“Bəhram qardaşımız yaşamaq uğrunda mübarizə aparır...”Millət vəkili, dünya şöhrətli həkim Rəşad Mahmudov sosial şəbəkədəki hesabında əməkdar artist Bəhram Bağırzadə ilə bağlı yeni fikirlər səsləndirib.

Avrasiya.net həmin fikirləri olduğu kimi oxucuların diqqətinə çatdırır:

“Bir tərəfdə Bəhram Bağırzadənin xəstəliyinə inanmayan insanlar, digər tərəfdə isə yaşaması üçün dəridən-qabıqdan çıxan tibbi heyət. Bir tərəfdə bu şoudur deyən kəslər, digər tərəfdə 19/06/2020 tarixli xarici ekspert rəylərində “bir faiz belə yaşama şansı yoxdu” açıqlamasını eşidib üzülənlər və kədərlənənlər...

Günlərdi koma vəziyyətində reanimasiyada yatan Bəhram Bağırzadənin səhhətində müsbətə doğru dəyişiklik var. Ağciyər fəaliyyəti yavaş-yavaş bərpa olunur. Ümidlərimizin tükəndiyi anda, “ağciyər transplantasiyası yoxsa mezenkimal kök hüceyrəmi?” kimi fərqli spekulyativ müzakirələrin aparıldığı şəraitdə Bəhram qardaşımız yaşamaq uğrunda mübarizə apardı və bu hələ də davam edir...

Tezliklə şəfa tapmağını, gözlərini yenidən açmağını və ayağa qalxaraq yayılan bütün şayiələrə özünün açıqlama verməsini diləyirəm...

Tanrı Sizləri, Dövlətimizi və Dünyamızı QORUSUN!”
Məhərrəm Ağalaroğlu: Karantin rejimini pozanlara qarşı cərimələr 3-4 dəfə artırılmalıdır“Ölkəmizdə koronavirusla mübarizə çərçivəsində bəzi vətəndaşların məsuliyyətsizliyi – sosial məsafəni gözləməməsi, tibbi maskadan istifadə etməməsi və karantin qaydalarını pozması bu istiqamətdə görülən tədbirlərin effektivliyini azaldır.” Bu fikri Oxucu.info-nun baş redaktoru Məhərrəm Ağalaroğlu mətbuata açıqlamasında deyib.

O, bildirib ki, bəzi vətəndaşların tələb olunan qaydalara riayət etməməsi koronavirusa yoluxanların sayının sürətlə artmasına səbəb olur: “Virusa yoluxmuş bir nəfərin ictimai nəqliyyatda, marketlərdə və ya ümumi istifadədə olan nəqliyyat vasitələrinin dayanacaqlarında, ümumiyyətlə, ictimai yerlərdə tələb olunan qaydalara laqeyd yanaşması onlarla insanı COVID-19-a yoluxdura bilər.”

M.Ağalaroğlu vurğulayıb ki, koronavirusla mübarizədə ictimai qınaq sosial məsuliyyətsizliyin qarşısının alınmasında effektiv olsa da kifayət etmir: “Bu günlərdə ümumi istifadədə olan nəqliyyat vasitəsində işə gələrkən bəzi sərnişinlərin maska taxmadıqlarının şahidi oldum. Avtobus müvəqqəti qurulmuş polis postunda dayanan kimi tez sərnişinlər ciblərindən maskanı çıxararaq taxmağa başladılar. Postda avtobusa daxil olaraq maarifləndirici təbliğat aparan polis əməkdaşının “maskanızı taxın” tələbinə xanım sərnişinin cavabı belə oldu: “Xoşum gəlmədiyi üçün taxmıram.” Həmin şəxsə etirazını bildirən sərnişinlərdən biri ilə mübahisə edən maskasız xanım “özüm bilərəm, xoşum gəlmir, istəmirəm taxmıram” cavabını verdi. Demək istədiyim odur ki, ictimai qınaq da həmin xanıma təsir etmədi. Düşünürəm ki, sosial tələbləri yerinə yetirməyən, ictimai qınağa əhəmiyyət verməyən və ya yersiz münaqişəyə zəmin yaradan insanlar böyük məbləğdə cərimələnərlərsə, qaydaları pozan digər vətəndaşlar da koronavirusla mübarizə çərçivəsində tələb olunan qaydalara riayət edərlər.”

Baş redaktor hesab edir ki, koronavirusla mübarizənin effektivliyini artırmaq üçün cərimələrin məbləği mütləq şəkildə artırılmalıdır: “Bizdə cərimələr digər ölkələrlə müqayisədə aşağıdır. Düşünürəm ki, vətəndaşlarımızın sağlamlığı üçün zəruri olan və koronavirusla mübarizənin effektivliyinin artırılmasına xidmət edən qaydaların pozulmasına görə müəyyən edilmiş cərimələr 3-4 dəfə artırılmalıdır.”

Vətəndaşların karantin qaydalarına riayət etmələrinin vacibliyini vurğulayan M.Ağalaroğlu əlavə edib ki, insanlar ictimai yerlərdə, o cümlədən marketlərdə, ictimai nəqliyyatda, avtobus dayanacaqlarında, qapalı məkanlarda və insanların çox olduğu digər ərazilərdə tələb olunan qaydalara əməl etməyəcəkləri təqdirdə koronavirusa yoluxanların sayının çoxalmasına səbəb olacaqlar: “Biz bir məqamı dərk etməliyik ki, virusa yoluxacağımız təqdirdə təkcə özümüzün deyil, eyni zamanda, ailəmizin, doğmalarımızın, bir sözlə, bütün sevdiklərimizin həyatını təhlükəyə atacağıq. Bu səbəbdən də vətəndaşlarımız daha diqqətli olmalı, karantin qaydalarına riayət etməli və bu qaydaları pozanlara qarşı ictimai qınaq formalaşdırılmalıdır.”

Virusa yoluxanların sürətlə artacağı təqdirdə həkim, preparat çatışmazlığı ilə üzləşə biləcəyimizi vurğulayan M.Ağalaroğlunun qənaətinə görə, bunun qarşısının alınması üçün hər birimiz üzərimizə düşən məsuliyyəti dərk etməli, karantin qaydalarına ciddi riayət etməliyik: “Əgər kimsə karantin rejiminin tələblərini pozarsa, zəruri tələblərə səhlənkar yanaşarsa, həmin şəxslərə digər insanlar laqeydlik göstərmədən mütləq şəkildə reaksiya verməli, qaydalara riayət olunmasını tələb etməlidirlər. Düşünürəm ki, cərimələrin məbləğinin artırılması da karantin rejiminə ciddi yanaşılmasına böyük töhfə verər. İnsanlar cərimələnməmək üçün tibbi maskalardan istifadə edər, sosial məsafə saxlayarlar.”
"Ermənistanın qəhrəmanları cinayətkardır, onların prezidentləri rüşvətxordur"“İndiki şəraitdə biz gücümüzü daha da artırmalıyıq və artırırıq. Ermənistan artıq bir neçə ildir ki, dərin böhran içindədir. Deyə bilərəm ki, Ermənistanın müstəqillik tarixi prinsipcə rüsvayçılıq tarixidir. Çünki indiki iqtidar artıq dəfələrlə bəyan və sübut edib ki, 1998-ci ildən 2018-ci ilə qədər Ermənistana rəhbərlik etmiş şəxslər cinayətkardır, oğrudur, quldurdur. Onların bir çoxu həbs edilib. Məlum olub ki, onların generalları oğrudur, əsgər tuşonkasını oğurlayıb, sonra bazarlarda satdırırdılar”.

Avrasiya.net xəbər verir ki, bu fikirləri Prezident İlham Əliyev Müdafiə Nazirliyinin "N" saylı hərbi hissəsinin açılışında bildirib.

İlham Əliyev qeyd edib ki, Ermənistanın qəhrəmanları cinayətkardır, onların prezidentləri rüşvətxordur: “İndiki hakimiyyət bunları açdı-tökdü. Onsuz da biz bunu bilirdik, indi bütün dünya bunu bilir. Yəni belə çıxır ki, 20 il ərzində bu dırnaqarası müstəqil ölkəyə quldur, rüşvətxor və cinayətkarlar rəhbərlik edib. Bu ölkəyə nə ad vermək olar? Hələ 30 il yoxdur, guya müstəqil ölkə kimi yaşayır, əgər 20 il quldurlar rəhbərlik edibsə, nə ad vermək olar - quldur ölkəsi, cinayətkar ölkəsi. Yaxşı, baxaq görək, 2018-ci ildən bu yana nə baş verib. Guya orada demokratik inqilab olub. Hamısı yalandır. O pullar oraya haradan axıdılıb, biz bunu bilirik, yəqin ki, erməni xalqı da bilir. Ermənistanda indiki hakimiyyət hansı xarici dairələrdən idarə olunur, bunu hər kəs bilir. Sadəcə olaraq, indiki rəhbərlərin tərcümeyi-halına baxın, görün bunlar hansı fondlarda işləyiblər, kimdən pul alıblar. Postsovet məkanında həmin dırnaqarası inqilabları, əslində, qanlı çevrilişləri təşkil edənlər indiki Ermənistan rəhbərlərinin himayədarlarıdır. Onları idarə ediblər və əlbəttə ki, xalqda o çirkin kriminal, xunta rejiminə nifrət böyük idi. Ondan istifadə edib hakimiyyəti zəbt ediblər. Ondan sonra nə baş verir? Ondan sonra hazırda Ermənistanda artıq diktatura hökm sürür. Bu, qaçılmaz faktdır. Onlarda təqribən bir il bundan əvvəl həbsdə olan bir jurnalist axıra qədər aclıq elan edir və ölür. Heç bir beynəlxalq təşkilat, Avropa Şurası, ATƏT-in mətbuat üzrə xidməti bir səs belə çıxarmırlar. Nə üçün? Çünki bilirlər ki, indiki Ermənistanın rəhbərləri kimdir”.

“Son hadisələr nəyi göstərir? Siyasi opponentlər təqib edilir, həbs olunur, konstitusiyaya qanunsuz dəyişikliklər edilir. Halbuki bu dəyişikliklər ancaq referendumda edilə bilər. Gördülər ki, referendumda keçməyib, parlamentdə dəyişikliklər etdilər. Deməli, hakimiyyət bölgüsü tamamilə pozulub. Qanunvericilik hakimiyyəti, icra hakimiyyəti, məhkəmə-hüquq sahəsi artıq bir adamın əlindədir, bir alətdir və bu diktatura möhkəmlənir. Eyni zamanda, Ermənistanda korrupsiya, talançılıq, rüşvətxorluq, qohumbazlıq kütləvi xarakter alıb. İndi bunu artıq üzə çıxardırlar. Sən demə, qaçaqmalçılıqla baş nazirin özü və onun ailəsi məşğuldur. Siqaret qaçaqmalçılığının başında baş nazir, onun ailəsi, yaxınları dayanır. Ondan sonra zəngin iş adamlarına qarşı cinayət işləri açılır, sonra da onlar məcbur edilir ki, - bir fond yaradıblar, - o pulları fonda köçürsünlər. O fonddan da bu pullar çəkilir, mənimsənilir”,- deyə Prezident qeyd edib.

İlham Əliyev vurğulayıb ki, bu gün Ermənistanın baş naziri və onun yaxın qohumları, ətrafı rüşvətxorluq rəmzinə çevrilib: “Baxın, bunların maliyyə imkanları iki il bundan əvvəl nə idi, indi nədir. Ona görə Ermənistanda diktatura hökm sürür və bu, nə qədər belə çox davam edərsə, orada problemlər böhranlı həddə bir o qədər tez çatacaq. Prinsip etibarilə əgər belə obyektiv təhlil aparsan, görərsən ki, orada inkişaf perspektivləri yoxdur. Çünki ölkə özü-özünü saxlaya bilmir, öz sərhədlərini qoruya bilmir, xarici ölkələrin əsgər və zabitləri onların sərhədlərini qoruyur, öz hərbi gücünü təmin edə bilmir, xarici dövlət orada hərbi baza saxlayır, silahlar ala bilmir, xarici dövlət onlara pulsuz silah-sursat verir. İqtisadiyyatı düz qura bilmir, ancaq yalvara-yalvara, dilənə-dilənə kreditlər hesabına yaşayır. İndi Avropa İttifaqından 90 milyon dollar pul dilənir, ondan-bundan dilənir. Deməli, demoqrafik böhran yaşanır, insanlar bu ölkəni tərk edir və təbii azalma gedir. İndi Ermənistanın real əhalisi 2 milyon nəfərdən azdır. Bunu mən bilirəm və Ermənistan rəhbərliyi bilir. Bir də ki, bu ölkə qonşulara - özü də kimə, Türkiyə kimi böyük bir ölkəyə ərazi iddiaları irəli sürür. Dırnaqarası soyqırımı ilə bağlı Türkiyəyə qarşı əsassız ittihamlar irəli sürülür. Heç bir soyqırımı olmamışdır. Ermənilər həm 1918-ci ildə, həm də Xocalıda bizə qarşı soyqırımı törətmişlər. Ona görə belə bir iddia ilə yaşayan ölkənin gələcəyi çox qaranlıqdır.

Biz isə hər sahədə, beynəlxalq müstəvidə güclənirik, güclənməliyik - ölkə daxilində sabitlik, iqtisadi sahədə islahatlar, sosial problemlərin həlli, regionların inkişafı və nəhayət, ordu quruculuğu. Ona görə bu yolla biz gedəcəyik, ordumuzu bundan sonra da gücləndirəcəyik, nə qədər lazımdırsa, orduya o qədər vəsait ayıracağıq. Heç nəyə baxmadan, - neftin qiyməti 14 dollara düşdü, Xalq Cəbhəsinin sevincinə səbəb olan o hadisəni xatırlatmaq istəyirəm, yaxud da ki, qalxdı, fərq etməz, - bizim iqtisadiyyatımız dayanıqlıdır və biz ordumuza nə lazımdırsa, bundan sonra da edəcəyik”.
“Biz münaqişə ilə bağlı mövqeyimizdə bir addım geri atmayacağıq” - Prezident İlham Əliyev“İşğal edilmiş torpaqlarda bu gün ermənilər qanunsuz məskunlaşma siyasəti aparır. Bu məsələ ilə əlaqədar mən artıq bir neçə dəfə öz fikirlərimi bildirmişəm, o cümlədən xüsusilə beynəlxalq tədbirlər çərçivəsində. Avropa İttifaqının sonuncu Şərq Tərəfdaşlığı Zirvə görüşü çərçivəsində də bu məsələyə diqqət yetirdim. Biz bütün beynəlxalq təşkilatlarda bu məsələni qaldırırıq və qaldıracağıq. Qanunsuz məskunlaşmaya son qoyulmalıdır. Beynəlxalq ictimaiyyəti buna çağırırıq”

Avrasiya.net xəbər verir ki, bu fikirləri Prezident İlham Əliyev Müdafiə Nazirliyinin "N" saylı hərbi hissəsinin açılışında bildirib.

“Minsk qrupunun həmsədrlərinin bu məsələyə xüsusi diqqət yetirməyini istəyirik ki, bu qanunsuz məskunlaşma dayansın. Çünki Ermənistanın siyasəti bundan ibarətdir. Onlar bizim şəhərlərin adlarını dəyişdiriblər. Əvvəlcə indiki Ermənistan ərazisində, indi isə Dağlıq Qarabağda və ətraf bölgələrdə. Orada yeni dırnaqarası sərhədlər çəkiblər, bizim tarixi keçmişimizi, məscidlərimizi məhv ediblər, tarixi abidələrimizi, torpaqlarımızı erməniləşdirmək istəyirlər. İndi qanunsuz məskunlaşma aparmaq istəyirlər, ancaq onlarda insan resursu olmadığı üçün çətinlik çəkirlər. Amma yenə də diaspor fəaliyyəti nəticəsində buna çalışırlar. Biz buna imkan verməyəcəyik, bunu hər kəs bilsin”,- deyə dövlət başçısı qeyd edib.

İlham Əliyev qeyd edib ki, münaqişə ilə bağlı mövqeyimizdə möhkəm dayanmışıq və bir addım geri atmayacağıq: “Beynəlxalq təşkilatlar indi ərazi bütövlüyü prinsipini xüsusilə qeyd edirlər. Avropa İttifaqının sonuncu Şərq Tərəfdaşlığı Zirvə görüşündə çıxış edənlərin, dünya liderlərinin bir çoxları bu məsələyə aydınlıq gətiriblər. Ərazi bütövlüyü prinsipi insanların, xalqların öz müqəddəratını təyin etmək prinsipindən üstündür. Heç kimin bu haqda şübhəsi olmasın. Bütövlükdə Ermənistana və Dağlıq Qarabağ məsələsinə gəldikdə, öz müqəddəratını müəyyənetmə prinsipi işləmir, çünki erməni xalqı öz müqəddəratını bir dəfə müəyyən edib, onların erməni dövləti var, baxmayaraq ki, Azərbaycan torpağında yaradılıb. Azərbaycan torpağında ikinci erməni dövlətinin yaradılmasına biz heç cür imkan verə bilmərik. Ancaq bir daha demək istəyirəm ki, ərazi bütövlüyü prinsipi bu gün üstünlük təşkil edir. Ona görə bizim mövqeyimiz beynəlxalq hüquq, tarixi ədalət baxımından mükəmməldir. Əlbəttə ki, münaqişə bu prinsiplər əsasında öz həllini tapmalıdır. Ancaq bayaq qeyd etdiyim kimi, dünyada güc amili ön plana çıxır və biz bu gücü toplamalıyıq, məsələni istənilən yolla həll etməliyik”.
“Bu münaqişə Azərbaycan Xalq Cəbhəsi hakimiyyətinin acı mirasıdır” - İlham Əliyev“Əlbəttə, bu münaqişə Azərbaycan Xalq Cəbhəsi hakimiyyətinin acı mirasıdır. Çünki məhz onların xəyanətkar fəaliyyəti nəticəsində torpaqlarımız işğal altına düşüb. Bunu hər kəs bilməlidir. Şuşanın işğalı böyük faciə idi. O vaxt Azərbaycanda hakimiyyət uğrunda mübarizə gedirdi”.

Avrasiya.net xəbər verir ki, bu sözləri Prezident İlham Əliyev Müdafiə Nazirliyinin "N" saylı hərbi hissəsinin açılışında iştirak edərkən səsləndirib.

“Azərbaycan Xalq Cəbhəsi istənilən yollarla hakimiyyətə gəlmək istəyirdi. O, əvvəlki hakimiyyəti yıxmaq üçün ən çirkin, ən xəyanətkar əməllərə əl atdı, Şuşanı ermənilərə təhvil verdi. Hərbçilər yaxşı bilirlər, Şuşa alınmaz qaladır. Onu almaq mümkün deyil. Onu təhvil verdilər, satdılar ki, hakimiyyəti yıxsınlar, hakimiyyətə gəlsinlər. Əfsuslar olsun ki, belə də oldu. 1992-ci ilin mayında Şuşa və Laçın işğal edildi, Xalq Cəbhəsinin dəstələri qanunsuz yollarla hakimiyyətə gəldi. Ondan sonra nə etdilər? Ondan sonra ölkəmizi dağıtmağa başladılar. İşğal edilmiş torpaqlar qaldı bir yana, onlar isə talançılıqla, rüşvətxorluqla, oğurluqla məşğul idilər, kabelləri kəsib satırdılar. Kütləvi talançılıq baş alıb gedirdi. Nəticədə bir tərəfdən xalq buna dözmədi, digər tərəfdən 1993-cü ilin aprelində Ermənistan Kəlbəcəri işğal etmişdi. Qanunsuz yollarla hakimiyyətə gəlmiş həmin xəyanətkar Azərbaycan Xalq Cəbhəsi hakimiyyəti Kəlbəcəri Ermənistana təhvil verdi və ondan sonra Ermənistanla Dağlıq Qarabağ arasında coğrafi bağlantı yarandı. Artıq gediş-gəliş və silah-sursat, texnika və təchizat başlamışdı. Ondan sonra nə etdilər? Torpaqları müdafiə etmək əvəzinə qardaş qanını axıtdılar, vətəndaş müharibəsini başladılar, Gəncəni bombaladılar. Azərbaycan əsgərlərini əsir götürmüşdülər. Orada torpaqlar əldən gedir, burada bir-birini qırırlar ki, hakimiyyətə gəlsinlər. Məhz bunun nəticəsində torpaqlarımız işğal altına düşdü. Əgər Heydər Əliyev hakimiyyətə gəlməsəydi, bilmək olmur Ermənistan hələ haraya qədər gəlib çıxa bilərdi”,- deyə dövlət başçısı qeyd edib.

Dövlət başçısı bildirib ki, bu tarixi hər kəs bilməlidir: “Bu işğal Azərbaycan Xalq Cəbhəsinin xəyanətkar və satqın hərəkətlərinin nəticəsidir. Xalq onlara dözmədi, qaçıb getdilər. Buna nə ad vermək olar? Ancaq fərarilik. Prezident fərarilik edib, qaçdı Kələkiyə. Yaxşı, sən Ali Baş Komandansan, ölkə müharibə şəraitindədir. Sən xalqı, dövləti, dövlətçiliyi qorumalısan. Gecə ilə gizlin təyyarəyə minib, uçub Naxçıvana, oradan gedib oturub Kələkidə. Buna nə ad vermək olar? İndi buna bəraət qazandırmaq istəyənlərə üz tutub deyirəm. Nə ad vermək olar buna? Qorxaqlıq, satqınlıq, fərarilik. Başqa ad yoxdur. Hamı da bunu bilməlidir. O birilər nə etdilər? O vaxtkı dövlət katibi indi özünü guya müxalifət adlandırır. Amma o hansı müxalifətdir Azərbaycan xalqı yaxşı bilir. Onların tərbiyəsi, mərifəti, addımları nədən ibarətdir, indi bütün vətəndaşlar internetdə görürlər.

Mən demişəm ki, Azərbaycanda nə qədər pis olsa, onlar üçün o qədər yaxşıdır. Görün, nəyə sevinirlər? Sevinirlər ki, neftin qiyməti 14 dollara düşüb. Buna kim sevinir? Bir Ermənistan, bir də özünü müxalifət adlandıran bu antimilli şura. Neftin qiyməti 14 dollara düşəndə axı, insanlar bundan əziyyət çəkəcək, problemlər yaranacaq, sosial sahədə problemlər yaşana bilər, iqtisadiyyatımız yavaşıyar. Amma bu, onların işinə yarayır, Azərbaycan üçün nə qədər pisdir, onlar üçün o qədər yaxşıdır. Bax, onlar o vaxt da bu prinsiplə yaşayırdılar. Ona görə torpaqlarımızı əldən verdilər. Dövlət katibi o vaxt prezidentlə bir yerdə fərarilik edib. O da getdi gizləndi Kələkidə. Parlamentin sədri fərarilik etdi. Onlar fəraridirlər, satqındırlar, xaindirlər. Hər kəs bunu bilməlidir, heç kim bunu unutmamalıdır”.
"Prezident İlham Əliyev ictimai qınağın vacibliyini çox doğru qeyd etdi" 1 saylı Gəncə Şəhər Xəstəxanasının modul tipli infeksion xəstəliklər korpusunun açılışında Azərbaycan Prezidenti İlham Əliyev geniş nitqində dövlətin koronavirusla mübarizə sahəsində həyata keçirdiyi tədbirlərin effektivliyinə, düşünülmüş qabaqlayıcı addımların əhalini böyük fəlakətdən qoruduğuna, Azərbaycan dövlətinin üzərinə düşən öhdəlikləri tam həcmdə yerinə yetirildiyinə, dövlətin hər zaman öz vətəndaşının yanında olmasına yönəldilməsinə həsr etməsi ilə yanaşı, ictimai qınağın vacibliyinə də toxunub.

Prezidentin son çıxışına münasibət bildirən BAXCP sədrinin müavini, tanınmış QHT sədri, politoloq Niyaməddin Orduxanlı Avrasiya.net saytına açıqlamasında bildirib ki, cənab Prezident ilk dəfə deyil ki, ictimai qınağın vabiliyinə toxunub:" Hər zaman prezident İlham Əliyev ictimai nəzarətin və ictimaqi qınağın önəmindən danışıb. Haqlı olaraq Prezident bildirir ki, əsas yük dövlət üzərində olmaqla yanaşı, vətədaşlar da yaxından dövlətə öz dəstəyi nümayiş etdirməlidir. İctimai qınağı vətəndaşlar təşkil etməlidir. Və birbaşa məsuliyyətsiz vətənşaları qınamalıdırlar. Hər kəsə başa düşməlidir ki, koronavirusla mübarizədə həmrəylik nümayiş olunmalıdır. Məsuliyyətsiz vətəndaşların hesabına insanlar həyatlarını itirə bilər. Və artıq tək Azərbaycand deyil, dünyanın ən inkişaf etmiş ölkələrində karantı rejimi yumşaldıldıqdan sonra virusa yoluxanların sayı artmaqdadır. Virusa yoluxan və çox ağır vəziyyətdə olan ölkənin kifyət qədər tanınmış şəxsləri var. İnsan nə qədər cahil olamlıdır ki, baş vermiş hadisəyə laqeyd yanaşmalıdır. Biz bütün imkanlarımızla məsuliyyətsiz vətənaşları qınamalıyıq və onlara imkan verməməliyik ki, virusun yayılmasında rol oynasınlar. Bütün bunları biz etməliyik. Maskasız avtobusa və qapalı məkanlara daxil olan şəxsləri qınamalıyıq. Onları məcbur etməliyik ki, qaydalara əməl etsinlər. Əks halda onların məsuliyyətsiliyi səbəbindən vəziyyətimiz daha da ağırlaşacaq. Bu gün həmin şəxsləri hesabına yoluxanların sayı 600 yaxınlaşıb. İctimai qınağın təşkilində QHT-lər aktiv olmalıdır. "

Niyaməddin Orduxanlının sözlərinə görə, bu gün dövlət karantin rejiminin sərtləşdirilməsi ilə bağlı verdiyi qərar yerində atılmış addımdır:" Prezident İlham Əliyev çıxışında da qeyd etdi ki, ilk gündən dövlət vətəndaşı qorumaq yolunu tutub. 213 ölkə bu gün virusla mübarizə aparır. Bu ölkələrdə yoluxma və ölüm faizini müqayisə etsək, Azərbaycanda vəziyyət çox da ağır deyil. Bugünə qədər 14 000 yoluxma qeydə alınıb və bu 14 000 xəstənin 7500 sağalaraq evə buraxılıb. 6000 şəxsin müalicəsi davam etdirilir. Çox təəssüf ki, 169 nəfər vətəndaşımızı itirmişik. Ancaq hər gün yoluxma sayı artmaqda davam edir. Belə bir vəziyyətdə Prezident yenidən sərt karantin rejiminə keçməyi vacib bilib. Bir daha vətəndaşın həyatını qorumaq siyasətini önə çəkib. Dünən də bəlli oldu ki, yenidən vətəndaşa 190 manat vəsait ödəniləcək. Vətəndaşlara başa düşməlidirlər ki, yolxumalar bu teplə artarsa, xəstəxanalarda həkim və çarpayı çatışmamazlığı baş verəcək. Və artıq bununla bağlı sosial şəbəklərdə Bakı şəhərinin xəstəxanalrında yer çatışmamzlığı ilə bağlı məlumatlar yayılır. Həkimlərimizə kömək etməliyik.

Xəstə sayı çox olsa və həkimlərimiz fiziki baxımdan onların müalicəsinə kömək edə bilməyəcəklər. Elə etməliyik ki, ən azından sağalanlar yoluxanlardan çox olsun və belə vəziyyətdə həkimlərimiz yoluxmuş şəxslərin müalicəsini təşkil edə bilsin. Bütün bunlar üçün 3 əsas qaydaya hər birimiz əməl etməliyil. Maska taxmaq, məsəfa saxlamaq və gigiyenik qaydalara əməl etmək!"

Politoloqun sözlərinə görə, yeni istifadəyə verilən modul tipli xəstəxanalar 200 çarpayılıqdır, müasir texnologiyalar əsasında quraşdırılan xəstəxanalarıdır, ikisi Bakıda, ikisi Sumqayıt və Gəncə şəhərlərində, biri isə Abşeron rayonunda olmaqla 5 xəstəxana istifadəyə verilib:" İlham Əliyevin sərəncamı ilə qısa müddətdə 10 modul tipli xəstəxanların inşasına başlanıldı. Gördüyünüzü ki, tək paytaxt deyil, Azərbaycanın bölkələrində də xəstəxanların tikilməsi həyata keçirilir. Dövlət qurumlarının verdiyi məlumata görə, yaxın günlərdə digər modul tipli xəstəxanalar da istifadəyə veriləcək. Bu xəstəxanaların tikintisi ilə əlaqədar qərarın hələ xəstələrin sayının az olduğu aprel ayında qəbul edilməsi onun nə qədər düzgün olduğunu aydın şəkildə göstərir. Zamanında dövlət bu addımı atmaqla çox doğru qərarın verildiyini göstərdi. Son zamanlar ölkəmizdə 700-dən artıq xəstəxanalar tikilmiş və ya yenidən qurulmuşdur. “Yeni klinika”, Azərbaycan Tibb Universitetinin Tədris-Terapevtik və Cərrahiyyə korpusları və digər tibb müəssisələri koronavirusa yoluxmuş vətəndaşların müalicəsində mühüm rol oynayırlar. Həyata keçirilən qabaqlayıcı tədbirlər ölkəni böyük fəlakətdən qorudu. Bunu hər kəs başa düşməlidir ki, sərtləşdirilmiş tədbirlərin əsas məqsədi yoluxmanın sürətini azaltmaqdır. Başa dümək lazımdır ki, koronavirus yoxa çıxmayıb və yoxa çıxmayacaq. Biz bu xəstəliklə yaşamağa məcburuq və artıq kütləvi surətdə yeni davranış qaydaları tətbiq edilməlidir. Azərbaycan dövləti hər zaman Azərbaycan vətəndaşının yanında olub."

QHT sədri Niyaməddin Orduxanlının sözlərin görə, bəzi ölkələrin yumşaldıcı addımlar atmasının səbəbi iqtisadi sahədə olan problemlərdir:" Azərbaycanda da bu problemlər var və beş ayın nəticələri onu göstərir ki, bizim iqtisadiyyatımız da tənəzzülə uğrayıb. Dünya bazarlarında neftin qiymətinin enməsi Azərbaycanın gəlirlərini azaltmışdır. Biz neft ölkəsiyik. Virus daha çox neft ölkələrinə ziyan vurur. Digər tərəfdən, turizm sektorunun dayanması, bir neçə başqa perspektivli sektorun fəaliyyət qalması iqtisadiyyatın durumuna mənfi təsir göstərdi. Azərbaycanın şüurlu şəkildə, ilk ölkələr sırasınsda məhdudlaşdırıcı tədbirlər görməsinin əsas səbəbi insanların sağlamlığının əsas prioritet təşkil etməsi ilə bağlı olmuşdur. Bütün bunlarla yanaşı dövlət heç bir sosial layihə ixtisar etmədi, məcburi köçkünlər üçün yeni şəhərciklər salınır, yeni məktəblər tikilir, yeni yaşayış kompleksləri salınır. Biz həm cənab Prezident İlham Əliyevi, həm də hörmətli vitse-prezident Mehriban xanım Əliyevan məcburi köçkünlər üçün yeni inşa edilmiş binların açlışında iştirakını görürük. Hər il minlərlə insana yeni tikilmiş evlər təqdim edilir. "
Ceyhun Əşrəfovun özbaşınalıqlarına görə Prezidentə müraciət olunacaq - TƏFƏRRÜATBinəqədi rayonu Sulutəpə sakini Abdullazadə Abdulla AFİA.AZ-a müraciət edərək məmur özbaşınalıqları ilə üzləşdiyini bildirib:

- "2019 iyun-iyul aylarında Gənclər və İdman Nazirliyinin işçisi və Azərbaycan Sindo Ryu və Pençak silat federasiyasının kuratoru olan Oruc Məmmədli və Vəfa adlı xanımla "Gənclik”də yerləşən ofisdə görüşdük. "Alov” İdman Klubunun yaratmaq üçün onlara 210 manat verdim. Daha sonra 6 nəfər tələbəmin sənədlərini və hər biri üçün ayrılıqda pul ödədim. Bunun əvəzində onlar tələbələrimə idmançı kartı verməli, mənə isə möhür və əsasnaməni təqdim etməli idilər. Lakin Vəfa xanım və Oruc Məmmədli mənə yalnız əsasnamə verdilər, o da sonra məlum oldu ki, saxtadır. Möhürü isə ümumiyyətlə vermədilər. Maraqlıdır rəsmi sənədləri saxtalaşdıran bu şəxslər öz günahlarını dərk edərək onu düzəltməkdənsə, sonrakı dönəmdə də mənə qarşı təzyiq kampaniyasında iştirak etdilər”.

Şikayətçi daha sonra ona Məqami Bayramov adlı şəxsin zəng etdiyini bildirib:

- "Onunla "20 yanvar”da görüşdük. Çevik Polis Alayının işçisi ilə gəlmişdi”. Məqami Bayramov mənə dedi ki, Azərbaycan Sindo Ryu və Pençak silat federasiyasına baş məşqçi gəlir. "Kömək elə Abbas Hümbətovu (mənim müəllimimi) federasiyadan uzaqlaşdıraq. Bunun üçün məhkəmədə şahidlik eləməlisən. Təbii ki, bu iyrənc təklifə qətiyyətlə "yox” cavabı verdim və bunun ardınca ora Teymur Əhmədov gəldi. Onlar birlikdə mənə hədə-qorxu gəlməyə başladılar. Həmin vaxt fedrasiyanın prezidenti olan
Ceyhun Əşrəfovun onların arxasında olduğunu bildirərək, onun da "yuxarılara” bağlı olduğunu və kəsdiyi başa sorğu olmadığını dedilər. Buna görə də Nazirliyin nümayəndəsi də ona baş əyir, çünki Ceyhun Əşrəfovun əlaqələri genişdi və pulu çoxdur.”

"Bütün bunları ona görə deyirəm ki, bir qrup məmur planlı şəkildə məni öz məqsədləri üçün istifadə etməyə çalışıb və bunun üçün düşünülmüş oyunlar oynayıblar” – Abdulla Abdullazadə bizimlə söhbətində deyib.

Bundan sonrakı hadisələr isə daha dramatik xarakter alıb. Belə ki, məhkəmədə yalançı şahidlik etmədiyi üçün Abdulla Abdullazadə bir qrup şəxs tərəfindən hədələnib. A.Abdullazadə bu adamların Ceyhun Əşrəfovun "qoçu”ları olduğunu bildirir. Və nəhayət o, qarşılaşdığı problemlə bağlı aidiyyatı orqanlara müraciət edib. Maraqlı burasıdır ki, müvafiq quruma şikayətdən sonra hədə - qorxuların sayı da artıb.

Vətəndaş qeyd edir ki, qarşı tərəf onları polisə verdiyim üçün: -"cəzanı çəkəcəksən, yaşadığın evə qədər sökdürəcəyik. Ceyhun müəllimin əli hər yerə çatır...” deyə təhdid edib.
"Üstündən bir müddət keçdikdən sonra, mayın 27-də, ailə üzvlərimin evdə olmalarına baxmayaraq xəbərdarlıq edilmədən, eyni zamanda, məhkəmənin qərarı olmadan evimi sökməyə başladılar” – A.Abdullazadə həyacanla davam edir.

”Evdə ailələikcə oturmuşduq. Güclü səs gəldi, ev silkələndi. Əvvəlcə hasar uçdu. 2016-cı ildən otağın birində yaşayıram, qaz, işıq su pulu ödəyirəm, evim hasarın içində, ikinci otağı tikdirmişəm, üstünü hələ bağlaya bilməmişəm. Maddi vəziyyətim buna imkan verməyib. Amma yaşayış olduğu halda məhkəmə qərarı olmadan, xəbərdarlıq edilmədən günün günorta vaxtı adamın evini başınamı uçurdarlar! Prezidentin göstərişi bu deyil axı.

Kimə güvənirlər bunlar? Arxalarında kim durur? İndi korrupsiya və özbaşınalığa qarşı Cənab Prezidentin rəhbərliyi altında bu qədər mübarizə aparıldığı halda görünür, hələ də özünü toxunulmaz hesab edənlər var. Polis əməkdaşları anamı itələyərək yerə yıxdılar, məni isə evi sökənə qədər post patrul maşınında saxladılar. Söküntü bitdikdən sonra məni buraxdılar. Xəstə anam və balaca bacımın gözləri önündə evimizi sökdülər. Bu dəhşətli anlar idi. Hələ də bacımın qorxu dolu baxışlarını, göz yaşlarını, anamın keçirdiyi həyacanı, haqsızlıqdan göylərə ucalan sızıltısını, narahatçılıq hisslərini unuda bilmirəm.
Ceyhun Əşrəfov kimə güvənir görəsən?!

Baş verənlərdə Ceyhun Əşrəfovu suçlayan şikayətçi iddia edir ki, O, Oruc Məmmədli ilə birləşib günün gunorta çağı evimi sökdürdü.

"Federasiyanın prezidenti Ceyhun Əşrəfov müəllimimə şər - böhtan ataraq məhkəmədə yalançı şahidlik etməyimi istəmişdi.”

Qartal Budaqlı, Rövşən, Səbuhi sökünütdə iştirak edən icra işçiləri dedilər ki, əmr yuxarıdandı. Hətta Səbuhi adlı icra məmuru bildirdi ki, yenidən tiksəniz bu dəfə yaşadığınız otağı da sökəcəyik.

Mən, buradan dövlət başçımıza, birinci vitse-rezidentimiz Mehriban xanım Əliyevaya müraciət edərək ölkədə baş verən haqsızlıqlara görə məmurlara layiqli cəza istəyirəm. Bir idmançı olaraq, ölkənin bayrağını xaricdə dalğalandıran insan kimi-evimin bu cür sökülməsini qəbul edə bilmirəm. İnanıram ki, haqq öz yerini tapacaq. Biz dövlətimizə və onun başçısına güvənirik”.

Yazıda adları çəkilən şəxslərin mövqeyini də verməyə hazırıq.
Ceyhun Əşrəfovun özbaşınalıqlarına görə Prezidentə müraciət olunacaq - TƏFƏRRÜAT


Azərbaycanda daha 547 nəfər koronavirusa yoluxdu, 6 nəfər öldüBu gün Azərbaycanda 547 nəfər koronavirusa yoluxub, 291 nəfər sağalaraq evə buraxılıb.

Avrasiya.net-in məlumatına görə, bunu Nazirlər Kabineti yanında Operativ Qərargahın brifinqində "Tibbi Ərazi Bölmələrini İdarəetmə Birliyi"nin (TƏBİB) Xəstəliklərin profilaktikası və kontrolu şöbəsinin müdiri Yaqut Qarayeva deyib. Y.Qarayeva deyib ki, 6 nəfər COVİD -19-dan vəfat edib.