AzTV kadr dəyişikliyi ilə bağlı yayılan məlumatları təkzib edibBu gün bəzi saytlarda Azərbaycan Televiziyasında (AzTV) kadr dəyişikliyi ilə bağlı məlumatlar yayılıb.

İnformasiyalarda məsul şəxslərin adları çəkilir və onların AzTV-dəki işindən azad olunduğu və ya yerdəyişmələr edildiyi bildirilir.

QSC-nın Sosial media və ictimaiyyətlə əlaqələr şöbəsindən Avrasiya.net-ə bildirilib ki, bu məlumatların heç bir əsası yoxdur. Yazılarda adları çəkilən əməkdaşlarımızın hər biri öz işinin başındadır. Televiziyamızın kadr strukturunda da hər hansı dəyişiklik baş verməyib.

Bir daha bildiririk ki, hər hansı məlumatı dəqiqləşdirmədən, TV-nin mövqeyini öyrənmədən yalan və əsassız materialları ictimaiyyətə ötürmək “Kütləvi İnformasiya Vasitələri haqqında” Qanunla zidiyyət təşkil edir. Eyni zamanda, əsassız məlumatlar yaymaq məsuliyyətsizliklə yanaşı, oxuculara hörmət etməməkdir.
Koronadan sağalanların sayı yoluxmanı üstələdiAzərbaycanda koronavirus (COVİD-19) infeksiyasına 3845 yeni yoluxma faktı qeydə alınıb, 3876 nəfər müalicə olunaraq sağalıb.

Nazirlər Kabineti yanında Operativ Qərargahdan Avrasiya.net-ə verilən məlumata görə, analiz nümunələri müsbət çıxan 41 nəfər vəfat edib.

İndiyədək ölkədə ümumilikdə 428 736 nəfərin koronavirus infeksiyasına yoluxması faktı müəyyən edilib, onlardan 370 002 nəfər müalicə olunaraq sağalıb, 5 677 nəfər vəfat edib, aktiv xəstə sayı 53 057 nəfərdir.

Son sutka ərzində yeni yoluxma hallarının müəyyənləşdirilməsi ilə əlaqədar 19 102, ötən müddət ərzində isə ümumilikdə 4 481 039 test icra olunub.
Nazim İbrahimov ifadə verdi: Onu Rövşən Əkbərov öldürübBu gün Bakı Hərbi Məhkəməsində sabiq birlik komandiri, general-leytenant Rövşən Əkbərovun cinayət işi üzrə məhkəmə iclası davam etdirilib.

Avrasiya.net Report-a istinadən xəbər verir ki, məhkəmənin sədri Həbib Həsənovun sədrliyi ilə keçirilən prosesdə zərərçəkmiş Məzahir Şıxəliyevin hüquqi varisi, qardaşı Rafiq Şıxəliyev dindirilib.

O deyib ki, 2001-ci il iyulun 2-də ona zəng gəldiyini, qardaşının Kiyevdə döyüldüyünü və onun tanışı Elçin Əliyevin qətlə yetirildiyini öyrənib:

“Buna görə qardaşım Məzahir polis tərəfindən saxlanıldı və bir neçə gündən sonra sərbəst buraxıldı.

Hadisə günü atamla birlikdə Elçinin valideynlərinin evinə getdik. Elçinin qardaşı İdark bildirdi ki, qardaşını Rövşən Əkbərov öldürüb. Bu işdə hamı Elçin Əkbərovun adını hallandırırdı".

Daha sonra şahid qismində Diasporla İş üzrə Dövlət Komitəsinin sabiq sədri Nazim İbrahimov ifadə verib.

O, R.Əkbərovu general kimi tanıdığını, lakin münasibətlərinin olmadığını bildirib:

“Mərhum Elçin Əliyevi 1994-cü ildən tanımışam, həmin vaxtlar özüm də Kiyevdə sahibkarlıqla məşğul olmuşam. Elçin Əliyevlə münasibətim yaxşı olub, ailəvi dostluq etmişik. 1997-ci ildə Ukraynaya səfir vəzifəsinə təyin edildim. 2000-ci ilin avqustunda Milli Məclisə keçirilən seçkilərilə bağlı Bakıya qayıtdım və 1 iyun 2001-ci ilədək Kiyev şəhərinə getmədim. 2001-ci ilin iyulun 1-də Elçin Əliyevin Kiyevdə qətlə yetirildiyini eşitdim. Sonra Elçin Əliyevin ailəsi ilə danışdım. Onun nəşinin Azərbaycana gətirilməsini üzərimə götürdüm. Elçin Əliyevin biznes ortağı, səfir olan dövrdə tanıdığım Səməd Novruzovla birgə Ukraynaya getdik. Ekspert həkim Elçinin ürəyindən bıçaqlandığını söylədi. Milis idarəsində Elçinlə əlaqəsi olan şəxslər dindirilirdi.

Kiyevdə olduğum müddətdə Qüdrət Əhmədov mənimlə əlaqə saxlayıb, general Rövşən Əkbərovun görüşmək istədiyini söylədi, mən də razılaşdım. O, “Dnepr” otelin foyesinə gəldi. Həmin vaxt Rövşən Əkbərov tək deyildi, yanında Qüdrət Əhmədov da var idi. Orada Rövşən Əkbərova dedim ki, hamı bu qətlin sənin tərəfindən törədildiyini danışır. O, Məzahiri yumruqla, Elçini isə bıçaqla vurduğunu bildirdi. Baş verən hadisəni mənə Rövşən Əkbərov tam danışdı. Bizim yanımızda Qüdrət Əhmədov olub və o da bizim bu söhbətimizi eşidib. Bundan sonra Rövşən Əkbərovla heç vaxt rastlaşmamışıq, onunla heç bir görüşümüz olmayıb. Növbəti gün də Elçin Əliyevi Azərbaycana gətirdik”.

Daha sonra N.İbrahimov 2021-ci ilin yanvarında istintaqa verdiyi ifadəsini təsdiqləyib. O, 2003-cü ildə verdiyi ifadəsini xatırlamadığını bildirib.

R.Əkbərovun vəkilləri N. İbrahimovun 2003-cü ildə istintaqa verdiyi ifadəsinin elan olunmasını istəyiblər.

N.İbrahimov söyləyib ki, hamı E.Əliyevin qətlə yetirilməsində R.Əkbırovun günahı olduğunu danışıb.

Bu vaxt N.İbrahimovla R.Əkbərovun arasında mübahisə yaranıb. Mübahisə zamanı R.Əkbərov keçmiş komitə rəhbərini təhqir edib.

Növbəti proses sentyabrın 8-də davam edəcək.

Qeyd edək ki, rəsmi məlumata əsasən, Rövşən Əkbərovun 2001-ci il mayın 31-dən iyunun 1-nə keçən gecə Kiyev şəhəri, Deqtyaryov küçəsi 7 ünvanda yerləşən “Sikora” kafesində yeyib-içdikdən sonra, saat 04 radələrində həmin kafenin yaxınlığında Elçin Əliyev ilə aralarında yaranmış cüzi münaqişə səbəbindən xuliqanlıq niyyəti ilə sonuncunun ürək nahiyəsinə kəsici-deşici predmetlə xəsarət yetirərək Elçin Əliyevi qəsdən öldürməsinə əsaslı şübhələr müəyyən edilib.

Rövşən Əkbərova Cinayət Məcəlləsinin 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə ittiham elan edilərək, barəsində məhkəmənin qərarı ilə həbs qətimkan tədbiri seçilib. Onun barəsində olan cinayət işinin istintaqı başa çatdırılaraq baxılması üçün Bakı Hərbi Məhkəməsinə göndərilib.
Biz burdayıq!Milli qürurumuzun və mədəniyyətimizin paytaxtından reportaj

...Şuşaya gedirik. Yol boyu hər kəs özünə qapılıb, arabir sükutu Vahid Əzizin, Səyyad Aranın, İntiqam Qasımzadənin, Mövlud Süleymanlının, Vaqif Əlixanlının, ... “səsli xatirələri” pozur. Bizim mikroavtobusda, deyəsən hamıdan gənc mənəm və Şuşalı, Qarabağlı xatirələrim heç bir yazıya sığacaq qədər də deyil. Mən indi-indi xatirə “toplayıram”.

...Mənim bir çox həmyaşıdlarım kimi, Şuşaya, bütövlükdə Qarabağa olan sevgimi bu cənnət məkanın torpağı-daşı, dərəsi-dağı, çiçəyi-böcəyi ilə bölüşmək imkanım olmayıb. Ağlımız kəsəndən Qarabağ və İstiqalal mücadiləsinin dolanbaclarından keçmişik, hər il işğal günlərinin, məğlubiyyətin qürursuzluğundan doğan əzabla qol-boyun olmuşuq... İndi bütün bunları xatirələrimdə daşımaq istəməsəm də, geridə buraxdığımız zaman kəsiyinin unudulmamasının vacibliyini də yaxşı başa düşürəm. Nəinki Qarabağımızın işğal altında olduğu zaman kəsiyini, bütövlükdə torpaqlarımıza ermənilərlə birlikdə gələn vəhşiliyin, qaniçənliyin, amansızlığın, vandallığın, xəyanətin, riyakarlığın, şərəfsizliyin... bir anını belə unutmaq olmaz. Heç vaxt və heç bir şərt daxilində, əsla... Olmaz! Olmaz! Olmaz!

Min il bundan sonra da dünyaya göz açan hər bir azərbaycanlı bir zamanlar qucaq açdığımız bu vəhşi tayfanın başımıza gətirdiyi bəlaları yaddan çıxarmamalı, daim tətikdə olmalıdır!

... Şuşaya doğru irələyirik - adına qurbam olduğum Zəfər yolu ilə... Allahım, sənə şükürlər olsun! Yaşadığım qarışıq hissləri indi ifadə etməyə çətinlik çəkirəm. Bəlkə də zaman keçdikcə alt qatlarına vara bilmədiyim, yaxud varmağa cəsarət etmədiyim hissləri yenidən süzgəcdən keçirib sözə çevirəcəyəm, amma indi təəssüratlarımın ağırlığı altında əyilən yaddaşımı zorlamaq istəmirəm.

Vasifə de, səni bizim evə aparsın”

…Şuşaya çatar-çatmaz Şamil Süleymanlının telefon zəngi gəlir:

- Elçin, qurban sənə, Vasifə de, səni bizim evə aparsın...
“Bizim evə...” Bilirsiniz nə böyüklükdə və dərinlikdə sevgi var bu sözlərin içində? Batmaq olar. Şuşanın, Qarabağın, Azərbaycanın, Şuşalı, Qarabağlı, Azərbaycanlı olmağın da fərqi bundadır. Sevdiyin, doğma, məlhəm bildiyin adamı evinə dəvət etmək, hətta bu evin yalnız daşı-divarı qalsa da belə...
…Şamil müəllimin evinə gedəcəyəm. Bir ovuc torpaq götürüb ovcumda sıxacağam. Daşına, divarına sığal çəkəcəyəm...

Arzularım burada keçirəcəyim günlərə, saatlara sığacaq qədər kiçik deyil. 30 ilə yaxın bir zaman kəsiyində, gənc yaşlarımdan böyütmüşəm onları. Övladlarımla yaşıddı Şuşalı, Qarabağlı arzularım.

Hər addımda heyrətə gəlirəm – həm qısa müddət ərzində erməni vəhşiliyinin izlərinin silinməsi, torpağın, daşın, təbiətin “yaraları”nın sağalması istiqamətində görülən işlərə, həm də Şuşada olduğuma...
...İlahi, mən Şuşadayam? Söhbət qarşılaşdığım gözəlliklərdən, təkrarsız mənzərələrdən getmir. Şuşa dağdan, daşdan, çəməndən, bulaqdan, dərədən... daha çox ruhumuzun kəhər atlar kimi şahə qalxdığı, qürurumuzun dirçəldiyi yerdir. Şuşa milli qürurumuzun paytaxtıdır.

***

...Gecəni yuxusuz keçirmişəm. Çox güman ki, yol yoldaşlarımın hamısı mənim kimidir. Amma heç kimin üzündən yorğunluq oxunmur. Şuşada olmağın xoşbəxtliyi yuxusuzluğa da, yol yorğunluğuna da qalib gəlib.

...”Xarıbülbül” hotelinə varar-varmaz Sabir Rüstəmxanlının təşəbbüsü ilə, Nəriman Həsənzadə, Fazil Mustafa, Aqil Abbas və Rəfael Hüseynov ilə birlikdə Cıdır düzünə yola düşürük.
Cıdır düzünə ayaq basanda addımım havadaca donur. İrəlidəki sıldırım qayaları görər-görməz Şuşanın düşməndən geri alınmasında misli görünməmiş şücaət göstərən, ölümləriylə istidbada meydan oxuyan igidlərimizi və Tofiq Fikrətin “İstiqlal” şeirinin məşhur beytini xatırlayıram:

Keçdiyin yerləri torpaq deyərək keçmə, tanı
Düşün altındakı minlərcə kəfənsiz yatanı...”

...İşğaldan azad edilmiş torpaqlarımıza basdığımız hər addımda, şəhidlərimizi, bu torpaqlar uğrunda sağlamlığından keçən, özünü oda-alova atan igidlərimizi xatırlamalıyıq.
...Və Cıdır düzündə şəhid ruhlarından halallıq istəyirəm. Şuşada olmağı məndən daha çox haq edən insanlardan da həmçinin... Haqqınızı halal edin.
...Şuşada vaxtın tamamilə fərqli bir ölçüsü var. Bəzən ildırım sürətilə, bəzən yavaşıldılmış kinokadrlarda olduğu kimi keçir, bəzən isə, sadəcə donur. İndi bunun izahını verə bilmirəm. Təsəvvür edin, addım atırsan və yerindəcə donursan. Gözün uzaqlara dikilib qalır. Sanki fərqli bir zaman ölçüsünə düşmüsən. Və hansısa mistik bir qüvvə donmuş baxışlarını əlçatmaz zirvələrdən, sıldırım qayalıqlardan keçirib qürurla dalğalanan Azərbaycan bayrağına doğru aparır. Baxışlarım yenidən donur və sinəmə sıxılmış hisslərimi yağış damlaları kimi Şuşanın müqəddəs havasına boşaldıram:

Ey üç rəngli bayrağım,
Dilimdəki son nida.
Ucaldığın yerlərin
Tozuna canım fəda!

30 avqust... Sübhün şəfəqləri doğma nəfəs üçün darıxan ağacların yarpaqları arasından süzülərək ən əziz, ən doğma qonaq kimi pəncərəmdən içəri düşür. Gün ərzində yaşadıqlarım yuxumu ərşə çəkib. Bir neçə saatdan sonra başlayacaq Vaqif Poeziya Günlərinin həyacanını yaşayıram.

...Molla Pənah Vaqifin məqbərəsinə doğru yol alırıq.
Qısa bir zaman kəsiyində az qala yenidən inşa edilən məqbərənin əzəmətinə, gözəlliyinə heyran qalmamaq mümkün deyil. Səbirsizliklə uzun illərdən bəri səbrlə, təmkinlə Qarabağın azadlığı, İlahi Ədalətin bərqərar olması üçün mücadilə aparan, bu məqsədlə düşüncəsində saldığı Zəfərə aparan YOLun XƏRİTƏSİni addım-addım həyata keçirən müzəffər Ali Baş Komandan, Prezident İlham Əliyev və Birinci vitse-prezident Mehriban Əliyevanın yolunu gözləyirik. Birdən-birə hər tərəf canlanır, Qalib Sərkərdənin və onun fikir, əqidə, həyat yoldaşının addım səsləri alqış səslərinə qarışaraq uzaq zirvələrə doğru sıçrayır, “Biz burdayıq” deyir. Nəinki buralar, hətta səsimizin yetdiyi, düşüncəmizdəki Vətənin sərhədlərinin keçdiyi nə varsa - BİZƏ MƏXSUSDUR!

Prezident danışır. Məqbərənin önündə 40 il öncə durduğu yeri nişan verir. Atasının Şuşanı, Qarabağı Azərbaycandan qoparmaq istəyənlərə bu torpaqların azərbaycanlılara məxsus olduğunu hayqıran addımlarından söz açır. Molla Pənah Vaqifin təkcə Azərbaycan şairi deyil, eyni zamanda dövlət xadimi, dövlətçiliyimizin bir parçası olan Qarabağ xanlığında yüksək dövlət vəzifəsi tutan bir şəxs olduğunu xatırladır və uzun illərdən bəri yaddaşlarda kök salan “Nə üçün məhz Vaqif” sualının cavabını verir. Vaqifin məqbərəsi Qarabağda mədəni-ədəbi varlığımızın ifadəsindən daha çox, bu torpaqların tarix boyu azərbaycanlılara məxsus olduğunu vurğulamaq üçün ucaldılıb. Bu 40 il öncə bu gününüzü görə bilən dühanın bizə və dünyaya verdiyi çox önəmli bir mesajdır.

Qarabağın, o cümlədən Şuşanın azad olunmasında, həmçinin düşmən tapdağından xilas edilmiş ərazilərimizdə həyata keçirlən quruculuq işlərində, baş tutan açılış mərasimlərinin hər birində insanı heyrətə salan və həyacanlandıran qəribə bir simvolizm var. Sanki tarix təkrarlanır və işğal dövründəki ədalətsizliyin izlərini silərək 30 il öncə qopmuş bağları yenidən bərpa edir.

Qeyd edim ki, bu məqam Prezident İlham Əliyevin nitqində daha detallı bir şəkildə öz əksini tapdı və yuxarıda haqqında söz açdığım rəmzlərlə bağlı göz önündə geniş bir mənzərə açdı.

Sitat: “Əziz dostlar, təxminən 40 il bundan əvvəl, bax, bu yerdə atam durmuşdu, mən isə o tərəfdə durmuşdum. Şaxtalı-qarlı havada Vaqifin məqbərəsinin açılışı idi. Ondan sonra 1982-ci il iyulun 29-da atamla bərabər ikinci dəfə Şuşaya gəlmişdim. O vaxt Vaqif Poeziya Günləri keçirilirdi. Bu gün isə ikinci dəfə Vaqifin məqbərəsinin açılışını biz qeyd edirik. Vaqif Poeziya Günləri keçirilərkən atamın 59 yaşı var idi. Bu gün mənim 59 yaşım var. Bəziləri hesab edə bilər ki, bu, təsadüfdür. Ancaq mən hesab edirəm ki, burada böyük rəmzi məna var, tarix təkrarlanır. Azərbaycan tarixinin qara səhifəsi artıq arxada qaldı və biz yenidən nəfəs almağa başlamışıq”.

Yeriyən” ədalət

Prezidentin çıxışı, şübhəsiz ki, mesajlarla zəngin idi. Amma dövlət başçısının ədalətin bərqərar edilməsi ilə bağlı fikirlərinin təkcə bu günümüz üçün deyil, gələcəyimiz üçün də mühüm əhəmiyyət kəsb etdiyi qənaətindəyəm.

Sitat: “İşğal dövründə bir çoxlarımız - həm keçmiş məcburi köçkünlər, həm bütün Azərbaycan xalqı, o cümlədən də mən dəfələrlə fikirləşirdik ki, dünyada ədalət yoxdur. Çünki ədalət olsaydı, biz bu vəziyyətə düşməzdik. Mən də o cümlədən belə fikirdə idim. Ancaq həyat göstərdi ki, ədalət var, sadəcə, dözümlü olmaq lazımdır, səbirli olmaq lazımdır, ədalətə inanmaq lazımdır və ədalətə nail olmaq üçün çalışmaq lazımdır, hədəfə doğru getmək lazımdır. Ədaləti bərpa etmək üçün fədakarlıq göstərmək lazımdır. Bu gün biz hamımız ürəyimizdə deyirik və açıq deyirik ki, bəli, ədalət var, ədalət bərpa edildi, biz bu gün Şuşadayıq və bundan sonra Şuşada əbədi yaşayacağıq”.
Fransa inqilabının məşhur simalarından, həmçinin İnsan və vətəndaş haqları Bəyannaməsinin müəlliflərindən biri olan Qabriel Mirabo təxminən 230 il öncə ədalətin topal olduğunu, yavaş-yavaş yeridiyini, bununla yanaşı, gedəcəyi yerə gec-tez çatdığını demişdi, amma nədənsə öz ölkəsinin timsalında ədalətə doğru aparan yolda xalqın fədakarlığından danışmağı unutmuşdu... Eynilə BMT Təhlükəsizlik Şurasının daimi üzvü olan Fransanın ATƏT-in Minsk qrupunun həmsədri olduğu və bizim üçün artıq bitmiş sayılan mərhələdə ədalət prinsiplərini unutduğu kimi...

...Öndə Prezident İlham Əliyev olmaqla, biz səbrimizlə, qətiyyətimizlə, fədakarlığımızla, iti zəkamızla, strateji düşüncəmizlə ədalətə yeriməyi və yürüməyi “öyrətdik”.

...Şuşada Heydər Əliyev Fondunun təşkilatçılığı ilə keçirilən Vaqif Poeziya Günləri, şübhəsiz ki, mədəniyyətimiz, ədəbiyyatımızın paytaxtına qayıdışının davamıdır. Şuşa dirçəlir, Qarabağın adındakı “qara” sözü rəng anlayışından qoparılaraq öz ilkin etimalogiyasına – böyüklüyünə qaytarılır. Qarabağ böyük bağa çevrilir. Gözümüzün önündə tarix yaşanır – hər anı tarixə çevrilən TARİX!

Sonu olmayan YOL

Azərbaycan Yazıçılar Birliyinin sədri, xalq yazıçısı Anarın çıxışı hər kəsi kövrəltdi. Təbii ki, məni də...
Sitat: “Biz buraya Zəfər yolu ilə gəldik. Bu yolun əvvəli var, amma sonu yoxdur. Bu yol uzandıqca uzanacaq. Bu Zəfər yolu Azərbaycanın hərbi gücünün yoludur, siyasi gücünün yoludur, iqtisadi gücünün yoludur və möhtəşəm Azərbaycan mədəniyyətinin, Azərbaycan ədəbiyyatının Zəfər yoludur!”

Bəli, bu yolun əvvəli var, amma sonu yoxdur. Azərbaycan Prezidentinin tarixi torpaqlarımıza qayıdışla bağlı nişan verdiyi hədəflər də, bu yolun sonunun olmadığını və olmayacağını göstərir.

Səsin rəngi

...Vaqif Poeziya Günlərində edilən bütün çıxışlar və səslənən bütün şeirlərlə bağlı təəssüratlarımı ifadə etmək üçün, yəqin ki, bir neçə gün fasiləsiz olaraq yazmaq lazımdır. Təəssüf ki, buna imkan yoxdur. Həm də təəssüratlarımın dərinliyinə varmaq üçün zamana ehtiyac olduğunu düşünürəm.

Səslənən şeirlərin hər birinin ayrı-ayrılıqda öz oxucusunun olduğuna şübhə etmirəm. Vaqif Poeziya Günlərində diqqətimi çəkən ən mühüm məqamlardan biri də ədəbiyyatımızdakı nəsillərarası sərhədlərin götürülməsi, əvəzində möhkəm mənəvi təməllər üzərindən körpülərin salınmasıdır. Gənclərə özlərini ifadə etmək üçün daha geniş imkan tanınmasını isə, alqışlayıram. Çünki estafeti, yolu onlar davam etdirməlidirlər. Yolun davam etdirilməsi üçün isə YOLA ayaq basmağa imkan yaratmaq lazımdır!

...Vaqif Poeziya Günlərinin ikinci günündə Günəşin sərt şüaları altında uzun müddət dayana bilmədiyimdən məqbərinin, təxminən yüz metrliyindəki kölgəliyə çəkildim. Amma Xəyal Rzanın səsinin rəngi məni yenidən geri qayıtmağa vadar etdi. Nigar Həsənzadənin mükəmməl ifası da həmçinin...

Düşünürəm ki, zaman keçdikcə poeziya günlərində səslənən şeirlərin əksəriyyəti ədəbiyyatımızda öz layiqli yerini tutacaq və böyük Zəfərimizin poetik rəmzlərinə çeriləcək.

P.S.Şuşa səfərimiz isə başa çatır. Zəfər yolu ilə Bakıya qayıdırıq – Şuşanın, Qarabağın ruhunun ayrılmaz bir parçası kimi...

Müqəddəs arzumun gerçəkləşməsinə imkan yaratdığına və mükəmməl təşkilatçılığa görə Heydər Əliyev Fonduna təşəkkürümü bildirirəm! Var olun!

Elçin Mirzəbəyli
Özünü AzTV-nin "əməkdaşı" kimi təqdim edən dələduz yaxalandı - VİDEOAğdam rayonunda özünü AzTV əməkdaşı kimi təqdim edərək market rəhbərliyindən pul tələb edən şəxs saxlanlılıb.

Avrasiya.net xəbər verir ki, Ağdamın Quzanlı qəsəbəsində yerləşən "Ağdam" marketə gələn və ağzında AzTV loqosu olan şəxs marketin guya antisanitar şəraitdə olması, işçilərin sanitar qaydalara düzgün əməl etməməsini bildirərək rəhbərlikdən pul tələb edib. Bu zaman market nümayəndələri polis çağırıblar və həmin şəxs saxlanılıb.

Məlum olub ki, reketliklə məşğul olan şəxs AzTV əməkdaşı deyil. O, daha əvvəl Ağcabədinin Hindarx qəsəbəsində də oxşar yolla marketlərdən 50 manat alıb.

Araşdırmalar davam etdirilir.
Naxçıvan istiqamətində təxribat törədən erməni hərbçi ÖLDÜErmənistan ordusu Azərbaycanla dövlət sərhədinin Sədərək rayonu istiqamətində atəşkəs rejimini pozub.

Ermənistan mediasının yaydığı məlumata görə, Arazdəyən kəndi istiqamətində təxribat törədən erməni hərbçi, 1982-ci il təvəllüdlü kiçik çavuş Qeqam Saakyan aldığı güllə yarasından ölüb.

Hadisə bu gün günorta saatlarında qeydə alınıb.

Əlavə məlumat verilməyib.

Modern.az
Rövşən Əkbərovun oğlu məhkəmədə vəkilə hücum etdiVəkillər Kollegiyasının üzvü Elçin Sadıqov hüquq-mühafizə orqanlarının rəhbərlərinə müraciət edərək bu gün məhkəmədə hazırda həbsdə olan general-leytenant Rövşən Əkbərovun oğlunun ona hücum etdiyini bildirib.

Avrasiya.net xəbər verir ki, bu barədə E.Sadıqov Unikal.org-a açıqlamasında məlumat verib.

O qeyd edib ki, general Rövşən Əkbərovun təqsirləndirildiyi cinayət işi üzrə öldürülmüş Əliyev Elçin Fəday oğlunun hüquqi varisi Əliyev Fədayın hüquqlarını müdafiə edir: “Məhkəmə prosesində Rövşən Əkbərovun əməlinin ifşa olunması üçün faəliyyət göstərdiyimə görə məhkəmə iclasından çıxarkən Bakı Hərbi Məhkəməsinin ikinci mərtəbəsində pilləkanın qarşısında Rövşən Əkbərovun oğlu (mətbuatdan öyrəndim ki, adı Telmandır) mənə hücum etdi. Onun qarşısını digər şəxslər aldı. Bununla bağlı məhkəmənin kamera yazısından başqa məndə də sübut var".
Gürcüstanda iş adamı qətlə yetirilibGürcüstanda biznesmen Vladimir Vaxaniya qətlə yetirilib.

“Report”un yerli bürosu xəbər verir ki, hadisə Zuqdidi bələdiyyəsinin Qanmuxuri kəndində baş verib.

İş adamının öz evində soyuq silahla öldürüldüyü bildirilir.

Gürcüstanın Daxili İşlər Nazirliyindən bildirilib ki, qətli törədən şəxsin kimliyi artıq müəyyənləşdirilib. Faktla bağlı qəsdən adam öldürmə maddəsi üzrə istintaq başlanılıb.

Qeyd edək ki, V.Vaxaniya əsasən Rusiyada bizneslə məşğul olub. O, 2009-cu ildə Gürcüstanda jurnalist fəaliyyətinə mane olduğuna görə həbs edilib, 2012-ci ildə yerli seçkilərə majoritar namizəd kimi qatılıb.
Tokio-2020: Azərbaycan paralimpiyaçıları 11-ci qızıl medalı qazanıbAzərbaycan üzgüçüsü Vəli İsrafilov Tokio-2020 Yay Paralimpiya Oyunlarında qızıl medal qazanıb.

Avrasiya.net-in məlumatına görə, o, 100 metr məsafəyə brass üsulu ilə üzmə yarışında 1 dəqiqə 04.86 saniyə nəticə ilə bütün rəqiblərini qabaqlayıb.

İsrafilov həmçinin paralimpiada rekordunu da qırıb.

Qeyd edək ki, hazırda aktivində 11 qızıl, 1 gümüş və 4 bürünc medal olan Azərbaycan komandası medal sıralamasında 10-cu yerdə qərarlaşıb.
Ermənilərə qarşı şücaətlə döyüşən Əhməd bəy Vəkilov kim olub? (FOTO)Dünya dövlətçilik tarixinə müsəlman şərqinin ilk dünyəvi hüquqi dövlətinin yaradıcısı kimi həkk edilmiş Azərbaycan Cümhuriyyətinin yaradılması və fəaliyyəti bizim üçün tarixi örnəkdir. 1918-1920-ci illər qədim Oğuz türk yurdu olan Qərbi Azərbaycan və Naxçıvan ərazisi erməni-müsəlman qırğınlarının əsas mübarizə meydanlarından birinə çevrilmişdir. O, dövrün nəsillərə örnək olacaq qəhrəmanlarını minnətdarlıq duyğusu ilə anmaq bizim mənəvi borcumuzdur. Bu gün məhz bu qəhrəmanlardan biri haqqında Əhməd bəy Vəkilov haqqında söhbət açacağıq. Əhməd bəy Həsən bəy oğlu Vəkilov Naxçıvan Xanlığının Şərur-Dərələyəz qəzasının naibi olmuş Həsənalı Sultan Vəkilovun nəvəsidir.

Şərur-Dərələyəz qəzasının Çivə kəndi erməni-müsəlman qırğınlarının başlanması bölgədə xalq qəhrəmanı Balo bəy Vəkilovun(Əhməd bəy Vəkilovun əmisi Cəlil bəy Vəkilovun oğludur) rəhbərliyi ilə könüllü özünümüdafiə dəstəsinin yaradılmasına səbəb oldu. Bu dəstənin ən fəal üzvülərindən biri də Əhməd bəy Vəkilov idi. O, bütün döyüşlərdə Balo bəy Vəkilovla birlikdə şücaətlə iştirak etmişdir. Dəstədə İsmayıl bəy, Əli bəy, Hüseyn bəy, Qafar bəy, Yusif bəy, Kərbəlayı Əşrəf bəy, Kərbəlayi Firudin bəy və başqa Vəkilovlar Kəllo və Məmili tayfaları ermənilərə qarşı şücaətlə vuruşurdu.

Ermənilərin hücumlarından birində Balo bəy, Əhməd bəy və Kərbəlayi Əşrəf bəy öz döyüş dostları ilə birlikdə böyük bir kötüyün içini oyub oraya çoxlu miqdarda barıt doldururlar. Sonra həmin kötüyü partladırlar. Ermənilər gurultunu eşidib vahimələnirlər. Ermənilər Çivəyə Osmanlı Türkiyəsindən top gətirildiyini düşünərək böyük bir ərazini qoyub qaçırlar. Sonralar ermənilər Çivəni bir neçə dəfə mühasirəyə alırlar. Ancaq müdafiəçilərin müqavimətini qıra bilmirlər. Ağır döyüşlərdən sonra Dərələyəzin müdafiəçiləri Çivə ətrafına yığışırlar. Bu zaman Vedibasar istiqamətində də qızğın döyüşlər gedirdi. Orada müdafiəçilərə Abbasqulu bəy Şadlinski başçılıq edirdi. Qüvvələr nisbətinin kəskin döyüşməsi ilə əlaqədar Dərələyəzin , Naxçıvanın (o cümlədən Vedibasarın) əhalisi geri çəkilməli olur. Əhməd bəy Vəkilov əmisi oğlu xalq qəhrəmanı Balo bəy Vəkilov və Çivə müdafiəçiləri də Naxçıvanın bütün əhalisi ilə birlikdə Arazın o tayına–Cənubi Azərbaycana üz tuturlar. Mərhum tarixçi alim Əli Əliyev özü bu hadisələrin canlı şahidi olmuş və "Biz əzablı bir ömür yaşadıq" xatirə memuarında Balo bəy Vəkilov və Çivə müdafiəçilərinin Cənubi Azərbaycana keçməsini təsvir etmişdir. Əhməd bəy Vəkilov ailəsi ilə birlikdə xalq qəhrəmanı Balo bəy Vəkilovla Arazın keçsələr də İran ərazisində xalq qəhrəmanı Balo bəy Vəkilovdan ayrı düşürlər. Onların ayrı düşdükləri ağır dönəmlərdə yaşadıqları həyacanlı günlər bir romanın mövzusudur. Bu ağır dönəmlərin şahidi olmuş Əhməd bəy Vəkilovun həyat yoldaşı Şəhrəbanu xanım da həyacanlı günləri ömrünün son günlərinə kimi yaddaşında yaşadmışdır.

Bir müddət Cənubi Azərbaycanda müdafiəçilər yenidən geri qayıdır. Bu zaman Əhməd bəy Vəkilovun atası Məşhədi Həsən bəy bu hadisələrin ağırlığına , xalqın faciəli vəziyyətinə dözmür, Naxçıvan şəhərində vəfat edir. Xalq qəhrəmanı Balo bəy Vəkilov geri qayıdandan sonra Bakıya gedir, Məhəmməd Əmin Rəsulzadə ilə görüşür. Məhəmməd Əmin Rəsulzadə onlara öz kəndlərinə qayıtmağı məsləhət görür. Bu dövrdə Dərələyəzin əhalisinin bir hissəsi Qarabağa köçür. Balo bəy və Çivə müdafiəçiləri isə öz kəndlərinə qayıdır. Yenidən döyüşlər şiddətlənir. Bu döyüşlərdə xalq qəhrəmanı Balo bəy Vəkilov və Çivə müdafiəçiləri o cümlədən Əhməd bəy Vəkilov özlərini məğlubedilməz qəhrəman kimi göstərirlər. Ermənilər Əhməd bəy Vəkilovun silahdaşı xalq qəhrəmanı Balo bəy Vəkilov başına mükafat təyin edirlər. Lakin ermənilər istəklərinə nail ola bilmirlər.

Azərbaycan Cümhuriyyəti hakimiyyətinə son qoyuldu və Azərbaycan Sovet hakimiyyəti quruldu. 1923-cü ildə bolşevik imperiya siyasətinin və yerli bolşeviklərin köməyi ilə əhalisi yalnız Azəraycan türklərindən ibarət olan Çivə kəndi Ermənistanın inzibati ərazi bölgüsünə daxil edildi. Əhməd bəy Vəkilov və xalq qəhrəmanı Balo bəy Vəkilovun mənsub olduğu vəkilovlar nəsli repressiyalara , təqib və təzyiqlərə məruz qaldı. Onların bütün mülkiyyəti evləri, torpaq sahələri , bağları alınıb kolxoza verildi. Vəkilovların bir hissəsi 37-ci il faciəsinin qurbanı oldu bir hissəsi isə el-obanı tərk etmək məcburiyyətində qaldılar. Əhməd bəy Vəkilov isə öz doğma kəndlərində qaldı. Əhməd bəy Vəkilovun ailəsini bəy nəslindən olduqları üçün 1940-cı ilə kimi kolxoza üzv olmağa qoymurlar. Nəhayət , Əhməd bəy Vəkilovu da 1951-ci ildə ailəsi ilə birlikdə Qərbi Azərbaycan ərazisindən deportasiya edirlər. Əhməd bəy Vəkilovun adı köçmə sənədinə qeyd edilsə də o, gedə bilmir. Hadisələrin ağırlığı və faciəliliyi onun da həyatla vidalaşmasına səbəb olur. Övladları isə öz doğma yurd –yuvalarından deportasiya olunaraq Bərdə rayonunun İmirli kəndinə köçməil olurlar.

Şübhəsiz ki, Azərbaycan xalqının tarixində silinməz iz buraxmış əsasən Qazax-İrəvan-Naxçıvan ərazilərində məskunlaşmış vəkilovlar nəslinin nümayəndəsi olan Əhməd bəy Vəkilovun parlaq xatirəsinə həsr edilmiş bu məqalə onun döyüş yolunun və keşməkeşlərlə dolu həyatının kiçik bir hissəsidir.

Sevinc İncəli