Fransada koronadan ölən müsəlmanlar dəfn edilmir

Fransada yeni tip koronavirusdan ölən müsəlmanların dəfn edilməsi məsələsində ciddi böhran yaşanır.

Axar.az xəbər verir ki, bu barədə paytaxt Parisdəki müsəlman icmanın rəsmiləri bildiriblər.

Onların sözlərinə görə, Fransada koronavirusdan ölən müsəlmanların təxminən 80 faizi ölkələrinə göndərilir:

"Çünki bu ölkədə müsəlmanlar üçün nəzərdə tutulan qəbiristanlıqların sayı çox azdır. Bu problem illərdir davam edir, amma indi daha ciddi böhran müşahidə olunur".

İcma nümayəndələrindən biri qeyd edib ki, Fransa İslam Şurası yeni qəbiristanlıqların salınması üçün müraciət etsə də, hələlik müsbət cavab almayıb.