Mətbuat Şurası Ermənistanla bağlı beynəlxalq qurumlara müraciət etdi
Azərbaycan Mətbuat Şurasında (MŞ) Azərbaycan Televiziyasının operatoru Sirac Abışov və AZƏRTAC-ın əməkdaşı Məhərrəm İbrahimovun (Əlioğlu) Kəlbəcər rayonunun Susuzluq kəndində xidməti vəzifələrini yerinə yetirərkən minaya düşmələri ilə bağlı tədbir keçirilib.
Avrasiya.net-in məluamatına görə, tədbirdə çıxış edən Mətbuat Şurası sədrinin müavini Umud Mirzəyev bildirib ki, Cenevre konvensiyasına və beynəlxalq protokollara görə minalanmış ərazilərin xəritələrini müharibə başa çatdıqdan sonra bir-birinə təqdim etməlidir.
O bildirib ki, Ermənistan hökuməti bütün beynəlxalq sənədlərə, özlərinin imzaladğı kapitulasiya aktına zidd olan xəritələri hələ də Azərbaycana təqdim etməyib:
"Təqribən 13 kvadratkilometr ərazi minalarla çirklənmiş vəziyyətdədir. Minalanmış ərazilərin xəritələrinin olmaması bu cür hadisələrin tez-tez baş verməsinə səbəb olur. Bizim I Qarabağ müharibəsi dövründə də 2000 nəfərdən çox mina qurbanlarımız var idi. İndi bu rəqəm 3000-ə yaxınlaşır. Bu son hadisə də bu məsələnin beynəlxalq ictimaiyyətdə daha çox qabardılmasına ehtiyac olduğunun sübutudur”.
MŞ sədri Əflatun Amaşov isə qeyd edib ki, Azərbaycan Mətbuat Şurasının adından beynəlxalq media qurumlarına və beynəlxalq təşkilatlara müraciət hazırlanıb.
Müraciətdə deyilir:
“2021-ci il iyun ayının 4-də Azərbaycan Televiziyasının (AzTV) operatoru 1989-cu il təvəllüdlü Sirac Abışov və “Azərtac”ın əməkdaşı Məhərrəm İbrahimov (Əlioğlu) Kəlbəcər rayonunun Susuzluq kəndində xidməti vəzifələrini yerinə yetirərkən minaya düşərək həlak olublar. Daha bir mülki şəxsin həlak olduğu, 4 nəfərin yaralandığı bu hadisə Azərbaycan jurnalistlərində dərin kədərə səbəb olub. İmzalanan üçtərəfli birgə bəyanatdan sonra erməni tərəfinin yerləşdirdiyi minalar səbəbindən 120 nəfər mina qurbanı var. Mina qurbanlarının sayı artmaqda davam edir. Minalanmış ərazilərin xəritələrinin verilməməsi jurnalist peşəsini də təhlükəyə çevirməkdədir. Ermənistan respublikası minalanmış ərazilərin xəritələrini verməkdən imtina edir. Bu, nəinki həmin ərazilərdə jurnalistlərin fəaliyyətini məhdudlaşdırır, həm də məcburi köçkünlərin öz yurd yerlərinə geri dönməsini çətinləşdirir. Ermənistan bu xəritələri verməməklə özünün sülhə qarşı çıxan siyasətini davam etdirməkdədir. Onu da qeyd etməliyik ki, Azərbaycanın işğaldan azad edilmiş ərazilərində quruculuq işlərinə başlanılıb. Ermənistanın mina xəritələrini verməməsi xarici jurnalistlərin də həyatına təhlükədir. Çox istərdik ki, jurnalistika sahəsində fəaliyyət göstərən beynəlxalq nüfuzlu qurumlar bununla bağlı öz sərt reaksiyasını bildirsin. Azərbaycan jurnalistlərinin gözləntisi bundan ibarətdir. Bu müraciəti imzalamaqda məqsədimiz beynəlxalq ictimaiyyətin diqqətini Ermənistanın beynəlxalq hüquqa zidd əməllərinə diqqət çəkməkdir. Bu çağırış missiyasına dəstək bölgədə sülhün, əmin-amanlığın yaradılmasına son dərəcə böyük töhfə ola bilər”.
