Koronavirusun yeni əlaməti aşkarlandıMelburnda (Avstraliya) Kral Hospitalının tibb bacısı Emil Morris özündə koronavirusun nadir simptomunu aşkarlayıb.

Bu barədə “Report” “Mirror”a istinadən xəbər verir.

Məlumata görə, o təcili yardım bölməsində işləyir və bilavasitə COVID-19 pasiyentləri ilə əlaqədə olur. Tibb bacısı bir neçə gün əvvəl əl-ayaqlarında ağrılar hiss edib. Qeyd edilir ki, tibb bacısı iş vaxtının çox hissəsini ayaq üstdə keçirir və yorğunluğa öyrəşib, ancaq bu dəfəki yorğunluq əlamətləri fərqli olub.

Tibb işcisi bununla bağlı rəhbərliyə müraciət edib və ondan koronavirus analizləri götürülüb. Virusla bağlı analizlər müsbət nəticə verib.

Mütəxəssislər bunun təhlükəli infeksiyanın nadir əlaməti olduğunu bildirirlər.
Səfərbərlikdən könüllülərə niyə zəng edilir?Bu gün sosial şəbəkələrdə Səfərbərlik və Hərbi Xidmətə Çağırış üzrə Dövlət Xidmətinin saytında qeydiyyatdan keçən şəxslərə Xidmətdən zəng edilməsi haqda məlumat yayılıb.

Avrasiya.net xəbər verir ki, məsələ ilə bağlı Axar.az-a açıqlama verən Səfərbərlik və Hərbi Xidmətə Çağırış üzrə Dövlət Xidmətinin mətbuat katibi Füzuli İsmayılov bildirib ki, müraciət edənlərə zəng edilməsinin səbəbi sadəcə onların anket məlumatlarının tam doldurulması olub.

“Edilən zənglər Səfərbərlik və Hərbi Xidmətə Çağırış üzrə Dövlət Xidmətinə könüllü olaraq ölkəmizin ərazi bütövlüyü uğrunda döyüşlərdə iştirak etmək üçün müraciət edən vətəndaşların anket məlumatlarının dəqiqləşdirilməsi xarakteri daşıyır”, - o bildirib.
İrəvanda təşviş: Türk ordusu Naxçıvana gəldiTürkiyə və Azərbaycan ordularının hərbi təlimlərini məlum Tovuz hadisələri ilə əlaqələndirmək doğru deyil. Lakin istənilən lokal müharibədə Türkiyə Azərbaycanın yanında olacaq. Məhz təlimlərin özündə ehtiva etdiyi məna da budur.

Bu sözləri Axar.az-a politoloq İlqar Vəlizadə Azərbaycan Respublikası ilə Türkiyə Respublikası arasında hərbi əməkdaşlıq haqqında sazişə əsasən ölkəmizdə hər iki ölkənin quru qoşunları və hərbi hava qüvvələrinin iştirakı ilə keçiriləcək təlimləri şərh edərkən deyib. O vurğulayıb ki, Türkiyə ilə birgə hərbi təlimlər Ermənistanı hər zaman ciddi narahat edir:

“Hazırda Ermənistan kütləvi informasiya vasitələrinə nəzər salsaq, görə bilərik ki, bu hərbi təlimləri fərqli məcrada şərh etməyə çalışırlar. Xüsusilə də son Tovuz hadisələri fonunda bunu özlərinə qarşı təhdid adlandırırlar. Əslində isə bu kimi təlimlər vaxtaşırı keçirilir. Bundan əlavə, Azərbaycan Respublikası ilə Türkiyə Respublikası arasında hərbi əməkdaşlıq haqqında saziş mövcuddur. Adətən bu təlimlər mövsümi xarakter daşıyır və hazırda da yay mövsümü ilə əlaqədar keçirilir. Bununla belə, düşmən tərəfi indidən qorxuya düşüb. İstənilən halda düşmənin qorxu içində qalması yaxşıdır. Azərbaycan bu təlimlər olmasa belə, Ermənistanı qorxuya salmağa qadirdir”.

Politoloq bildirib ki, Tovuz hadisələrindən sonra Ermənistan onsuz da ciddi narahatlıq içində idi:

“Çünki faktiki olaraq Rusiyadan və çox güvəndiyi KTMT-dən gözlədiyi dəstəyi ala bilmədi. Türkiyə isə birmənalı olaraq Azərbaycana dəstək verdiyini açıqladı. Yəni Ermənistanda hərbi əməliyyatların hər an başlaya biləcəyi yönündə bir təlaş var. Mövcud hərbi təlimlərə erməni mediasının reaksiyası bunun sübutudur”.