Elşən Həsənov yenidən ASP sədri seçilib

Bu gün Azərbaycan Sosialist Partiyasının onlayn formada yenidən təsis qurultayı keçirilib.

1999–cu ildən Yeni Yol Partiyası, 2002–ci ildən isə qurultay vasitəsi ilə adı dəyişdirilərək Azərbaycan Sosialist Partiyası adı altında fəaliyyət göstərən siyasi qurum, hər iki halda qediyyatla bağlı sənədlərini Azərbaycan Respublikası Ədliyyə Nazirliyinə təqdim edib.

Keçən illər ərzində Azərbaycanın ictimai – siyasi həyatında fəallığı ilə seçilən və öz yeri olan partiya, ölkəmizin siyasi həyatında özünəməxsus fəaliyyəti ilə geniş kütlələrə yaxından tanışdır.

Partiyanın sədri Elşən Həsənov bildirib ki, Azərbaycan Respublikasının siyasi həyatında yeni dönəmin başlaması ilə əlaqədar, partiyanın Nizamnamə və Məramnaməsinə dəyişikliklər və digər məsələlərlə yanaşı, partiyanın Ali Məclisi, Siyasi Şurasının tərkibinin dəyişilməsi ilə bağlı zərurətlər meydana çıxmışdır.

Beləliklə, Respublikada pandemiya ilə bağlı rejimin qüvvədə olması ilə əlaqədar Azərbaycan Sosialist Partiyasının təşəbbüs qrupunun keçirdiyi onlayn və nümayəndə olaraq ümumilikdə 65 nəfərin qatıldığı onlayn qurultayda cari məsələlərə baxılmış, partiyanın seçkili orqanlarına və müvafiq strukturlarına seçkilər keçirilmişdir.

Qurultay nümayəndələrinin təklifi ilə partiya təsis edildiyi ilk gündən ona rəhbərlik edən Azərbaycan Sosialist Partiyasının sədri Elşən Həsənovun namizədliyi yenidən irəli sürülmüş və o, Azərbaycan Sosialist Partiyasının sədri vəzifəsinə seçilmişdir.

Beləliklə qurultay öz işini başa çatdırmış və təsis sənədlərinin dövlət qeydiyyatına alınması üçün Azərbaycan Respublikası Ədiyyə Nazirliyinə rəsmi ərizə ilə yenidən müraciət edilməsi qərara alınmışdır.

Müvafiq sənədlər hazırlandıqdan sonra Azərbaycan Sosialist Partiyasının təsis sənədləri instansiya üzrə təqdim ediləcəkdir.