Ölüm yatağında olan həkimin son şeiri ürək sızlatdı
Dünən koronavirus səbəbilə dünyasını dəyişən həkim Xasay Bayramovun son şeiri izləyiciləri kədərləndirib.
Avrasiya.net xəbər verir ki, Bayramov şeiri ölümündən bir neçə gün əvvəl yazıb. O, şeirdə çəkdiyi ağrılardan, düşdüyü əziyyətli vəziyyətdən söz açıb. Həkim şeiri “Facebook” səhifəsində yayımlayıb:
Bir yerim olsaydı, küsüb gedərdim,
Köpəyoğluyam e, qayıtsam geri.
Ay, Ay, işığını nərdivan eylə,
Çək məni yanına, ağlat bu yeri.
Bunun çayına da, dənizinə də,
Suyuna, qumuna, pişiyinə də,
Lap məsçidinə də, kilsəsinə də,
İsasına da,
Musanın əsasına da
Saqqalısına da, kosasına da,
Əlvida deyibən şüa içində,
Qızdırma içində çıxıb gedirəm,
Amma bir ev var ki, pəncərəsindən,
Xəlvətçə o evə baxıb gedirəm.
Görmək istəmirəm sifətimi də
Şəklimi versələr, cırıb ataram.
Ağrıdır canımı, ev-eşik yastıq,
Başımı buluda qoyub yataram.
Şeir xasiyyətimi unutdum daha,
Bu gündən qələmi tuturam topa.
Hər şey uydurulub oğul, qız, nəvə,
Hər şey uydurulub ana və ata.
Durub məndən ötrü ağlayan qadın,
Həyatın ən qəddar təşbehi sənsən.
Görən kim uydurub sənin ərinəm,
Görən kim uydurub sən sevgilimsən?
Şeir də yalandı, kağız yanırsa,
Yaddaş pozulursa, səslər sönürsə.
Dünyanın sonuncu adamı gəlib,
Gözün görə-görə bax e ölürsə...
Guya ki, deyirlər oğlumsan mənim,
Nə sənə atayam, nə də qızıma.
Ürəyimdən çıxan bu son şerimi,
Atıram küçədə itin ağzına.
Qeyd edək ki, bir müddət əvvəl Sumqayıt şəhər Təcili və Təxirəsalınmaz Tibbi Yardım Stansiyasının həkimi Xasay Bayramov COVİD-19 virusuna yoluxub. Vəziyyəti ağırlaşdığından mərhum həkim süni tənəffüs aparatına qoşulubmuş.
Həkimlərin səylərinə baxmayaraq, onun həyatını xilas etmək mümkün olmayıb.