Nazirlik: Birdəfəlik ödəmə ala bilməyən vətəndaşlar da diqqətdən kənarda qalmayacaq

İndiyədək birdəfəlik ödəniş edilən şəxslərin sayı 320 minə çatıb. Avrasiya.net-in məlumatına görə, Dövlət Məşğulluq Xidmətinin (DMX) rəisi Cəmaləddin Quliyev bildirib ki, bu kateqoriyalardan olanlara ödənilən ümumi vəsaitin məbləği isə 60 milyon 800 min manata çatıb.

O qeyd edib ki, pandemiya səbəbindən iş yerini itirən 600 min nəfərə birdəfəlik ödəmə veriləcək:
“Hazırda bu istiqamətdə nazirliyin bütün qurumları gücləndirilmiş iş rejimində çalışır. Bizə müraciət edən vətəndaşların işsiz kimi qeydiyyata alınması və növbəti dövrdə onlara birdəfəlik ödəmənin təyinatı ilə bağlı işlər aparılır”.

C.Quliyev deyib ki, dövlətdən birdəfəlik ödəməni ala bilməyən vətəndaşlar da diqqətdən kənarda qalmayacaq:

“Ödəmə almayan vətəndaşlara haqqı ödənilən iş yerləri təklif edilir. Onların sayı 90 minə çatdırılıb. Vətəndaşlar yerli İcra Hakimiyyəti orqanları ilə birlikdə əlaqələndirmə komitələri tərəfindən hazılanmış siyahılara uyğun olaraq, həmin ictimai iş yerlərinə cəlb olunur”.

Onun sözlərinə görə, növbəti ay üçün birdəfəlik ödənişlərin nağdsız qaydada verilməsi nəzərdə tutulur.