ona də.. O murdar heyvana… (donuzu nəzərdə tutur)

Vəzirlər:-Allah eləməsin, Allah eləməsin..

Donuz haqqında torpaqlarımızı işğal edən ermənilərə birbaşa aidiyyəti olan məsəl də var: “Kiş deməklə donuz darıdan çıxmaz”. Gərəkdir ki, onu kötəkləyib çıxarasan, öz həddini qandırasan. İnşallah, biz də çox yaxın zamanda hədlərini tanıdarıq, bir selbə ilə çıxararıq donuzları darıdan, yediklərini burunlarından gətirərik... Ordumuz güclü, dövlətimiz sarsılmaz!

Və nəhayət, “donuzdan bir tük də qənimətdir” deyimi. Məncə, gönüqalın və simic şəxslər barədə işlədilir bu məsəl. Yəni simic və adamlığı olmayanlardan nə qazansan, qənimətdir. Onsuz da özləri qanıb, başa düşüb nəsə verən, ikram edən, bağışlayan deyillər.

Əvvəldə qeyd etdiyim kimi, 2019-cu ilin simvolu sarı torpaq Donuzu olacaq. Astroloqların qənaətinə görə, il ərzində çoxlu münaqişələr, problemlər həll ediləcək. İctimai əmin-amanlıq və ünsiyyət sferası aktivləşdiyi üçün insanlar bir-birlərini daha yaxşı anlayacaqlar.

2019-da dünyaya gələn körpələr son dərəcə sülhsevər və xeyirxah olacaqlar. Bununla yanaşı, bəzən sadəlövhlük onlara öz hədəflərinə çatmaqda maneçilik törədəcək. Bu səbəbdən də uşağın tərbiyəsi prosesində dost-düşməni bir-birindən ayırmağı mütləq qaydada öyrətmək gərəkdir.

Beləliklə, itlə vidalaşmağımıza az qalır. Adətən it itəndə, yaxud da birdəfəlik çıxıb gedəndə ona bağlanan ipini də özü ilə götürüb apardığından “it də getdi, ip də” söyləyirlər. O ip ki, itlə anadangəlmə doğulmur, onu idarə etmək, nəzarətdə saxlamaq üçün həmin ipi itə özümüz bağlayırıq, itin boynundakı o iplər (adətən xalta adlanır) məhz bizə- sahiblərinə məxsus olur. Odur ki, dekabrın 31-də 12 illiyə bizə vida edən it boynundakı ipimizi, yaxud iplərimizi də özü ilə aparacaq, şübhəsiz ki…
Bizdən isə qalır gedən itə “xoş getdin” deyib (ardınca su atmasaq da olar), gələn donuza “xoş gəldin” söyləyib, gül-çiçəklə qarşılamaq. (Sevdiyi mhsullarla da olar).
Gəl e, gəl ay donuzumuz, gəl görək, neyləyəcəksən?! 2019-da yerin məlum!