30 yan 14:58Sosial

“Palmali”nin növbəti gəmisi Elçibəyin adını daşıyacaq

“Palmali”nin növbəti gəmisi Elçibəyin adını daşıyacaq“Palmali” Şirkətlər Qrupu Azərbaycanın ikinci prezidenti Əbülfəz Elçibəyin adını daşıyacaq gəmini bu ilin aprel ayında istismara verəcək.

Strateq.az-ın xəbərinə görə, bu barədə qrupun prezidenti, iş adamı Mübariz Mənsimov özünün “Facebook” səhifəsində bildirib.

M.Mənsimov aşağıdakıları yazıb:

“Bir liderin böyüklüyü inancının dərinliyi, hədəflərinin yüksəkliyi, dünyagörüşünün genişliyi və sevgisinin məsafəsi ilə ölçülür. Uca Allah, sadəcə, XX əsrdə üç böyük lider qismət etdi: Məhəmməd Əmin Rəsulzadə, Heydər Əliyev və Əbülfəz Elçibəy. Bəzi cahillər bunların müqayisəsini aparırlar. Halbuki bu üç şəxsiyyətin missiyaları başqa olsa da, hər üçü müasir Azərbaycan dövlətinin təməlini atan kişilərdir. Məhəmməd Əmin Rəsulzadə üçrəngli bayraqla Şərqdə ilk respublikanın təməlini ataraq, içimizdə bir azadlıq məşəli yandırdı. 70 illik Sovet zülmü repressiyalara rəğmən, bu məşəli söndürə bilmədi və əsrin sonlarına yaxın Əbülfəz Elçibəy çıxdı, bir kərə yüksələn bayrağı əbədiyyətə qədər göylərdə dalğalandırmaq qərarını verdi. Milli azadlıq hərəkatı məhz onun liderliyi ilə Azərbaycanın qolundakı buxovları qırdı. Bu günə qədər digər postsovet ölkələrində qalan rus qoşunlarını ölkəmizdən çıxararaq, həqiqi suverenliyimizə qovuşdurdu. Test islahatı keçirərək, varlı balaları ilə yanaşı, kasıbların da üzünə ali məktəbləri açıq elan etdi. Bütün bu uğurların bir bədəli olacaqdı? Məhz o bədəli milləti deyil, özü çəksin deyə, Azərbaycanı Heydər Əliyevə əmanət edərək getdi. Çünki bu axının qarşısında kimin duruş gətirəcəyini bilirdi.

Yəni bu üç şəxsiyyəti bir-birindən ayırmaq olmaz. Çünki hər üçü bir-birini tamamlayır. Yetər ki, bəsirət gözünlə görəsən. Biz də Cümhuriyyətimizin 100 illiyi ilə bağlı yeni gəmimizin adının Məhəmməd Əmin Rəsulzadə qoyduğumuzu bildirmişdik. Eyni zamanda 2004-cü ildən etibarən “Heydər Əliyev” gəmimiz dünya sularında üzməkdədir. Hər üç şəxsiyyət bizim üçün əziz olduğundan, Əbülfəz Elçibəyi də unutmamağa və unutdurmamağa qərar verdik. Bu ilin aprel ayında gəmilərimizdən biri bu böyük şəxsiyyətin – Əbülfəz Elçibəyin adını daşıyacaq. Beləliklə, XX əsrdə yaşamış hər üç şəxsiyyətin adını daşıyan gəmilərimiz dünya sularında üzəcəklər.

Mustafa Kamal Atatürk deyirdi ki, tarix yazmaq tarixi yaratmaq qədər mühümdür. Bu baxımdan yazanlar yaradanlara sadiq qalmalı, nə kimsənin rolunu azaltmalı, nə də artırmalıdırlar. Tarixə sayğı gələcəyə yatırımdır. Tarixi olmayanın gələcəyi də olmaz…”
loading...
XƏBƏR LENTİ
SORĞU