Azərbaycan və İran arasında turizm sahəsində əməkdaşlıq sazişi imzalanıb
Fevralın 15-də Tehranda İran və Azərbaycan üzrə ikinci ixtisaslaşdırılmış turizm simpoziumu keçirilib.

Avrasiya.net xəbər verir ki, Azərbaycanın İrandakı səfirliyi ilə “Aysan Pərvaz” şirkətinin təşkil etdiyi simpoziumda İranda fəaliyyət göstərən turizm şirkətlərinin rəhbərləri, İqtisadi Əməkdaşlıq Təşkilatının əməkdaşları və media nümayəndələri iştirak ediblər.

Tədbirdə çıxış edən Azərbaycanın Dövlət Turizm Agentliyinin sədri Fuad Nağıyev ölkəmizin turizm potensialı haqqında məlumat verib. O qeyd edib ki, ölkələrimizin coğrafi yaxınlığı ikitərəfli əlaqələrin inkişafı üçün böyük imkanlar yaradıb.

F.Nağıyev həmçinin vurğulayıb ki, Azərbaycan ilə İran arasında turizm əlaqələri genişlənməkdədir. Ötən il İrandan Azərbaycana gələn turistlərin sayı 255 min nəfərdən çox olub ki, bu da 2018-ci illə müqayisədə 6,3 faiz çoxdur. İran Azərbaycan vətəndaşlarının ən çox ziyarət etdikləri ölkələrdən biridir.

Novruz bayramında İrandan Azərbaycana xüsusilə çox turist gəlir. Hazırda Azərbaycana gəlmək istəyən turistlərin səfərlərinin daha da asanlaşması istiqamətində iş aparılır. Ötən ilin dekabr ayının 1-dən İran vətəndaşlarının Naxçıvan Muxtar Respublikasına səfərlərini asanlaşdırmaq məqsədi ilə viza rejimi ləğv edilib. Tehran ilə Bakı arasında hər gün birbaşa təyyarə reysləri təşkil edilib.

İranın Azərbaycandakı səfiri Cavad Cahangirzadə isə İran ilə Azərbaycanın əlaqələrinin səmimi dostluq və qardaşlıq xarakteri daşıdığını söyləyib. O, ölkələrimiz arasında bütün sahələr üzrə qarşılıqlı faydalı əməkdaşlıq əlaqələrinin yüksələn xətt üzrə inkişaf etdiyini diqqətə çatdırıb.

Azərbaycanın İrandakı səfiri Bünyad Hüseynov isə çıxışında bildirib ki, Azərbaycan ilə İranın münasibətləri müştərək tarixə, qədim dostluq və qardaşlıq ənənələrinə əsaslanır. Ötən 7 il ərzində Azərbaycan və İran prezidentlərinin 13 görüşü olub, yüksək səviyyəli nümayəndə heyətlərinin 150-dən çox qarşılıqlı səfərləri həyata keçib və 75-dən artıq sənəd imzalanıb.

Simpoziumda İranın “Aysan Pərvaz” turizm şirkətinin direktoru Möhsün Dəsmalçi, Naxçıvan Muxtar Respublikası turizm departamentinin rəhbəri Əkbər Novruzov, Azərbaycan Turizm Agentlikləri Assosiasiyasının sədri Rüfət Hacıyev, İran Turizm Agentlikləri Assosiasiyasının sədri Hörmətullah Rəfii və başqaları çıxış edərək turizm əlaqələrinin inkişafı istiqamətindən danışıblar.



Sonra Azərbaycan Turizm Agentlikləri Assosiasiyası ilə İranın Turizm Agentlikləri Assosiasiyası arasında əməkdaşlıq haqqında Memorandum imzalanıb.
"Atabank” əmanətçiləri üçün hər hansı qorxu yoxdur - Sədr“Azərbaycan Mərkəzi Bankı (AMB) Atabank ASC-də yaranmış vəziyyətə dair təkliflər hazırlayıb və bu gün Maliyyə Sabitliyi Şurasına təqdim edəcək. Bankla bağlı atılacaq addımlar ciddi olduğu üçün Şurada müzakirə ediləcək”.

Report xəbər verir ki, bunu AMB-nin sədri Elman Rüstəmov keçirdiyi mətbuat konfrasında deyib.

“Görüləcək tədbirlərin “Atabank”ın əmanətçiləri üçün hər hansı qorxusu yoxdur. Bu bankda qorunmayan əmanətlər də var. Biz bank rəhbərliyinə dedik ki, hər bir müştəriyə bildiriş göndərilsin və onlar gəlib əmanətlərini sığortalasınlar”, - o qeyd edib.
Sığortalanmayan evlərə görə cərimə olmayacaq - ŞAD XƏBƏR
İcbari Sığorta Bürosunun icraçı direktoru Rəşad Əhmədov daşınmaz əmlakın icbari sığortası ilə bağlı suallara aydınlıq gətirib.

Avrasiya.net xəbər verir ki, "İTV xəbər-Yekun"da məsələyə münasibət bildirən R.Əhmədov bildirib ki, dövlət qeydiyyatında olan evlərin siyahısının Dövlət Əmlak Komitəsindən İcbari Sığorta Bürosuna ötürülməsi üçün zəruri qanunvericilik aktı yoxdur:

“Qanunvericilik əmlak məsələləri üzrə komitənin bizə məlumatı ötürməsini nəzərdə tutmayıb. Bu səbəbə görə də biz hələ ki, inteqrasiyanı həyata keçirə bilməmişik. Qanunvericiliyə müvafiq dəyişiklik edildikdən sonra inteqrasiyanın həyata keçirilməsi mümkün olacaq. Sığorta şəhadətnamələri elektron olacaq və elektron sistemlərdə hansı ünvanda sığortanın olub-olmaması müəyyən ediləcək”.

Məsələyə münasibət bildirən iqitisadçı Samir Əliyev Modern.az-a deyib ki, Rəşad Əhmədovun bu açıqlaması ilə icbari sığorta məsələsinə xeyli aydınlıq gətirilib:

“İcbari Sığorta Bürosunun (İSB) rəhbərinin açıqlaması ajiotaja bir müddət nöqtə qoydu. Söhbət ondan gedir ki, dövlət qeydiyyatında olan (kupçalı) evlərin siyahısının İSB-nin Dövlət Əmlak Komitəsindən (DƏK) alması üçün zəruri qanunvericilk aktı yoxdur. Yəni, bu qayda olmayınca, DƏK qeydiyyatlı evərin siyahısını İSB-yə ötürə bilməz. Bu məlumat ötürülmədiyi üçün kimin evinin sığortalı, kiminkinin isə sığortasız olduğunu müəyyənləşdirmək mümkün olmayacaq və deməli, cərimə də olmayacaq. Ona görə də Nazirlər Kabinetinin müvafiq qərarı olmadan kiminsə cərimələnməsi real deyil. Əslində ajiotaja səbəb Nazirlər Kabinetinin 21 may 2019-cu il tarixli 354s nömrəli Sərəncamı ilə tədiq edilmiş “Sığorta sektorunun inkişaf etdirilməsi üçün görülməli işlərlə bağlı Tədbirlər Planı” olub. Sığorta şirkətləri də vəziyyətdən istifadə ediblər”.

S.Əliyev qeyd edib ki, əmlakın sığortasının icbariliyi aradan qaldırılmalı, könüllü mexanizmə keçilməlidir.



“Əgər dövlət icbarilikdə qərarlıdırsa, hansı ki bunun qəti əleyhinəyəm, bu halda heç olmazsa, 3 ili öz büdcəsi hesabına ödəməlidir. Bu il isə icbari sığorta tətili olmalıdır, yəni cərimə məsələsi gələn ildən başlamalıdır”, - deyə iqtisadçı bildirib.
Elman Rüstəmov manatın 2020-ci il məzənnəsi haqda danışıb
2020-ci ildə manatın məzənnəsi öz dinamikasını qoruyacaq.

Virtualaz.org bildirir ki, bunu Mərkəzi Bankın sədri Elman Rüstəmov Azərbaycan Sahibkarlar (İşəgötürənlər) Təşkilatları Milli Konfederasiyasının nümayəndələri, sahibkarlar və bank rəhbərləri ilə görüşündə deyib. Onun sözlərinə görə, manatın məzənnəsinin dinamikası bu il də aşağı inflyasiyanın vacib şərtlərindən biri olacaq.

E.Rüstəmov, həmçinin qeyd edib ki, hazırda Azərbaycan Mərkəzi Bankının valyuta ehtiyatları 51 milyard dolları keçib: "Bu göstərici ölkənin xarici borcundan 5 dəfə çoxdur və ümumi daxili məhsul səviyyəsindədir".
Şuranın əməkdaşı sosial sığorta haqqı ödənişi barədə şərh verdi 01 yanvar 2020-ci il ildən sahibkarlıq fəaliyyəti üzrə məcburi dövlət sosial sığorta haqqı ödənişində ölkə üzrə vahid qayda tətbiq edilmişdir.

Bu barədə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Katibliyinin məsləhətçisi Toğrul Turabov öz facebook səhifəsində açıqlama verib.

Toğrul Turabov yazıb:

“"Sosial Sığorta haqqında" Qanunda dəyişiklik edilməsi barədə Azərbaycan Respublikasının Qanunun 14.5.1. bəndində sahibkarlıq fəaliyyəti üzrə - minimum aylıq ¬əməkhaqqının tikinti və ticarət sahələrində 50 faizi, digər sahələrdə 25 faizi miqdarında hesablanıb, ödənilməsi qeyd edilmişdir.Ticarət və tikinti sahəsi üzrə 125 manat (250 manat x 50 faiz), digər sahələrdə sahibkarlıq fəaliyyəti ilə məşğul olan fərdi sahibkarlar isə 62,50 manat (250 manat x 25 faiz) məcburi dövlət sosial sığorta haqqı ödəməlidir. Məsələn: Hər hansı bir QHT-ə layihə çərçivəsində ekspert, hüquqşünas, təlimçi, piar, sorğuçu, psixoloq və s. xidmətlərdən biri üzrə xidmət göstərən fiziki şəxs (VÖEN-i olan) xidmət göstərdiyi aylar üzrə 62.50 manat məcburi sosial siğorta haqqı ödənişi etməlidir”.

Sosial şəbəkə istifadəçisinin əgər xidmət göstərilən aylar üzrə gəlir cəmi 50 manat olarsa sualına Şura Katibliyinin məsləhətçisi Toğrul Turabov cavab olaraq yazıb:
“Qeyd etdiyiniz vəziyyət reallıqdan kənardır. Çünki bazar iqtisadiyyatı dövründə sahibkarın əsas məqsədi çoxlu qazanc əldə etməkdir. Xidmət göstərən fiziki şəxslər müxtəlif hüquqi və fiziki şəxslərə xidmət göstərə bilər və bu xidmətlərdən əldə edilmiş gəlirin məbləğindən asılı olmayaraq 62.50 manat məcburi sosial siğorta haqqı ödəməlidir”.
Neftin qiyməti 150 dolları keçə bilərXəbər verdiyimiz kimi, İran Silahlı Qüvvələrinin elit bölməsi olan İslam İnqilabı Keşikçiləri Korpusunun (“Sepah”) “Qüds” qanadının komandiri general Qasım Süleymaninin öldürülməsindən sonra ABŞ-İran arasında baş verə biləcək müharibə ilə bağlı narahatlıqlar fonunda bu həftə neft qiymətləri yeddi ayda ilk dəfə 70 dolları keçib.

“İndependent” xəbər verir ki, iki ölkə arasındakı gərginliyin müharibəyə çevrilməsi halında neftin qiyməti 150 dolları keçəcək.

Nəşr iddia edir ki, neftin qiymətinin qalxması dünya iqtisadiyyatına zəncirvari təsir göstərəcək ki, bu da istehlakçılar üçün geniş çeşiddə malların qiymətinin qalxmasına səbəb olacaq.

Beynəlxalq ekspertlərə görə, Tehranın dünya neft daşımalarının beşdə birinin həyata keçirildiyi Hörmüz boğazını bağlaması, regiondakı bir sıra vacib qurğular və nəqliyyat xətlərinin hədəfə çevrilməsi dünyanın neft tədarükünə çox ciddi təsir göstərəcək.(“Report”)
“Bank Standard”da bir müştərinin 44 milyon dolları batıb
2016-ci ilin sonunda lisenziyası dayandırılaraq ləğv edilən «Bank Standard»da bəzi şəxslərin böyük məbləğdə əmanəti batıb.

Bank dairələrindən Fed.az-a veridən məlumata görə, bəzi əmanətçilərin batan əmanətlərinin həcmi 10 milyon dollarla ölçülür.

Xatırladaq ki, «Bank Standard»ın lisenziyası 2016-cı ilin 30 sentyabr tarixində Maliyyə Bazarlarına Nəzarət Palatasının qərarı ilə ləğv edilmişdi. Həmin vaxt bildirilirdi ki, bankdakı əmanətlərin həcmi 520 milyon manat təşkil edir və onlardan 460 milyon manat həcmində əmanət sığortalanıb. Bankda əmanəti olanların sayı isə 43 min nəfər idi.

Ötən dövr ərzində bankda qorunan əmanətlər qaytarılıb, qaytarılmayan əmanətlərin isə bankın aktivləri satılaraq qaytarılması nəzərdə tutulur.

Bankın Kreditorlar Şurasından Fed.az-a veriən məlumata görə, hazırda «Bank Standard»ın əmanətçilərinin bankdan 147 milyon manat alacaqları var. Bir qədər əvvəl Azərbaycan Əmanətlərin Sığortalanması Fondu (ADIF) ləğvedicisi olduğu banklarda, o cümlədən «Bank Standard»da 10 min ABŞ dollarına (17 min manata) qədər qorunmayan əmanəti olan əmanətçilərin əmanətlərini qaytarmaq barədə qərar qəbul edib. Nəticədə «Bank Standard»da 10 min dollara (17 min manat) qədər qorunmayan əmanəti olan 16 500 nəfərə konpensasiya verilib. Bu addım nəticəsində vətəndaşlara ümumilikdə 6 mln 550 min manat qaytarılıb.

Fed.az-ın əldə etdiyi məlumata görə, hazırda bankda batmış vəsaitlərin yarıdan çoxu iri məbləğli əmanətlərin payına düşür. Belə ki, bir əmanətçinin «Bank Standard»da 44 milyon dolları (74,8 milyon manat), digərinin isə 13 milyon dollar (22.1 milyon manat) əmanəti qalıb.

Hazırda həmin şəxslər də əmanətlərinin ya tam, ya da qismən qaytarılması üçün səylərini davam etdirirlər. Qeyd edək ki, «Bank Standard»da fiziki şəxslərlə yanaşı, hüquqi şəxslərin də böyük məbləğdə vəsaitləri itirilib.