Şabranda ağır qəza - bir ailənin üç üzvü yaralandıŞabran rayonu ərazisində 3 nəfərin yaralanmasına səbəb olan qəza qeydə alınıb.

Hadisə Şabran- Zeyvə yolunun Dağbilici kəndindən keçən hissəsində rayonun Dağbilici kənd sakini Əlabbas Qulu oğlu Cəfərovun idarə etdiyi Vaz-2109 markalı avtomaşınla Zöhrəmli kənd sakini Şaiq Əlibala oğlu Nağdəliyevin idarə etdiyi Vaz-2106 markalı avtomobil toqquşub. Nəticədə Vaz-2106-da olan sürücü və sərnişinlər-sürücünün oğlu, 22 yaşlı Osman Nağdəliyev və həyat yoldaşı xəsarət alıblar.

Hadisə yerinə FHN-nin xiilasediciləri və polis əməkdaşları cəlb olunub. Sərnişinlərdən Osman Nağdəliyev avtomobildə sıxılıb qaldığından FHN-nin xilasedicilər onu çıxarıblar.



Qəzanın başvermə səbəbləri araşdırılır.
MHP Şuşada məktəb inşasından imtina etdi - Baxçalıdan AÇIQLAMAMHP lideri Dövlət Baxçalı Şuşada tikiləcək məktəblə bağlı "twit" atıb.

Baxçalı öz "Twitter" hesabında yazıb:

"16 yanvar 2021-ci ildə sosial mediada verdiyim bir açıqlama ilə Ülkü Ocaqları Təhsil və Mədəniyyət Vəqfi təşəbbüsü ilə Qarabağ qələbəsindən sonra Şuşada Azərbaycanın intellektual və bədii həyatında görkəmli yeri olan doqquz sinifli bir məktəb inşa etməyi öhdəmizə götürdük. Bu çərçivədə layihəmizi hazırladıq və ictimaiyyətlə paylaşdıq.

Hədəflədiyimiz məktəbə Azərbaycan Dövlət Himninin bəstəkarı və Şuşada anadan olan mərhum Üzeyir Hacıbəylinin adını verməyi planlaşdırmışdıq. Sözügedən məktəbin təməlqoyma günü kimi 30 yanvar 2021-ci il olmalı idi".

Baxçalı bəzi səbəblərə görə, Milliyyətçi Hərəkat Partiyasının Şuşada inşa etdirəcəyi məktəb layihəsindən imtina etdiyini bildirib. "Ancaq Azərbaycan rəhbərliyi layihəmizi qəbul etmədi və yeni və fərqli bir məktəb layihəsi hazırladı. Əlbəttə ki, bu qənaət onların ən təbii haqqıdır və onlara hörmət etməkdən başqa çarəmiz qalmayacaq.

Məktəbin tikintisini dəstəkləyən qardaşlarımızdan yardım və ianə adı altında yığılan pul təxirə salınmadan və eyni şəkildə qaytarılacaqdır". / "Yenisabah"
Türkiyə “Zagros” ləqəbli terrorçunu məhv etdi - FotoTürkiyənin təhlükəsizlik qüvvələri axtarışda olan daha bir terrorçunu məhv edib.

Axar.az xəbər verir ki, “Zagros” ləqəbli Səlahəddin Dədə və onunla birlikdə olan daha 4 PKK/YPG üzvü İraqın şimalındakı Mangeş kəndi ərazisində zərərsizləşdirilib.

Həmin terrorçuların şəxsiyyətinin müəyyənləşdirilməsi nəticəsində məlum olub ki, “Dilgəş” ləqəbli Məhməd Emin Alkaş və “Dara Beritan” ləqəbli Babək Ebdilselendeci də məhv edilənlər arasındadır. Dördüncü terrorçunun şəxsiyyəti hələ müəyyənləşdirilməyib.

Türkiyənin Milli Təhlükəsizlik Təşkilatı (MİT) S.Dədəni Suriyadan İraqa gələrkən izləməyə nail ola bilib. Mayın 19-da Suriyanı tərk edən terrorçunun Türkiyə Silahlı Qüvvələrinin “Pəncə-Şimşək” antiterror əməliyyatı keçirən birləşmələrinə qarşı terror aktı planladığı məlum olub. Təxminən 10 ildir terrorçuluq fəaliyyəti ilə məşğul olan S.Dədə 2012-2015-ci illərdə Türkiyənin Hakkari vilayətinin Yüksekova rayonu ərazisində bir sıra silahlı hücumların təşkilində fəal iştirak edib
Məhv edəcəyik!Elçin Mirzəbəyli

Prezident İlham Əliyevin 28 May Respublika günündə Ağdama səfəri, təkcə təməlqoyma mərasimləri ilə deyil, həm də dövlət başçısının rayon ictimaiyyətinin nümayəndələri ilə görüşündə açıqladığı, yaxın tarixdə baş verən hadisələrin mahiyyətini gün işığına çıxaran məqamlarla da yadda qaldı. Azərbaycanın 30 ilə yaxın bir zaman kəsiyində münaqişənin sülh və diplomatik həllinə sadiq qaldığına, lakin buna baxmayaraq, ikili standartlar siyasəti ilə qarşılaşdığına diqqət çəkən Azərbaycan Prezidentinin hadisələrin xronikasına uyğun şəkildə toxunduğu məqamlar, İkinci Qarabağ savaşının baş vermə səbəblərini bir daha göz önünə sərgiləyir.

Məhz bu baxımdan, Azərbaycan torpaqlarının azad edilməsi, işğala, ardı-arası kəsilməyən təxribatlara son qoyulması üçün müharibənin yeganə və istisnasız çıxış yolu kimi gündəmə gəlməsinə, baş verməsinə görə, Prezidentin vurğuladığı kimi, həm də 30 ilə yaxın davam edən danışıqlar müddətində aqressora – işğalçıya təzyiq göstərməyən, onu sülhə məcbur etməyən, “Azərbaycan torpağından çıx” deməyən, qəsbkara vaxt qazandıranlar da məsuliyyət daşıyırlar.

Haşiyə:

Qeyd edim ki, Ermənistanın ilk prezidenti Levon Ter-Petrosyan son müsahibəsində danışıqlar prosesində rəsmi İrəvanın nümayiş etdirdiyi mövqeyin yanlış olduğuna diqqət çəkib və dolayısıyla işğalçı ölkəyə vaxt tanımaqla prosesin uzadılmasına imkan yaradan qüvvələrin də bu prosesdə rol oynadıqlarını etiraf edib. Ter-Petrosyanın qənaətinə görə, əgər münaqişə danışıqlar yolu ilə həll edilsəydi, indi Rusiya sülhməramlılarının müşahidəsi altında olan, etnik ermənilərin yaşadığı ərazilərin inkişafı üçün imkan yaranacaqdı.

Sitat: “Bütün Avropada sərhəd məfhumu yoxdur. İnkişaf etmiş ölkələrdə sərhədin önəmi yoxdur”. Ermənistanın ilk prezidentindən iqtibas gətirdiyim son iki cümlə də sübuta yetirir ki, ermənilərə Azərbaycanın tərkində muxtariyyət statusunun verilməsi, əslində nəinki ərazilərimizdə yaşayan etnik ermənilər, hətta Ermənistanın özü üçün tarixi fürsət imiş və onlar bu fürsəti qaçırmaqla əldə də biləcəkləri bütün imkanlardan məhrum olublar. İndi isə danışıqlar masasında əlçatan olan muxtariyyət “satusu” cəhənnəmə yola salınıb və oradan geriyə qayıdış imkanı yoxdur.

Bu yazıda Levon Ter-Petrosyanın sözügedən müsahibəsində yer alan bəzi məqamlara da nəzər salmağı vacib sayıram. Ermənistanın ilk prezidenti deyir:
.”..Biz ona görə məğlub olduq ki, zamanın axışını dərk edə bilmədik. Zaman siyasətdə ən vacib faktordur.
...Əgər 90-cı illərdə təklif edilən mərhələli həll varinatına belə getsəydik, indi bizim xalq xöşbəxt olardı.
...Zaman Azərbaycanın xeyrinə işlədi. İqtisadi baxımdan Azərbaycan gücləndi,
Ermənistan isə zəiflədi, Azərbaycan müasir ordu yaratdı, bizim ordu isə miqrasiya səbəbindən kiçildi. Gizli olan məsələlər var ki, onlardan danışmıram, indi bizim ordunun sayı 90-cı illərdəkindən azdır. İndi nəyə ümid edirlər?”

Bəli, indi nəyə ümid edirlər?

Bəlkə, liderləri Nikol Paşinyanın kapitulyasiya aktına hansı şəraitdə, necə imza atdığından xəbərsizdirlər? Bunun necə baş verdiyini bütün dünya bilir... Hətta uzun illərdən bəri işğalçının başını tumarlayan, himayə edənlər, o cümlədən dünyanın müxtəlif ölkələrinin müharibə cinayətkarlarının lobbiçiliyi ilə məşğul olan siyasətçiləri, dünya erməniliyinin qurduğu cinayətkar şəbəkənin açar fiqurları da həmçinin... Məşhur lətifədə deyildiyi kimi, “bilməyənlər bilənlərdən soruşsin”.
Və bütün bunlardan sonra, təxribatçı əməllərindən əl çəkməyənlər başa düşməlidirlər ki, daha onlara “öyüd-nəsihət” verən olmayacaq.

Prezident İlham Əliyevin dediyi kimi, “əgər xalqımızın, dövlətimizin təhlükəsizliyinə zərrə qədər təhlükə olarsa, dərhal yerindəcə düşməni məhv edəcəyik”. Vəssalam!

Bayden Ermənistana 24 milyon ayırmaq istəyirABŞ Prezident Administrasiyası Ermənistana müharibədən sonrakı dövrdə yardım üçün 24 milyon dollarlıq paket təklif edir.

Axar.az xəbər verir ki, bu məlumatı Amerika Erməniləri Milli Komitəsi (ANCA) yayıb.

ANCA bu yardımın 600 min dollarlıq hissəsinin hərbi yardım olmasının təklif edildiyini bildirib.
Azərbaycanda nazirliyin 30-a yaxın əməkdaşı işdən çıxarıldıƏmək və Əhalinin Sosial Müdafiəsi Nazirliyi (ƏƏSMN) yanında Dövlət Sosial Müdafiə Fondunun (DSMF) sədri Himalay Məmişov 30-a yaxın şəxsi işdən azad edib.

Dövlət Sosial Müdafiə Fondunun Qazax Rayon Şöbəsinin 30 əməkdaşı işdən azad olunaraq, Fondun Tovuz rayonun şöbəsinə köçürülüb.

İlkin məlumatlara görə, Dövlət Sosial Müdafiə Fondunun Qazax və Tovuz filialları birləşdirilərək, regional mərkəz yaradılır.

Hazırda Fondun Qazax Rayon Şöbəsində bir neçə əməkdaş qalıb, rəhbərlik səlahiyyətlərinin icrası isə müvəqqəti olaraq Nemət Mərdalıyeva həvalə olunub./Oxu.az


Koronaya yoluxanların sayı açıqlandıAzərbaycanda koronavirus (COVID-19) infeksiyasına 164 yeni yoluxma faktı qeydə alınıb, 419 nəfər müalicə olunaraq sağalıb.

Nazirlər Kabineti yanında Operativ Qərargahdan Avrasiya.net-ə verilən məlumata görə, analiz nümunələri müsbət çıxan 7 nəfər vəfat edib.

İndiyədək ölkədə ümumilikdə 333 723 nəfərin koronavirus infeksiyasına yoluxması faktı müəyyən edilib, onlardan 323 617 nəfər müalicə olunaraq sağalıb, 4 903 nəfər vəfat edib. 5 203 nəfər aktiv xəstə sayını təşkil edib.

Son sutka ərzində yeni yoluxma hallarının müəyyənləşdirilməsi ilə əlaqədar 7 004, bu günə qədər isə ümumilikdə 3 503 639 test icra olunub.
Polis azərbaycanlı gənci güllələdi - VideoNovosibirsk yaxınlığında yol polisi azərbaycanlını başından güllələyib.

Avrasiya.net Bakupost.az-a istinadla xəbər verir ki, bu barədə görüntülər sosial şəbəkələrdə yayılıb.

Məlumata görə, polis təqib etdiyi şəxslərdən birinə ehtiyatsızlıqdan atəş açıb. Hadisənin mayın 28-də Sibir yolunda baş verdiyi bildirilir.

Qeyd edilir ki, “Toyota” markalı avtomobilin sürücüsü yol polisi məmurunun dayanma tələbini yerinə yetirməyib. Yol polisi qısa müddətdə avtomobilin sürücüsünü saxlamağa müvəffəq olub. 38 yaşlı yol polisi müfəttişi şübhəli şəxsi xidməti avtomobilinə aparıb. Bu zaman saxlanılanın 19 yaşlı bir tanışı ona müdaxilə etməyə başlayıb.

Polis səlahiyyətlərindən kənara çıxıb, 19 yaşlı gəncə qarşı şiddət tətbiq edib. Nəticədə gənc başında ağır güllə yarası alıb. Hadisənin səbəbkarı 38 yaşlı polisə qarşı “Rəsmi səlahiyyətləri aşma (Rusiya Federasiyası Cinayət Məcəlləsinin 286-cı maddəsinin 3-cü hissəsi) və “Laqeydliklə ağır bədən xəsarəti yetirmə” (Cinayət Məcəlləsinin 118-ci maddəsinin 1-ci hissəsi) maddələri ilə cinayət işi açılıb. Faktla bağlı araşdırmalar davam etdirilir.
Kiyevdə azərbaycanlılar döyüldü, səfirlik işə qarışdıUkraynanın paytaxtı Kiyevdə bir qrup azərbaycanlı hücuma məruz qalıb.

Avrasiya.net Report-a istinadən xəbər verir ki, hadisə mayın 28-də axşam saatlarında bazarların birində qeydə alınıb.

Belə ki, Əliverdi və Fikrət Məmmədov qardaşları, eləcə də daha bir neçə azərbaycanlı polis geyimində olan naməlum şəxslər tərəfindən döyülüblər.

Hücuma məruz qalan azərbaycanlıların sözlərinə görə, onlara qarşı beşbarmaqdan istifadə olunub.

Yaralı azərbaycanlılar Kiyev şəhər Travmatologiya Mərkəzinə yerləşdiriliblər.

Azərbaycanın Ukraynadakı səfirliyi Kiyevdə azərbaycanlıların döyülməsi faktını nəzarətə götürüb. Səfir Elmira Axundova bununla bağlı müvafiq tapşırıq verib.

Azərbaycan Daxili İşlər Nazirliyinin əməkdaşı, konsul və diaspor nümayəndələri xəstəxanadakı yaralılara baş çəkiblər.

Eyni zamanda onlar Ukrayna hüquq-mühafizə orqanlarının rəhbər şəxsləri ilə görüşərək araşdırmanın gedişatını nəzarətə götürüblər.
Aktivist Andreia Hiromi San Pauloda “Liberdade do Azerbaijan” mövzulu ilk küçə sənətini hazırlayıbAktivist Andreia Hiromi, 2021-ci il Respublika Günü münasibətilə Azərbaycanın Braziliyadakı səfiri cənab Elxan Poluxovla birlikdə cəsarətli bir layihə həyata keçirib.

Avrasiya.net xəbər verir ki, o, pandemiyanın ortasında San Paulo şəhərində “Liberdade do Azerbaijan” mövzulu ilk küçə sənətini hazırlayıb.

Quraşdırılmış 3 metr hündürlükdə və 5 metr enində olan interaktiv reklam lövhəsində qanadları Azərbaycan bayrağının rənglərində olan insan və kənarlarda isə Azərbaycanın turizm obyektlərinin rəsmləri təsvir olunub. Bu bilbord braziliyalı Andreia Hiromi və azərbaycanlı Emin Şəmsiyev tərəfindən birlikdə hazırlanıb. Quraşdırma işi isə "FourServ"-in dəstəyi ilə tamamlanıb. (@FourServ)

Bilborddan əlavə olaraq böyük dünya metropollarında “qraffiti” kimi tanınan bir küçə sənət əsəri də yaradılıb. Əsərdə birləşən Azərbaycan və Braziliya bayraqları, bir tərəfdə Azərbaycanın ənənəvi rəsmləri (Heydər Əliyev Mədəniyyət Mərkəzi, "Flame Towers", Qız Qalası və milli Azərbaycan paltarında olan qızlar) digər tərəfdə isə Bakının qardaş şəhəri olan Rio de Janeiro şəhəri və onun “Pão de Açucar”, “Cristo Redentor” və Copacabana çimərliyi kimi turistik yerlərinin rəsmləri yer alıb. Rəssam @borrachaoamericano tərəfindən ərsəyə gətirilmiş qraffitinin ümumi sahəsi 8x7 kvadrat metri əhatə edir.

Aktivist Andreia Hiromi layihə barədə belə deyib: "Biz bu hərəkətimizlə, incəsənət, mədəniyyət və iki xalq arasındakı böyük dostluqdan bəhrələnərək San Pauloda ilk Azərbaycan bayrağının açılışını etdik."

Braziliyanın yaşadığı çətin anlara hörmət əlaməti olaraq, səfirimiz yerli sakinlərə bayraqlarla bəzənmiş hədiyyə səbətləri və içində “Hamınız xoşməramlı səfirsiniz!” sözləri yazılmış məktublar təqdim etdi. Əməkdaşlıqlarına görə onlara təşəkkür etdi. Bütün hədiyyələr və ianələr şəxsən Andreia Hiromi tərəfindən ünvanlarına çatdırıldı.

Azərbaycana qarşı xüsusi sevgisi olan Andreia Hiromi sonda bu sözləri deyib: "İndi bütün azərbaycanlılar San-Paulo şəhərində xüsusi bir yerə sahibdirlər. San-Paulo şəhərində bu qədər çox erməni olsa da, Azərbaycanın dostluq, mədəniyyət və incəsənət ruhunu əngəlləməyə gücləri çatmayacaq."







Layihənin fotoları @Evertonphotographyy tərəfindən çəkilmişdir.