Sabiq polis Bakıda qəza törətdi, əsgər öldü
Bakının Sabunçu rayonunda yol-nəqliyyat hadisəsi baş verib.
Avrasiya.net Oxu.az-a istinadən xəbər verir ki, hadisə zamanı sabiq polis serjantı Vaqif Novruzov avtomobillə idarəetməni itirərək yolun kənarında dayanmış Daxili Qoşunların əsgəri Rövşən Alxasovu vurub.
Daxili İşlər Nazirliyinin Mətbuat Xidmətinin əməkdaşı, polis baş leytenantı Zeyni Hüseynov bildirib ki, hadisə noyabrın 6-da Sabunçu rayonu ərazisində baş verib:
“Sabiq polis serjantı Vaqif Novruzov idarə etdiyi “Toyota” markalı avtomobillə idarəetməni itirərək yolun kənarında dayanmış DQ-nin əsgəri Rövşən Alxasovu vurub. O, dərhal xəstəxanaya yerləşdirilib və həkimlərin səyinə baxmayaraq orada vəfat edib”.
DİN rəsmisi həmçinin sürücülərə müraciət edib:
“Hər birimiz - istər sürücü, istər piyada, istərsə də sərnişin olaraq avtomobil yollarında məsuliyyətimizi dərk etməliyik. Heç kimə sirr deyil ki, günümüzdə insan itkilərinin baş verməsinin ən böyük səbəblərindən biri də məhz yol qəzalarıdır. Sürücülər sükan arxasında ehtiyatlı olmalıdırlar”.
