Vüqar Biləcərinin son arzusu və ölümü... - Dostu danışdıAvqustun 29-da vəfat etmiş meyxanaçı, şair Vüqar Biləcərinin dostu, həmkarı Pünhan Əzimlinin Kult.az-a müsahibəsi:

- Meyxana aləmi son 2 ildə 2 gənc və dəyərli simasını itirdi...

- Hə, elədir. Aydın Xırdalanlını yenicə itirmişdik, indi də Vüqar rəhmətə getdi. Allah hər ikisinə rəhmət eləsin. Bu yaxınlarda Aydının xatirəsinə həsr etdiyimiz kitab işıq üzü görəcək. Sağlıq olsun, Vüqar üçün də belə bir kitab hazırlayacağıq. Hər iki kitab “Parlaq İmzalar” nəşriyyatında çıxacaq.

Sizə bir şey deyim. Mən həm Aydın, həm də Vüqarın dəftərlərini açanda gördüm ki, “Bismillahir-Rəhmanir-Rəhim” kəlamı ilə yazmağa başlayıblar. Bu da onların yaşadıqları həyatı və mənəvi ab-havanın göstəricisidir. Vüqarın mənəvi ab-havasına bələd idim. Dəfələrlə onun necə mənəvi dünyada olduğunu, möhkəmliyini, mərdliyini görmüşəm.

- Vüqar Biləcəri ilə nə vaxt dost olmusunuz?

- Vüqarla 9-cu sinifdə oxuyanda tanış olmuşam. Məktəbimizin qarşısında “Rəşidin çayxanası” deyilən yer vardı, o zamanlar orada keçirilən meyxana meydanlarının birində tanış olmuşduq. Onun qeyri-adi deyim tərzi var idi. Ənənəvi meyxanadan fərqlənirdi, elə bil, qəzəli musiqili deyirdi.

Hərdən zarafatla onun adını qəzəl dilində “Vüğar” deyə çağıranda, o, bu adın Həzrəti Əlinin ləqəblərindən biri olduğunu və “şir“ mənasını verdiyini söyləyirdi. Mən də ona deyərdim ki, sən özün də şir kimi oğlansan. Vüqar həqiqətən də şir kimi oğlan idi.

Söhbət adından düşmüşkən, şeirlərinin birində adını görün necə qeyd edib:

“Bitir, ey gül üzlüm, ömrüm, bitir intizari-eşqi
Gəlir ətri-baği-cənnət, tuta laləzari-eşqi.
Səni harda görsəm, ey şah, ölərəm qədəmlərində
Böyüyər kiçilməyiynən Vüqarın vüqari-eşqi”.

Hərdən öz aramızda danışırdıq. Deyirdi ki, Allah birinə söz, birinə səs verib, amma bəzilərinə də həm söz, həm səs, həm də bunları yerində idarə etmək bacarığı verib, demək, onu başqalarından fərqləndirib. Vüqar deyirdi ki, həmin adamlar Allahın onlara verdikləri bu neməti hara sərf etməli olduqlarını bilməlidirlər. O, bunu deyəndə əslində özünü nəzərdə tuturdu, amma bunu dilinə gətirmirdi. Çünki çox sadə insan idi.

- Vüqar hansı şairin yaradıcılığına daha çox müraciət edirdi?

- Vüqarın mütaliəsi yaxşı idi. Bir-birimizdən kitab alıb oxuyurduq. O, kitabımı mənə qaytaranda görürdüm ki, beytlərin mənasını, ərəb-fars tərkibli sözlərin anlamını da kitaba qeyd edib. Yəni şeiriyyatın o qədər dərinliyinə gedirdi.

Onun Füzuliyə böyük sevgisi var idi. Hər dəfə görüşlərdə Füzulidən mütləq nəsə oxuyardı. Hətta heykəlinin önündən ona baş əymədən keçməzdi. O, daşa deyil, Füzulinin yaradıcılığına baş əyirdi.

Bir şeir yazan kimi onu bir-birimizə dinlətmək üçün səbirsizlənərdik. Tanımadığım nömrədən bir beyt gəldiyi zaman onun Vüqar tərəfindən göndərildiyini anlayırdım.

- Ölümünə yaxın nə deyərdi, daha çox nə üçün darıxardı?

- Ölümündən bir neçə gün öncə xəstəxanadan çıxanda tələbəsi Elnur Xırdalanlının telefonundan bir beyt yazmışdı mənə:

Görmürəm çoxdandır, ey mehribanım, hardasan?

Tarı zülfündən asılmış yarı canım, hardasan?

- Vüqarın xəstəliyi ilə bağlı danışın, mümkünsə. Nə vaxtdan xəstə idi? Ümumiyyətlə, necə tutuldu bu xəstəliyə?

- Ayağında tromblaşma oldu. Ölümündən 2 gün öncə də müalicə alırdı. Həkim nəzarətində idi, özünü yaxşı hiss edirdi. Amma ayaqları ilə bağlı şikayətləri və narahatlıqları var idi.

- Vüqarın hansı arzuları var idi?

- Çox idi arzusu. Nə yaşı var idi ki?! O, qısa ömrünə böyük bərəkət sığdıra bilmişdi. Xəstə anasını sevindirmək üçün toy etmək istəyirdi. Fikirləşirdi ki, özü sağalandan sonra ailə qursun.

Bundan başqa, dostlarla ziyarətə getməyi düşünürdük, Vüqarı da çağırdıq. O isə Kərbəlanı tək ziyarət etmək istədiyini söyləmişdi.

- Narazı qaldığı insanlar, haqsızlıqla üzləşməsi haqda nəsə demişdimi?

- Təbii ki, hər kəsin həyatında olduğu kimi, Vüqarın da narazı qaldığı insanlar var idi. Vüqar onlar haqda kənarda arxalarında danışmazdı, həmişə məqamı gəlincə o insanların üzünə deyərdi.

- Bu sual ənənəvi olsa da, düşünürəm ki, hər birimiz üçün həssas nöqtələrə toxunur: Vüqar elə bu dəqiqə gəlsəydi, ona nə deyərdiniz?

- Vüqarı görə bilsəydim, ona hər zaman dediyim “Sən Allahın nemətisən, qədrini bil” sözünü və bir də onun yarım qalan şeirlərini tamamladığımı deyərdim.

- Vüqarın özünəməxsus dəst-xətti var idi. Sizcə, kimi onun davamçısı kimi görürsünüz?

- Bu üslub, bu tərz heç kimdə olmayıb. Əgər olubsa da, Vüqarda daha kamil, daha geniş forması idi. Onun yerini kiminsə doldura biləcəyinə inanmıram. Amma bir tələbəsi var idi - Elnur Xırdalanlı. Dəfələrlə Vüqarın yanına gedəndə Elnuru yanında görmüşəm.

- Vüqarla bağlı ən maraqlı xatirənizi bölüşün, mümkünsə.

- Vüqarla keçən hər gün bir xatirə idi. Bir gün dostumuz Feyzigilin bağında meyxana dedik, sonra otluqda güləşməyi təklif etdi, o zamanlar idmanla məşğul olurdu. Sonra ikimiz də yıxıldıq və bir müddət bir-birimizə baxaraq susduq, danışa bilmədik. Çox qəribədir ki, ikimiz də qəribə bir hal keçirdik həmin an. Bunu Vüqar da dedi mənə.

…15-16 yaşımız var idi, avtobusa minmişdik. Birdən baxdıq ki, cibimizdə pul yoxdur. Mən bunu Vüqara dedim, o da qayıtdı ki, narahat olma, düşəndə türk dilində danışarıq, guya turistik, səhv minmişik (gülür). Elə də etdik, sürücü bizə yol göstərdi, gedəcəyimiz ünvana çatdıq…

Nə deyim?.. Allah rəhmət eləsin.
 Hakimiyyətlə dialoq mütləqdir - ALDP sədriAzərbaycan Liberal Demokrat Partiyasının (ALDP) sədri Fuad Əliyev Baku News-a müsahibə verib. Müsahibəni təqdim edirik.

-Son dövrlər hakimiyyət Siyasi partiyalar, QHT-lər, media nümayəndələri ilə görüşlər keçirilir. ALDP hər zaman dialoq tərəfdarı olub. Hazırkı dialoq səviyyəsini necə qiymətləndirirsiniz?

- Hakimiyyət daxilində yenilənmə prosesi davam edir. Paralel olaraq Dövlət başçısının köməkçiləri cəmiyyət nümayəndələrilə görüşlər keçirirlər. Artıq bir neçə görüş olub və demək olar ki, bəzi məsələlər müsbət həll olunub. Siyasi partiyaların qeydiyyat məsələsi, pandemiya dövründə on-line qurultayların keçirilməsi kimi məsələləri misal çəkmək olar.

- Bəzi müxalifət qüvvələri bu görüşləri normal qəbul etmir. Görüşdə iştrak edənləri hakimiyyətlə işbirliyində olmaqda suçlayırlar. Onların belə ittiham etməyə hansısa əsas varmı?

- Hesab edirəm ki, kimin nə dediyindən asılı olmayaraq, bu görüşlər cəmiyyət üçün çox vacibdir. Görüşlərdən imtina edənlərin mövgelərilə razılaşmasam da, onlara normal yanaşıram. ALDP olaraq hesab edirik ki, hakimiyyətlə dialoq mütləqdir. Çünki keçirilən görüşlərdə mən cəmiyyəti narahat edən problemləri, məmurların özbaşınalığı, vətəndaşların sosial və digər problemlər ətrafında fikir mübadiləsi aparıram. Əgər bu “işbirliyi” nəticəsində vətəndaşların problemləri həll olunursa, bunun nəyi pisdir. Hər halda bizim bu məsələdə yanlış və yaxud haqlı olduğumuza cəmiyyət qiymət verəcək. Rəhim Qaziyevin həbs qətimkan tədbirinin ev dustaqlığı ilə əvəz olunması bu görüşlərin nəticəsi kimi qiymətləndirmək olar.

- Fuad müəllim, Rəhim Qaziyevi buraxırlar. Tofiq Yaqubluya isə 4 il 6 ay həbs qərarını verirlər...

- Bu yanlış qərardır. Bildiyim qədər Tofiq bəyin səhhətində problemlər var, müalicə alırdı. İndi də bu qərara etiraz olaraq aclıq elan edib. Hesab edirəm ki, dövlət başçısı ona ünvanlanan çoxsaylı xahişləri və onun səhətində problemlərin olduğunu nəzərə alaraq əfv edəcək. Tofiq Yaqublunun azadlığa buraxılması dialoq mühitinə də müsbət təsir edəcək.
"Bu sözlər etibarlı siyasətin əxlaq fəlsəfəsini özündə əks etdirir"“Türkiyə Azərbaycana hərbi dəstəyini davam etdirməkdə qərarlıdır...“Bizi birləşdirən təkcə dövlətlərimizin maraqları deyil, həm də sadiqlik, etibar və qarşılıqlı dəstəkdir”

“Cənab Prezident Yunanıstanın səfirini qəbul etdiyi zaman istifadə etdiyi ritorika yalnız güclü dövlət başçılarına xasdır”


Azərbaycanla Türkiyənin hərbi-siyasi əməkdaşlığı, Tovuz hadisələri fonunda bu əməkdaşlığın daha da aktuallaşması və ümumilikdə münaqişə zonasında bir növ yeni situasiyanın yaranması ölkəmiz üçün əsas gündəm mövzusudur.

“AzPolitika.info” bu mövzuyla bağlı Milli Məclisin deputatı Sadiq Qurbanovun fikirlərini öyrənib:

-Ermənistanın Tovuzda törətdiyi hərbi təxribatdan sonra Türkiyənin Azərbaycana ən yüksək səviyyədə dəstək göstərməsinin şahidi olduq. Sizcə, ölkələrimiz arasındakı xüsusilə hərbi sahədəki əməkdaşlığın genişlənməsi və son birgə təlimlər nədən xəbər verir?

-Məlum olduğu kimi, Azərbaycan Respublikası ilə Türkiyə Respublikası arasında hərbi əməkdaşlıq haqqında sazişə əsasən, illik plana uyğun olaraq iyulun 29-dan avqustun 10-dək ölkəmizdə hər iki ölkənin quru qoşunları və hərbi hava qüvvələrinin iştirakı ilə birgə genişmiqyaslı döyüş atışlı taktiki və taktiki-uçuş təlimləri keçirilib. Birgə təlimlərə iki ölkənin ordularının şəxsi heyəti, zirehli texnikası, artilleriya qurğuları və minaatanları, həmçinin hərbi aviasiya və hava hücumundan müdafiə vasitələri cəlb edilib. Plana əsasən təlimlər avqustun 1-dən 5-dək quru qoşunlarının da cəlb edilməsi ilə Bakıda və Naxçıvanda, hərbi aviasiya vasitələrinin iştirakı ilə isə iyulun 29-dan avqustun 10-dək Bakı, Naxçıvan, Gəncə, Kürdəmir və Yevlax şəhərlərində keçirilib.

Bilirik ki, Türkiyə Azərbaycan müstəqillik qazandıqdan sonra onun Silahlı Qüvvələrinin formalaşmasına yardım göstərib. O zaman orduda kadr çatışmazlığı var idi. Sonrakı dövrdə də iki ölkə arasında hərbi-texniki əməkdaşlıq inkişaf etdi. Türkiyə Azərbaycanda kadrların hazırlanması, hərbi məktəblərin proqramlarının formalaşmasında böyük rol oynayıb. Hər il Azərbaycan və Türkiyə silahlı qüvvələri birgə hərbi təlimlər keçirirlər. Prezidenti İlham Əliyev avqustun 13-də Türkiyə Respublikasının Milli Müdafiə naziri Hulusi Akarın başçılıq etdiyi nümayəndə heyətini qəbul edərkən bildirib ki, hərbi əməkdaşlıq baxımından bu təlimlərin çox böyük önəmi var, eyni zamanda, insanlar arasındakı əlaqələrin, xalqlar arasındakı qardaşlığın gücləndirilməsi üçün təlimlərin çox böyük əhəmiyyəti və faydası var. Prezident bununla bağlı deyib: “Bu, bir ənənədir. Bildiyiniz kimi, hər il həm Azərbaycanda, həm də Türkiyədə 10-dan çox birgə təlim keçirilir. Ona görə bu təlimlərin keçirilməsi adi haldır. Burada hansısa bir fövqəladə hal axtarmaq lüzumsuzdur. Biz də müşahidə edirik ki, bu təlimlər bəzi ölkələrdə narahatlıq doğurur. Ancaq buna heç bir əsas yoxdur. Bu, Türkiyə-Azərbaycan birliyinin, qardaşlığının növbəti təzahürüdür”;

-Sizcə, bu əməkdaşlığın əsas məqsədi və istiqamətləri nədən ibarətdir?

- Məlumat üçün deyim ki, “Azərbaycan Respublikası Hökuməti ilə Türkiyə Respublikası Hökuməti arasında hərbi maliyyə əməkdaşlığı haqqında” 2020-ci il fevralın 25-də Bakı şəhərində imzalanmış Saziş cari ilin iyulun 2-də qüvvəyə minib. Bu saziş olduqca önəmlidir və ölkələrimiz arasındakı hərbi əməkdaşlığın yüksək səviyyəsini təsdiqləyən növbəti sənəddir.

Bununla yanaşı, iki ölkə arasında hərbi əməkdaşlığın bugünkü vəziyyətini 3 vacib məsələ müəyyənləşdirir. Bunlardan birincisi, NATO ilə əməkdaşlıq sənədləridir - bu çərçivədə NATO-nun aparıcı ölkələrindən olan Türkiyə Azərbaycan Silahlı Qüvvələrinin modernləşdirilməsinə kömək göstərir. İkincisi, Azərbaycanın təhlükəsizlik sənədləri və iki ölkə arasında imzalanmış strateji müqavilələrdir. Üçüncüsü məsələ isə Türkiyənin milli regional maraqları və həmçinin, qardaş ölkənin milli təhlükəsizlik sənədləri ilə bağlıdır. Qeyd edim ki, 2009-cu ildən etibarən Türkiyənin milli təhlükəsizlik sənədlərində dəyişiklik prosesi başlayıb.

İki ölkə arasında hərbi əməkdaşlıq baxımından perspektiv planlar da mövcuddur. Buraya hərbi kadrların hazırlanması, maddi-texniki təchizat məsələlərindən tutmuş, müdafiə sənayesi sahəsində yeni birgə əməkdaşlığa qədər məsələlər daxildir. Perspektivdə iki ölkə arasında hərtərəfli hərbi əməkdaşlığın gücləndirilməsi istiqamətində yeni imkanlar mövcuddur. Artıq hər kəsə məlumdur ki, Türkiyə Azərbaycana taktiki və strateji dövrdə hərbi dəstəyini davam etdirməkdə qərarlıdır.

Onu da qeyd edim ki, Ermənistanın işğalı nəticəsində nəzarətdən kənar qalmış Azərbaycan sərhədlərindən qeyri-qanuni məqsədlərlə istifadə məsələsi də Türkiyə-Azərbaycan hərbi əməkdaşlığı üçün mühüm istiqamətlərdən hesab olunur. İki ölkə terrorizmdən əziyyət çəkməklə bu istiqamətdə ayrı-ayrılıqda və birgə mübarizənin bu günü və perspektivlərini həmişə diqqət mərkəzində saxlayır. Həmçinin, iki ölkə arasında hərbi təhsil, kadrların hazırlanması sahəsində əməkdaşlığın inkişafı prioritet sahələrdən biridir. Bu istiqamətdə ciddi planların olduğu məlumdur.

-Ermənistanın ayrı-ayrı ölkələrlə hərbi əməkdaşlığının Azərbaycana yaratdığı potensial təhlükə kifayət qədər ciddidir. Bunu Tovuzdakı təxribat da bir daha təsdiqlədi. Sizcə, son zamanlar bu mövzunun ölkə rəhbərliyi səviyyəsində qaldırılması və prezidentin Yunanıstan səfirilə görüşü zamanı bu əməkdaşlığa cəlb olunan ölkələrə açıq mesajlar verməsi nəyə hesablanıb?

- Təbii ki, Azərbaycan haqlı olaraq, Ermənistan, Yunanıstan və Kipr arasındakı hərbi əməkdaşlıqdan narahatdır. Çünki Ermənistan ərazilərimizi işğal etmiş ölkədir. Xocalıda soyqırımı aktı törədib, bir milyon azərbaycanlını evlərindən didərgin salıb, tarixi, mədəni, dini abidələrimizi dağıdıb, işğal edilmiş ərazilərdə etnik təmizləmə siyasəti həyata keçirib, beynəlxalq hüququ pozur, BMT Təhlükəsizlik Şurasının və başqa təşkilatların qətnamələrinə əməl etmir.

Ermənistan aqressiv davranır. Dövlət sərhədində son gərginliklər Ermənistanın təxribatıdır, terror aktı törətmək üçün sonuncu cəhd zamanı təmas xəttini keçmək istəyərkən erməni zabiti saxlanılıb və o, artıq etiraf edib ki, onun qrupu bizim hərbçilərimizə və mülki şəxslərə hücum etmək məqsədi güdüb. Sirr deyil ki, Ermənistan Azərbaycana düşmən mövqedədir və bu onların qərarı olub.

Sözsüz ki, Ermənistanın istənilən ölkə ilə sıx hərbi əməkdaşlığı narahatlıq doğurur. Ermənistanın təxribatından dərhal sonra Azərbaycan Rusiyadan Ermənistana intensiv silah təchizatına reaksiya göstərib. Aktiv toqquşmalar iyulun 16-da dayandırılıb və iyulun 17-dən başlayaraq 2 sentyabra qədər Rusiyadan Ermənistana Xəzəryanı dövlətlərin hava məkanı vasitəsilə çoxsaylı yük reysləri həyata keçirilib. Ermənistanla hərbi əməkdaşlıq bizi narahat edən məsələdir. Çünki bu, Azərbaycan üçün mühüm təhdid törədir. Ermənilər bu silahlardan istifadə edərək bizim hərbçilərimizi, mülki şəxsləri öldürürlər.

-Son zamanlar Türkiyənin Azərbaycana göstərdiyi dəstəyə paralel olaraq, Azərbaycan rəhbərliyi də Türkiyəyə qarşı ayrı-ayrı ölkələrin apardığı aqressiv siyasətlə bağlı ortaya açıq mövqe qoyur, qardaş ölkəni dəstəkləyir. Sizcə, bu dəstək ölkələrimizin gələcək birgə fəaliyyətində hansı rola malikdir və bu əməkdaşlığın hansı perspektivləri var?

- Türkiyə və Yunanıstan arasında Şərqi Aralıq dənizi regionunda bu yaxınlarda baş verən gərginlikdə Azərbaycan Türkiyəni dəstəklədi və dəstəkləyir. Biz eyni dəstəyi türk qardaşlarımızdan da görürük. Beynəlxalq ictimaiyyət növbəti dəfə Azərbaycan-Türkiyə münasibətlərinin qardaşlıq səviyyəsində olmasına şahidlik etdi. Bizi birləşdirən təkcə dövlətlərimizin maraqları deyil, bizi birləşdirən sadiqlik, etibar və qarşılıqlı dəstəkdir. Beynəlxalq tədbirlər zamanı dəfələrlə bu qarşılıqlı dəstəyin şahidi olmuşuq.

Yunanıstanın Azərbaycandakı səfirini qəbul edərkən ölkə başçısı tərəfindən səsləndirilmiş sözlər həmin dəstəyin və əməkdaşlığın bariz sübutudur: “Türkiyə təkcə bizim dost və tərəfdaşımız yox, bizim üçün qardaş ölkədir. Biz heç bir tərəddüd etmədən Türkiyəni dəstəkləyirik və bütün hallarda dəstəkləyəcəyik”.

Bu, sadəcə siyasi mesaj kimi qəbul olunmamalıdır. Bu sözlər etibarlı siyasətin əxlaq fəlsəfəsini özündə əks etdirir. Mövcud yanaşma isə yalnız özünə inanan və potensialına güvənən siyasi liderlərə məxsus olan keyfiyyətdir. Cənab Prezident Yunanıstanın səfirini qəbul etdiyi zaman istifadə etdiyi ritorika da yalnız güclü dövlət başçılarına xasdır. Prezidentin “mən istəyirəm ki, siz bizim mövqeyimizi biləsiniz” ifadəsi Azərbaycanın açıq diplomatiyasına işarə edir. Dövlət başçısı tərəfindən həmin görüşdə səsləndirilmiş sözlər ümumən Azərbaycanın mövqeyini, gücünü və beynəlxalq münasibətlər sistemində yerini nümayiş etdirir.
Dağlıq Qarabağ məsələsində dövlət başçısına dəstək verməliyik - Fuad ƏliyevAzərbaycan Liberal Demokrat Partiyasının (ALDP) sədri Fuad Əliyev Baku News-a müsahibə verib.

- Fuad müəllim, beynəlxalq təşkilatların son olaylardan sonra Ermənistan-Azərbaycan Dağlıq Qarabağ münaqişəsi ilə bağlı sərgilədiyi mövqe ədaləti əks etdirirmi?

- Bizim səylərimiz nəticəsində beynəlxalq təşkilatların əksəriyyəti münaqişənin ölkəmizin ərazi bütövlüyü çərçivəsində həll olunması ilə bağlı müvafiq bəyanatlar veriblər. Dağlıq Qarabağla bağlı məsələdə bütün dünya Azərbaycanın mövqeyini dəstəkləyib, ərazi bütövlüyümüzü tanıyıb. Dünyanın nüfuzlu təşkilatları münaqişənin ölkəmizin ərazi bütövlüyü çərçivəsində həll olunmasıyla bağlı bəyanatlar veriblər, mövqe bildiriblər.

- Amma Avropadakı bəzi dairələr Azərbaycanla bağlı öz hesabatlarında qərəz və qeyri-obyektivliyə yol verir.

- Mən deməzdim ki, Ermənistan-Azərbaycan Dağlıq Qarabağ münaqişəsi məsələsində Avropa dövlətlərinin qərəzli mövqeləri olsun. Bu ölkələr BMT üzvüdürlər və Ermənistanın işğalçı dövlət olduğuna, Azərbaycanın işğal etdiyi torpaqlarından silahlı qüvvələrin çıxarılması ilə bağlı 4 qətnamənin qəbulua səs veriblər. İkincisi, Azərbaycanın bir çox ölkələrlə ikitərəfli formatda imzaladığı strateji tərəfdaşlıq haqqında bəyannamələrdə ölkəmizin ərazi bütövlüyü dəstəklənir və münaqişənin məhz bu prinsiplər əsasında həll olunması təsbit olunub. Amma düzdür, vaxtaşırı bəzi beynəlxalq təşkilatlar bəyanatlar verirlər. O da əsasən insan haqları və seçkilərlə bağlı olur.

- Bəs Avropa Şurası? “Susmaq razılığ əlamətidir” belə deyirlər.

- Avropa Şurasının Azərbaycanla münasibətləri, bu başqa bir söhbətdir. Ermənilərin dünyada güclü lobbisi var. Bu təşkilatlar illər boyu fəaliyyət göstərdiyi ölkələrdə Azərbaycan və Türkiyəyə qarşı iş görürlər. Azərbaycan Avropa Şurasına üzv olandan sonra, bu təşkilatda ermənipərəst güvvələr fəallaşdılar. Bu faktdır. Azərbaycana qarşı ikili standart, qərəzli mövqe nümayiş etdirib. Ermənilərin Tovuzda təxribati ilə bağlı susmaqları, bizə olan qərəzli münasibətin sübutudur.

- Belə olan təqdirdə biz daha nə etməliyik ki, bizə qarşı belə qeyri-obyektiv münasibət olmasın?

- Mənim fikrimcə, Azərbaycan belə qurumlarla və hətta erməni mövgeyindən çıxış edən ölkələrlə ikili münasibətlərə yenidən baxmalıdır. Bunlar bilməlidirlər ki, Dağlıq Qarabağ münaqişəsində neytrallığı qoruyub beynəlxalq prinsipləri, qəbul olunan qanunları, BMT-nin 4 qətnaməsini hər şeydən üstün tutub işğalçı Ermənistana qarşı siyasi və iqtisadi təzyiqlər etməlidirlər. Biz isə, bütöv bir cəmiyyət olaraq, Dağlıq Qarabağ məsələsində dövlət başçısına dəstək verməliyik. Dövlət başçısı dəfələrlə vurğulayıb ki, sülh danışıqları müsbət nəticə verməzsə və ermənilər beynəlxalq hüquq norma və prinsiplərinə sayqısızlıqlarını nümayiş etdirib işğalçılıq siyasətini davam etdirərlərsə, o zaman hərb yolunun seçilməsi məcburiyyətində qalacağıq. Mənə elə gəlir ki, anti-terror əməliyyatlara başlanması, bütün cəmiyyətin istəyi ola bilər.

- Fuad müəllim, toy qalmaqalı davam edir. Sanki cəmiyyətimiz indi “bal ayı”-nın qurtarmasını gözləyir ki, bunun sonu necə olacaq. Sizcə nə baş verir?

- Bu mövzu ilə bağlı mən və partiyanın rəsmiləri ilk gündən açıqlamalar vermişik. Əlavə nesə deməyə ehtiyac duymuram. Əsas odur ki, qanun pozulmasına görə saxlananlar var, cərimələr ödənildi. Qanunun aliliyi qorundu. Nə yaşa, nə tutduğu vəzifəyə, nə də ki, keçdiyi yola görə qüzəşt olunmadı. Bizim başqa problemlərimiz var. Pandemiya bilinmir ki, nə vaxt qurtaracaq. İqtisadiyyatımızı fikirləşməliyik. Kiçik və orta biznesin inkişafı ilə məşqul olan adamları fikirləşməliyik ki, onlara necə kömək edək. Az təminatlı ailələri fikirləşməliyik. Bunlar qanunu pozaraq öz toyunu edib, “bal ayı”-nı yaşayırlar. Minlərlə subaylımız, hansılar ki, ailə qurmaq istəyirlər, onlar nə etsin? Bunları fikirləşmək lazımdır.
"Azərbaycan MDB və GUAM-da üzvlüyünü dayandırmalıdır" Azərbaycan Liberal Demokrat Partiyasının (ALDP) sədri Fuad Əliyev Baku News-a müsahibə verib.

- Fuad müəllim, Azərbaycan və Rusiya Xarici İşlər Nazirlərinin keçirdiyi brifinqdə, Lavrov Azərbaycanın Şanxay Əməkdaşlıq Təşkilatında (ŞƏT) müşahidəçi statusu almaq üçün etdiyi müraciəti dəstəkləyəcəyini bildirdi. Sizə elə gəlmir ki, bu məsələ artıq həll olunub?

- Lavrovun bu məsələni Ceyhun Bayramovla ilk görüşdə səsləndirilməsi məsələnin dolayısı ilə həll olunmuş kimi təsdiq edir. ŞƏT-lə bağlı fikirlərimi, 2008-ci ildə keçirilən prezident seçkilərində bildirmişdim. Prezidentliyə namizəd kimi, İctimai televiziyada öz çıxışlarımda bu məsələnin Azərbaycan üçün prioritet məsələ olduğunu qeyd etmişdim. Bu mənim siyasi-iqtisadi proqramımda öz əksini tapmışdı. Bu Azərbaycanın ictimai-siyasi həyatında yeni bir təklif idi. Və o dövürdə verdiyim bu təklifə görə demək olar ki, hər tərəfdən tənqid olunmuşdum. İllər keçəndən sonra 2015-ci il tarixində ŞƏT üzv dövlətlərinin başçıları Şurasının iclasında Azərbaycan Respublikasına ŞƏT-də dialoq üzrə tərəfdaş statusunun verilməsi barədə qərar qəbul edilmişdir. 2016-cı il tarixində isə, Pekin şəhərində ölkəmizlə ŞƏT arasında ümumi əməkdaşlıq istiqamətlərini nizamlayan “Azərbaycan Respublikasına Şanxay Əməkdaşlıq Təşkilatının dialoq üzrə tərəfdaşı statusunun verilməsi haqqında Memorandum” imzalanmışdır.

- Belə demək olar ki, prezidentliyə namizəd kimi seçicilərə təqdim etdiyiniz proqramın bir bəndi həyata keçir….

- (gülür) Niyə bir? Bir neçəsi. Misal üçün proqramda Xəzəryanı dövlətlərin Əməkdaşlıq Şurasının yaradılması təklifimdə həyata keçdi. Mən bu gün də hesab edirəm ki, Azərbaycanın üzv olduğu bir neçə beynəlxalq təşkilatlardan çıxmalıdır. Misal üçün, MDB və GUAM təşkilatlarda üzvlüyünü dayandırlmalıdır. Bu təşkilatların demək olar ki, bir adları qalıb. Belə halda niyə Azərbaycan hər il bu təşkilatlara üzvlük haqqı verməlidir? Bunları da 2008-ci ildə demişdim. Yəqin ki, nə vaxtsa verdiyim bu təkliflər də həyata keçəcək.

- İnşallah. Fuad müəlim, ŞƏT Azərbaycana nə verəcək?


- Şanxay Əməkdaşlıq Təşkilatı iqtisadi təşkilat olduğuna görə Azərbaycana iqtisadi baxımdan çox şey verə bilər. Baxın, Azərbaycanın neft-qaz kəmərləri Avropaya istiqamətlənib. Yəni ki, biz neftimizi, qazımızı Avropa ölkələrinə satırıq. Bu baxımdan bizim ehtiyat bazarımız olmalıdır. Necə ki, Avropa ölkələrin bu məsələdə seçimi var, bizim də olmalıdır. Bu seçim olmayanda biz Avropa ölkələrindən asılı vəziyyətdə oluruq. Bu iqtisadi asılacağımız, dolayısı ilə siyasi asılacağımıza çevrilir. Bunu da mən hesab edirəm ki, bizim üçün qəbul olunmazdır. Baxın, qardaş Türkiyə Qərblə münasibətləri pozmadan Avrasiya regionuna, ŞƏT-ə can atır. Türkiyə də Azərbaycan kimi, bu təşkilatın tam hüquqlu üzv olmaq istəyir. Niyə? Çünki Fransa və Almaniyanın Türkiyəyə Avropa İttifaqının tam üzvlüyü verilməməsi ilə bağlı qəti mövqeyini nəzərə alan Ankara alternativ əməkdaşlıq platformalar axtarmaq məcburiyyətindədir. Ona görə hesab edirəm ki, Azərbaycan üçün hər iki istiqaməti prinsipcə bir-birini istisna etmədiyinə görə, biz hər iki istiqamətin paralel inkişafında maraqlı olmalıyıq.
MaksimMusayev Ramiz Mehdiyevlə bağlı şok faktları açıqladıAvrasiya.net hakim Yeni Azərbaycan Partiyasının (YAP) qurucularından sayılan Maksim Musayevin Musavat.com-a müsahibəsini təqdim edir:

- Maksim müəllim, açıqlamalarınızın birində qeyd edirsiniz ki, o dövrdə Mehdiyevlə görüşmüsünüz, partiyaya qoşulmaqdan imtina edib. Belə başa düşdüm ki, YAP-ın qurulmasına qarşı çıxıb...

- Ramiz Mehdiyev partiyanın qurulmasına qarşı çıxmırdı. Daha doğrusu, onun elə bir qüvvəsi və bacarığı yoxuydu ki, bizə qarşı gedə. Sadəcə, o vaxt belə prinsiplə işləyirdi ki, özü partiya yaratsın. Amma başına adam yığa bilmirdi, onlardan ikisini tanıyıram, sanballı adamlardı. Mənə deyirdilər ki, bizdən əl çəkmir, deyir, gəlin partiya quraq. Axı 1000 nəfər olmalıdır ki, partiya təsis olunsun. Təsəvvür edin ki, biz 1000 adam tapa bilmirdik YAP-ı quraq. Yəni çətin dövr idi. O zaman naxçıvanlı dostlar sağ olsunlar, dəstək verdilər, Bakıdan, hər yerdən adamlar toplandı və partiya quruldu. Amma Ramiz Mehdiyev bunun əleyhinə gedirdi.

- Nəyə görə əleyhinə idi?

- Biz partiyanı yaradanda onun heç xəbəri yox idi. YAP elə çətin günlərdə yaradılıb, elə təhlükələrlə üzləşmişik ki, indikilər xəbərsizdirlər. Amma partiyanın yuxarı postlarında, kreslolarında oturub kef çəkirlər. Halbuki YAP-ı yaradanları çoxu indi kənarda qalıb. Onlardan heç kim də vəzifə istəmir. Bu gün bir-birimizlə əlaqə saxlayırıq, maraqlanırıq ki, niyə partiyadan kənarda qalıblar. Lakin partiyanın çətinliklə qurulmasında iştirakı olmayanları, bu gün kef çəkənləri, hiss olunur ki, Ramiz Mehdiyev özü YAP-a qoşdu. O zaman Əli Əhmədov AMİP-də idi, bizə qarşı gedirdi. Ramiz özü sonradan gəldi. İndi partiyanın 80 nəfər Siyasi Şurasının üzvü var. Həmin Şurada elə adamlar var ki, o vaxt bizə qarşı gedirdilər. Bəs hanı Asya Manafova, Əli Əlirzayev? Heydər Əliyev Əlirzayevə tapşırıq verirdi ki, indidən iqtisadi məsələləri hazırla. Sirus Təbrizlini də eynilə kənar qoydular. Sizə bir fakt deyim: ilk dəfə mənim dilimdən çıxır - təxminən 1994-1995-ci illər olardı, biz YAP-çıların nümayəndəsi kimi Sirus Təbrizli günaşırı Heydər Əliyevin yanına gedib-gəlirdi. Heydər Əliyev ona bir dəfə deyir ki, prezidentin partiya sədri olması mütləqdir? Yəni prezident bütün vətəndaşların prezidentidir. Sirus bunu gəlib bizə danışdı, xeyli narahat olmuşdu. Dedi ki, yəqin düzgün anlamamısan, get dəqiqləşdir. O da aydınlaşdırdı və məlum oldu ki, kim olsa yaxşıdır - əlbəttə, Ramiz Mehdiyev bu məsələni ortalığa qoyub ki, prezident YAP-ın sədri ola bilməz. Sonradan başa düşdüm ki, Ramiz Mehdiyevin niyyəti partiyanı ələ keçirmək olub. Amma biz həmin dövrdə bu məsələni açıb-ağartmadıq. İndi Mehdiyevin içüzü açılandan sonra elə faktlar deyiləcək ki, bütün əməlləri cəmiyyətə məlum olacaq. İndi də sakit dayanmır, yenə bəyanat verib.

Axı təkrar bəyanat verməkdə məqsədin nədir? O, hələ də elə bilir ki, Prezident Administrasiyasında oturub, istədiyi vaxt telefonu götürüb sağına da, soluna da əmr verir. Bu insan o binadan çıxdığını, vəzifədən getdiyini unudub. Dərk etmir ki, akademiya bütün universitetlərin elmi ocağıdır. Sən niyə indi atılıb-düşürsən? Ümumiyyətlə, heç bir qabiliyyəti olmaya-olmaya bu qədər kitablar yazıb. Onun adına olan kitabları yığasan bir kitabxanaya, deyəsən oxu, gündə 20-30 saat lazımdır onları oxuyub qurtarasan. Gör nə qədər adamları avam yerinə qoyub ki, ayda neçə kitab buraxırdı. Bəs sən işləyirsən, yoxsa kitab yazırsan? Sadəcə, vaxtilə o qədər qabağından qaçıblar, susublar, adamları qapazaltı saxlayıb ki, elə bilir böyük şəxsiyyətdir. Necə ki, Abel Məhərrəmov tost deyir ki, “biz xırda adamlarıq, siçan-qurbağa, qarışqayıq...”

- Partiya ilə bağlı maraqlı məqamlara toxundunuz, sizə elə gəlmir ki, çoxu Mehdiyevin adamı olan YAP və Siyasi Şuranın tərkibi yenilənməlidir?

- Deməli, o vaxt Heydər Əliyevə suallar verirdilər ki, partiyanın adı nə olsun. O da demişdi ki, AMİP-in adında millilik var, gəlin, biz də milli bir ad qoyaq. Bu vaxt Asya Manafova yerindən qalxıb getmək istəyəndə mən saxladım. Dedim nə olub? Qayıtdı ki, bəs mən ləzgiyəm, milli yazırsınızsa gedirəm. Dedim ki, Heydər Əliyev burada oturub, otur yerində. Sonra Heydər Əliyeva ona işarə elədi ki, otursun. Bir dəfə də özüm Heydər Əliyevə dedim ki, partiyaya üzvlük üçün nə etməliyik, sovet vaxtında Kommunist Partiyasına qoşulmaq kimidir? Dedi ki, dünyada bir çox partiyaların fərqli nizamnamələri var. Məsələn, Türkiyədə Kommunist Partiyasına ərizə verib üzv olursan, ərizə yazıb çıxırsan. Dedi ki, biz sovet dövründə xaricdən gətirilən partiyada olmuşuq, indi özümüz partiya qururuq. Yəni, sualına cavab olaraq deyim ki, bu gün YAP-da saf-çürüklük getməlidir. Kim partiyaya sonralar gəlibsə, onun haqqında fikirləşmək lazımdır. Demirəm ki, çıxarsınlar. Bu gün partiya elə çirkab vəziyyətə salınıb ki, onun üzvləri rüşvətlə həbs olunublar. Belə eybəcərlik olmaz. Birincisi, Əli Əhmədov istefa verməlidir. Siyavuş Novruzov bu biabırçılıqdan sonra özündə güc tapıb istefa verdi. Halbuki vaxtilə Ukrayna prezidenti Kuçma Heydər Əliyevə YAP haqda necə fəxrlə sözlər deyirdi, Şverdnadze partiya təcrübəsini öyrənmək üçün Gürcüstandan adamlar göndərirdi. İndisə partiya nə vəziyyətə salınıb.

- Maksim müəllim, bildirmisiniz ki, Mehdiyev sizi məhkəməyə verməsə, özünüz onu məhkəməyə verəcəksiniz. Çox maraqlıdır, hansı iddianı qaldırmaq fikrindəsiniz?

- Mən hələ bilmirəm hansı məhkəməyə müraciət edəcəyəm. Amma hansı iddianı irəli sürəcəyimi desəm, Ramiz Mehdiyev ayılar. Onu debata da çağırmışam. Amma hansı iddianı qaldıracağımı hələ deməzlər. Üç gün keçsin, soruşarsınız, deyərəm. Söhbət ondan gedir ki, səhv etmirəmsə 29 adamın adını çəkib və xüsusi ittiham qaydasında məhkəməyə verə biləcəyini deyib. Sən bu adamlara necə qara yaxa bilirsən? Elə təhqiramiz cümlələr işlədir ki, buna dözmək olmur. Əgər üzbəüz gəlsəydim, daha sərt sözlər deyərdim. Amma yaxşı olar ki, getsin akademiyadakı işi ilə məşğul olsun.
Putinin şok tapşırığı: Rövşən və Quli niyə Türkiyədə öldürüldü?Sabiq polis rəisi, ekspert-kriminalist Mahmud Hacıyevin bu gün gecə saatlarında Antalyada qətlə yetirilən Lotu Qulinin ölümü ilə bağlı Axar.az-a müsahibəsi:

- Sizcə, bu qətlin səbəbi nədir?

- “Vorzakon” və ya “qanuni oğru” dediyimiz şəxslərin vahid bir amalı, hədəfi, əqidəsi olmur. Bu şəxslər daha çox klanlar və ya qruplaşmalar halında müəyyən sahələrə nəzarət edirlər. Məhz qeyd etdiyim sahələr uğrunda vaxtaşırı bir-biri ilə konfliktə girirlər. Adətən bu mübahisələr bir klanın və ya qruplaşmanın digərinin ərazisinə girməsi, keçirilən “sxodka”larda yaranan konfliktlər, eyni zamanda klan üzvlərindən birinin qətli səbəblərindən yarana bilir. Yəni bu şəxslər və nəzarət etdikləri qruplar arasında vahid birlik və ya sabitlik olmur. Qeyd etdiyim mübahisələrin kulminasiya nöqtəsi isə Lotu Quli kimi klan başçılarının ölümü ilə nəticələnir.

Lotu Qulinin qətlinə gəldikdə isə onu deyə bilərəm ki, ümumiyyətlə, kriminal aləmdə digər qanuni oğrulara nəzərən ona qarşı münasibət heç də yaxşı olmayıb. Elə o özü də bir çox qanuni oğru ilə düşmənçilik edirdi. Lotu Quliyə qarşı bu cür aqressiyanın, düşmənçiliyin olmasının əsas səbəbi onun özü ilə bağlı idi. Bildiyiniz kimi, qanuni oğruların yazılmamış qanunları var. Bu qanunlara bütün qanuni oğrular riayət etməlidir. Lotu Quli bir çox hallarda bu qanunların bir çoxu ilə razılaşmır, hətta riayət etmirdi. Buna görə də bu gün, ya sabah onun qətlə yetiriləcəyi gözlənilirdi.

- Lotu Qulinin mərhum qanuni oğru Rövşən Lənkəranskinin qətlinin (18 avqust 2016-cı) ildönümündən bir gün sonra öldürülməsi bu hadisənin Rövşənin qisası olması haqda fikir yaradıb. Qulinin ölümü ilə bağlı diqqət çəkən bir digər məqam da həmin tarixdə, daha doğrusu, avqustun 18-də daha bir azərbaycanlı kriminal avtoritetin - “Qoca Yasamalski” ləqəbli Əlibala Həmidovun öldürülməsidir. Sizcə, bu şəxslərin qətlləri arasında bir bağlantı varmı?

- Düşünmürəm ki, bu şəxslərin qətlləri arasında hansısa bir bağlantı var. Tarixlərə gəldikdə isə bu, sadəcə, təsadüf də ola bilər. Bilirsiniz, belə məqamlar hər zaman olub, olacaq da. Tarixdə bir çox hökmdarların ölümü də eyni tarixdə olub və ya gündəlik həyatımızda baxırsan ki, bir ailənin 3 üzvü müxtəlif illərdə, lakin eyni ayda rəhmətə gedir. Yəni bu kimi hadisələrin eyni tarixlərə təsadüf etməsinin arxasında xüsusi bir səbəb dayanmaya da bilər.

Lakin diqqət yetirsəniz, görərsiniz ki, həm Rövşən Lənkəranski, həm də Lotu Quli məhz Türkiyədə qətlə yetirilib. Bunun isə xüsusi bir səbəbi var. Bildiyiniz kimi, postsovet məkanında qanuni oğruların ən çox yığıldığı, xüsusi tədbirlər keçirdiyi, hətta fəaliyyət göstərdiyi əsas ölkə Rusiya idi. Ukrayna, Belarus kimi böyük ölkələrin qanuni oğruları da bu ölkəyə üz tuturdular. Lakin Vladimir Putin faktiki olaraq qanuni oğrulara qarşı bir müharibə açdı.

Putin özü də xüsusi xidmət orqanlarından çıxmış təcrübəli və peşakar zabitdir. Həm bu aləmi, həm də qanunlarını yaxşı bilirdi. Digər tərəfdən, qanuni oğruların Rusiyada çoxalması həm ölkə iqtisadiyyatını, həm də dövlət idarəetməsini ciddi mənada zəiflətmişdi. Yəni qanuni oğrular, sadəcə öz aralarında münaqişə etmir, bir çox tanınmış dövlət adamlarını dəstəkləyərək vəzifəyə gəlməsini təmin edirdi. Bu isə faktiki olaraq qanuni oğruların özlərini dövlət qarşısında toxunulmaz hala gətirirdi.

Putin məhz buna görə ölkədə olan bütün qanuni oğrulara müharibə açdı, hətta onu da deyim ki, qanuni oğruların yazılmamış qanularından birini dəyişdirmələrinə nail oldu. O, polislərə qanuni oğrulara yaxınlaşanda onlardan qanuni oğru olub-olmadığını soruşmasını tapşırdı. Əgər şəxs qanuni oğru olduğunu desə, həbs edilirdi, demədisə, bu zaman onun qanuni oğru adı digərləri tərəfindən tanınmırdı. Çünki qanuni oğrular bu adı dana bilməzlər. Məhz bundan sonra qanuni oğrular həm öz yazılmamış qanunlarında bu məsələni əsas gətirərək dəyişiklik etdi, həm də daha fərqli ölkəyə - Türkiyəyə getməyə başladılar. Rövşən Lənkəranski və Lotu Qulinin Türkiyədə öldürülməsinin səbəbi də budur.

Qurbanov qələbədən danışdıÇox vacib qələbə qazandıq. Uzun müddətdən sonra qalib gəlmək xoşdur. Təəssüf ki, bu gün azarkeşlərimiz meydanda yox idilər. Azarkeş amilinin futbolda nə demək olduğunu tam hiss etdik. Qarşıda çempionat oyunu var. Bu oyunlara maksimum dərəcədə hazırlaşmağa çalışacağıq.

Avrasiya.net-in Report-a istinadən məlumatına görə, bunu “Qarabağ”ın baş məşqçisi Qurban Qurbanov Çempionlar Liqasının I təsnifat mərhələsində Şimali Makedoniyanın “Sileks” komandasına 4:0 hesabı ilə qalib gəldikləri oyundan sonra mətbuat konfransında deyib. 48 yaşlı mütəxəssis daha sonra jurnalistlərin suallarını cavablandırıb...

- Maksim Medvedevin durumu necədir?

- Həkimlər sabah dəqiq deyəcəklər. Çox ciddi olduğunu düşünmürəm. Topuq nahiyəsi burxuldu. Ağrısı güclü olduğu üçün əvəzlədik.

- İlk hissədə bir qədər narazı idiniz. Konkret nə sizi qane etmirdi?

- Bu gün futbolçulardan ideal oyun gözləyə bilmərik. Amma lazımi anlarda tempi artırırdıq. Surətdən daha çox topla daha səliqəli oynamalı idilər. Onlardan bunu tələb etmişdim, edəcəyəm də. Amma bu qədər fasilədən sonra futbolçuların ən yaxşı oyununu göstərməsi mümkün deyil. Bu gün çox əziyyət çəkdilər. Hazırlaşdığımız hücumlar pis alınmadı, standart vəziyyətdən də pis oynamadıq.

- Növbəti mərhələdə hansı komandaya rəqib olmaq istərdiniz?

- Fərqi yoxdur. Hansı olsa, bizim üçün rəqibdir. Bugünkü səhvləri təkrarlamamalıyıq. Çünki növbəti mərhələyə adlayacaq komanda daha yaxşı formada olacaq.

- Bugünkü rəqibin gücü komandanın səhvlərini görməyə imkan verdi?

- Səhvlər var. Səhv elə bir elementdir ki, rəqibin güclü və ya zəif olmasının fərqi yoxdur. Futbolçu formadan, komanda ritmdən uzaq olanda səhvlər olur. Oyundan-oyuna bunları aradan qaldırmağa çalışacağıq. Elə səhvlərdir ki, çox az təkrarlayırıq və tezliklə aradan qaldıracağıq.

- Yeni transferlər gözləməyə dəyərmi?

- Pandemiyadan sonra transfer etmək daha da çətinləşib. İstənilən halda axtarışlarımız davam edir. Mütləq bir neçə transfer etmək istəyirik.

- Qapıçı seçimində həlledici məqam nə oldu?

- Şahruddin uzun müddətdir komandadadır. Emil bir ilə yaxın oynamadı. Bu gün belə qərar verdim. Amma onları ayırmıram. Qarşıdakı oyunlarda Emili də meydanda görə bilərik.

- Əcnəbi qapıçı transferi gündəmdədir?- Bəli, gündəmdədir. Danışıqlar davam edir. Hətta iki qapıçı ilə danışıq uğurlu alınmadı.

- Növbəti oyun da evdə olacaq. Ot örtüyünün durumunu nəzərə alsaq, II mərhələ matçını ehtiyat arenada keçirə bilərsiniz?

- Açığı, oyundan əvvəl UEFA-ya bildirildi ki, bununla bağlı problem ola bilər. UEFA bildirdi ki, ilk oyunu burada oynamalısınız. Əgər icazə versələr, növbəti görüşü “Azersun Arena”da keçirə bilərik. Bəlkə 10-15 gündən sonra meydança düzəldi. Amma yenə də müraciətimizi etmişik.

- Yay fasiləsində komandadan gedənlər oldu. Bu gün ən çox kimin yoxluğunu hiss etdiniz?

- Mənim üçün futbolçulardan ayrılmaq asan deyil. Xüsusən də, 3-5 il burada oynayanlarla. Məcburuq yeni oyunçular gətirək. Çalışırıq özlərini sərbəst göstərsinlər. Kim gedirsə, hər birini burada görmək istərdim. Amma futbolda dəyişikliklər mütləq olmalıdır, kimsə getməlidir. Bir neçə oyunçu var ki, onlarla hər bir məşqçi işləmək istərdi.
Belarus, Kremlin gücünün ölçü məkanı kimi görünür - VideoBelarusda baş verənlərin Azərbaycana birbaşa təsiri olmasa da, rəsmi Bakı prosesləri diqqətlə izləyir. Prosesləri Azərbaycan üçün maraqlı edən bir neçə amil var. Məsələn, Aleksand Lukaşenkonun ölkəmizə münasibəti, KTMT-də kritik anlarda Ermənistanın Azərbaycan əleyhinə olan istəklərinə qarşı çıxması bu amili şərtləndirən səbəblərdən biridir. Amma bu, heç də birmənalı qəbul olunmur. Paralel olaraq düşünənlər var ki, Belarus bütün situasiyalarda məhz Rusiyanın diqtəsi ilə hərəkət edir.

Məsələnin digər maraqlı tərəfi budur ki, Rusiyanın qərblə, xüsusən ABŞ-la maraqlarının toqquşduğu Belarus, Kremlin gücünün ölçü məkanı kimi görünür. Yəni Lukaşenko hakimiyyətdən uzaqlaşdırılarsa, bu, "BATYA"nın deyil, Kremlin məğlubiyyəti kimi görünəcək. Proseslərin məhz bu tərəfi Belarusu Azərbaycan ictimaiyyəti üçün cəlbedici edir. Çünki Azərbaycanda böyük əksəriyyət bu fikirdədir ki, Qarabağ probleminin açarı Rusiyanın əlindədir. Və şimal qonşumuz bu kartdan Azərbaycana qarşı istifadə edir.

Biz, Rusiya ilə münasibətlərimizi necə tənzimləməliyik, Türkiyə hərbi bazalarının ölkəmizdə yerləşdirilməsi hansı halda mümkün ola bilər, əgər bu bazalar Azərbaycanda yaradılarsa, hansı ölkələrin maraqlarına toxuna və əlaqələr kəskinləşə bilər? Bu və digər marağlı sualların cavabını BAXCP sədri, millət vəkili Qüdrət Həsənquliyevdən eşidə bilərsiniz.

Ətraflı - VİDEODA



Putin Batyanı devirmək istəyirmi? - Deputat açıqladı9 avqustda Belarusda keçirilən prezident seçkilərinin nəticələrini elan edən Mərkəzi Seçki Komissiyası hazırkı dövlət başçısı Aleksandr Lukaşenkonun 80.1% səslə qalib gəldiyini elan edib. Belarus Prezidentinin əsas rəqibi S.Tixanovskayanın isə 10.12% səs topladığı açıqlanıb.

Lakin seçkilərdən sonra paytaxt Minsk də daxil olmaqla, ölkənin müxtəlif şəhərlərində nəticələrə etiraz edən vətəndaşlarla polis qüvvələri arasında toqquşmalar davam edir. İndiyədək 7 000-dək etirazçının saxlanıldığı, 2 nəfərin toqquşmalarda həlak olduğu, yüzlərlə insanın yaralandığı bildirilir. Seçkidə Lukaşenkonun əsas rəqibi olan Svetlana Tixanovskaya təhlükəsizliyi ilə əlaqədar Belarusu tərk edib, o, hazırda Litvadadır.

Avrasiya.net xəbər verir ki, Belarusda seçkiləri müşahidə edən Milli Məclisin üzvü, deputat Arzu Nağıyev Musavat.com-ın mövzu ilə əlaqədar suallarını cavablandırıb:

- Arzu bəy, Belarusda prezident seçkilərini müşahidə etdiniz. Konkret harada müşahidələr apardınız? Sizin müşahidələr nə deyir, Aleksandr Lukaşenkonun adının qarşısına yazılan faizlər ədalətli nəticədirmi?

- Belarusda prezident seçkilərini müşahidə missiyasında mən və Milli Məclisin digər 3 üzvü, Mərkəzi Seçki Komissiyasının nümayəndəsi, eyni zamanda Azərbaycanın MDB Parlamentlərarası Assambleyadakı nümayəndəsi var idik. Biz həm MDB İcraiyyə Komitəsini, həm də MDB Parlament Assambleyasını təmsil edirdik. Konkret olaraq mən Minsk şəhərinin ən iri sənaye rayonu olan Partizansk rayonunda həm seçkidən öncə, həm də seçki günü müşahidələr apardım. Belarusda seçki iki mərhələdə keçirilir. Səsvermə 5 gün əvvəlcədən başlayır, bir də seçki günü, əsas gün, yəni 9 avqustda səs verilir. Partizansk rayonunda iri sənaye obyektləri, zavodlar, fabriklər, ali təhsil ocaqları və s. yerləşir. Birmənalı şəkildə deyə bilərəm ki, bu rayonda cənab Lukaşenko liderlik edirdi. Çünki rayon sakinləri işlə təmin edilib, sosial məsələlər həllini tapıb, zavod və fabriklər öz məhsullarını həm daxili, həm də xarici bazara şıxara bilirlər, bu da ki, çox vacib elementdir. Qeyd etməliyəm ki, Partizansk rayonunda cənab Lukaşenkonun səs faizləri həqiqətə uyğun idi.

- Elə isə seçkilərdən sonra xalqın küçəyə axışması nəyin göstəricisidir, burada xarici amil rol oynayıb, yoxsa sadəcə total seçki saxtakarlıqlarına etirazdan söhbət gedə bilər?

- Total seçki saxtakarlığından söhbət gedə bilməz. Çünki hətta vətəndaşların özü tərəfindən aparılan müşahidə və statistik göstəricilər ekzitpolla müqayisədə o qədər də fərqli deyildi. Həmin nümayəndələrlə də görüşlərimiz oldu və əsas problemin siyasi olduğu nəzərə çarpırdı. Yəni iqtisadi tənəzzüldən və ya problemlərdən söhbət açılmırdı, əsas məsələ siyasi problemlərlə bağlı idi. Hiss edilirdi ki, xarici polittexnoloqlar öz işlərini görürdü. Təsəvvür edin ki, seçkinin bitməsinə 10-15 dəqiqə qalanda məntəqəyə 30-40 seçici gəlir və bir nəfər seçki kabinəsinə daxil olur, 10 dəqiqə ərzində çıxmır, süni sıxlıq yaradılır, narazılıq edənlərin və avtomobillərdən siqnallar verənlərin avtomobilləri isə şəxsi deyildi, icarəyə götürülənlər idi. Yəni düşünülmüş məsələlər nəzərə çarpırdı. Küçələrə çıxan kontingentə gələndə isə bunlar heç də həssas və çətin durumda olanlar deyildi. Əsasən Polşada, Litva və digər xarici dövlətlərdə təhsil alan tələbələr, xarici şirkətlərdə işləyənlər, Rusiya ilə biznes fəaliyyəti ilə məşğul olanlar və bu və ya digər səbəbdən iş yerlərini itirən iş adamları çoxluq təşkil edirdi.

- Lukaşenkonun xanım rəqibi Svetlana Tixanovskayanın ölkədən çıxarılması əməliy
yatını necə dəyərləndirirsiniz?

- Bilirsiniz ki, əsas rəqib kimi göstərilən Svetlana Tixanovskaya səslərin 10 faizini toplayıb. Heç vaxt siyasətlə məşğul olmayan və həyat yoldaşının azadlığa çıxması üçün bu seçkiyə qoşulan şəxs üçün çox mühüm bir qələbədir, yəni səslər bunu deyir. Seçkilərdən sonra Litvaya getməsi və verdiyi bəyanatdan da məlum olur ki, həqiqətən onun həyatına təhlükə olub. Lakin kim tərəfindən? Əgər Belarus hakimiyyəti ona ölkədən çıxmağa şərait yaradaraq, təhlükəsizliyini təmin etdisə, deməli, bu təhlükə əks tərəfdən də ola bilərdi və bunu da iqtidarın üzərinə qoya bilərdilər. Məhz buna görə də belə bir əməliyyat baş tutdu.

- Həbs edilən və öldürülən etirazçılarla bağlı sizdə məlumatlar nədən ibarətdir?


- Bu barədə ancaq kütləvi informasiya vasitələrindən məlumatlıyam. Belarus Daxili İşlər naziri Yuri Karayev etiraz mitinqlərinin yatırılması və həbslər vaxtı güc strukturlarının əməkdaşları tərəfindən təsadüfən xəsarət yetirilən, zədə alan vətəndaşlardan üzr istədi, məsuliyyəti öz üzərinə götürdü və bu şəxslərin də “rəngli inqilablar”da istifadəsini qeyd etdi. Bu hadisələr təbii ki, araşdırılmalıdır və hüquqi qiymətlər verilməlidir.

- Necə bilirsiniz, Putin Batyanı devirmək istəyir, ya onu xilas məqsədilə Belarusla hansısa oyun qurub? Bu arada rusiyalı hərbçilərin Belarusda həbsi də maraqlı detal idi.


- Zənnimcə, belə deyil. Çünki Belarus həm coğrafi, həm də geosiyasi yerinə görə həm Rusiya, həm də Qərb üçün çox mühüm əhəmiyyət kəsb edir. Təbii ki, güclü bir liderin olması da buna mane olan amildir. Eyni zamanda Lukaşenkonun son vaxtlar apardığı müstəqil daxili və xarici siyasət də çoxlarına xoş gəlmir. Bütün məsələlər də məhz bundan qaynaqlanır.

- Beynəlxalq aləm, Qərb dövlətləri və təsisatları Lukaşenkonun legitimliyini tanımadı. Belə olan halda gedişat necə olacaq, sizcə? Küncə sıxışdırılmış Belarus sonda Rusiya ilə məcburən birləşə, SSRİ-nin dirildilməsi əməliyyatında yer ala bilərmi?


- Belarus birinci və axırıncı dövlət deyil ki, Qərb onun nəticələrini tanımasın. Zənnimcə, MDB məkanı tam şəkildə nəticələri tanıyacaq. Bundan başqa, Belarusun tərəfdaşları olan dövlətlər də az deyil. Yəni bu dövləti hazırki potensialı ilə siz dediyiniz kimi “küncə sıxmaq” mümkün olmayacaq. SSRİ-nin bərpası məsələsinə gəldikdə isə Belarus bu qədər gərginliklə müstəqilik əldə edibsə, onun hansı dövlətləsə birləşməsi inandırıcı deyil