12 yan 10:21Sosial

“Nişan etməyə hazırlaşırdıq...” - Şəhid gizirinin anası

“Nişan etməyə hazırlaşırdıq...” - Şəhid gizirinin anasıAprel Şəhidlərimizdən biri də Şabranın Zeyvə kəndində doğulub boya-başa çatan gizir Babək Abdinovdu. Bu dəfə Şəhidin ailəsi ilə görüşmək üçün Şabrana yola düşdük. Səfərimizi Şəhid gizirimiz Elimdar Səfərovun qardaşı Elizbar Səfərov gerçəkləşdirdi. Bu səfərə daha iki vətənpərvər dostumuz Elman Əsədullayev və Xəyal Qasımov da qoşuldu. Elə dostumuz Xəyal Qasımovun “Niva” markalı avtomobili ilə yola düşdük.

“Çayın üzərində qurlumuş nimdaş körpü...”

Zeyvə kəndi Şabran rayonunun mərkəzindən 26 klometr aralıda yerləşir. Şabran rayonunun mərkəzinə çatırıq. Rayonun mərkəzindən Zeyvə kəndinə yola düşürük. Zeyvə kəndinə gedən asfalt yolun avtomobilimizi yırğalamasından məlum olur ki, kənd yolunun artıq təmirə ehtiyacı var. Zeyvə kəndini digər kəndlərlə “Şabran çay” ayırır. Biz də kəndə keçmək üçün bu çaydan keçməli olduq. Çayın üzərində qurlumuş nimdaş körpü çoxdan öz istifadə müddətini başa vurub. Ona görə də sakinlər körpünün qarşısına çay daşı düzərək xəbərdarlıq edirblər ki, körpüdən heç kim avtomobillə keçməsin. Ancaq piyada keçmək mümkündür beton panellərin üstündən. Buna görə də Xəyal avtomobili ilə çaydan keçirir bizi. Az qalır ki, avtomobil də suda batıb qalsın, amma Xəyal neçə illik təcrübəsinə arxalanıb avtobili sulara qurban vermir.

“Ey qardaş, Babək qəhrəmandı, bunu hamınız bilin...”

Zeyvə kəndinin girişində yerləşən kənd qəbristanlığına daxil olub Şəhidimiz Babək Abdinovun məzarını ziyarət edib, ruhuna dualar oxuyuruq. Elə dostların təklifi ilə Şəhidimizin məzarı başında xatirə şəkili də çəkdiririk. Qəbristanlıqdan çıxıb Şəhidimizin ata evinə getmək üçün hazırlaşırıq və bu yandan bir kənd sakini at belində yanımızdan keçir. Dostumuz Elman Əsədullayev atlıdan Şəhidimizin ata evini soruşur. At belində siqaretini tüsdülədən kənd sakini uzaqdan ot tayası qoyulmuş bir evi nişan verərək Şəhidimizin evinin ora olduğunu deyir. Yola düşərkən birdən Elman başını avtomobilin pəncərəsindən çıxarıb qışqırır: “Ey qardaş, Babək qəhrəmandı, buna hamınız bilin”. Kənd sakini atının yüyənini bizə tərəf çevirib dillənir: “Bilirik qardaş. Allah Babək kimi Şəhidlərimizi rəhmət eləsin”. Beləcə atlı öz yoluna, biz də Şəhidimizin ata evinə yola düşürük.

“Babək Şəhid olanda tabutu körpüdən keçirdə bilmirdik...”

Şəhid gizirimizin ata evinə çatırıq. Bizi Şəhidimizin qardaşı Elçin, atası Vəfadar müəllim və anası Simnarə xanım qarşılayır. Şəhid gizirimizin həyətlərinə daxil olarkən təəsüf hissi keçiririk. Həyətdə palçıqdan yeriməli deyil. Hələ Şəhid gizirimizin ata evi daha çox ürəyimizi dağlayır. Bu nimdaş, damı sınıq-salxaq evdə Babək kimi qəhrəman böyüyüb. Həyətdə Babəkin “Niva” markalı avtomobili dayanıb. Zeyvə kəndində fizika müəllimi işləyən Şəhidimizin atası Vəfadar müəllim bizi görcək sevinsə də, diqqətsizlikdən gileylənir: “Babək əsl qəhrəman idi, amma bunu layiqincə qiymətləndirmədilər. Siz kəndə gələndə “Şabran çayı” üzərindəki sınıq körpüdən keçdiniz yəqin. İndi onu hələ düzəltmişik. Babək Şəhid olanda tabutu körpüdən keçirdə bilmirdik. Rayon icra hakimiyyətinin işçiləri də var idi dəfndə, amma heç biri bu körpünü düzəltmədilər. İndi evimə Babəkə görə gələn adamları görəndə bir tərəfdən sevinirəm ki, oğlum unudulmayıb, onu yad edirlər. Bir tərəfdən də bu çaydan keçən insanlara görə utanıram. İnsafları olsun heç olmasa gəlib bu körpünü düzəltsinlər.

“Məktəbdə Babək də sevimli şagirdlərimdən biri olub...”

Mən bu adamlardan nə pul, nə də ev istəyirəm. Keçən dəfə Şabran rayon icra hakimiyyətinə gedib dedim ki, heç olmasa Babəkin adına ya küçə adı, ya da məktəb adı verilsin. Bunu da etmədilər. Mən də incidim qayıtdım. Mənim oğlum təkcə mənə görə döyüşməyib axı, o, hamımıza görə Şəhid olub. Babək 1992-ci il may ayının 5-də doğulub. Ailədə iki qardaş və iki bacıdırlar. Babək evin son beşiyi idi. Zeyvə kənd orta məktəbini bitirdi. Məktəbdə Babək də sevimli şagirdlərimdən biri olub. Sonra hərbi xidmətə yollandı. Ordan da Xüsusi Təyinatlı dəstəyə qəbul olundu. Babək Milli Qəhrəmanımız Polkovnik-leytenant Murad Mirzəyevin əsgəri olub. Onsuz bizim üçün çox çətindi”. (Ağlayır)

“Nişan etməyə hazırlaşırdıq...”

Şəhid əsgərimizin ata evinin bir otağı ondan qalan əşyalardı: hərbi geyimi, qol saatı, darağı, şəkilləri və sair. Elə biz də Şəhidimizin otağına daxil olub onun əşyalarına baxırıq. Şəhidimizin anası Simnarə xanım göz yaşlarına hakim ola bilmir: “Babək məni çox pis yerdə qoyub getdi. Hər gün bu otağa girib onun əşyaları ilə danışıram, paltarlarını qoxlayıram. Elə bilirəm harasa gedib, indi gələcək. Bayaq siz gələndə elə bildim ki, Babəkdi gələn, maşınlarınızın rəngi eynidi. Martın 21-də evə gəldi. Bizimlə bayramlaşıb getdi. Mən ona qız ad eləmişdim. Nişan etməyə hazırlaşırdıq. Amma qismət olmadı. Aprel döyüşlərində hamı kimi biz də Babəkdən nigaran qaldıq. Telefonuna da zəng çatmırdı. Aprelin 9-da bələdiyyədən həyətimizə gəlib Babəkin Şəhid olduğunu dedilər. O günləri yaşamaq çox çətin idi. İndiyə kimi özümə gələ bilmirəm. Allah bütün Şəhid analarına səbr versin”.

Şəhid gizirimizin ailəsi ilə sağollaşıb Bakıya qayıdırıq. Hava artıq qaranlıqlaşıb. Gecəyə düşsək də, buna görə narahat olmuruq. Dostlar məsləhət görür ki, Bakıya qayıdarkən yolüstü digər Şəhid gizirimiz Ravil Novruzovun da ailəsinə baş çəkmək üçün Xızının Giləzi qəsəbəsinə dönək. Elə də olur. Giləziyə gedib Şəhid gizirimiz Ravil Novruzovun da ailəsi ilə görüşürük. Yarım saat sonra Bakıya qayıdırıq. Biz hər dəfə rayon səfərimizdə bir Şəhid qapısı döyüb onlar haqda yazmağa davam edəcəyik. Allah bütün Şəhidlərimizə rəhmət eləsin.
“Nişan etməyə hazırlaşırdıq...” - Şəhid gizirinin anası
Vasif Əlihüseyn
loading...
Reklam
Hüquqi Məsləhət - Xidmət Mərkəzi
Tel - 5968740, 055 640 94 59, 050 331 75 86.
Ünvan - Rəsul Rza, 96 ("Nizami" metrostansiyasının yaxınlığı)
XƏBƏR LENTİ
24-06-2017, 13:11
24-06-2017, 10:37
23-06-2017, 16:32
23-06-2017, 16:21