Deputat sərxoş halda polisi döydü - DİN-dən açıqlamaXaçmaz rayonunun deputatı Eldəniz Səlimovun polisi döyməyi barədə məlumat yayılıb.

Avrasiya.net xəbər verir ki, Xaçmaz sakinləri Bakipost.az-a açıqlamalarında hadisənin dünən Nabranda baş verdiyini bildiriblər.

Sakinlər qeyd edib ki, deputat sərxoş olub və istirahət mərkəzlərinin birində rayonun qeydiyyat şöbəsinin polis əməkdaşı Mirzəyev Zaur Cavanşir oğluna hücum çəkib, ona xəsarət yetirib.

Hazırda polis işə çıxmır.

Qeyd edilib ki, deputatın ailə üzvləri polisin evinə gediblər, ondan məsələni böyütməməyi xahiş edirlər.

Məlumat artıq sosial şəbəkələrdə də sürətlə yayılır.

***

Xaçmaz rayonunun deputatı Eldəniz Səlimovun polis əməkdaşını döyməsi ilə bağlı Daxili İşlər Nazirliyinin (DİN) mətbuat xidmətinə məlumat daxil olmayıb.

Bu sözləri Axar.az-a açıqlamasında DİN-nin KİV və ictimaiyyətlə əlaqələr şöbəsinin rəisi Elşad Hacıyev deyib.
Şəntop və Qeysər Şuşa məscidində namaz qıldıAzərbaycan Milli Məclisinin sədri Sahibə Qafarova, Türkiyə Böyük Millət Məclisinin (TBMM) sədri Mustafa Şəntop və Pakistan Milli Assambleyasının sədri Əsəd Qeysərin rəhbərlik etdiyi nümayəndə heyətlərinin Şuşaya səfəri davam edir.

Avrasiya.net Report-a istinadən xəbər verir ki, qonaqlar Şuşa şəhərindəki bir sıra tarixi və dini-memarlıq abidələrinə baş çəkiblər, Cıdır düzündə olublar.

Nümayəndə heyəti daha sonra Yuxarı Gövhər Ağa məscidini ziyarət edib. M.Şəntop, Ə.Qeysəri və Azərbaycan, Türkiyə, Pakistan parlamentlərinin nümayəndə heyətlərinin üzvləri məsciddə namaz qılıblar, dualar ediblər.
Avropa Birliyinin Şərq Tərəfdaşlığı ölkələrinə yaxın 5 il üçün ayırdığı 17 milyard avro yardım ciddi şəkildə müzakirə olunmaqdadır.

2 iyulda qəbul edilən qərarın detalları ictimaiyyətə tam açıqlanmayıb və bu da ciddi informasiya qırlığı və yanlış nəticələrə səbəb olub. Şərq Tərəfdaşlığı çərçivəsində Cənubi Qafqaz ölkələri içərisində ən çox vəsaitin Ermənistana ayrılması barədə iddiaların yaranmasına da səbəb budur.

Bu barədə saytımızın AB-nin Bakı nümayəndəliyinə göndərdiyi sorğuya da 3 gündür cavab verilməyib. Maraqlıdır ki, AB tənqidlərə baxmayaraq, situasiyanı aydınlaşdırmaq və səbəbləri izah etməkdə maraqlı görünmür. Bu isə ayrılan vəsaitdə doğrudan da ikili standartlar olduğu təəssüratını gücləndirir.

Əldə etdiyimiz məlumatda isə əslində ən çox vəsaitin Ukraynaya ayrıldığı qeyd olunur. Cənubi Qafqaz ölkələrində də ən böyük yardımı Gürcüstan alacaq – 3,9 milyard avro. Ermənistana əvvəlcə 1,6 milyard avro yardım ayrılsa da, sonradan daha 1 milyard faizsiz kredit verilməsi qərara alınıb.

Vəsaitlər hissə-hissə, 5 il müddətində köçürüləcək.

Bəs, niyə Cənubi Qafqaz ölkələri arasında Gürcüstana 3,9 milyard, Ermənistana 1,6+1 milyard, Azərbaycana isə 145 milyon avro yardım nəzərdə tutulur?

İqtisadçı ekspertlər (o cümlədən Natiq Cəfərli) hesab edir ki, buna səbəb Gürcüstan və Ermənistanın AB ilə assosiativ saziş imzalamasıdır. Gürcüstan daha üst, Ermənistan isə alt səviyyədə saziş imzaladığı üçün yardım da buna uyğun ayrılıb. Azərbaycan isə hələ AB ilə müqavilə imzalamadığı üçün yardım da simvolikdir.

İlk baxışda olduqca əsaslı arqumentdir. Ancaq bu suallar açıq qalır:

1. Belarus nəinki AB ilə saziş imzalayıb, hətta AB-nin Şərq Tərəfdaşlığı proqramından rəsmən çıxdığını elan edib. Bəs, necə olur ki, Şərq Tərəfdaşlığından imtina edən Belarusa 850 milyon civarında, Şərq Tərəfdaşlığında fəaliyyətini davam etdirən və AB ilə müqavilə şərtlərinin artıq 90 faizini razılaşdıran Azərbaycana 145 milyon avro yardım təklif edilir?

2. AB Şərq Tərəfdaşlığı ölkələrinə (Ukrayna, Belarus, Moldova, Gürcüstan, Ermənistan, Azərbaycan) vəsaiti hansı prinsiplə ayırdığını niyə elan etmir?

3. Bu layihənin tam mətni və ölkələr üzrə ayrılan vəsait niyə əlçatan deyil? Niyə indiyə qədər detallı məlumat yayılmır?

4. AB-nin yerli nümayəndəlikləri bu yöndən sorğuları niyə cavablandırmaq və ayırmalardan narazı olan ölkələrdəki anlaşılmazlıqlara aydınlıq gətirmək istəmir?

Bu suallara cavab tapılsa, mənzərə aydınlaşar...

Axar.az
Bu gün İsraildə Azərbaycanın ticarət nümayəndəliyi açılıb.

“Report” xəbər verir ki, bu barədə İsrailin Azərbaycandakı səfiri Corc Dik (George Deek) “Twitter” səhifəsində xəbər paylaşıb:

“Həmin o gün gəldi. Bu gün biz Azərbaycan rəsmilərini İsraildə ticarət nümayəndəliyinin açılışı ilə bağlı qarşılayırıq. Bu, ölkədəki ilk rəsmi mövcudluğudur. İndi Azərbaycanın İsraildə ilk rəsmi evi var! Bu gün aramızdakı əlaqələr tarixində mühüm bir gündür. Nazir M.Cabbarov və nazir Y.Razvozov birgə lenti kəsərək Azərbaycanın İsraildəki ticarət nümayəndəliyini açıblar”.

O, paylaşdığı video müraciətində bildirib ki, ölkələrimiz arasında rəsmi əlaqələr, təxminən, 30 il əvvəl qurulsa da, Azərbaycanın İsraildə heç bir nümayəndəliyi olmayıb: “İndi bu vəziyyət dəyişdi, Təl-Əvivdə indi Azərbaycanın ticarət nümayəndəliyi açıldı və ilk dəfə İsraildə Azərbaycan bayrağı dalğalanacaq. Bu da ölkələrimizi və xalqlarımızı bir-birinə daha da yaxınlaşdıracaq, münasibətlərimizin daha güclü və çoxşaxəli olması üçün zəmin yaradacaq. İnanıram ki, bu hadisə İsraildə Azərbaycan səfirliyinin açılması istiqamətində daha bir addımdır. Gələn il ölkələrimiz arasında diplomatik münasibətlərinin 30 illiyini qeyd edəcəyik. İnşallah, biz bunu hamımız bir yerdə, Azərbaycanda və İsraildə qeyd edərik”.Corc Dik: "İsraildə ilk dəfə Azərbaycan bayrağı dalğalanacaq"
Rus qoşunları sərhədə gəlir: Bakının strateji manevrləriPutin Təhlükəsizlik Şurasının iclasında Azərbaycan-Ermənistan sərhədində baş verənləri müzakirə etdi: Moskvanın Bakı və İrəvan arasında atəşkəsə nail olduqdan dərhal sonra TŞ-nin iclasını keçirməsi Rusiya qoşunlarının Kəlbəcər istiqamətində (Söyüdlüdən Xəzinəvara qədər) yerləşdirilməsinə hazırlıq getdiyi ehtimalını önə çıxarır və yaxın günlərdə bunun şahidi ola bilərik.

Bu, proseslərin inkişafını təxmin etməyə imkan verir:

- rus qoşunları bölgəyə yerləşdirildikdən sonra tərəflər olduqları mövqelərdə qalır;

- sərhədin Kəlbəcər istiqamətində delimitasiya həyata keçirilir, ardınca müqavilə ilə rəsmiləşir;

- Moskva Paşinyanın təklif etdiyi “beynəlxalq müşahidəçilər”in – ABŞ və Fransanın bölgəyə girişinin qarşısını alır;

- Bakı dövlət sərhədini de-fakto və de-yure bərpa edir: bu, İrəvanın Qarabağı Azərbaycan ərazisi kimi tanıması deməkdir.

Açıq qalan sual var: Rusiyanın sərhəddə dayanmaq istəyi nədən qaynaqlanır?

Bu ilin mayında Lavrovun bölgəyə səfəri, ardınca Qaragöl ətrafında bu gün də davam edən gərginliyin başlanması zamanı yazmışdıq: Rusiyaya bölgədə qalmaq üçün uzunmüddətli səbəb lazımdır.

- Moskva anlayır ki, 30 il ərzində bölgədə təsir rıçağı olaraq istifadə etdiyi Qarabağ məsələsi bitib və bundan yalnız yaxın perspektiv üçün istifadə edə bilər;

- Moskva anlayır ki, Bakı Qarabağa “status” verməyəcək, altına imza atdığı üçtərəfli razılaşmanı icra etməlidir, rus sülhməramlılarının 5 ildən sonra bölgədə qalması sual altındadır;

- Moskva onu da anlayır ki, geosiyasi dəyişiklikdə Azərbaycan güclü olan tərəfdədir və Bakı-Ankara ikilisi ilə toqquşmaq yox, əməkdaşlıqda fayda var, bu, həm də bölgədə maraqlarını qorumaq baxımından əhəmiyyətlidir.

Və qoşunlarını iki ölkənin sərhədinə çıxarmaqla iki hədəfə nail olur: Ermənistanın əlindən çıxması riskinin qarşısını alır: ruslar üçün Ermənistanda Qərb yox, kommunikasiyanın bərpası, sərhədlərin açılmasından sonra Türkiyə faktoru daha təhlükəlidir; bölgədə uzunmüddətli təsir rıçağı əldə edir.

Rusiya qazanan tərəfdir, amma Bakı hansı manevrləri edir?

1. Rusiyanın əli ilə Ermənistan üçün yeni imkanlar aça biləcək “beynəlxalq müşahidəçi” planını sıradan çıxarır;

2. Rusiyanın vasitəçiliyi ilə sərhədlərin delimitasiyasını həyata keçirir;

3. Rusiyaya bölgədə uzunmüddətli imkanlar açmaqla zamanı çatanda Qarabağdan – Azərbaycanın sərhədləri daxilindən çıxmasına zəmin yaradır;

4. Gərginliyi Azərbaycan daxilindən Ermənistan daxilinə köçürür.

Və belə görünür ki, Əliyevlə Putin anlaşa bilib. Əliyevin Xankəndi, Xocalı və Xocavənd məsələsini rəsmi şəkildə bitirən fərmanı imzaladıqdan sonra Moskvaya getməsi və ardınca baş verənlər də bu ehtimalı gücləndirir.

Bakı Moskvaya tam güvənməyin də yanlış olduğunu bilir və Türkiyə faktorunun oyuna daxil edilməsi həm Qarabağda, həm də sərhəddə mümkün risklərə qarşı hesablanıb.

Asif Nərimanlı
Erməni terrorçu qrupun üzvlərinə hökm oxunduBu gün Bakı Ağır Cinayətlər Məhkəməsində Ermənistan vətəndaşlarından ibarət terrorçu silahlı birləşmənin tərkibində döyüşən - Astanyan Yeqiş Oqanesoviç, Aramyan Karen Armenoviç, Avakyan Tiqran Manikoviç, Qevorkyan Qriqor Qevorqiyeviç, Manukyan Ovsep Robertoviç, Martirosyan Qevorg Samveloviç, Qevorkyan Robert Ovikoviç, Avetisyan Vaqarşaq Aşotoviç, Akopyan Volodya Qaqikoviç, Sukiasyan Andranik Srapoviç, Manukyan Andranik Tiqranoviç, Saqatelyan Qriqor Seyranoviç, Giraqusyan Eduard Armenoviçin cinayət işi üzrə məhkəmə prosesi başa çatıb.

Avrasiya.net xəbər verir ki, hakim Faiq Qəniyevin sədrliyi ilə keçirilən prosesdə vəkillər müdafiə çıxışı edib.

Daha sonra təqsirləndirilən şəxslər son sözlə çıxış edib.

Prosesdə hökm oxunub. Hökmə əsasən, təqsirləndirilən şəxslərə qarşı irəli sürülmüş Cinayət Məcəlləsinin 214.2.1, 214.2.3-cü (terrorçuluq, qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən odlu silahdan və silah qismində istifadə olunan predmetlərdən istifadə etməklə törədildikdə) və 279.2-ci (qanunvericiliklə nəzərdə tutulmayan silahlı birləşmələrin və ya qrupların tərkibində müəssisələrə, idarələrə, təşkilatlara və ya ayrı-ayrı şəxslərə basqın etmə) maddələr ümumi ittihamdan xaric olunub.

Təqsirləndirilən şəxslər Cinayət Məcəlləsinin 228.3-cü (mütəşəkkil dəstə tərəfindən qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, saxlama, daşıma və gəzdirmə) və 318.2-ci (qabaqcadan əlbir olan bir qrup şəxs və ya mütəşəkkil dəstə tərəfindən Azərbaycan Respublikasının dövlət sərhədini qanunsuz olaraq keçmə) maddələri ilə təqsirli biliniblər.

Dəstə üzvlərinin hər biri 6 il müddətinə azadlıqdan məhrum ediliblər.

Təqsirləndirilən şəxslərə təyin olunmuş cəzalarının başa çatdıqdan sonra Azərbaycan hüdudlarından kənara məcburi qaydada çıxarılmalarının təmin olunmasını barədə hökm elan edilib.
Bərdədə şəhidin doğum günü qeyd olunub28 iyul 2021-ci il tarixdə Bərdə rayon İcra Hakimiyyətinin başçısı Vidadi İsayevin tapşırığına əsasən Vətən müharibəsində şəhid olan Bərdə rayonu Əyricə kəndindən olan şəhidimiz Paşayev Ramil Şakir oğlunun doğum günü münasibəti ilə şəhidin ailəsi ziyarət olunmuş, qəbirüstü abidəsinə gül dəstələri qoyulmuşdur.

Bərdə Rayon İcra Hakimiyyətindən Avrasiya.net-ə bildirilib ki, tədbirdə Bərdə rayon İcra Hakimiyyəti başçısının müavini, YAP rayon təşkilatının sədri Fəqət Şadlinskaya, rayon İcra Hakimiyyəti başçısı aparatında Vətən müharibəsi iştirakçıları və şəhid ailələri ilə işin təşkili şöbəsinin müdiri Samir Səfərov və şöbənin böyük məsləhətçisi Ziya İsmayılzadə, Millət vəkili Fatma Yıldırımın köməkçisi Fuad Ağayev, Bərdə rayon İcra Hakimiyyəti başçısının Əyricə kənd inzibati ərazi dairəsi üzrə nümayəndəsi Royal Namazov, "Qarabağ Qaziləri" İctimai birliyinin sədri Sürəddin Səfərov, şəhər 7 saylı tam orta məktəbin direktoru Mehparə Mustafayeva, rayon ictimaiyyəti və başqaları iştirak etmişlər.

Tədbirdə Fəqət Şadlinskaya bildirmişdir ki, 2020-ci il ölkəmiz üçün Qələbə ili kimi tarixə düşdü. Möhtərəm Prezidentimiz, Ali Baş Komandan cənab İlham Əliyevin uzaqgörən və qətiyyətli siyasəti, xalqımızın birliyi və müzəffər Ordumuzun peşəkarlığı sayəsində, şəhidlərimizin qanı, qazilərimizin canı hesabına 30 illik həsrətə son qoyulmuşdur. Bütün Azərbaycan xalqı kimi bərdəlilər ilk gündən Vətən müharibəsində Ali Baş Komandanın ətrafında birləşmiş, oğulları igidliklər göstərmiş, canlarını qurban verməkdən çəkinməmişlər. Şəhid olan qəhrəman oğullarımızdan biri də bugün 27 yaşı tamam olan Paşayev Ramil Şakir oğludur. Onun qəhrəmanlığı cənab Prezident İlham Əliyevin Sərəncamı ilə “Vətən uğrunda”, “Suqovuşanın azad olunmasına görə”, “İgidliyə görə” medalları ilə qiymətləndirilmiş, ailəsi dövlətin diqqət və qayğısı ilə əhatə olunmuşlar.

Şəhidimizin atası Şakir Paşayev oğlu şəhid Paşayev Ramilin hərbidəki xidmətindən və ömür yolundan danışmış, möhtərəm Prezidentimiz cənab İlham Əliyev və ölkənin Birinci Vitse-prezidenti Mehriban xanım Əliyeva tərəfindən dövlət səviyyəsində şəhid ailələrinə göstərilən diqqət və qayğıdan məmnunluğunu ifadə etmişdir. Digər çıxışçılar Millət vəkili Fatma Yıldırımın köməkçisi Fuad Ağayev, şəhidin döyüşçü yoldaşları, “N” saylı hərbi hissənin komandir və hərbçiləri, Bərdə rayon İcra Hakimiyyəti başçısının Əyricə kənd inzibati ərazi dairəsi üzrə nümayəndəsi Royal Namazov, "Qarabağ Qaziləri" İctimai birliyinin sədri Sürəddin Səfərov, Azərbaycan Vətən Müharibəsi İctimai Birliyi rayon şöbəsinin sədri İsmayıl Rüstəmov və başqaları çıxış edərək ölkəmizdə şəhidlərin xatirəsinin əziz tutulduğundan, şəhid ailələrinə və qazilərə olan dövlət qayğısından, şəhid Paşayev Ramilin döyüş yolundan, xatirələrindən danışmış, onun timsalında bütün şəhidlərə rəhmət, qazilərə can sağlığı arzulamışlar.
Paşinyan: Sərhədə rus ordusu yerləşməlidirRusiya sərhədçilərinin Azərbaycanla sərhəd boyunca dayaq məntəqələri yerləşdirilməlidir.

Bunu Ermənistan baş naziri vəzifələrini icra edən Nikol Paşinyan deyib.

“Hazırkı situasiyada Rusiya sərhədçilərinin Azərbaycanla bütün sərhəd boyunca dayaq məntəqələrinin yerləşdirilməsi məsələsinə baxmağı məqsədəuyğun hesab edirəm. Bu imkan verəcək ki, delimitasiya və demarkasiya işlərini döyüş toqquşmalar riski olmadan gerçəkləşdirək”, – deyə o bildirib.

Paşinyan bu mövzunu rusiyalı həmkarları ilə müzakirə etməyi planlaşdırdığını söyləyib.

O, eyni zamanda KTMT-nin (Kollektiv Təhlükəsizlik Müqaviləsi Təşkilatı) monitorinq missiyasının da sərhəddə yerləşdirilməsini təklif edib.
"Taliban" məşhur aktyorun başını kəsdi - VİDEOƏfqanıstanın məşhur yumor aktyoru Nəzər Məhəmməd ağa Kaşa "Taliban" üzvləri tərəfindən öldürülüb.

Publika.az xarici mətbuata istinadən xəbər verir ki, komediya ustası Kaşa "taliban"çılar tərəfindən tutularaq dəfələrlə döyülüb. "Taliban" aktyoru döyərkən insanları güldürməyin "haram" olduğunu irəli sürüb. Ağaca bağlanaraq boğazı kəsilən sənətçinin vəhşicəsinə öldürülmüş meyiti dəhşətli vəziyyətdə tapılıb.

Məlum olub ki, ABŞ hərbi qüvvələri Əfqanıstandan çəkiləndən sonra "Taliban"ın insanlara təzyiqi çoxalıb.



Hafiz Hacıyevin səhhəti ağırlaşdı - Xaricə aparıldıMüasir Müsavat Partiyasının sədri Hafiz Hacıyevin uzun müddətdən bəri siyasi arenada görünməməsinin səbəbi məlum olub.

Avrasiya.net Yenisabah.az-a istinadən xəbər verir ki, tanınmış siyasətçi səhhətində yaranmış problemlərə görə siyasi proseslərdən təcrid olunub.

Müasir Müsavat Partiyası sədrinin müavini Könül İsmayılovanın sözlərinə görə, Hacıyev səhhəti ilə əlaqədar xarici ölkələrdən birinə üz tutub. Hazırda onun həkim nəzarətində olduğu bildirilir.

Səhhəti ilə maraqlanmaq üçün siyasətçi ilə əlaqə saxlamağa çalışsaq da, telefonuna zəng çatmadı.