Ermənilərin Qarabağda qurduğu 8 yeni post - Foto

Ermənilərin Qarabağda qurduğu 8 yeni post - FotoHazırda Xocavənd-Xankəndi yolu boyunca, habelə Şuşanın yaxınlığında ermənilərin artıq 8 yeni mövqeyi var.

Axar.az xəbər verir ki, bu barədə araşdırmaçı-jurnalist Elçin Alıoğlu məlumat yayıb.

“Hazırda ermənilər Xocavənd şəhəri ətrafında, Nərgizqala və Gülmantəpə yüksəkliklərində, habelə Əmiranlı, Muğanlı kəndlərində və Yuxarı Veysəlli kəndi ilə üzbəüz məkanda mövqelərinin inşasını başa vurublar.

Həmin mövqelərdə iriçaplı silahlar, pulemyotlar, minaatanlar da var”, - o bildirib.

Qeyd edək ki, Azərbaycan Müdafiə Nazirliyi bu gün Ermənistanın üçtərəfli bəyanatı kobud şəkildə pozaraq, öz silahlı qüvvələrinin şəxsi heyətini Rusiya Federasiyası sülhməramlı qüvvələrinin müvəqqəti yerləşdirildiyi Azərbaycan ərazilərinə daşıması, Muxtarkənd, Şuşakənd məntəqələri yaxınlığında, eləcə də Kəlbəcər və Laçın rayonlarının inzibati hüdudlarının şərq istiqamətindəki ərazilərdə yeni erməni postlarını qoyması hallarının müşahidə olunduğu barədə açıqlama yayıb. Bildirilib ki, Ordumuz adekvat tədbirlər görür və bu kimi hallara imkan vermir.

Eyni zamanda, MN Rusiya Federasiyası sülhməramlı qüvvələrinin üçtərəfli bəyanatın müddəalarına uyğun olaraq müvəqqəti dislokasiya olunduqları Azərbaycan ərazilərində Ermənistan silahlı qüvvələrinin yerləşdirilməsi hallarına son qoymasını da tələb etmişdir.