Çempionlar Liqasında 1/4 final mərhələsi başlayırBu gün UEFA Çempionlar Liqasında 1/4 final mərhələsinə start veriləcək.

İlk oyun günündə iki qarşılaşma keçiriləcək. Hər iki görüş Bakı vaxtı ilə saat 23:00-da başlayacaq.

İspaniyanın "Atletiko" (Madrid) klubu İngiltərədə "Mançester Siti"nin qonağı olacaq. Matçı rumıniyalı İştvan Kovaç idarə edəcək.

Meydan sahiblərinin heyətində Kayl Uoker cəzalı, Ruben Diaş cəzalı olduğu üçün meydana çıxmayacaqlar. Qonaqlardan isə Xose Mariya Ximenes zədə, Yannik Karrasko cəza səbəbindən oyunu buraxacaqlar.

Gecənin digər matçında Portuqaliya "Benfika"sı İngiltərə "Liverpul"unu qəbul edəcək. Qarşılaşmanın baş hakimi ispaniyalı Xesus Hil Mansano olacaq.

Oyun öncəsi komandaların heyətində ciddi itkilər yoxdur. Sadəcə, Mersisyad təmsilçisində Körtis Cons və Nabi Keytanın oynayıb-oynamayacaqları sual altındadır.

Çempionlar Liqası, 1/4 final

İlk oyunlar

5 aprel

23:00. "Mançester Siti" (İngiltərə) - "Atletiko" Madrid (İspaniya)

Baş hakim: İştvan Kovaç (Rumıniya)

23:00. "Benfika" (Portuqaliya) - "Liverpul" (İngiltərə)

Baş hakim: Xesus Hil Mansano (İspaniya)

Qeyd edək ki, bu mərhələnin digər iki ilk oyunu aprelin 6-da gerçəkləşəcək.
Azərbaycan və Ermənistan güləşçiləri arasında insident baş veribMacarıstanın paytaxtı Budapeştdə keçirilən Avropa çempionatında Azərbaycanın yunan-Roma güləşçisi Taleh Məmmədovla Ermənistan təmsilçisi Hraçya Poqosyan arasında insident baş verib.

"Report"un məlumatına görə, məğlubiyyəti həmz edə bilməyən erməni idmançı Məmmədovu sifətinə zərbə endirərək onu itələyib.

Azərbaycan güləşçisi rəqibinin üzərinə yerisə də, görüşü idarə edən hakim insidentin böyüməsinə imkan verməyib. Qələbəni çılğın şəkildə qeyd edən Məmmədov Poqosyan və məşqçinin qarşısında salto vurub. İdmançı bununla rəqibin təxribatına cavab verib.

Qeyd edək ki, Hraçya Poqosyana 3:1 hesabı ilə qalib gələn Taleh Məmmədov finala vəsiqə qazanıb. O, qızıl medal uğrunda qarşılaşmada gürcüstanlı Leri Abduladze ilə görüşəcək.
Bu gün Qətərin paytaxtı Dohada FIFA-nın 72-ci Konqresi keçiriləcək.

"Report"un məlumatına görə, iclasın gündəliyinə 12 məsələ daxil edilib. Onların böyük hissəsi protokol xarakteri daşıyır. Ən maraqlı bənd "Təşkilat üzvlüyünün dayandırılması və ya kənarlaşdırılma"dır.

Fevralın sonlarında FIFA və UEFA Rusiya klubları ilə yığmalarını Ukraynaya hərbi müdaxilə səbəbindən beynəlxalq yarışlardan müvəqqəti uzaqlaşdırıb. Rusiya Futbol İttifaqı (RFS) qərardan İdman Arbitraj Məhkəməsinə (CAS) apellyasiya verib. Məsələyə aprel-mayda baxılacağı gözlənilir.

Bugünkü FIFA Konqresində RFS-in ali futbol qurumundakı gələcək taleyinə aydınlıq gələcəyi də güman olunur. Lakin gündəlikdəki müvafiq bənd Zimbabve və Keniya milli assosiasiyalarına şamil edilə bilər. Onların üzvlüyü fəaliyyətlərinə kənar müdaxilələrlə əlaqədar iki ay əvvəl dayandırılıb.

Bununla yanaşı, Konqresdə FIFA-nın rəsmi dilləri sırasına rus dilinin də daxil edilməsinin mümkünlüyü bildirilir. Hazırda təşkilatın sənədləşmə və ünsiyyətlərində ingilis, ispan, fransız və alman dillərindən istifadə olunur. FIFA rəhbərliyinin bu siyahıya rus, portuqal və ərəb dillərini də əlavə edəcəyi gözlənilir.

Qeyd edək ki, FIFA Konqresində AFFA rəhbərliyi də təmsil olunacaq.
Ermənistan millisinin baş məşqçisi tarixi məğlubiyyətə görə üzr istəyibFutbol üzrə Ermənistan millisi yoldaşlıq oyununda böyük hesabla uduzub.

"Report"un məlumatına görə, səfərdə Norveç yığması ilə qarşılaşan Xoakin Kaparrosun baş məşqçi olduğu kollektiv qapısından 9 cavabsız top buraxıb.

Ermənilər 17-ci dəqiqədə azlıqda qalıblar. Arman Ohanesyan qırmızı vərəqə alaraq meydandan qovulub. Norveçin heyətində qolları Coşua Kinq (3), Erlinq Holann (2), Aleksandr Sörlot (2), Kristian Torstvedt və Mats Deli vurublar.

Bu, Ermənistan seçməsinin tarixində ən ağır məğlubiyyətdir. Kaparros qarşılaşmadan sonra keçirilən mətbuat konfransında nəticəyə görə üzr istəyib: "Hesab hər şeyi deyir. Rəqib bizdən güclü idi. Məğlubiyyətdə futbolçumuzun meydandan qovulmasının da rolu var idi. Fikrimcə, bu, sərt qərar idi. O andan etibarən komandamız sanki meydanda yox idi. Məsul şəxs kimi azarkeşlərimizdən üzr istəməliyəm".
Avropada dövlət himnimizin yeddi dəfə səsləndirilməsi böyük qürurdurUlu öndər Heydər Əliyevin Azərbaycanın idman siyasətinin həyata keçirilməsi sahəsindəki xidmətləri əvəzsizdir. Ulu Öndər idmançıların cəmiyyət həyatındakı rolunun artması, özlərinə layiqli yer tutmaları üçün əlindən gələni əsirgəməmişdir. Dövlətin idman siyasətinin həyata keçirilməsi üçün 1994-cü ildə Heydər Əliyevin fərmanı ilə Gənclər və İdman Nazirliyi yaradıldı. Bu mənada, 1994-cü ili respublikanın idman həyatında dönüş ili adlandırmaq olar. 1995-ci il martın 5-də Heydər Əliyev yeni bir fərman imzaladı. Həmin fərmana əsasən, Azərbaycan Respublikası əhalisi arasında sağlam həyat tərzinin təbliğ edilməsi və bədən tərbiyəsinin maddi-texniki bazasının inkişaf etdirilməsi, bu sahədə ümumxalq yardımının təşkil olunması məqsədilə gənclərin idmana marağını artırmaq və Azərbaycan idmanının beynəlxalq miqyasa çıxmasına real zəmin yaratmaq üçün Azərbaycan Prezidenti yanında fond yaradıldı.

Ümummilli lider Heydər Əliyev Azərbaycanda idmanın kütləviliyinə nail olmaq, bədən tərbiyəsi və idmanı geniş coğrafi məkanda inkişaf və təbliğ etdirmək, yüksək nailiyyətlər qazanmaq və dünya şöhrətli idmançılar hazırlamaq üçün bu sahədə birbaşa məşğul olan qurumlar qarşısında konkret vəzifələr qoymuşdu. İdmanın inkişafı üçün həyata keçirilməli əsas tədbirlər sırasına mövcud idman bazalarının, stadionların, meydança və zalların qorunması, bərpası və təyinatı üzrə istifadəsinin təmin edilməsi, yeni idman bazalarının, meydançalarının, stadion və zalların tikilməsi, zəruri avadanlıqlarla təchizatı, idman klublarının açılması, mütəxəssislərinin yetişdirilməsi, ölkə birinciliklərinin və digər yarışların keçirilməsi, idmançılarımızın beynəlxalq yarışlarda iştirakının təmin edilməsi, yüksək nəticələri olan idmançılara diqqət və qayğı göstərilməsi, Azərbaycanda beynəlxalq yarışların keçirilməsi, uşaq və yeniyetmələrin daha geniş miqyasda idmana cəlb olunması daxil edilmişdi. Çox qısa zamanda həyata keçirilən mühüm tədbirlərin nəticəsi olaraq idmançılarımız tədricən möhtəşəm qələbələrə imza atdılar, üçrəngli bayrağımız beynəlxalq arenalarda dalğalanmağa başladı.

Heydər Əliyev idmanın, bədən tərbiyəsinin inkişafını hər bir sivilizasiyalı xalqın ali ideallarının təcəssümü olmaqla yanaşı, həm də dövlətin beynəlxalq nüfuz və mövqelərinin təntənəsi kimi qiymətləndirirdi. Ulu Öndər idmanın dövlətimizin dünyada tanınmasında, imicinin möhkəmlənməsində müstəsna rolunu önə çəkərək deyirdi: "İdman, bədən tərbiyəsi xalqın sağlamlığı ilə bağlı olan mühüm sosial sahədir. Azərbaycan bayrağı dünyada, demək olar ki, iki dəfə qaldırılır. Bu, bir Azərbaycanın dövlət başçısı hər hansı ölkəyə gələrkən və bir də idmançılarımız beynəlxalq yarışlarda çempion adını qazanarkən baş verir. Azərbaycan himni səslənir, dövlət bayrağı qaldırılır".

Hər bir dövlət öz qüdrətinin nümayişi ilə dünya reytinqində özünə yer qazanır. Müharibələr, hərbi paradlar, yarışlar, beynəlxalq miqyasda keçirilən sammitlər, görüşlər və müxtəlif dövlətlər arasında bütün növ rəqabətlərin əsasında məhz dövlətin öz qüdrətini açıq ifadəetmə arzusu dayanmaqdadır. İdman isə özünü ifadəetmənin ən rahat və sadə üsuludur. Əgər fikir versəniz görəcəksiniz ki, ancaq güclü dövlətlər idman yarışlarını təşkil edir və qalib olurlar. İdmançılara şərait yaradılmalı və onlardan nəticəni gözləməliyik. Bunu həyata keçirə bildiyimiz təqdirdə böyük qələbələr əldə edəcəyik. Azərbaycan idman dövlətidir və həm böyüklər, həm gənclər arasında keçirilmiş beynəlxalq yarışlarda bizim idmançılarımız öz gücünü, dövlətimizin qüdrətini nümayiş etdirirlər. Bu gün idmançılarımız üçün hər bir şərait yaradılmışdır. İstər sosial problemlərinin həlli baxımından, istərsə də peşəkar fəaliyyətləri ilə bağlı dövlət öz məsuliyyətini tam yerinə yetirməkdədir. İdmançılarımızın qələbələr qazanması heç də təsadüfi deyildir. Onlara göstərilən dövlət qayğısının dünyada çox az nümunəsi vardır. Biz bu qayğının ən bariz nümunələrindən birinə Prezident İlham Əliyevin Bolqarıstanda keçirilmiş güləş üzrə 7-ci Avropa çempionatının iştirakçıları ilə cari ilin 17 mart tarixli görüşü ilə bir daha şahidi olduq. İdman Azərbaycanın dövlət siyasətidir və idman eyni zamanda ölkəmizin qüdrətini əks etdirir.

Bolqarıstanda keçirilmiş Avropa çempionatında gənc güləşçilərimiz ölkəmizi ləyaqətlə təmsil edərək böyük uğura imza atdılar. Azərbaycan idmançıları yarışda 16 medal qazandı, onlardan 7-si qızıl medaldır. Komanda hesabında ölkəmizin komandası birinci yerə layiq görülmüşdür.

Azərbaycanda idman uğurla inkişaf edir. Azərbaycan idman dövlətidir və həm böyüklər, həm gənclər arasında keçirilmiş beynəlxalq yarışlarda bizim idmançılarımız öz gücünü, dövlətimizin qüdrətini nümayiş etdirirlər.

Azərbaycan Kikboksinq Federasiyasının Hakimlər Kollegiyasının sədri, beynəlxalq dərəcəli hakim Aydın Ağabəyov
Bu günün idmançıları beynəlxalq yarışlarda artıq qalib gəlmiş müzəffər xalqı təmsil edirFərmayılov Anar Hümbət oğlu
ADPU-nun İncəsənət və fiziki tərbiyyə fakültəsinin
dekan müavini, sosiologiya üzrə fəlsəfə doktoru


Müasir müstəqil Azərbaycan dövlətinin qurucusu, Ulu öndər Heydər Əliyevin düşünülmüş və məqsədyönlü siyasəti, son 18 ildən artıq dövrdə bu xəttin Prezident İlham Əliyev tərəfindən uğurla davam etdirilməsi ölkəmizin inkişaf modelini dünyaya nümunə göstərdi. Ölkəmizin bütün sahələrinə dövlət dəstəyi əhatəli şəkildə hiss olunur, o cümlədən, gənclər siyasəti və idman sahəsində.Azərbaycan idman dövlətidir və həm böyüklər, həm gənclər arasında keçirilmiş beynəlxalq yarışlarda bizim idmançılarımız öz gücünü, dövlətimizin qüdrətini nümayiş etdirirlər.

Beynəlxalq idman qurumları Azərbaycana çox böyük ehtiramla yanaşırlar. Avropa vəİslam Həmrəyliyi Oyunlarının, eləcə də digər nüfuzlu beynəlxalq yarışların ölkəmizdə keçirilməsi bunun təsdiqidir. Göstərilən etimadı doğruldan respublikamız adları çəkilən yarışları yüksək və nümunə olacaq səviyyədə təşkil edərək idmana, sağlam həyata bağlı bir ölkə olduğunu ortaya qoydu.

Bir neçə gün öncə Bolqarıstanda gerçəkləşən Avropa çempionatında gənc güləşçilərimizin ölkəmizi layiqli şəkildə təmsil edərək böyük uğur qazanmaları bunun təsdiqidir. Qeyd olunan tədbirdə gənc güləşçilərimiz ölkəmizi ləyaqətlə təmsil edərək böyük uğura imza atdılar. Azərbaycan idmançıları yarışda 16 medal qazandı, onlardan 7-si qızıl medaldır. Yarışda iştirak etmiş 34 Avropa ölkəsi arasında Azərbaycan birinci yerə layiq görüldü. Bütün Azərbaycan vətəndaşları bu qələbəni böyük qürur hissi ilə qarşıladılar.

Martın 17-də Dövlət başçısı İlham Əliyev Bolqarıstanda keçirilmiş güləş üzrə 7-ci Avropa çempionatının iştirakçılarını qəbul edərkən məzmunlu nitqi xalqımız və respublikamızın idman ictimaiyyəti tərəfindən maraqla qarşılandı. Azərbaycan idmanında güləşin xüsusi yerə və önəmə malik oldugunu qeyd edən dövlət başçısı ölkəmizin daim bu sahədə ön sıralarda olduğunu qeyd etdi: “Güləş Azərbaycanda idmanın bütün növləri arasında xüsusi yerə malikdir. Güləş bizim milli idman növümüzdür. Bütün dövrlərdə güclü güləşçilərimiz olubdur, həm sovet dövründə və xüsusilə müstəqillik dövründə. Bizim güləşçilərimiz Azərbaycanı müxtəlif yarışlarda ləyaqətlə təmsil ediblər. Bizim bir çox Olimpiya, dünya, Avropa çempionlarımız var. Əlbəttə, güləşin ənənələri Azərbaycanda kifayət qədər güclüdür və şadam ki, indi gənc nəsil bu ənənələri davam etdirir”.
Şübhəsiz ki, güləş ənənələrinə sadiq, onu layiqincə, təcrübəli şəkildə nəsildən- nəslə ötürə bilən gənclərimiz Azərbaycanı bundan sonra da beynəlxalq arenada aparıcı güləş ölkələrindən birinə çevirəcək və nüfuzunu daha da artıracaq.

Prezident İlham Əliyevin vurğuladığı kimi, bu sahə Azərbaycanın dövlət siyasətində prioritet istiqamətlərdən biridir. Ona görə də ölkəmizdə idmanın kütləviliyini təmin etmək, bölgələrdə inkişafını diqqətdə saxlamaq qarşıya əsas vəzifə kimi qoyulub. Xüsusilə, işgaldan azad edilmiş torpaqlarımızda idman komplekslərinin yaradılması, məskunlaşmadan sonra isə gənclərin bu sahəyə dərindən bağlanmaları mühüm önəm daşıyır. Hazırda bu istiqamətdə layihələr üzərində iş aparılır.

Bu günün idmançıları beynəlxalq yarışlarda artıq qalib gəlmiş müzəffər xalqı təmsil edir. Bu barədə danışan ölkə başçımız çıxışında bildirmişdir: "Beynəlxalq yarışlarda iştirak edən bütün idmançıların ürəyində bu duyğular mütləq olmalıdır. Təkcə Azərbaycan vətəndaşları yox, bütün dünya azərbaycanlıları bu gün özlərini əmin hiss edirlər, yaşadıqları ölkələrdə Azərbaycan həqiqətlərini çatdıraraq İkinci Qarabağ müharibəsi haqqında qürur hissi ilə danışırlar".
Beləliklə, hazırda qalib ölkənin vətəndaşları olaraq ölkəmizin qalib idmançıları ilə qələbənin xoşbəxtliyini yaşayırıq. Prezident İlham Əliyevin rəhbərliyi ilə bütün sahələrdə davamlı olaraq zəfər bizimlədir.
Azərbaycan yığması Maltaya bu dəfə qalib gəlib17 yaşadək futbolçulardan ibarət Azərbaycan millisi Maltadakı təlim-məşq toplanışında yerli yaşıdları ilə yenidən qarşılaşıb.

Avrasiya.net-in məlumatına görə, yoldaşlıq görüşü Elxan Abdullayevin baş məşqçi olduğu yığmanın 2:0 hesablı qələbəsi ilə yekunlaşıb.

U-17-nin qollarını Əşrəf Ələkbərli 24-cü, Nihad Əhmədzadə isə 45+1-ci dəqiqədə vurub.

Qeyd edək ki, bu komandalar arasında martın 25-də keçirilmiş ilk qarşılaşma 2:2 hesabı ilə bitib.
Bu gün Azərbaycan yığması Malta ilə qarşılaşacaqBu gün futbol üzrə Azərbaycan millisi yoldaşlıq oyunu keçirəcək.

Canni De Byazinin baş məşqçi olduğu komanda səfərdə Malta yığması ilə üz-üzə gələcək.

Maltanın Ta Qali şəhərindəki Milli Stadionda oynanılacaq qarşılaşma Bakı vaxtı ilə saat 22:00-da başlayacaq.

Bu, Azərbaycan yığmasının 2022-ci ildə ilk matçı olacaq. Meydan sahiblərindən Keyn Attard, Azərbaycan millisində isə Namik Ələskərov zədə səbəbindən oynamayacaq.

Qarşılaşma komandalar arasında 9-cu duel olacaq. Ümumilikdə 2 qələbə və 3 heç-heçəsi olan yığma 3 dəfə Maltaya məğlub olub. Topların nisbətində də rəqibin üstünlüyü var - 13:9.

25 mart

Yoldaşlıq oyunu

22:00. Malta - Azərbaycan.
Baş hakim: Alexandro Ernandes (İspaniya)
Malta. Ta Qali. Milli Stadion.

Qeyd edək ki, Azərbaycan yığması martın 29-da eyni arenada Latviya ilə qarşılaşacaq.

UEFA Rusiyanın Avropa çempionatları ilə bağlı müraciətini rədd etmək istəyirUEFA Rusiya Futbol İttifaqının (RFS) 2028 və ya 2032-ci ildəki Avropa çempionatına ev sahibliyi ilə bağlı müraciətini rədd etməyə çalışır.

"Report" "The Telegraph" nəşrinə istinadən xəbər verir ki, qitə futbol qurumunun rəhbərliyi məsələ ilə bağlı təcili toplantı keçirmək niyyətindədir.

Ərizənin rədd edilməsi ilə bağlı addımlar artıq işlənmə mərhələsindədir.

Qeyd edək ki, daha əvvəl Türkiyə, Yunanıstan, Bolqarıstan, Serbiya, Rumıniya, Böyük Britaniya və İrlandiya AVRO-2028-i keçirmək üçün UEFA-ya müraciət ünvanlayıb. Qərar 2023-cü ilin sentyabrında açıqlanacaq.
Azərbaycanlı idmançının olimpiya medalı əlindən alındıDopinq-test üçün verdiyi sidik analizini dəyişdirməkdə şübhəli bilinən azərbaycanlı ağırlıqqaldıran Nicat Rəhimov sərt cəzalandırılıb.

Avrasiya.net Axar.az-a istinadən xəbər verir ki, 29 yaşlı idmançı 8 il müddətinə diskvalifikasiya olunub. O, həmçinin olimpiya medalından məhrum edilib.

Beynəlxalq Dopinq Test-Agentliyi (ITA) 2021-ci ilin yanvarında Rəhimova qarşı antidopinq qaydalarının pozuntusu ilə bağlı ittiham irəli sürüb və idmançını yarışdan kənarlaşdırıb.

Qərardan narazı qalan ağırlıqqaldıran CAS-a müraciət edib. O, araşdırma müddətində yarışlardan müvəqqəti uzaqlaşdırılmışdı.

Təcrübəli idmançı 2014-cü ildə Azərbaycan yığmasını tərk edərək, Qazaxıstan vətəndaşlığına keçib. O, növbəti il dünya çempionu, 2016-cı ildə isə Rio-de-Janeyro Yay Olimpiya Oyunlarının qalibi olub.

Qeyd edək ki, Nicat Rəhimov Azərbaycan millisində ikən 2013-cü ildə orqanizmində steroidlər tapıldığı üçün 2 il müddətinə diskvalifikasiyaya məruz qalıb.