Rusiya Ermənistana qabaqcıl silahlar verir - MuraxovskiRusiya Ermənistana qabaqcıl silahlanma sistemləri verir.

Bunu rusiyalı hərbi ekspert Viktor Muraxovski deyib.

“Hələ bir neçə il əvvəl Ermənistan “İsgəndər” operativ-taktiki raket komplekslərini aldı. Bundan başqa ilk olaraq “Tor M2” zenit-raket kompleksləri əldə etdi. Moskva eyni zamanda müasir radioelektron mübarizə sistemləri və radiolokasiya stansiyaları verdi. Silahlı qüvvələrin də qarşısında bu sistemləri mənimsəmək vəzifəsi durur. Bu da o deməkdir ki, yalnız heyətə daxil olan mütəxəssisləri deyil, eyni zamanda bütün komandanlıq zabitlərini yetişdirmək lazımdır. Onlar bu silah sistemlərinin silahlı qüvvələrin strukturundakı yerini və rolunu, döyüşlərdə və əməliyyatlarda istifadə edilməsinin əsaslarını anlamalıdırlar”, - Muraxovski bildirib.

Axar.az
Ölkədə sağlam iqtidar-müxalifət münasibətləri qurulubPrezident İlham Əliyevin apardığı siyasi islahatlar nəticəsində ölkədə sağlam iqtidar-müxalifət münasibətləri qurulub.

Avrasiya.net xəbər verir ki, bunu Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev martın 10-da Milli Məclisdə “Siyasi dialoqun Azərbaycan modeli: qanunvericilik hakimiyyətinin rolu” mövzusunda keçirilən konfransda deyib.

O, bu münasibətlərdə dövlətçilik maraqlarının bütün digər maraqlardan üstün tutulduğunu, sağlam tənqid və qarşılıqlı hörmətlə xarakterizə olunan sivil formaya keçidin önə çəkildiyini, hörmət əsaslı siyasi rəqabət və qarşılıqlı dinləmə üzərində yeni siyasi mədəniyyət formalaşdığını, təkcə iqtidarla müxalifət arasında deyil, müxalifət partiyaları arasında da qarşılıqlı anlaşma və sivil rəqabət mühiti, sağlam əməkdaşlığın meydana gəldiyini bildirib.

Ə.Vəliyev həmçinin Azərbaycan siyasi mühitində iqtidar-müxalifət dialoqunun aparılması, partiyalararası ikitərəfli və çoxtərəfli danışıqların və müzakirələrin baş tutması, əməkdaşlığın qurulması üçün üçüncü tərəfin – hansısa xarici dairələrin vasitəçilik etməsinə ehtiyac olmadığının isbat olunduğunu, siyasi dialoqdan boyun qaçıran bəzi siyasi qüvvələrin siyasi mübarizə adı altında əslində hansı dairələrin çirkin maraqlarına xidmət etməsinin özünü daha aydın şəkildə büruzə verdiyini, ölkədə uzun illərdən sonra ilk dəfə olaraq siyasi qüvvələrin mütləq əksəriyyəti arasında milli vəhdət və həmrəylik yarandığını qeyd edib.

Şöbə müdiri Vətən müharibəsi dövründə ölkədəki, demək olar ki, bütün siyasi partiyaların Ali Baş Komandanın həyata keçirdiyi siyasəti dəstəkləyən və milli birliyə səsləyən birgə bəyanatlarının, habelə beynəlxalq qurumlara birgə müraciətlərinin mütərəqqi önəmini xatırladıb.
Qarabağda daha 6 erməni hərbçinin cəsədi tapıldıBu gün Azərbaycanın Füzuli və Xocavənd rayonları ərazisində aparılan axtarış işləri nəticəsində daha 6 erməni hərbçinin cəsədinin qalıqları tapılıb.

Ermənistan KİV xəbər verir ki, cəsədləri tapılan hərbi qulluqçuların şəxsiyyəti müayinələr nəticəsində müəyyənləşdiriləcək.

Son məlumata görə, 10 noyabr 2020-ci il tarixli atəşkəs razılaşmasından indiyə kimi Qarabağ ərazisində 1496 erməninin cəsədi tapılıb.
Elçin Mirzəbəylinin Ermənistanda baş qərargah rəisi ilə bağlı “dramaturiji material” barədə TƏHLİLİErmənistanda baş qərargah rəisi ilə bağlı “dramaturiji materialı” 2015-ci ildə “yazılmış” absurd tamaşası davam etməkdədir.

Məlum olduğu kimi baş nazir Nikol Paşinyan baş qərargah rəisinin istefaya göndərilmiş sayıldığını bəyan edib. Prezident Armen Sarkisyanın ofisi isə baş qərargah rəisinin vəzifəsindən azad edilməsi ilə bağlı baş nazirin müraciətinin Konstitusiya Məhkəməsinə göndərildiyini açıqlayıb. Maraqlıdır ki, Ermənistan prezidenti adminstrasiyasının Konstitusiya Məhkəməsi ilə bağlı açıqlaması, Nikol Paşinyanın məlum bəyanatından sonra verilib. Məsələ burasındadır ki, Paşinyan baş qərargah rəisi Onik Qasparyanın istefaya göndərilmiş sayıldığını bəyan edəndə, prezident Armen Sarkisyanın baş qərərgah rəisinin vəzifəsindən azad edilməsi ilə bağlı məsələyə qanunvericilikdə nəzərdə tutulan müddət ərzində reaksiya vermədiyini əsas götürüb. Prezident Armen Sarkisyanın ofisinin baş nazirin bəyanatından sonra açıqlama yayması isə bir sıra maraqlı və ziddiyyətli məqamların ortaya çıxmasına zəmin yaradır. Yəni əgər prezident Armen Sarkisyan qanunvericilikdə nəzərdə tutulan müddət ərzində Konstitusiya Məhkəməsinə müraciət etmişdisə, o zaman nə üçün bunu dərhal açıqlamır, baş nazirdən və ictimaiyyətdən gizli saxlayırdı? Belə anlaşılır ki, Armen Sarkisyan Konstitusiya Məhkəməsinə ya köhnə tarixlə müraciət ünvanlayıb və keçmiş prezident Serj Sarkisyanın Konstitusiya Məhkəməsindəki dostları bu qanun pozuntusuna göz yumublar ya da prezident qanunvericilikdə nəzərdə tutulmuş müddət ərzində Konstitusiya Məhkəməsinə müraciət edib, amma qarşılıqlı razılaşma əsasında bu barədə baş nazirə məlumat verilməyib. Ötən müddət ərzində isə baş naziri Onik Qasparyanla bağlı müraciəti geri çəkməyə, yaxud onun əvəzinə başqa bir “canişin”in təyin edilməsinə razı salmağa çalışıb.

Prezident Armen Sarkisyanın ofisinin Konstitusiya Məhkəməsinə müraciətlə bağlı açıqlamasında diqqət çəkən məqamlardan biri, “Hərbi xidmət və hərbçilərin statusu” haqqında qanuna istinad edilməsidir. Yəni Ermənistan Prezidenti öz müraciətində sözügedən qanunun konstitusiyaya uyğunluğu ilə bağlı Konstitusiya Məhkəməsinin rəy verməsini istəyir. Hansı ki, “Hərbi xidmət və hərbçilərin statusu” haqqında qanunda baş qərargah rəsininin vəzifəyə təyin edilməsi, yaxud azad olunması ilə, bütövlükdə baş qərargah rəisi ilə əlaqədar yaranmış böhranla heç bir əlaqəsi yoxdur.

O zaman belə anlaşılır ki, Prezident Armen Sarkisyanın Konstitusiya Məhkəməsinə müraciəti, sadəcə vaxt udmaq üçün növbəti bəhanədir. Çox güman ki, Ermənistan Konstitusiya Məhkəməsi 20 gün müddətində, yəqin ki, 19-cu ya da 20-ci gün bu məsələyə baxacaq, istinad edilən qanunun baş qərargah rəisinin vəzifəsindən azad edilməsi ilə bağlı məsələyə heç bir aidiyyatı olmadığını bildirəcək. Daha sonra Armen Sarkisyan yenə də 20 gün müddətində Konstitusiya Məhkəməsinə növbəti müraciətini göndərəcək. Onlar da yenə 20 gün ərzində bu müraciətə baxacaqlar və s.

Bütün bunlara isə məzhəkədən başqa ad vermək mümkün deyil. İndi Ermənistan vətəndaşları yaşadıqları torpaq parçasının üzərində formalaşdırdıqları təsisata “dövlət” deyəndə, hesab edirəm ki, daha ciddi düşünməlidirlər.

ELÇİN MİRZƏBƏYLİ
Sərkisyan Paşinyanın təqdimatını rədd etdiErmənistan Prezidenti Armen Sərkisyan Baş nazir Nikol Paşinyanın Artak Davtyanın Baş Qərargah rəisi təyin edilməsi haqqında təqdimatını imzalamaqdan imtina edib.

Axar.az xəbər verir ki, bu məlumatı “Times.am” saytı yayıb. Məlumata görə, Sərkisyanın belə addımına səbəb situasiyanın nəzarətdən çıxmasına imkan verməmək olub.

Hökumətin hazırda Baş Qərargahla Qasparyanın yerinə müvəqqəti təyinat üçün danışıqlar apardığı bildirilib.
Koronavirusa yoluxanların sayı artdıAzərbaycanda koronavirus (COVID-19) infeksiyasına 515 yeni yoluxma faktı qeydə alınıb, 201 nəfər sağalaraq evə buraxılıb.

Nazirlər Kabineti yanında Operativ Qərargahdan Avrasiya.net-ə verilən məlumata görə, analiz nümunələri müsbət çıxan 7 nəfər vəfat edib.

İndiyədək ölkədə ümumilikdə 237 775 nəfərin koronavirus infeksiyasına yoluxması faktı müəyyən edilib, onlardan 230 116 nəfər müalicə olunaraq sağalıb, 3 257 nəfər vəfat edib, aktiv xəstə sayı 4 402-dir.

Son sutka ərzində yeni yoluxma hallarının müəyyənləşdirilməsi ilə əlaqədar 8 462, bu günə qədər isə ümumilikdə 2 671 613 test icra olunub.
Göyçə-Zəngəzur Respublikası yaradıldı - Bəyanat1988-1989- cu illərə qədər indiki Ermənistan Respublikasının ayrı-ayrı ərazilərində kompakt yaşamış azərbaycanlı əhalinin tam əksəriyyətinin təmsilçiləri olan, Ermənistandakı tarixi yurdlarından 32 ildir məhrum edilmiş 200 ( iki yüz ) nəfərə yaxın ziyalılardan formalaşmış QAQB Ali Məşvərət Şurası Göyçə-Zəngəzur Respublikasının (GZR) yaradıldığı ilə bağlı bəyanat yayıb.

Avrasiya.net sözügedən bəyanatı təqdim edir:

1. Beynəlxalq təşkilatlar tərəfindən tanınmış indiki Ermənistan Respublikası sərhədləri daxilindəki Göyçə, Zəngəzur mahallarının tarixi sərhədləri içində QAQB-nin legitim sturukturları əsasında Göyçə - Zəngəzur Respublikasının (GZR) yaradıldığını elan edirik.

2. Göyçə- Zəngəzur Respublikası (GZR ) prezident üsuli-idarəli, demokratik Respublikadır.

3. QAQB-nin legitm Ali Məclisinin üzvlərindən təşkil olunmaqla, Göyçə- Zəngəzur Respublikası Milli Məclisi (Parlamenti) 75 (yetmiş beş) nəfər deputatdan (millət vəkilindən) ibarət olmaqla təsis olunur. Növbəti GZR Milli Məclisinin deputatları 5 (beş) ildən sonra keçiriləcək azad, demokratik seçkilər yolu ilə seçiləcək.

4. QAQB Ali Məşvərət Şurasının üzvləri arasında onlayn olaraq adbaad səsvermə yolu ilə keçirilmiş seçki nəticəsində Talıbov Rizvan Rəşid oğlu – Göyçə - Zəngəzur Respublikasının prezidenti vəzifəsinə seçilmiş və bu vəzifəyə təsdiq edilmişdir.

5. Göyçə - Zəngəzur Respublikasının Milli Məclisinin (Parlamentinin) bir ay ərzində ilk iclası keçiriləcək. GZR Milli Məclisinin spikeri (sədri), I müavini, iki müavinləri, katibliyi, komitə və komissiyaları bu iclasda səsvermə yolu ilə müəyyənləşdiriləcəkdir.

6. Göyçə - Zəngəzur Respublikası höküməti, GZR prezidentinin sərəncamı ilə GZR hökümətinin Baş naziri təyin edildikdən və bu təyinat GZR Milli Məclisi (Parlamenti) tərəfindən təsdiq olunduqdan sonra GZR prezidentinin müvafiq sərəncamları ilə təyin olunacaq Baş nazirin I müavini və üç müavinləri, müxtəlif sahələri özündə birləşdirəcək 9(doqquz) nazir və 2 (iki) Dövlət Komitəsi sədrlərindən ibarət olmaqla GZR höküməti formalaşdırılıb, fəaliyyətə başlayacaqdır.

7. GZR Hökümətinin Nazirlər Kabineti aşağıdakı nazirlik və dövlət komitələrindən ibarət olmaqla təşkil olunacaqdır.

- Xarici İşlər Nazirliyi

- Daxili İşlər və Dövlət Təhlükəsizlik Nazirliyi

- Elm, Təhsil və Mədəniyyət Nazirliyi

- Vergilər və Gömrük Nazirliyi

- Maliyyə və İqtisadiyyat Nazirliyi

- Ədliyyə Nazirliyi

- Gənclər və İdman Nazirliyi.

- Səhiyyə Nazirliyi

- Mətbuat və İnformasiya Nazirliyi

- Qadın və Uşaqlarla İş Üzrə Dövlət Komitəsi

- Dövlət Statistika Komitəsi

8. Göyçə - Zəngəzur Respublikasına paytaxt olaraq, Ermənistan Respublikası höküməti ilə razılaşdırılmaqla, Qafan şəhəri, yaxud Vardenis (Basarkeçər) şəhəri nəzərdə tutulur. Bu şəhərlərdən biri GZR paytaxtı elan olunacaq.

9. Göyçə - Zəngəzur Respublikasının müvəqqəti yerləşim mərkəzi Bakı, yaxud Gəncə şəhərində, yaxud yeni qəsəbə salınması halında Ermənistan sərhədlərinə yaxın Köhnə Başkənd qəsəbəsi olacaq.

10. Göyçə - Zəngəzur Respublikası vətəndaşlığını qəbul etmiş şəxslərə ikili vətəndaşlıq hüququ tanınır.

Türkiyə, Azərbaycan, İran, Ermənistan, Rusiya, ABŞ, Avropa dövlətləri vətəndaşları olan şəxslər, öz istəklərinə uyğun Göyçə - Zəngəzur Respublikası vətəndaşı qəbul oluna bilərlər. GZR vətəndaşlığına qəbul etmək və vətəndaşlıqdan çıxartma səlahiyyəti GZR prezidentinin müstəsna səlahiyyətidir.

1. Göyçə - Zəngəzur Respublikası konfederativ hüquqi əsaslarla Beynəlxalq səviyyədə tanınmış Ermənsitan Respublikası sərhədləri daxilində, erməni əhali ilə sülh şəraitində, birgə yaşayışı mümkün sayır və qəbul edir.

2. Bu bəyənnamə ictimaiyyətə açıqlandığı tarixdən qüvvəyə minir və Beynəlxalq təşkilatlara, dövlətlərə təqdim olunması təmin edilir.
Bakıda gəmi yanırFövqəladə Hallar Nazirliyinin (FHN) Böhran Vəziyyətlərində İdarəetmə Mərkəzinə Bakı şəhəri, Suraxanı rayonu, Hövsan qəsəbəsində yanalma körpüsündə doğranmaqda olan gəmidə yanğın olması barədə məlumat daxil olub.

Avrasiya.net nazirliyin mətbuat xidmətinə istinadən xəbər verir ki, FHN-nin Dövlət Yanğından Mühafizə Xidmətinin yanğından mühafizə bölmələri yanğının baş verdiyi əraziyə cəlb olunub.

"Bu gün Azərbaycan qadınlarının siyasi müstəvidə heç bir problemi yoxdur"8 Mart Beynəlxalq Qadınlar gününü "8 Marş" şousuna çevirən psevdo-feministlərimiz barəsində heç nə yazmaq istəmirdim. Lakin üç gündür ki, bir çox insanlarımızın bu barədə danışmaları da bir faktdır, bir reallıqdır və bu reallığı gözardı etmək olmaz. Cəmiyyəti düşündürən, narahat edən məsələlərə biz siyasilər də münasibət bildirməliyik.

Zatən bu “feministlər” özləri də etiraf edirlər ki, onların əsas məqsədlərindən biri də bütün diqqətləri öz üzərlərinə çəkməkdir. Bəli, onlar belə bir şablon və tapdanmış məqsədin dalınca düşüblər. Müəyyən mənada onlar bu məqsədlərinə nail olublar. İndi necə deyərlər, hamı onlardan danışır. Ancaq heç kim onların haqqında yaxşı bir şeylər danışmır. Çünki ortada yaxşı bir əməlləri yoxdur. "8 Marş" aksiyası şoudur, əməl deyil. Bir dəstə qızın, qadının müxtəlif şüarlar qışqıraraq paytaxtın mərkəzində aksiya keçirməyə və polislərlə qəsdən toqquşmaya cəhd göstərməsi həqiqətən də ucuz şoudan və siyasi avantürizmdən başqa bir şey deyildi. Çünki onların əsas məqsədləri ölkəmizdə 8 Mart Beynəlxalq Qadınlar gününü qadınların bayramı statusundan çıxarıb, onu siyasiləşdirmək idi. Yəni əsas məqsəd iddia etdikləri kimi qadın hüquqlarını müdafiə etmək deyildi. Bu aksiyanın qadın hüquqlarının yaxından-uzaqdan heç bir əlaqəsi yox idi.

Aydın məsələdir ki, bu gün Azərbaycan qadınlarının siyasi müstəvidə heç bir problemi yoxdur. Bizim ölkəmizdə qadınların siyasi motivlərə görə öldürülməsi faktı da indiyə qədər qeydə alınmayıb. Eləcə də ölkəmizdə qadınların siyasi fəaliyyətlə məşğul olması, siyasi partiyalara üzv olması, seçkilərə qatılması, parlamentə üzv seçilməsi baxımından da heç bir problem yoxdur. Əgər bu ölkənin ikinci şəxsi - Birinci vitse-prezidenti qadındırsa, deməli, Azərbaycanda qadınların hər hansı siyasi məhdudiyyətlərə, diskriminasiyaya məruz qalmasından danışmağa əsla lüzum qalmır. Bu mənada, xaricdəki mərkəzlərdən tapşırıq alan bir ovuc psevdo-feministin "nəlbəkidə fırtına" yaratmağa, qaşınmayan yerdən qan çıxartmağa, 8 Mart bayramını məcrasından, kontekstindən çıxarıb zorla siyasiləşdirməyə çalışması öncədən planlaşdırılmış təxribatdır. Ancaq gördüyünüz kimi bu plan işləmədi, bu təxribat alınmadı, baş tutmadı. Onların siyasi şousu siyasi yalan kimi iflasa uğradı. Cəmiyyət küçələrə can atan "feminist"lərin bu riyakar planını, aksiyasını qınadı.

İkinci Qarabağ müharibəsi dövründə antimilli, düşük “humanist” mövqe sərgiləyərək gecə-gündüz erməni əsgərləri üçün ağlaşma quran, döyüşlər zamanı ölən erməni əsgərlərinin fotolarını sosial şəbəkələrdə profil fotosu kimi paylaşanlar, “Sülh!” deyib car çəkən pasifistlər, feministlər ruhən bizim cəmiyyətə yad olduqlarına görə, cəmiyyət də onları dəstəkləmir. 30 ildir çadırlarda, yataqxanalarda yaşayan soydaşlarımızın halına acımayan, məscidlərimizi, qəbirlərimizi, muzeylərimizin erməni vandalları tərəfindən dağıdılmasına göz yuman, Qarabağdakı ərazilərimizin az qala hər qarışının minalanması nəticəsində əsgərlərimizin və mülki vətəndaşlarımızın tez-tez minaya düşüb həlak olmasına səsssiz qalan bu xalq düşmənlərini - dırnaqarası "feminist"ləri, "pasifist"ləri, "humanist"ləri, "sülh göyərçinləri"ni cəmiyyətimiz nəyə görə dəstəkləməlidir ki? Axı onlar ruhən özlərini Azərbaycana yox, düşmənlərimizə doğma hesab edirlər. Erməni əsirliyindəki qadınlarımızın, Xocalı soyqırımının dəhşətlərini yaşamışın qadınlarımızın haqqını, hüququnu bircə dəfə də olsun müdafiə etməyən, buna görə beynəlxalq qurumlar qarşısında Ermənistanın cəzalandırılması tələbini irəli sürməyən "feministlər", "humanistlər" srağa gün təşkil etmək istədikləri aksiya ilə əslində həm cəmiyyəti, həm də dövləti mənəvi-psixoloji terrora məruz qoymaq istəyirdilər. Lakin cəhdləri elə özlərinin psixoloji iflası ilə nəticələndi.

Zənnimcə, əlaqədar qurumlar bu "feminist" fəallar üçün gerçək feminizm və qadın hüquqları ilə əlaqədar geniş maarifləndirmə işi aparmalıdır. Feminizm küçə həyatı deyil. Feminizm əxlaqsızlıq deyil. Feminizm özbaşınalıq deyil. Feminizm bütün mənəvi dəyərləri ayaqlar altına atıb, bioloji bir varlığa, nihilist və anarxist ünsürə çevrilmək demək deyil.

Bu adamlara başa salmaq lazımdır ki, qadın hüquqlarını müdafiə etmək üçün illah da ki, bu cür radikal, ifrat üsullara əl atmağa gərək yox. Qadın hüquqlarını uğurlu bir şəkildə müdafiə edə bilmək üçün başqa vasitələr, daha sivil yollar da var. Bunun yolu ilk növbədə sosial və hüquqi yardımdan keçir. Dırnaqarası "feminist"lərimiz özləri bu ən adi həqiqəti dərk etməyənə qədər, onlar əsla başqalarına yardımçı ola bilməzlər. Bu ki heç bir isbata ehtiyacı olmayan aksiomadır.

Əlisahib Hüseynov
Milli Həmrəylik Partiyasının sədri
"Bu gün Azərbaycanın qazandığı bütün uğurların təməli ümummilli lider Heydər Əliyev tərəfindən qoyulub"Bu gün Azərbaycan tarixinin ən yaxşı dövrünü yaşayır və Azərbaycan dövləti heç vaxt indiki qədər güclü olmayıb. Bütün bu böyük uğurlar Prezident İlham Əliyevin müdrik siyasəti sayəsində qazanılıb.

AZƏRTAC xəbər verir ki, bu fikirlər Moldovanın nüfuzlu “Noi.md” xəbər portalında dərc olunmuş məqalədə yer alıb.

Müəllifi ölkəmizin Moldovadakı səfiri Qüdsi Osmanov olan yazıda qeyd edilib ki, bu gün Azərbaycan Prezident İlham Əliyevin müdrik və uzaqgörən siyasəti sayəsində bölgədə həm siyasi, həm iqtisadi, həm də hərbi cəhətdən güclü və nüfuzlu ölkəyə çevrilib, orada hakimiyyət-xalq birliyi mövcuddur.

“Bütün bunlar Vətən müharibəsi zamanı bütün dünyaya açıq şəkildə göstərildi və qazanılan şanlı Qələbə tarixdə əbədi qalacaq. Müharibə nəticəsində işğaldan azad olunan ərazilər nəinki yenidən qurulur və bərpa edilir, orada iqtisadiyyat da inkişaf etdirilir, tamamilə yeni sistem qurulur, sosial əhəmiyyətli layihələr həyata keçirilir. Bu gün Azərbaycanın qazandığı bütün uğurların təməli ümummilli lider Heydər Əliyev tərəfindən qoyulub”, - deyə Qüdsi Osmanov bildirib.
Səfir, həmçinin işğaldan azad olunan ərazilərdə həyata keçirilən infrastruktur layihələrindən, ölkəmizin iqtisadi və hərbi sahələrdə uğurlarından ətraflı bəhs edib.