Gürcüstan müsəlman icmasına 828 min dollar ayırdı

Gürcüstanda 2019-cu ilin dövlət büdcəsindən ölkədə fəaliyyət göstərən dini icmalara, ümumilikdə, 4,5 mln. lari (1,6 mln. dollardan çox) vəsait ayrılıb.

Bu barədə ölkənin Dini Məsələlər üzrə Dövlət Agentliyi məlumat yayıb.

Məbləğin 3,5 mln. larisi (1,3 mln. dollardan çox) dini icmalar arasında artıq bölüşdürülüb.

Vəsaitin böyük hissəsi 2,2 mln. lari (828,2min dollar) olmaqla Gürcüstanın müsəlman icmasının payına düşüb. Erməni xristian, Roma katolik və yəhudi icmasına təqdim olunmuş vəsait isə müvafiq olaraq 600 min lari (225,8min dollar), 400 min lari (150,5min dollar) və 300 min lari (112,9 min dollar) təşkil edib.

Yerdə qalan 1 mln. lari (376,4 min dollar) məbləğində vəsait isə cari ilin sonuna qədər dini icmalara paylanılacaq.

“Report” xatırladır ki, Gürcüstanda müsəlmanlar əhalinin 10,74%-ni təşkil edir.