Sanskrit dili tədris olunacaq

Sanskrit dili tədris olunacaqHindistanın Bakıdakı Səfirliyi Sanskrit dilini öyrənmək üçün ‘Little Guru’ adlı yeni tətbiqi təqdim etdi.

Hindistanın Bakıdakı Səfirliyinin Azərbaycan Dillər Universiteti ilə birgə əməkdaşlığı çərçivəsində 07 may 2021-ci il tarixində Sanskrit dilini öyrənmə tətbiqi olan ‘Little Guru’ adlı yeni tətbiqi təqdim etmək məqsədilə onlayn tədbir təşkil olundu. Onlayn tədbirdə Azərbaycan Dillər Universitetinin prorektoru Dr. Jalə Qəribova və universitetin digər fakültə heyəti iştirak etdi. Tədbirə həmçinin Sanskrit dilini öyrənmək istəyən tələbələr və akademiklər qatıldı.

Dünyanın ilk oyun formatına salınmış Sanskrit dilini öyrənmə tətbiqi olan “Little Guru” tətbiqi Hindistanın Mədəni Əlaqələr Şurası və “GamappSportswizz” Texnologiyalarının birgə əməkdaşlığı ilə hazırlanmış və 09 aprel 2021-ci il tarixində Hindistanın Mədəni Əlaqələr Şurası tərəfindən rəsmi şəkildə bütün dünyaya təqdim olunmuşdur. Sanskrit dili dünyanın ən qədim dillərindən biridir. Bu dilin qrammatik strukturu yüksək dərəcədə inkişaf etmişdir və ən mükəmməl proqramlaşdırıla bilən kompüter dili kimi görünür.

Hindistanın Bakıdakı səfiri cənab B. Vanlalvavna açılış nitqində Sanskrit dilinin əhəmiyyəti və müxtəlif ölkələr arasında mədəni əlaqələrin qurulmasında rolu barədə ümumi məlumat verdi. O, Azərbaycan Dillər Universitetinin dilin inkişafı və Hindistan ilə Azərbaycan arasında mədəni əlaqələrin qurulması sahəsində Hindistan Səfirliyi ilə əməkdaşlığını vurğuladı. Azərbaycan Dillər Universitetinin prorektoru Dr. Jalə Qəribova Hindistanın Bakıdakı Səfirliyi ilə uzun müddət davam edən əlaqələrin, həmçinin Azərbaycanda dil biliklərinin təbliğinə dair razılaşmaların təfərrüatlarını açıqlayaraq geniş çıxış etdi. O, həmçinin hind dilinin tədrisi üçün Hindistan Səfirliyi tərəfindən universitetdə təsis edilən hind dili mərkəzinin əhəmiyyətindən bəhs etdi. Hindistanın Səfirliyinin Mədəniyyət şöbəsinin müdiri tərəfindən “Little Guru” tətbiqi haqqında və bu tətbiqdən istifadə etməyin yollarını izah edən qısa təqdimat keçirildi.

‘Little Guru’ Tətbiqi abunə əsaslı bir tətbiqdir. İlk bir neçə dərs pulsuzdur və abunə yalnız istifadəçilər daha da irəlilədikdə fəaliyyətə başlayır. Proqramı Google Play-də yükləmək üçün https://bit.ly/3mDhnXo linkindən, App Store-da yükləmək üçün isə https://apple.co/3t8tAWv linkindən istifadə olunur.