15 iyn 18:32siyaset

Səfir bəzi deputatların qeyri-adi çıxışlarına reaksiya verdi

Səfir bəzi deputatların qeyri-adi çıxışlarına reaksiya verdiİranın Azərbaycandakı səfiri Möhsün Pakayin Azərbaycan Milli Məclisində İran haqqında səslənən fikirlərə münasibət bildirib.

Avrasiya.net-in səfirliyin saytına istinadla verdiyi məlumata görə, səfir səslənən fikirlərin dost və qardaş olan iki ölkə arasında əlaqələrin inkişafına yardım etmədiyini bildirib.

İran İslam Respublikasının Azərbaycan Respublikasındakı fövqəladə və səlahiyyətli səfiri Möhsün Pakayin mətbuat açıqlamasında Azərbaycan Milli Məclisinin bəzi deputatları tərəfindən çərşənbə axşamı günündə səslənmiş qeyri-adi çıxışlardan təəssüflənərək demişdir: “Bu qəbil açıqlamalar dost və qardaş olan iki ölkə arasında əlaqələrin inkişafına heç bir yardım etmir”.

O, Tehran və Bakı arasında mövcud olan bu günkü müsbət əlaqələrin heç bir zaman mövcud olmadığına diqqət çəkərək bildirdi: “Ermənistan Xarici İşlər Nazirinin Tehrana səfəri İran İslam Respublikasının qonşu dövlətlərlə siyasi əlaqələrin tənzimlənməsi çərçivəsində həyata keçmişdir və bu səfər heç bir ölkənin əleyhinə olmamışdır”.

Möhsün Pakayin bəzi media qurumların doktor Həsən Ruhaninin yaxın zamanlarda İrəvana səfəri ilə bağlı yaydığı xəbərlərin əslində güman əsasında olduğunu vurğulayaraq söylədi: “İran İslam Respublikasının Prezidentinin səfər proqramı və həmin səfərlərin dəqiq tarixi milli mənafe çərçivəsində həyata keçir. Təbii ki, hər səfərdən öncə bununla bağlı İİR Prezident Administrasiyası tərəfindən lazım olan məlumatlar verilir”.

Səfir iki ölkə arasında münasibətlərin genişlənmə şərtinin ölkə rəhbərlərinin siyasi iradəsindən asılı olduğunu diqqət mərkəzinə çəkərək söylədi: “Son 3 il ərzində İran və Azərbaycan prezidentlərinin 6 dəfə görüşməsi iki ölkə rəhbərlərinin ölkələr arasında münasibətlərin inkişafı üçün siyasi iradəyə malik olduğunu göstərir. İki ölkə prezidentinin bu müddət ərzində bir-biri ilə bu qədər görüşməsi və iki ölkə arasında imzalanmış sənədlər İranın qonşu dövlətləri arasında bənzərsizdir”.

Möhsün Pakayin Tehran və Bakı arasında mövcud olan münasibətlərin bu tərzdə müsbətə doğru inkişafının səbəbini Həsən Ruhani dövlətinin qonşu dövlətlərlə münasibətin inkişafı və xarici siyasətdə ədalət prinsipinə xüsusi təkid göstərməsi nəticəsində baş verdiyini vurğulayaraq dedi: “Bu siyasətin icrasında iki tərəf iqtisad, ticarət, tranzit, əkinçilik, sənaye, turizm və enerji sahələrində yaxşı uğurlar əldə etmişlər. İki ölkənin Şimal-Cənub dəhlizinin təkmilləşdirilməsi ilə bağlı əldə etdikləri razılıq bu uğurun simvolu sayılır. İki ölkə arasında qarşılıqlı olaraq viza rejiminin aradan qaldırılması da turizm sahəsinin genişlənməsi və iqtisadi mübadilələrin həcminin artması üçün qarşılıqlı mənafeə xidmət göstərəcək və hər iki ölkə bu əməkdaşlıqların faydalarından bəhrələnə biləcəklər”.

Səfir iki tərəfli və çoxtərəfli münasibətlərin genişlənməsinin zəruri olduğunu söyləyərək dedi: “Gələcəkdə də İranın yüksək səviyyəli dövlət məmurlarının Bakıya səfəri və xüsusilə də Bakıda keçiriləcək iclasda İran, Rusiya və Azərbaycan Prezidentlərinin görüşünün şahidi olacağıq”.

İran İslam Respublikasının Azərbaycan Respublikasındakı səfiri əlavə etdi: “Gələcəkdə bizim Azərbaycan Respublikası ilə əlaqələrimiz bir qonşu, dost və tərəfdaş ölkə olaraq əvvəlki illərdən daha yüksək səviyyədə genişlənəcəkdir. İki ölkənin rəhbərləri özlərini ölkələrimiz arasında mövcud olan münasibətləri bədxahlardan qorumağa borclu bilirlər”.

Qeyd etmək lazımdır ki, çərşənbə axşamı günündə Azərbaycan Milli Məclisinin üç deputatı qeyri-adi çıxışları ilə Ermənistan Xarici İşlər Nazirinin Tehrana səfərini tənqid etmişlər. Buna rəğmən, Azərbaycan Milli Məclisi spiker Oktay Əsədovun himayəsi ilə Azərbaycan Respublikası ilə İran İslam Respublikası arasında imzalanmış bir neçə müqaviləni təsdiq etmişdir.
Reklam
Hüquqi Məsləhət - Xidmət Mərkəzi
Tel - 5968740, 055 640 94 59, 050 331 75 86.
Ünvan - Rəsul Rza, 96 ("Nizami" metrostansiyasının yaxınlığı)
XƏBƏR LENTİ