Növbədə kim(lər)dir?Ölkə başçısı bəyan edir ki, yerlərdəki məmur özbaşınalığı ilə bağlı ona siqnal ötürək. Bunun alt qatda olan bir mənası budur ki, müvafiq dövlət qurumları ölkə başçısına bəzən dəqiq və dolğun məlumat vermir, digəri isə ondan ibarətdir ki, məmur özbaşınalığı artıq o həddə çatıb ki, vətəndaşlarla dövlət hakimiyyəti arasındakı etimad bağlarını kökündən zədələyir, insanları ümidsizləşdirir, inamsızlaşdırır və bu da yolverilməzdir, yəni zaman itirmədən qarşısı alınmalı, buna şərait yaradanlar ciddi şəkildə cəzalanmalıdır, nəticədə xalq-dövlət birliyi daha da möhkəmlənməlidir. Təqdirəlayiqdir bu. Amma bir neçə ildir ki, eyni mözu ilə bağlı gur səslə həyəcan siqnalı (SOS) verirəm, nə eşidəni var, nə də eşidib əlac qılanı. Dönə-dönə ölkə mətbuatında xalq və dövlət əmlakının dağıdıldığını faktlarla ictimailəşdirirəm, faydası olmur və əksinə, bir az da dağıtma tempi sürətlənir. İndi bunu necə başa düşək? Siqnal deyilən nəsnə bundan o yana necə olmalıdır ki?..

Səsin eşidilmirsə – demək, inamsızlıq və güvənsizlik məqsədli şəkildə sənə təlqin olunur. Çıxılmazlıq labiritində bunu hüquqsuzluğun sənə olan son diqtəsi kimi də dəyərləndirə bilərsən. Və səndə qeyri-ixtiyari belə bir fikir yarana bilər ki, ölkədə sanki bir idarəolunmazlıq hökm sürür, dövlətin bütün idarəetmə sistemi çökdürülür, onun təməl prinsipləri sarsıdılır! Və artıq, sənə ayrı heç bir alternativ yol saxlanılmır. O zaman hamı – bütün məmur ordusu sənin nəzərlərində eyniləşir və hətta, istəməsən də özünü narazı kəsimin ön sıralarında hiss edirsən. Beləcə, haqq və hüquqların uğrunda mücadilən özünün yeni mərhələsinə qədəm qoyur...

İndi söyləyəcəyim problem bütün ölkə üzrə azacıq nisbət fərqilə xarakterikdir, və adını çəkəcəyim məkan (Masallı) burada əlahiddə olaraq fərqlənmir. Lakin məsələnin maraqlı tərəfi də budur ki, mövcud problemi ictimailəşdirdikcə daha çox onun əksi istiqamətində “irəliləyişə” şahidlik edirik. Diqqət edin, rayonun Boradigah qəsəbəsində (əsasən də “Çaylıq” adlanan ərazidə) bir çoxlarının pay torpaqları zəbt olunub, böyük ərazidə meşə zolaqları məhv edilib və ərazisi mənimsənilib, su hövzələri dağıdılaraq ərazisindən başqa təyinatı üzrə istifadə edilir. Bunların qarşısının alınması məqsdilə qəsəbə icra nümayəndəsini, bələdiyyə sədrini və üzvlərini, rayon rəhbərliyini dəfələrlə məlumatlandırsam da, bugünədək müsbətə doğru heç bir əməli iş görülməyib.

Məsələnin çözülməsi istiqamətində əməli addımların atılmamasını sizcə, necə dəyərləndirməliyik? Yenə də şablon bir fikrə istinad edək ki, guya, rayon rəhbərliyinin və daha yuxarı aidiyyəti qurumların bundan xəbəri yoxdur. Hərçənd ki, belə deyil, hətta belədirsə, o zaman ortaya iki nəticə çıxacaqdır: 1) baş verənlərdən xəbərdar deyilsiniz və sizi düzgün məlumatlandırmırlar; 2) xəbərdarsınız, lakin əhəmiyyət vermirsiniz. Təbii ki, hər iki hal qəbuledilməzdir.

Dəfələrlə rayon rəhbərliyinə, qəsəbə icra nümayəndəsinə, yerli bələdiyyə sədrinə və üzvlərinə bildirmişəm ki, bu zamanadək zəbt olunmuş ərazilərdə tikilən evlər və tikilməkdə olanlar istisna olmaqla, ən azından digər ərazilərin qanunsuz tutulması durdurulsun, meşə zolaqlarına qənim kəsilənlərin və ərazisini mənimsəyənlərin, su hövzələrini dağıdıb öz şəxsi istifadəsi üçün çalışanların qarşısı alınsın, elə bil daşa-qayaya deyirsən. Gerçək olan budur ki, bütün bunlar sanki məqsədli şəkildə edilir, dövlət və xalq əmlakını dağıdanlara qarşı heç bir qanunamüvafiq ölçü götürülmür. Sual yaranır: rayonda dövlət qanunları qeyri-işlək vəziyyətdədirmi? Burada Azərbaycanın dövlət qanunları işləmirmi? Vətəndaşların məqsədli olaraq dövlətə, dövlətçiliyə olan inamı sarsıdılır, amma nədən Baş Prokurorluq susur, DTX bütün bunları görmür?

Ötən yazılarımda vurğuladığım kimi, bütün bunlar, şübhəsiz ki, qəsəbə bələdiyyəsi və icra nümayəndəsinin biganəliyi, xüsusən də bacaracaqsızlığı, rayon rəhbərliyinin bilavasitə buna şərait yaratması, Ekologiya və Təbii Sərvətlər Nazirliyinin, həmçinin İqtisadiyat Nazirliyi yanında Əmlak Məsələləri Dövlət Xidməti regional şöbələrinin və onlara nəzarət edən daha yuxarı instansiyaların yarıtmaz fəaliyyətinin nəticəsidir.

Təbii ki, Boradigah qəsəbəsində baş verən vandallığa görə, rayonun sabiq icra başçısı (hazırda Ağcabədiyə rəhbərlik edən) Rafil Hüseynov və indiki başçı Şahin Məmmədovdan, bu işə birbaşa məsul olan digər məsul şəxslərdən nə zamansa bunun hesabı sorulacaq - buna inanıram. Amma bunlar hələ ki, baş vermir. Qanunların “sərt və səmt küləyi” hələ ki, bu tərəflərə istiqamət götürməyib.

Külək qalxıbsa mütləq tozanağı olacaq. Burulğana kim(lər) düşəcək, yaxud növbədə kim(lər)dir, təbii ki, bunu da zaman göstərəcək.

Vasif Hüseynov
Dünya çempionatında faciə: Boksçu rinqdə öldüİordaniyalı boksçu Raşed əl-Svaisat Polşanın Kelts şəhərində gənclər arasında keçirilmiş dünya çempionatında aldığı zərbədən dünyasını dəyişib.

Avrasiya.net xəbər verir ki, bu barədə Beynəlxalq Həvəskar Boks Assosiasiyasının (AIBA) rəsmi saytı məlumat yayıb.

Xəbərə görə, 19 yaşlı idmançı aprelin 16-da 81 kq çəki dərəcəsində estoniyalı Anton Vinoqradovla üçüncü raund qarşılaşmasında öldürücü zərbəyə məruz qalıb. Huşunu itirərək yerə yıxılan əl-Svaisat xəstəxanaya çatdırılıb. Həkimlərin bir neçə gün davam edən səylərinə baxmayaraq, onun həyatını xilas etmək mümkün olmayıb.

Faciəvi hadisə ilə əlaqədar mərhumun əzizlərinə və komanda yoldaşlarına başsağlığı verilib.

Qeyd edək ki, dünya çempionatında Azərbaycan yığması bir medalla kifayətlənib. Nicat Hüseynov 49 kq çəki dərəcəsində bürünc medala sahib olub.
Hüseynbala Mirələmovdan “video qalmaqalı” ilə bağlı yeni açıqlama: kağız axtarırmışSabiq deputat Hüseynbala Mirələmov məlum “video qalmaqalı” ilə bağlı yeni açıqlama verib.

O, bildirib ki, əslində heç də hamının başa düşdüyü kimi qeyri-əxlaqi hərəkət etməyib, əli ilə xanım köməkçisinə bilməyərəkdən toxunub.

Avrasiya.net-in məlumatına görə, bu haqda Hüseynbala Mirələmovla danışan “Təzadlar” qəzetinin baş redaktoru Asif Mərzili sosial şəbəkədə yazdığı qeydində bildirib:

“İndicə Hüseynbala Mirələmovla danışdım, bir daha o qalmaqallı hadisəyə dair mövqeyini soruşdum... Bu Facebok istifadəçiləri onu əməlli-başlı çaşdırıblar.
Hüseynbala müəllim mənə bir resept kağızı göndərdi: sən demə bir müddət imiş ki, gözündən müalicə alırmış, yəni uzağı görmə pistəşib, eynəksiz ətrafı tor görür. Konfrans zamanı isə o, əlini atıb köməkçisindən çıxış mətnini istəyirmiş, əli ilə həmin kağızı axtarırmış... Bunu da mərdimazarlar videoqeydə alıb, sosial şəbəkələrdə pis mənada yayımlayıblar... Məsələ belədir!”.

H.Mirələmov daha əvvəl verdiyi açıqlamada videonun şantaj xarakterli olduğunu qeyd etmişdi.

"...O mənim qızım yerindədir. Ayıbdır, sadəcə ayıbdır... Məni şantaj etdilər. Bu, universitetdə konfrans zamanı olub. Videonu yayan adamlar tapılmalıdır!"ş

Xatırladaq ki, H.Mirələmov məlum video yayılandan sonra Neft və Sənaye Universitetindəki kafedra müdiri və YAP Xətai rayon təşkilatının sədri vəzifəsindən azad edilib. Eyni zamanda, YAP sıralarından da xaric olunub.
"Prezidentimiz diplomatik ismarıclardan yerində və effektiv istifadə etməyi yaxşı bacarır"Aprelin 26-da öz işinə başlayan Asiya və Sakit okean üçün İqtisadi və Sosial Komissiyasının "Asiya və Sakit okean hövzəsində regional əməkdaşlıq vasitəsilə böhranlardan sonra daha güclü inkişafın təmin olunması" mövzusuna həsr edilən 77-ci sessiyasının Asiya və Sakit okean regionu ölkələrinin dövlət və hökumət başçılarının çıxışları seqmentində Azərbaycan Respublikasının Prezidenti İlham Əliyevin videoformatda çıxışında bir neçə məqam xüsusilə diqqətimi çəkdi.

Birincisi, dövlət başçımız hazırda qarşımızda işğaldan azad olunmuş ərazilərdə tamamilə dağıdılmış şəhər və kəndlərin, bütün mədəni və dini abidələrin bərpası kimi nəhəng vəzifənin dayandığını qeyd etdi və yenidənqurma prosesi çərçivəsində “ağıllı şəhər”, “ağıllı kənd” və “yaşıl enerji” konsepsiyalarından istifadə olunacağını vurğuladı. Eyni zamanda dost ölkələrdən olan şirkətləri işğaldan azad olunmuş ərazilərimizə, irimiqyaslı yenidənqurma işlərinə dəvət etdi. Fikir verdinizsə, cənab Prezident həmin məqamda işğaldan azad edilmiş ərazilərimizin miqyasını Avropanın inkişaf etmiş dövlətlərindən biri olan Lüksemburqla müqayisə etdi və dedi ki, mən sizi Lüksemburqdan dörd dəfə böyük olan ərazidə yenidənqurma işlərinə dəvət edirəm.

Prezident nəyə görə Qarabağı məhz Lüksemburqla müqayisə etdi? Bu çox önəmli və həssas məqamdır. Məsələ burasındadır ki, Avropanın inkişaf etmiş cırtdan ölkəsi sayılan Lüksemburq bir sıra mühüm məqamlarda ermənilərin tərəfini tutur, Azərbaycana qarşı böhtan xarakterli çıxışlar edir. Ona görə də Prezident İlham Əliyev bir qədər istehzalı tonla Lüksemburqla Qarabağın ərazisini müqayisə etdi, bizim işğaldan azad etdiyimiz, bərpa edəcəyimiz ərazilərin hətta 4 Lüksemburqa bərabər olduğunu xüsusi olaraq vurğuladı. Prezidentin bu istehzası, kinayəsi Lüksemburqun ermənipərəst siyasi elitası üçün kifayət qədər böyük təsir gücünə malikdir. Prezidentimiz diplomatik ismarıclardan yerində və effektiv istifadə etməyi yaxşı bacarır.

Dövlət başçımızın çıxışında diqqətimi çəkən ikinci məqam Zəngəzur dəhlizi ilə bağlı fikirlər səsləndirməsi oldu. Azərbaycanın regionda dayanıqlı sülh və təhlükəsizliyi təmin etmək arzusunda olduğunu bildirən və ölkəmizin Şərq-Qərb, Şimal-Cənub, Şimal-Qərb nəqliyyat dəhlizləri kimi regional bağlantı layihələrinin icrasına mühüm töhfə verdiyini qeyd edən Prezident İlham Əliyev eyni zamanda Zəngəzur dəhlizi üzərində çalışdığımızı da vurğuladı və tərəfdaş ölkələri bu layihənin icrasında iştirak etməyə dəvət etdi: “Hazırda biz Azərbaycan ərazisindən Asiyanı Avropa ilə birləşdirən Şərq-Qərb dəhlizinin tərkib hissəsi olacaq “Zəngəzur nəqliyyat dəhlizi” üzərində çalışırıq. Bu dəhliz Azərbaycana Avrasiyanın nəqliyyat və logistika mərkəzi kimi mövqeyini gücləndirməyə imkan verəcək. Mən Asiya və Sakit okean hövzəsindən olan tərəfdaş ölkələri bu regional layihənin potensialını nəzərdən keçirməyə dəvət edirəm”.

Cənab Prezident bununla bir daha Zəngəzur dəhlizinin bölgə və beynəlxalq yükdaşımalarda mühüm həlqə olacağını vurğulamış oldu. Bu həm də İlham Əliyevin qətiyyətini göstərir. Bəli, Azərbaycanın dövlət başçısı Zəngəzur dəhlizinin açılmasında maraqlı və israrlıdır. Çünki bu dəhlizin açılması son nəticədə həm türk dünyasının coğrafi-iqtisadi birləşməsini təmin edəcək, həm də ki, öz tarixi torpaqlarımıza qovuşmağımız üçün yeni hədəfləri stimullaşdıracaq. Bu mənada cənab Prezident “Azərbaycan xalqı 101 il bundan əvvəl bizim əlimizdən alınmış Zəngəzura qayıdacaqdır!” sözünü heç də əbəs yerə demir. Bu Azərbaycan liderinin ermənilərə də, onun havadarlarına da açıq ismarıcıdır. Biz Prezidentimizin bu cür qətiyyətli mövqeyini təqdir edirik.

Prezidentin sözügedən çıxışında diqqətimi çəkən növbəti məqam “Vaksin millətçiliyi”, vaksinlərin inkişaf etmiş və inkişaf etməkdə olan ölkələr arasında ədalətsiz bölgüsü məsələsi ilə bağlı söylədiyi fikirlər idi. Dövlət başçısı bildirdi ki, Azərbaycan pandemiyaya qarşı qlobal fəaliyyətin səfərbər edilməsi səylərinin önündə gedir, lakin “Vaksin millətçiliyi”, vaksinlərin inkişaf etmiş və inkişaf etməkdə olan ölkələr arasında ədalətsiz bölgüsü bizi dərindən narahat edir: “Dünyada mövcud vaksinlərin 53 faizi 30-dan çox zəngin dövlət tərəfindən sifariş edilib. Azərbaycan həm Qoşulmama Hərəkatının sədri kimi, həm də milli səviyyədə dünyada vaksinlərin ədalətli bölgüsü və vaksinlərin inkişaf etməkdə olan və ən az inkişaf etmiş ölkələr üçün əlçatanlığının təmin edilməsi istiqamətində mübarizəsini davam etdirəcəkdir”.

Azərbaycanın dövlət başçısının ölkələrin vaksinlərə bərabər çıxışı ilə bağlı bu cür prinsipial və ədalətli mövqeyinin dünyanın əksər ölkələri tərəfindən müsbət qarşılanacağına əminik. Təsadüfi deyil ki, bu yaxınlarda BMT-nin İnsan Hüquqları Şurası Azərbaycan tərəfindən Qoşulmama Hərəkatı adından irəli sürülmüş, ölkələrin vaksinlərə bərabər çıxışı ilə bağlı qətnaməni yekdilliklə qəbul edib. Bu onu göstərir ki, Azərbaycan Qoşulmama Hərəkatının üzv ölkələri qarşısında və ümumiyyətlə, insanlıq qarşısında məsuliyyətini yaxşı dərk edir və öz vəzifəsinin öhdəsindən layiqincə gəlir. Pandemiya kimi həssas və kritik bir məqamda Qoşulmama Hərəkatı kimi dünyanın BMT-dən sonra ikinci ən nüfuzlu beynəlxalq təşkilatına rəhbərlik etmək heç də asan məsələ deyil. Bir sıra iri dövlətlər koronavirus dönəmində peyvənd quldurluğu ilə məşğul olduğu bir vaxtda, Azərbaycan isə koronavirusla bağlı əksəriyyətinin ən az inkişaf etmiş olduğu 30-dan artıq ölkəyə humanitar və maliyyə yardımı göstərib. Təkcə bu faktın özü kimin kim olduğunu aydın göstərir.

Əlisahib Hüseynov,
Milli Həmrəylik Partiyasının sədri
Prezident İlham Əliyev: Azərbaycan-İran sərhədi dostluq sərhədidirAzərbaycan-İran sərhədi dostluq sərhədidir.

Trend-in məlumatına görə, bunu Prezident İlham Əliyev aprelin 26-da Cəbrayıl rayonunda Dövlət Sərhəd Xidmətinin hərbi hissəsinin açılışından sonra hərbi qulluqçuları ilə görüşündə çıxışı zamanı deyib.

Dövlət başçısı bildirib:

"Vətən müharibəsi dövründə Azərbaycan-İran sərhədi tam bərpa edilib, işğal altında olmuş 132 kilometr sərhəd bərpa edilibdir. Müharibədən dərhal sonra sərhəd boyunca bütün lazımi istehkam, mühafizə işləri görülməyə başlamışdır. Bu hərbi hissənin fəaliyyətə başlaması bunun bariz nümunəsidir. Bütün sərhəd boyunca - həm Azərbaycan-İran, həm Azərbaycan-Ermənistan sərhədləri boyunca lazımi işlər aparılır.

Azərbaycan-İran sərhədi dostluq sərhədidir. Bu sərhədin qorunması Azərbaycan-İran əlaqələrinin inkişafı üçün də çox böyük önəm daşıyır. Bizim İran İslam Respublikası ilə digər istiqamətlərdə sərhədimiz var və bu, sözün əsl mənasında, dostluq, əməkdaşlıq sərhədidir. Hər iki ölkənin sərhəddən keçən vətəndaşları bundan faydalanırlar. Eyni zamanda, ildən-ilə artan yüklərin həcmi Azərbaycan-İran əlaqələrinin inkişafından xəbər verir".

Bu il ilk təyyarələri Füzulidə qəbul edə biləcəyik - PrezidentAzad edilmiş torpaqlarda ikinci hava limanının tikintisinə start verilibdir. Artıq Füzuli Beynəlxalq Hava Limanının tikintisi uğurla gedir. Bu il Füzuli hava limanının uçuş-enmə zolağı istismara veriləcək. Beləliklə, biz bu il ilk təyyarələri Füzulidə qəbul edə biləcəyik.

Avrasiya.net xəbər verir ki, bu fikirləri Prezident İlham Əliyev aprelin 26-da Zəngilanda Beynəlxalq Hava Limanının təməlini qoyarkən deyib.

Dövlət başçısı qeyd edib ki, Zəngilan rayonunun coğrafi yerləşməsi və burada olan imkanlar təbii ki, Zəngilanı beynəlxalq nəqliyyat-logistika mərkəzinə çevirmək üçün imkanlar yaradır:

"Təsadüfi deyil ki, hava limanı məhz Zəngilanda inşa ediləcək. Çünki coğrafi vəziyyətə baxdıqda hər kəs görə bilər ki, Füzuli, Zəngilan və ondan sonra Laçın rayonunda inşa ediləcək üçüncü beynəlxalq hava limanı bütün Qarabağ və şərqi Zəngəzur zonasını Zəngilan daxil olmaq şərtilə əhatə edəcək. Buradan dəmir yolu, avtomobil yolu keçəcək, Naxçıvana yol açılacaq. Əlbəttə ki, Zəngilanın gələcək uğurlu sosial-iqtisadi inkişafı üçün bu hava limanının böyük rolu olacaq".
İlham Əliyev Zəngilanda beynəlxalq hava limanının təməlini qoydu, əhəmiyyətindən DANIŞDIPrezident İlham Əliyev aprelin 26-da Zəngilan rayonunda beynəlxalq hava limanının təməlini qoyub.

Avrasiya.net xəbər verir ki, ölkə başçısı təməlqaoymada bu hava limanının bölgənin inkişafında mühüm rol oynayacaq:

Prezident İlham Əliyev çıxış edərək deyib:

- Bu gün Zəngilan Beynəlxalq Hava Limanının təməl daşını qoyduq. Yaxın gələcəkdə Zəngilanda beynəlxalq hava limanı inşa ediləcək. Bu hava limanının uçuş-enmə zolağı üç kilometrə bərabər olacaq. Bu hava limanı bütün növ təyyarələri, o cümlədən ağır yük təyyarələrini qəbul etməyə qadir olacaq.

Azad edilmiş torpaqlarda ikinci hava limanının tikintisinə start verilibdir. Artıq Füzuli Beynəlxalq Hava Limanının tikintisi uğurla gedir. Bu il Füzuli hava limanının uçuş-enmə zolağı istismara veriləcəkdir. Beləliklə, biz bu il ilk təyyarələri Füzulidə qəbul edə biləcəyik.

Zəngilan rayonunun coğrafi yerləşməsi və burada olan imkanlar təbii ki, Zəngilanı beynəlxalq nəqliyyat-logistika mərkəzinə çevirmək üçün imkanlar yaradır. Təsadüfi deyil ki, hava limanı məhz Zəngilanda inşa ediləcək. Çünki coğrafi vəziyyətə baxdıqda hər kəs görə bilər ki, Füzuli, Zəngilan və ondan sonra Laçın rayonunda inşa ediləcək üçüncü beynəlxalq hava limanı bütün Qarabağ və şərqi Zəngəzur zonasını Zəngilan daxil olmaq şərtilə əhatə edəcək. Buradan dəmir yolu, avtomobil yolu keçəcək, Naxçıvana yol açılacaq. Əlbəttə ki, Zəngilanın gələcək uğurlu sosial-iqtisadi inkişafı üçün bu hava limanının böyük rolu olacaqdır.

Zəngilanda bu gün birinci kənd layihəsi artıq icra edilməyə başlamışdır. Ağalı kəndinin təməl daşı qoyulmuşdur. Bu, böyük qayıdışın birinci
addımıdır. Biz müharibədən bir neçə ay keçəndən sonra artıq bu işlərə də start verdik. İnfrastruktur işləri öz qaydasında davam edir. İndi birinci “ağıllı kənd” layihəsi olan Ağalı kəndinin bərpasına start verilib. Ağalı kəndi, əslində, üç kənd – Birinci, İkinci, Üçüncü Ağalı kəndləri oktyabrın 28-də işğalçılardan azad edilmişdir. Altı aydan sonra Ağalıda yeni kəndin təməl daşı qoyuldu və bu nümunəvi kənd olacaq. Çünki bu kənddə tətbiq olunacaq texnologiyalar ən müasir standartlara cavab verir. Həm tikiləcək evlər, ictimai binalar, sosial obyektlər, həm də iş yerləri, əkin sahələri müəyyən edilibdir. Zəngilanın bütövlükdə təbiəti və təbii sərvətləri bu rayonu Azərbaycanın ən qabaqcıl rayonlarının birinə çevirmək üçün imkanlar verəcəkdir.

Böyük qayıdış başlayıb. Bu gün burada təməl daşını qoyduğum hava limanı dövlətimizin gücünü göstərir. Bir qədər bundan aralıda yeni Horadiz-Zəngilan avtomagistral yolunun təməli də qoyulacaq. Mövcud yola paralel olan 4-6 zolaqlı bu yol geniş imkanlar açacaq. Zəngilanı Azərbaycanın digər rayonları və Naxçıvan Muxtar Respublikası ilə birləşdirmək üçün bu layihələrin çox böyük əhəmiyyəti vardır. Bu hadisə münasibətilə zəngilanlıları və bütün Azərbaycan xalqını təbrik edirəm.

Vətənin şəhid oğluHeybətalı Məmmədovun həyat hekayəsi

Şəhidlik ən uca zirvə, torpaq uğrunda can fəda etməkdir. O torpaq ki, sənə oğul deyir. Vətən, torpaq kimi müqəddəs məfhumlar qarşısında hər kəsin borcu boya-başa çatdığı doğma yurdu qorumaqdır. Müqəddəs "Qurani-Kərim"də də buyurulur ki, şəhidlik və qazilik peyğəmbərlərdən sonra gələn adlardır. Əlbəttə ki, vətənə olan müqəddəs hissdir ki, torpaq igid oğullarımızı qoynuna şəhid kimi alır.

Son dövr tariximizə nəzər salsaq görərik ki, minlərlə Azərbaycan övladı qanı ilə bu torpağı suvararaq şəhidlik zirvəsinə yüksəlib. İstər Birinci Qarabağ, istərsə də İkinci Vətən müharibəsində minlərlə igidlər, ərənlər öz qanları ilə torpağımızı suvardılar. Onların hər birinin qəlbimizdə möhtəşəm abidəsi ucalır. Bir ailənin ocağından çıxan oğullar xalqımızın övladına çevrildilər. Hər birinin döyüş yolu bir dastana çevrilib. Bu gün onlardan biri haqqında söz açacağıq. Birinci Qarabağ müharibəsi savaşında şəhid olan Məmmədov Heybətalı Dostali oğlu. Qısa bir ömür yolunda böyük bir ömür yaşayan, əbədiyyətə qovuşan Şəhidimiz. Keçdiyi yol şərəfli və qürurvericidir. 1972-ci il fevralın 23-də Şamaxı rayonunun Qaradüzlü kəndində anadan olub. Ailənin sonbeşiyi olub Heybətalı.

Tale elə gətirir ki, Heybətalı ailəsi ilə birlikdə Abşeron rayonun Güzdək qəsəbəsinə köçür. Uşaqlıqdan, yeniyetməlik çağından canına, qanına vətənpərvərlik, vətən sevgisi kimi ali hisslər hopmuşdu. Heç şübhəsiz ki, vətənpərvərlik insanda fədakarlıq, qəhrəmanlıq və məğlubedilməzlik hissi yaradır.

1990-cı ildə yaşıdları kimi, hərbi xidmətə çağrılır. Sovet İttifaqının süqutuna az qalmışdı. O, Rusiyanın Saratov şəhərində hərbi xidmətə başlayır. Bu o illər idi ki, artıq ictimai-siyasi vəziyyət gərgin idi. Qarabağda erməni seperatçılar baş qaldırmışdı. Vətənin harayına, səsinə səs verir. Belə bir vəziyyətdə Azərbaycana qayıdan Heybətalı vətən torpaqlarının müdafiəsinə qoşulur. Döyüşün ən qaynar nöqtəsində ermənilərlə üz-üzə dayanaraq Ağdam, Füzuli istiqamətində gedən döyüşlərdə şücaətlə vuruşur. 1994-cü ilin yanvarında Horadizin və daha 21 kəndin erməni işğalçılarından təmizlənməsində qəhrəmanlıq göstərir. Buna görə, komandanlığın "Təşəkkürnaməsi"nə layiq görülür. Erməniyə Azərbaycan oğlunun, döyüşçüsünün gücünü göstərir. O, döyüş meydanında igidcəsinə şəhid olur.

1994-cü ilin 23 fevralında anadan olduğu tarixdə düşmən tərəfindən snayperlə vurulur və 22 yaşında ikən ən uca zirvəyə - şəhidlik zirvəsinə yüksəlir. Erməni qəsbkarlarına qarşı ölüm-dirim savaşında şəhid olan Məmmədov Heybətalı Dostalı oğlunun həyatı bu gün gənclərə nümunədir. Ərənlik, qəhrəmanlıq nümunəsi. Artıq şəhidlərimizin ruhu bu gün vətən torpağının səmasında azad dolanır. Tökülən qanlar yerdə qalmadı. Heybətalı kimi oğulların davamçıları erməniyə dərs verdilər. Azərbaycan Ordusunun sentyabrın 27-də Qarabağda başladığı uğurlu əks-həmlə əməliyyatı zamanı rəşadətli ordumuz bir-birinin ardınca düşmənə ağır zərbələr vuraraq təcavüzkar ölkənin siyasi-hərbi rəhbərliyini çıxılmaz vəziyyətə saldı. 44 gün davam edən Vətən müharibəsində işğal altında olan torpaqlarımız işğalçılardan azad olundu. Qisas qiyamətə qalmadı. Azərbaycan Prezidenti, Ali Baş Komandan İlham Əliyevin siyasi iradəsi və Azərbaycan ordusunun gücü ilə bu gün torpaqlarımız azad nəfəs alır.

Vətənin şəhid oğlu Heybətalı Məmmədov haqqında mətbuatda soxsaylı məqalələr yazılıb. "Gecənin rəngi" romanında da onun əsas qəhrəmanlarda biri kimi ermənilərin məhv edilməsində böyük şücaət göstərməsi öz əksini tapıb. Xalqın adını uca tutan Heybətalı Məmmədov kimi şəhidlərimizin hər birinin bir həyat hekayəsi var. Qısa bir ömrün hekayəsi. Adının qarşısına baş əyirik bizim QƏHRƏMAN ŞƏHİDİMİZ. Allah sənə və bütün şəhidlərimizə rəhmət eləsin!

İ.ƏLİYEV