02 iyn 12:30siyaset

"Müxalifət partiyaları hələ də keçmişin qalıqlarından qurtula bilmir"

"Müxalifət partiyaları hələ də keçmişin qalıqlarından qurtula bilmir"Baku News Azərbaycan Liberal Demokrat Partiyasının (ALDP) Mətbuat Xidmətinə istinadən xəbər verir ki, bunu ALDP sədri Fuad Əliyev ona ünvanlanan suallara cavabında qeyd edib.

ALDP sədri müxalifətin bugünki durumu və özünün “ənənəvi mübarizə üsulları, yaxud yeni taktika ilə hərəkət etməli”, “dilemmasını aşa biləcəkmi? suallarını cavablandıraraq bunları bildirdi:

"Təəssüf ki, müxalifət bu baryeri aşa bilmir. Bunun da bir çox səbəbləri var. Bu məsələlər daim siyasi görüşlərdə müzakirə olunur və çıxış yolları aranır. Müxalifətin bir çox hallarda bir araya gələ bilməməsi, bir - birinə qarşı neqativ yanaşmaları bu problemlərin aşmasına imkan vermir. Buna görə də narazı elektorat müxalifətə inamsızlıq nümayiş etdirir. Əvəzində isə bir çox müxalifət liderləri yalnız özlərini "mənəm güclü, mənəm birinci", şüarları ilə qabağa çıxmağa çalışırlar. Lakin bunların da heç bir faydası olmayacaq, çünki xalq nə qədər narazı olsa da, bu müxalifətdəki bir çox simaların yanlışlarını görüb və görməkdə davam edir. Təbii ki, bu gün ölkədə böyük narazı elektorat var. Lakin bu, heç də o demək deyil ki, bütün narazılar hamısı gəlib bu müxalifəti dəstəkləyir. Həmin o elektorat iqtidarı da dəstəkləmir və sakitcə kənarda dayanıb. Çox təəssüf ki, bu gün müxalifət narazı olan vətəndaşların böyük bir hissəsini öz ətrafına cəlb edə bilmir. Bu da müxalifətin son 15 ildə atdığı səhv addımlarla bağlıdır. Artıq demək olar ki, insanlar müxalifətdaxili çəkişmələrdən, ”agent" axtarışı səhnələrindən, partiyaların bir-birinə qısqanclığı, keçmişdən qopa bilməməyi insanlarda müxalifətə qarşı ikrah hissi yaradıb."

Sonra ALDP sədri vətəndaşların müxalifətin bəzi nümayəndələrinə görə inamsızlığını qeyd edərək bildirib ki, artıq insanlar köhnə simalardan və köhnə ritorikaladan beziblər. Sosial kəsim siyasi səhnədə yeni simaları görmədiyinə görə siyasiləşmir və etimadı itirdiyinə görə ümumi müxalifətə dəstək vermir. Amma müxalifətin də öz elektoratının qarşısında öhdəsinə götürdüyü bir məsuliyyət var: "Müxalifət mövcud siyasi və sosial problemlərdən, həmçinin yeni metodlardan və yeni texnologiyalardan istifadə etməyi bacarmalıdır. Müxalifət nə qədər zəif və ona olan inamını itirmiş olsa belə, dövlətin və cəmiyyətin inkişafı məsələsi, müxalifətin özündə güc tapıb, vətəndaşlarının inamını və dəstəyini yenidən qazanıb dirçələcəyinə inanıram.

Mən bu prosesin daha çox siyasətə atılan yeni simaların, demokratik kəsimlə bir araya gəlməsi ilə gerçəkləşə biləcəyini düşünürəm. Müxalifətin fəaliyyətinin inkişafından danışarkən xüsusilə heç bir qarşıdurmaya yol veməyən, yalnız səmimi qəlbdən ölkənin inkişafına yönəlik islahatların aparılması naminə çalışan, öz maraqlarını deyil, ümummilli maraqları hər şeydən üstün tutan siyasi fiqurların meydana gəlişini nəzərdə tuturam. Yeni müxalif güclərin yaranması və təşkilatlanması iqtidara rəqib ola biləcək və yeni gücün formalaşmasına təsir edəcək müxalifəti formalaşdıra bilər və mən ümid edirəm ki, belə də olacaq".

Daha sonra "İndi gəlin baxaq iqtidara rəqib olacaq bizim müxlifət bu məqsədi həyata keçirmək üçün narazı elektoratı öz ətrafına yığa bilirmi?" sualını belə cavab verib:
"Bilirsiz, hər bir ölkənin inkişafı üçün güclü müxalifətin olması çox vacibdir. Bunu inkişaf etmiş ölkələrin təcrübəsindən də görmək olar. Əslində rəqabətin fonunda hər bir düşərgə tərəqqi, ölkənin potensialının artırılması, bir sözlə, inkişafı üçün öz proqramı və fəaliyyəti ilə ön planda olmağa çalışır. Bu məsələdə seçim xalqa məxsusdur. Azərbaycanda isə müxalifət partiyaları hələ də keçmişin qalıqlarından qurtula bilmir. Lakin müxalifət öz işini görməlidir, mübarizə aparmalıdır, bir-biri ilə mübarizə aparmamalıdır. Qeyd etdiyim kimi, yeni siyasi liderlərin meydana gəlməsi və sağlam siyasi mübarizə şəraitində rəqabətin qurulması demokraik cəmiyyətin əsas göstəricisidi. Təbii ki, iqtidar varsa, onun müxalifəti olmalıdır və müxalifət nə qədər güclü olarsa, iqtidarın iş potensialı da bir qədər çevik olar, öz üzərindəki məsuliyyəti daha da artar. Belə bir şəraitdə demokratik seçki sisteminə nail olmaq və öz həqiqi gücünü ortaya qoymaq mümkündür. Müxalifət güclü olarsa qalib olar, zəifdirsə uduzacaq və bununla barışmalı olacaq və seçkinin saxta keçirilməsi ilə bağlı ortaya heç bir iddia qoyulmasına imkan verilməyəcək. Hələlik isə bütün bunlar partiyamızın siyasi camiyədə görmək istədikləri əsas nüansladır."
XƏBƏR LENTİ
SORĞU