Siyəzəndə “Şərqin ilk demokratik respublikası və onun tariximizdə yeri” mövzusunda videokonfrans keçirilib
Mayın 27-də Siyəzən Rayon Gənclər və İdman İdarəsinin təşkilatçılığı ilə Azərbaycan Xalq Cümhuriyyətinin yaradılmasının 102-ci ildönümünə həsr olunmuş “Şərqin ilk demokratik respublikası və onun tariximizdə yeri” mövzusunda videokonfrans keçirilib.
Fəal gənclərin iştirakı ilə zoom platforması üzərindən təşkil olunan online görüşdə Gənclər və İdman İdarəsinin rəisi Nadir Məmmədov, Təhsil Şöbəsinin müdiri Pərvin Ağasıyev, YAP Siyəzən Rayon Təşkilatı Gənclər Birliyinin sədri Elvin Kərimov, Mədəniyyət Mərkəzinin direktoru Ziyada Dadaşova və şəhər 1 saylı tam orta məktəbin tarix müəllimi Vuqar Abdullayev çıxış ediblər.
Çıxışlarda bildirilib ki, Azərbaycan Xalq Cümhuriyyəti xalqımızın qədim dövlətçilik ənənələrini yaşadaraq, həmin dövr üçün mütərəqqi hesab edilən dövlət təsisatlarının yaradılmasına nail olmuş, gərgin və mürəkkəb ictimai-siyasi şəraitdə fəaliyyət göstərmiş, dövlət quruculuğu, iqtisadiyyat, mədəniyyət, təhsil, hərbi quruculuq və digər sahələrdə həyata keçirdiyi işlərlə Azərbaycan xalqının tarixində parlaq iz qoymuşdur.
Qısa bir zaman kəsiyində mövcud olmasına baxmayaraq onun şüurlarda bərqərar etdiyi müstəqillik ideyası unudulmamış, zəngin dövlət quruculuğu təcrübəsi ilə milli dövlətçilik tariximizdə silinməz izlər qoyaraq xalqın qəlbində azadlıq və istiqlal duyğularını gücləndirməklə respublikanın gələcək müstəqilliyi üçün etibarlı zəmin hazırlamışdır. Çıxışlarda həmçinin mövcud vəziyyətlə əlaqədar digər görüşlərin də videokonfrans formatında keçiriləcəyi qeyd olunub. 
#evdəqal #Bizbirlikdəgüclüyük #məsafəsaxla #Respublikagünü #AzərbaycanXalqCümhuriyyəti102 #SiyəzənGİİ #GənclərvəİdmanNazirliyi #MysGovAz #MysAz #Gənclərsiyasəti
