Gürcüstan müxalifəti deputat mandatlarından rəsmən imtina etdi
Gürcüstanda parlament seçkilərində deputat mandatları əldə edən müxalifət partiyaları parlamentdə təmsil olunmaqdan rəsmən imtina ediblər.
Aktual.ge xəbər verir ki, mandat əldə etmiş müxalifət partiyalarının birgə bəyanatında deyilir:
"31 Oktyabr 2020 parlament seçkiləri zorakılıq və seçicilərin qorxudulması, Dövlət Təhlükəsizlik Xidməti (DTX) və kriminal aləmin kordinasiyalı təzyiqi, genişmiqyaslı rüşvət, inzibati resurslardan istifadə və seçicilərin iradəsinə zidd olaraq həyata keçirilmişdir. Seçki nəticələri MSK tərəfindən nəşr olunan son nəticələr Gürcüstan xalqının iradəsini əks etdirmir və biz müxalifət partiyaları gördük ki, həmvətənlərimiz İvanişvilinin rəhbərliyini rədd edərək ona üçüncü dəfə Gürcüstanı idarəetməsinə icazə vermədilər. Bu səbəbdən də bizlər, seçkiləri saxtalaşdırılmış müxalifət partiyaları olaraq parlamentdəki mandatımızdan imtina edir və "qondarma" parlamentə girməməyimiz üçün siyasi və hüquqi addımlar atırıq. MSK-nın nəticələri gürcü xalqının azad iradəsini əks etdirmir.
Bu qərar, saxta seçkilər nəticəsində MSK tərəfindən elan olunan məlumatlara görə parlamentə girə bilməyən aşağıdakı siyasi partiyalar tərəfindən təsdiqlənir. Ölkəmizin daha yaxşı demokratik gələcəyi üçün İvanişviliyə qarşı mübarizəmizi davam etdiririk. Demokratik müxalifətin tələbi bu seçkilərin nəticələrini ləğv etmək, yenidən seçkilər keçirmək və bu seçkilərin sistematik şəkildə saxtalaşdırılmasına səbəb olan MSK-nın kadr qaydaları da daxil olmaqla bütün qanunsuzluqları sistematik şəkildə aradan qaldırmaqdır".
Bəyanat "Vahid Milli Hərəkat"; "Avropalı Gürcüstan"; Lelo"; "Strategiya Qurucu"; "Vətənpərvərlər İttifaqı"; "Vətəndaşlar" və "Leyboristlər Partiyası" tərəfindən imzalanır.
