Sumqayıtda Türkiyə bayrağı davası - Video
Sumqayıt şəhərində şəhid guşəsində Azərbaycan və Türkiyə bayraqlarının Sumqayıt şəhər İcra Hakimiyyətinin nümayəndələri tərəfindən endirilməsi barədə sosial şəbəkələrdə yayılan məlumatlar həqiqəti əks etdirmir.
Bunu Axar.az-a açıqlamasında Sumqayıt Şəhər İcra Hakimiyyətinin sözçüsü Eyvaz Qocayev ötən gün adıçəkilən şəhərdə baş verən bayraq insidenti ilə bağlı danışarkən deyib. Meriya sözçüsü onu da əlavə edib ki, şəhər icra hakimiyyəti tərəfindən belə bir tapşırıq verilməyib:
“Videoda əks olunan görüntünün araşdırılması zamanı məlum olub ki, ərazidə yaşayan vətəndaş tərəfindən bayrağın səliqəyə salınması istəyini başqa bir vətəndaş yanlış anlayıb və buna etirazını bildirib”.
Eyvaz Qocayevin sözlərinə görə, bu gün də həmin guşə və bayraqlar yerindədir:
“Azərbaycan bayrağı hər birimizin qürur, fəxarət mənbəyidir. O cümlədən, qardaş Türkiyə bayrağı hər bir azərbaycanlı üçün eyni dəyəri ifadə edir”.
Qeyd edək ki, ötən gün Sumqayıtdakı şəhid guşəsində özünü təqdim etməyən şəxslərin Türkiyə bayrağına toxunması ətrafdakı sakinlərin ciddi etirazına və mübahisəyə səbəb olub.