Aqil Məmmədov kəlbəcərlilərlə görüşüb
123 saylı Kəlbəcər seçki dairəsindən namizədliyi Yeni Azərbaycan Partiyası tərəfindən irəli sürülən Məmmədov Aqil Sadiq oğlu növbəti təbliğat kampaniyasını Kəlbəcər ziyalıları ilə görüşünü Nəsimi rayonunda keçirib.
Tədbiri açan YAP Nəsimi rayon təşkilatının sədri, partiyanın Siyasi Şurasının üzvü, Məlahət İbrahimqızı hakim partiyanın bütün namizədlərinə uğurlar arzulayıb. M.İbrahimqızı Prezident İlham Əliyevin həyata keçirdiyi siyasətin uğurlarından, Yeni Azərbaycan Partiyasının cəmiyyətdə artan nüfuzundan bəhs edib. O, partiyanın yarandığı mürəkkəb tarixi-siyasi şəraitdən, keçdiyi çətin və şərəfli mübarizə yolundan, Heydər Əliyevin xalqın və dövlətin qarşısında göstərdiyi böyük xidmətlərdən danışıb.
M.İbrahimqızı Azərbaycanda dövlətçiliyin möhkəmlənməsi və demokratik prinsiplərin bərqərar olmasının, demokratik, hüquqi, dünyəvi dövlət quruculuğu prosesinin uğurla həyata keçirilməsinin dahi rəhbər Heydər Əliyevin adı ilə bağlı olduğunu bildirib: “Bu gün partiyamız Prezident İlham Əliyevin rəhbərliyi ilə Cənubi Qafqaz bölgəsinin ən güclü siyasi qüvvəsi kimi özünü təsdiq edib. Azərbaycanın inkişafı prosesində YAP fəal şəkildə iştirak edir. Yeni Azərbaycan Partiyası qısa müddətdə böyük rəğbət qazanaraq əsl xalq partiyasına çevrilib”.
M.İbrahimqızı bildirib ki, Yeni Azərbaycan Partiyasının rəhbəri ölkə Prezidentidir və ölkə Prezidentinin həyata keçirdiyi islahatları xalq, ictimaiyyət dəstəkləyir. İnsanlar bilirlər ki, bu siyasətin icra olunmasında istirak edənlər də məhz Yeni Azərbaycan Partiyasının üzvləridir.
Daha sonra YAP Siyasi Şurasının üzvü, professor, sabiq deputat Şahlar Əsgərov çıxış edərək qeyd edib ki, YAP hər zaman öz layiqli, cəmiyyət arasında nüfuz sahibi olan namizədlərini cəmiyyətə təqdim edib. Ş.Əsgərov bildirib ki, bu gün Azəraycanda azad, şəffaf və demokratik prinsiplərə əsaslanan seçki sistemi formalaşıb: “Yeni Azərbaycan Partiyası öz potensialı, real addımları və bacarıqlı kadrları ilə xalqa xidmət edir. Partiyanın gücü onun siyasi proseslərdəki mühüm rolu, iştirakı və qələbəsi ilə ölçülür. Prezident İlham Əliyevin həyata keçirdiyi siyasət ölkəmizə böyük nüfuz qazandırıb, Azərbaycan regionun lider dövlətinə çevrilib”.
Tanınmış kəlbəcərli ziyalı, əməkdar jurnalist, şair Adil Cəmil də YAP namizədlərinə uğurlar arzulamaqla yanaşı, bu partiyanın ölkədə böyük nüfuza malik olduğunu deyib: “YAP seçkilərə həmişə uğurlu namizədlərlə gedib və məhz buna görə partiya daim seçkilərdə qalib gəlib. Ona görə də hər bir seçici millətinə, dövlətinə, xalqına layiqli olan namizədə səs verməlidir. O namizədə ki, deputat seçiləndən sonra da daim onun yanında olsun”.
"Dədə Şəmşir" ocağının sədr müavini Həbib Misirov da çıxışında YAP-ın yeni namizədinə uğurlar diləyib. Qeyd edib ki, Aqil Məmmədov bütün kəlbəcərlilərin doğru seçimi olacaq: "Bizim səsimizə layib bir şəxsiyyətdir. YAP heç vaxt namizəd seçimində səhv edə bilməz. Biz inanırıq ki, Aqil Məmmədov parlamentdə bizim səsimiz olacaq, milləti layiqincə təmsil edəcək".
Aşıqlar Birliyinin sədri, əməkdar elm xadimi Məhərrəm Qasımlı da öz növbəsində mənsub olduğu bölgədən çıxan Aqil Məmmədova dəstək olduqlarını bildirib: "Dədə Şəmşirin ocağı, milli mənəvi dəyərlərimizin qorunduğu, hörmət olunduğu bir bölgənin oğlu olan Aqil Məmmədov bizim fəxrimizdir. Çünki o bu bölgənin vətənpərvər, elinə, obasına, xalqına sadiq olan oğludur".
Tədbirdə çıxış edən ziyalılar YAP-ın namizədii Aqil Məmmədovun vətənpərvərliyinə, H.Əliyev ideyalarına sadiqliyindən və onların ən layiqli namizədi olduğundan bəhs ediblər. Kəlbəcərli ziyalıları seçki günündə Aqil Məmmədov kimi nüfuz sahibi olan namizədə səs verəcəklərini qeyd ediblər.
Namizəd Aqil Məmmədov YAP rəhbərliyi tərəfindən ona göstərilən etimada görə təşəkkürünü bildirib. Qeyd edib ki, Yeni Azərbaycan Partiyası əvvəlki seçkilərdə olduğu kimi bu seçkilərdə də qalib gələcək: “Bu qalibiyyət partiyanın sədri cənab prezidentimiz İlham Əliyevin apardığı düzgün, müdrik, uzaqgörən bir siyasətin nəticəsidir. Bu siyasətə hər bir partiya üzvü sədaqətini nümayiş etdirir. Bu gün güclü Azərbaycanın mövcudluğu ümummilli liderimizin ideyaları və o ideyaların davamçısı cənab prezidentimiz İlham Əliyevin apardığı siyasətin nəticəsidir. Bu gün birmənalı demək olar ki, Azərbaycanda cənab Prezidentin həyata keçirdiyi bu islahatlar öz mahiyyətinə görə postsovet və Şərqi Avropa ölkələrini qabaqlayıb”.
Aqil Məmmədov daha sonra seçki platforması barədə tədbir iştirakçılarına məlumat verib.Tədbirin sonunda A.Məmmədov bir qrup seçicini qəbul edib.
